໒. ອຠິຘມ຺ມຠາຊນີຍວຓ຺ຓນາ

໔໙໐. ອຠິຘມ຺ເມ ໂລກຸຕ຺ຕຣຈິຕ຺ຕຠາຊນີເຍປິ ‘‘ຕສ຺ມິໍ ໂຂ ປນ ສມເຍ ຈຕ຺ຕາໂຣ ຂນ຺ຘາ ໂຫນ຺ຕິ…ເປ… ອຏ຺ຐງ຺ຄິໂກ ມຄ຺ໂຄ ໂຫຕີ’’ຕິ (ຘ. ສ. ໓໓໗) ວຸຕ຺ຕຕ຺ຕາ ອິຘາປິ ອຠິຘມ຺ມຠາຊນີເຍ ອຠິຘມ຺ມານຸຣູປໍ ເທສນໍ ກໂຣນ຺ໂຕ ‘‘ອຏ຺ຐງ຺ຄິໂກ ມຄ຺ໂຄ’’ຕິ ອຣິໂຍປປທຕໍ ນ ກໂຣຕິ.

໔໙໓. ຕສ຺ມິໍ ສມເຍຕິ ໂລກິຍກາເລນ ເອເຕສໍ ອຕິເຣກກິຈ຺ຈໍ ທສ຺ເສຕິ. ວິຣຕິອຸປ຺ປາທເນນ ມິຈ຺ຉາວາຈາທີນິ ປຸຄ຺ຄລໍ ປຊຫາເປນ຺ຕີຕິ ສມ຺ມາທິຏ຺ຐາທີນິ ປຎ຺ຈ ‘‘ກາຣາປກງ຺ຄານີ’’ຕິ ວຸຕ຺ຕານິ. ສມ຺ມາວາຈາທິກິຣິຍາ ຫິ ວິຣຕິ, ຕຎ຺ຈ ເອຕານິ ກາຣາເປນ຺ຕີຕິ. ວິຣຕິວເສນາຕິ ວິຣມຓກິຣິຍາວເສນ, ນ ກາຣາປກຠາເວນ ກຕ຺ຕຸຠາເວນ ຈາຕິ ອຕ຺ໂຖ. ອິມໍ…ເປ… ກິຈ຺ຈາຕິເຣກຕໍ ທສ຺ເສຕຸນ຺ຕິ ໂລກຸຕ຺ຕຣກ຺ຂເຓປິ ອິມາເນວ ປຎ຺ຈ ສມ຺ມາວາຈາທິຕ຺ຕຍສ຺ສ ເອກກ຺ຂເຓ ກາຣາປການີຕິ ທສ຺ເສຕຸນ຺ຕິ ອຕ຺ໂຖ. ມິຈ຺ຉາທິຏ຺ຐາທິກາ ທສ, ຕປ຺ປຈ຺ຈຍາ ອກຸສລາ ຈ ທສາຕິ ວີສຕິ ອກຸສລປກ຺ຂິຍາ, ສມ຺ມາທິຏ຺ຐາທິກາ ທສ, ຕປ຺ປຈ຺ຈຍາ ຈ ກຸສລາ ທສາຕິ ວີສຕິ ກຸສລປກ຺ຂິຍາ ຈ ມຫາຈຕ຺ຕາຣີສກສຸຕ຺ເຕ (ມ. ນິ. ໓.໑໓໖) ວຸຕ຺ຕາຕິ ຕສ຺ສ ເອຕໍ ນາມໍ.

ປຸຎ຺ຎຠາຄິຍາຕິ ປຸຎ຺ຎໂກຏ຺ຐາເສ ຠວາ, ປຸຎ຺ຎາຠິສງ຺ຂາເຣກເທສຠູຕາຕິ ອຕ຺ໂຖ. ຂນ຺ໂຘປຘິໍ ວິປຈ຺ຈຕິ, ຕຕ຺ຖ ວາ ວິປຈ຺ຈຕີຕິ ອຸປຘິເວປກ຺ກາ.

ປຎ຺ຈງ຺ຄິກມຄ຺ຄໍ ອຸທ຺ທິສິຕ຺ວາ ຕຕ຺ຖ ເອເກກໍ ປຸຈ຺ຉິຕ຺ວາ ຕສ຺ສ ຕສ຺ເສວ ສມຍວວຕ຺ຖານໍ ກຕ຺ວາ ວິສ຺ສຊ຺ຊນໍ ‘‘ປາຏິເຍກ຺ກໍ ປຸຈ຺ຉິຕ຺ວາ ປາຏິເຍກ຺ກໍ ວິສ຺ສຊ຺ຊນ’’ນ຺ຕິ ວຸຕ຺ຕໍ. ສຫ ປນ ປຸຈ຺ຉິຕ຺ວາ ປຎ຺ຈນ຺ນມ຺ປິ ສມຍວວຕ຺ຖານໍ ກຕ຺ວາ ວິສ຺ສຊ຺ຊເນ ‘‘ຕຕ຺ຖ ກຕມາ ສມ຺ມາທິຏ຺ຐິຍາ ປຎ຺ຎາ’’ຕິອາທິໂກ ປຏິນິທ຺ເທໂສ ເອກໂຕ ວິສ຺ສຊ຺ຊນປຏິນິທ຺ເທສຕ຺ຕາ ນ ປາຏິເຍກ຺ກໍ ປຸຈ຺ຉາວິສ຺ສຊ຺ຊນໍ ນາມ ໂຫຕີຕິ. ຕຕ຺ຖ ປຎ຺ຈງ຺ຄິກວາເຣ ເອວ ປາຏິເຍກ຺ກໍ ປຸຈ຺ຉາວິສ຺ສຊ຺ຊນໍ ສມ຺ມາທິຏ຺ຐາທີສຸ ກາຣາປກງ຺ເຄສຸ ເອເກກມຸຂາຍ ຠາວນາຍ ມຄ຺ຄຸປ຺ປຕ຺ຕິໍ ສນ຺ຘາຍ ກຕນ຺ຕິ ເວທິຕພ຺ພໍ. ວາຈາທີນິ ຫິ ປຸພ຺ພສຸທ຺ຘິຍາ ສິຊ຺ຌນ຺ຕິ, ນ ມຄ຺ຄສ຺ສ ອຸປຈາເຣນາຕິ.

ອຠິຘມ຺ມຠາຊນີຍວຓ຺ຓນາ ນິຏ຺ຐິຕາ.

ມຄ຺ຄງ຺ຄວິຠງ຺ຄວຓ຺ຓນາ ນິຏ຺ຐິຕາ.