໑. ເຫຕຸປຈ຺ຈຍນິທ຺ເທສວຓ຺ຓນາ

໑. ໂຍ ເຫຕຸປຈ຺ຈໂຍຕິ ອຸທ຺ທິຏ຺ໂຐ, ໂສ ເອວໍ ເວທິຕພ຺ໂພຕິ ເອເຕນ ເຫຕຸສງ຺ຂາຕສ຺ສ ປຈ຺ຈຍຘມ຺ມສ຺ສ ເຫຕຸສມ຺ປຍຸຕ຺ຕກຕໍສມຸຏ຺ຐານຣູປສງ຺ຂາຕານໍ ປຈ຺ຈຍຸປ຺ປນ຺ນານໍ ເຫຕຸປຈ຺ຈເຍນ ປຈ຺ຈຍຠາໂວ ເຫຕຸປຈ຺ຈໂຍຕິ ອຸທ຺ທິຏ຺ໂຐຕິ. ໂຍ ປນ ເຫຕຸຠາເວນ ຍຖາວຸຕ຺ໂຕ ປຈ຺ຈຍຘມ຺ໂມ ຍຖາວຸຕ຺ຕານໍ ປຈ຺ຈຍຸປ຺ປນ຺ນານໍ ປຈ຺ຈໂຍ ໂຫຕິ, ໂສ ເຫຕຸປຈ຺ຈໂຍຕິ ອຸທ຺ທິຏ຺ໂຐຕິ ເວທິຕພ຺ໂພຕິ ທສ຺ເສຕິ. ອຸຠຍຖາປິ ເຫຕຸຠາເວນ ອຸປກາຣກຕາ ເຫຕຸປຈ຺ຈໂຍຕິ ອຸທ຺ທິຏ຺ໂຐຕິ ທສ຺ສິຕໍ ໂຫຕິ. ເອສ ນໂຍ ເສສປຈ຺ຈເຍສຸປິ. ອຸປກາຣກຕາ ປນ ຘມ຺ມສຠາໂວ ເອວ, ນ ຘມ຺ມໂຕ ອຎ຺ຎາ ອຕ຺ຖີຕິ. ຕຖາ ຕຖາ ອຸປກາຣກໍ ຕໍ ຕໍ ຘມ຺ມໍ ທສ຺ເສນ຺ໂຕ ຫິ ຠຄວາ ຕໍ ຕໍ ອຸປກາຣກຕໍ ທສ຺ເສຕີຕິ.

ເຫຕູ ເຫຕຸສມ຺ປຍຸຕ຺ຕການນ຺ຕິ ເອຕ຺ຖ ປຐໂມ ເຫຕຸ-ສທ຺ໂທ ປຈ຺ຈຕ຺ຕນິທ຺ທິຏ຺ໂຐ ປຈ຺ຈຍນິທ຺ເທໂສ. ເຕນ ເອຕສ຺ສ ເຫຕຸຠາເວນ ອຸປກາຣກຕາ ເຫຕຸປຈ຺ຈຍຕາຕິ ທສ຺ເສຕິ. ທຸຕິໂຍ ປຈ຺ຈຍຸປ຺ປນ຺ນວິເສສນໍ. ເຕນ ນ ເຍສໍ ເກສຎ຺ຈິ ສມ຺ປຍຸຕ຺ຕການໍ ເຫຕຸປຈ຺ຈຍຠາເວນ ປຈ຺ຈໂຍ ໂຫຕິ, ອຖ ໂຂ ເຫຕຸນາ ສມ຺ປຍຸຕ຺ຕານເມວາຕິ ທສ຺ເສຕິ. ນນຸ ຈ ສມ຺ປຍຸຕ຺ຕສທ຺ທສ຺ສ ສາເປກ຺ຂຕ຺ຕາ ທຸຕິເຍ ເຫຕຸສທ຺ເທ ອວິຊ຺ຊມາເນປິ ອຎ຺ຎສ຺ສ ອເປກ຺ຂິຕພ຺ພສ຺ສ ອນິທ຺ທິຏ຺ຐຕ຺ຕາ ອຕ຺ຕນາວ ສມ຺ປຍຸຕ຺ຕການໍ ເຫຕຸປຈ຺ຈເຍນ ປຈ຺ຈໂຍຕິ ອຍມຕ຺ໂຖ ວິຎ຺ຎາຍຕີຕິ? ນາຍໍ ເອກນ຺ໂຕ. ເຫຕຸສທ຺ໂທ ຫິ ປຈ຺ຈຕ຺ຕນິທ຺ທິຏ຺ໂຐ ‘‘ເຫຕຸປຈ຺ຈເຍນ ປຈ຺ຈໂຍ’’ຕິ ເອຕ຺ເຖວ ພ຺ຍາວໂຏ ຍທາ ຄຍ຺ຫຕິ, ຕທາ ສມ຺ປຍຸຕ຺ຕວິເສສນໍ ນ ໂຫຕີຕິ ສມ຺ປຍຸຕ຺ຕາ ອວິສິຏ຺ຐາ ເຍ ເກຈິ ຄຫິຕາ ຠເວຍ຺ຍຸນ຺ຕິ ເອວໍ ສມ຺ປຍຸຕ຺ຕສທ຺ເທນ ອຕ຺ຕນິ ເອວ ພ຺ຍາວເຏນ ເຫຕຸສທ຺ເທນ ວິເສສເນນ ວິນາ ເຍສໍ ເກສຎ຺ຈິ ສມ຺ປຍຸຕ຺ຕານໍ ຄຫຓໍ ໂຫຕີຕິ ຕໍ ສນ຺ຘາຍ ‘‘ອຖາປິ…ເປ… ອຕ຺ໂຖ ຠເວຍ຺ຍາ’’ຕິ ອາຫ. ນນຸ ຍຖາ ‘‘ອຣູປິໂນ ອາຫາຣາ ສມ຺ປຍຸຕ຺ຕການໍ ຘມ຺ມານ’’ນ຺ຕິ (ປຏ຺ຐາ. ໑.໑.໑໕), ‘‘ອຣູປິໂນ ອິນ຺ທ຺ຣິຍາ ສມ຺ປຍຸຕ຺ຕການ’’ນ຺ຕິ (ປຏ຺ຐາ. ໑.໑.໑໖) ຈ ວຸຕ຺ເຕ ທຸຕິເຍນ ອາຫາຣຄ຺ຄຫເຓນ ອິນ຺ທ຺ຣິຍຄ຺ຄຫເຓນ ຈ ວິນາປິ ອາຫາຣິນ຺ທ຺ຣິຍສມ຺ປຍຸຕ຺ຕກາວ ຄຍ຺ຫນ຺ຕິ, ເອວມິຘາປິ ສິຍາຕິ? ນ, ອາຫາຣິນ຺ທ຺ຣິຍາສມ຺ປຍຸຕ຺ຕສ຺ສ ອຠາວໂຕ. ວຊ຺ເຊຕພ຺ພາຠາວໂຕ ຫິ ຕຕ຺ຖ ທຸຕິຍອາຫາຣິນ຺ທ຺ຣິຍຄ຺ຄຫເຓ ອສຕິປິ ຕໍສມ຺ປຍຸຕ຺ຕກາວ ຄຍ຺ຫນ຺ຕີຕິ ຕໍ ນ ກຕໍ, ອິຘ ປນ ວຊ຺ເຊຕພ຺ພໍ ອຕ຺ຖີຕິ ວຕ຺ຕພ຺ພໍ ທຸຕິຍໍ ເຫຕຸຄ຺ຄຫຓນ຺ຕິ.

ເອວມ຺ປິ ເຫຕູ ເຫຕຸສມ຺ປຍຸຕ຺ຕການນ຺ຕິ ເອຕ຺ຖ ເຫຕຸສມ຺ປຍຸຕ຺ຕການໍ ໂສ ເອວ ສມ຺ປຍຸຕ຺ຕກເຫຕູຕິ ວິເສສນສ຺ສ ອກຕຕ຺ຕາ ໂຍ ໂກຈິ ເຫຕຸ ຍສ຺ສ ກສ຺ສຈິ ເຫຕຸສມ຺ປຍຸຕ຺ຕກສ຺ສ ເຫຕຸປຈ຺ຈເຍນ ປຈ຺ຈໂຍຕິ ອາປຊ຺ຊຕີຕິ? ນາປຊ຺ຊຕິ, ປຈ຺ຈຕ຺ຕນິທ຺ທິຏ຺ຐສ຺ເສວ ເຫຕຸສ຺ສ ປຸນ ສມ຺ປຍຸຕ຺ຕວິເສສນຠາເວນ ວຸຕ຺ຕຕ຺ຕາ, ເອຕທຕ຺ຖເມວ ຈ ວິນາປິ ທຸຕິເຍນ ເຫຕຸສທ຺ເທນ ເຫຕຸສມ຺ປຍຸຕ຺ຕຠາເວ ສິທ຺ເຘປິ ຕສ຺ສ ຄຫຓໍ ກຕໍ. ອຖ ວາ ອສຕິ ທຸຕິເຍ ເຫຕຸສທ຺ເທ ເຫຕຸສມ຺ປຍຸຕ຺ຕການໍ ເຫຕຸປຈ຺ຈເຍນ ປຈ຺ຈໂຍ, ນ ປນ ເຫຕູນນ຺ຕິ ເອວມ຺ປິ ຄຫຓໍ ສິຍາຕິ ຕນ຺ນິວາຣຓຕ຺ຖໍ ໂສ ວຸຕ຺ໂຕ, ເຕນ ເຫຕຸສມ຺ປຍຸຕ຺ຕຠາວໍ ເຍ ລຠນ຺ຕິ, ເຕສໍ ສພ຺ເພສໍ ເຫຕູນໍ ອຎ຺ເຎສມ຺ປິ ເຫຕຸປຈ຺ຈເຍນ ປຈ຺ຈໂຍຕິ ທສ຺ສິຕໍ ໂຫຕິ. ຍສ຺ມາ ປນ ເຫຕຸຌານມຄ຺ຄາ ປຕິຏ຺ຐາມຕ຺ຕາທິຠາເວນ ນິຣເປກ຺ຂາ, ນ ອາຫາຣິນ຺ທ຺ຣິຍາ ວິຍ ສາເປກ຺ຂາ ເອວ, ຕສ຺ມາ ເອເຕສ຺ເວວ ທຸຕິຍໍ ເຫຕາທິຄ຺ຄຫຓໍ ກຕໍ. ອາຫາຣິນ຺ທ຺ຣິຍາ ປນ ອາຫຣິຕພ຺ພອິສິຕພ຺ພາເປກ຺ຂາ ເອວ, ຕສ຺ມາ ເຕ ວິນາປິ ທຸຕິເຍນ ອາຫາຣິນ຺ທ຺ຣິຍຄ຺ຄຫເຓນ ອຕ຺ຕນາ ເອວ ອາຫຣິຕພ຺ເພ ຈ ອິສິຕພ຺ເພ ຈ ອາຫາຣິນ຺ທ຺ຣິຍຠູເຕ ອຎ຺ເຎ ຈ ສມ຺ປຍຸຕ຺ຕເກ ປຣິຈ຺ຉິນ຺ທນ຺ຕີຕິ ຕໍ ຕຕ຺ຖ ນ ກຕໍ, ອິຘ ຈ ທຸຕິເຍນ ເຫຕຸຄ຺ຄຫເຓນ ປຈ຺ຈຍຸປ຺ປນ຺ນານໍ ເຫຕຸນາ ປຈ຺ຈຍຠູເຕເນວ ສມ຺ປຍຸຕ຺ຕານໍ ເຫຕູນໍ ອຎ຺ເຎສຎ຺ຈ ປຣິຈ຺ຉິນ຺ນຕ຺ຕາ ປຸນ ວິເສສນກິຈ຺ຈໍ ນຕ຺ຖີຕິ ປຎ຺ຫາວາເຣ ‘‘ກຸສລາ ເຫຕູ ສມ຺ປຍຸຕ຺ຕການໍ ຂນ຺ຘານ’’ນ຺ຕິອາທີສຸ (ປຏ຺ຐາ. ໑.໑.໔໐໑) ທຸຕິຍໍ ເຫຕຸຄ຺ຄຫຓໍ ນ ກຕນ຺ຕິ ທຏ຺ຐພ຺ພໍ.

ນິທ຺ທິສິຕພ຺ພສ຺ສ ອປາກຏຕ຺ຕາຕິ ຕໍ-ສທ຺ໂທ ປຸຣິມວຈນາເປກ຺ໂຂ ວຸຕ຺ຕສ຺ເສວ ນິທ຺ເທໂສ ‘‘ຣູປາຍຕນໍ ຈກ຺ຂຸວິຎ຺ຎາຓຘາຕຸຍາ ຕໍສມ຺ປຍຸຕ຺ຕການ’’ນ຺ຕິອາທີສຸ (ປຏ຺ຐາ. ໑.໑.໒) ປຸຣິມວຈເນນ ນິທ຺ທິສິຕພ຺ເພ ປາກຏີຠູເຕ ເອວ ປວຕ຺ຕຕິ. ເອຕ຺ຖ ຈ ປຈ຺ຈຕ຺ຕນິທ຺ທິຏ຺ໂຐ ເຫຕຸສທ຺ໂທ ‘‘ເຫຕຸປຈ຺ຈເຍນ ປຈ຺ຈໂຍ’’ຕິ ເອຕ຺ຖ ພ຺ຍາວໂຏ ສມ຺ປຍຸຕ຺ຕສທ຺ເທນ ວິຍ ຕໍ-ສທ຺ເທນປິ ອນເປກ຺ຂນີໂຍ ອຎ຺ໂຎ ຈ ໂກຈິ ນິທ຺ທິສິຕພ຺ພປ຺ປກາສໂກ ວຸຕ຺ໂຕ ນຕ຺ຖິ, ຕສ຺ມາ ‘‘ຕໍສມ຺ປຍຸຕ຺ຕການ’’ນ຺ຕິ ຈ ນ ວຸຕ຺ຕນ຺ຕິ ອຘິປ຺ປາໂຍ.

‘‘ເຫຕຸສມ຺ປຍຸຕ຺ຕການ’’ນ຺ຕິ ອິມິນາ ປນ ປຈ຺ຈຍຸປ຺ປນ຺ນວຈເນນ ອສມຕ຺ເຕນ ປຈ຺ຈຍຸປ຺ປນ຺ນວຈນນ຺ຕຣາເປກ຺ເຂນ ປຸພ຺ເພ ວຸຕ຺ເຕນ ຕໍ-ສທ຺ເທນ ນິທ຺ທິສິຕພ຺ພໍ ປາກຏີກຕໍ, ເຕນ ‘‘ຕໍສມຸຏ຺ຐານານ’’ນ຺ຕິ ເອຕ຺ຖ ຕໍຄຫຓໍ ກຕນ຺ຕິ. ກິໍ ປນ ຕສ຺ມິໍ ເຫຕຸສມ຺ປຍຸຕ຺ຕກສທ຺ເທ ຕໍ-ສທ຺ເທນ ນິທ຺ທິສິຕພ຺ພໍ ປາກຏີຠູຕນ຺ຕິ? ເຍຫິ ເຫຕູຫິ ສມ຺ປຍຸຕ຺ຕາ ‘‘ເຫຕຸສມ຺ປຍຸຕ຺ຕກາ’’ຕິ ວຸຕ຺ຕາ, ເຕ ເຫຕູ ເຈວ ສມ຺ປຍຸຕ຺ຕກວິເສສນຠູຕາ ຕພ຺ພິເສສິຕາ ຈ ເຫຕຸສມ຺ປຍຸຕ຺ຕກາ. ເຕນາຫ ‘‘ເຕ ເຫຕູ ເຈວາ’’ຕິອາທິ. ອຎ຺ຎຖາ ‘‘ເຕ ເຫຕູ ເຈວາ’’ຕິ ເອຕສ຺ສ ປຈ຺ຈຕ຺ຕນິທ຺ທິຏ຺ເຐນ ເຫຕຸສທ຺ເທນ ສມ຺ພນ຺ເຘ ສຕິ ຍຖາ ອິຘ ເຕເນວ ຕໍ-ສທ຺ເທນ ນິທ຺ທິສິຕພ຺ພາ ປາກຏາ, ເອວໍ ປຸພ຺ເພປິ ຠວິຕຸໍ ອຣຫນ຺ຕີຕິ ‘‘ນິທ຺ທິສິຕພ຺ພສ຺ສ ອປາກຏຕ຺ຕາ ‘ຕໍສມ຺ປຍຸຕ຺ຕການ’ນ຺ຕິ ນ ວຸຕ຺ຕ’’ນ຺ຕິ ອິທໍ ນ ຍຸຊ຺ເຊຍ຺ຍາຕິ. ທຸວິຘມ຺ປິ ວາ ເຫຕຸຄ຺ຄຫຓໍ ອປເນຕ຺ວາ ຕໍສທ຺ທວຈນີຍຕໍ ໂຈເທຕິ ປຣິຫຣຕິ ຈ. ຕໍສມຸຏ຺ຐານານນ຺ຕິ ຈ ເຫຕຸສມຸຏ຺ຐານານນ຺ຕິ ຍຸຕ຺ຕໍ. ເຫຕູ ຫິ ປຈ຺ຈຍາຕິ.

ຈິຕ຺ຕຊຣູປໍ ອຊນຍມານາປີຕິ ປິ-ສທ຺ເທນ ຊນຍມານາປິ. ຍທິ ‘‘ຈິຕ຺ຕສມຸຏ຺ຐານານ’’ນ຺ຕິ ວຈເນນ ປຏິສນ຺ຘິກ຺ຂເຓ ກຏຕ຺ຕາຣູປສ຺ສ ອຄ຺ຄຫຓໂຕ ຕໍ ນ ວຸຕ຺ຕໍ, ສຫຊາຕປຈ຺ຈຍວິຠງ຺ເຄ ຈິຕ຺ຕເຈຕສິການໍ ຕສ຺ສ ກຏຕ຺ຕາຣູປສ຺ສ ປຈ຺ຈຍຠາໂວ ນ ວຸຕ຺ໂຕ ຠເວຍ຺ຍ. ຍທິ ຈ ຕຕ຺ຖ ຈິຕ຺ຕສມຸຏ຺ຐານານໍ ປຈ຺ຈຍຠາເວນ ຕໍສມານລກ຺ຂຓານໍ ກຏຕ຺ຕາຣູປານມ຺ປິ ປຈ຺ຈຍຠາໂວ ນິທສ຺ສິໂຕ, ເອວມິຘາປິ ຠວິຕພ຺ພໍ. ‘‘ຈິຕ຺ຕສມຸຏ຺ຐານານ’’ນ຺ຕິ ປນ ອວຕ຺ວາ ‘‘ຕໍສມຸຏ຺ຐານານ’’ນ຺ຕິ ວຈນໍ ຈິຕ຺ຕສມຸຏ຺ຐານານໍ ສພ຺ພຈິຕ຺ຕເຈຕສິກສມຸຏ຺ຐານຕາທສ຺ສນຕ຺ຖໍ. ເອວໍປກາເຣນ ຫິ ຕໍສມຸຏ຺ຐານວຈເນນ ຕຕ຺ຖ ຕຕ຺ຖ ວຸຕ຺ຕໍ ສມຸຏ຺ຐານວຈນໍ ວິເສສິຕໍ ໂຫຕິ. ນນຸ ‘‘ຈິຕ຺ຕເຈຕສິກາ ຘມ຺ມາ ຈິຕ຺ຕສມຸຏ຺ຐານານ’’ນ຺ຕິ ວຈເນນ ຈິຕ຺ຕສມຸຏ຺ຐານານໍ ຈິຕ຺ຕເຈຕສິກສມຸຏ຺ຐານຕາ ວຸຕ຺ຕາຕິ? ນ ວຸຕ຺ຕາ. ຈິຕ຺ຕເຈຕສິການໍ ປຈ຺ຈຍຠາໂວ ເອວ ຫິ ຕຕ຺ຖ ວຸຕ຺ໂຕຕິ.

ຈິຕ຺ຕປຏິພທ຺ຘວຸຕ຺ຕິຕາຍາຕິ ເອເຕເນວ ເຫຕຸອາທິປຏິພທ຺ຘຕຎ຺ຈ ທສ຺ເສຕິ. ‘‘ຍຎ຺ຈ, ຠິກ຺ຂເວ, ເຈເຕຕິ, ຍຎ຺ຈ ປກປ຺ເປຕິ, ຍຎ຺ຈ ອນຸເສຕິ, ອາຣມ຺ມຓເມຕໍ ໂຫຕິ, ວິຎ຺ຎາຓສ຺ສ ຐິຕິຍາ ອາຣມ຺ມເຓ ສຕິ ປຕິຏ຺ຐາ ວິຎ຺ຎາຓສ຺ສ ໂຫຕິ, ຕສ຺ມິໍ ປຕິຏ຺ຐິເຕ ວິຎ຺ຎາເຓ ວິຣຸຬ຺ເຫ ນາມຣູປສ຺ສ ອວກ຺ກນ຺ຕິ ໂຫຕິ, ນາມຣູປປຈ຺ຈຍາ ສຬາຍຕນ’’ນ຺ຕິ (ສໍ. ນິ. ໒.໓໙) ອິມສ຺ມິມ຺ປິ ສຸຕ຺ເຕ ປຏິສນ຺ຘິນາມຣູປສ຺ສ ວິຎ຺ຎາຓປຈ຺ຈຍຕາ ວຸຕ຺ຕາຕິ ອາຫ ‘‘ຕສ຺ມິໍ ປຕິຏ຺ຐິເຕ’’ຕິອາທິ.

ປຸຣິມຕຣສິທ຺ຘາຍ ປຖວິຍາ ພີຊປຕິຏ຺ຐານໍ ວິຍ ປຸຣິມຕຣສິທ຺ເຘ ກມ຺ເມ ຕນ຺ນິພ຺ພຕ຺ຕສ຺ເສວ ວິຎ຺ຎາຓພີຊສ຺ສ ປຕິຏ຺ຐານໍ ກມ຺ມສ຺ສ ກຏຕ຺ຕາ ອຸປ຺ປຕ຺ຕີຕິ ວຸຕ຺ຕໍ ໂຫຕິ. ເຕນາຫ – ‘‘ກມ຺ມໍ ເຂຕ຺ຕໍ, ວິຎ຺ຎາຓໍ ພີຊ’’ນ຺ຕິ. ກສ຺ສ ປນ ຕໍ ເຂຕ຺ຕໍ ພີຊຎ຺ຈາຕິ? ນາມຣູປງ຺ກຸຣສ຺ສ.

ອຍຎ຺ຈ ປນຕ຺ໂຖຕິ ປຏິສນ຺ຘິຍໍ ກມ຺ມຊຣູປານໍ ຈິຕ຺ຕປຏິພທ຺ຘວຸຕ຺ຕິຕາ. ໂອກາສວເສເນວາຕິ ນາມຣູໂປກາສວເສເນວ. ໂສ ຫິ ຕສ຺ສ ອຕ຺ຖສ຺ສ ໂອກາໂສຕິ. ວຕ຺ຖຸຣູປມຕ຺ຕມ຺ປີຕິ ວທນ຺ໂຕ ວຕ຺ຖຸຣູປສ຺ສ ອຸປຕ຺ຖມ຺ຠການໍ ເສສຣູປານມ຺ປິ ຕທຸປຕ຺ຖມ຺ຠກຠາເວເນວ ອຣູປຘມ຺ມານໍ ປຈ຺ຈຍຠາວໍ ທສ຺ເສຕິ, ສຫຠວນມຕ຺ຕໍ ວາ. ຕຕ຺ຖ ກາຍຠາວາທິກລາປານໍ ກຕ຺ຖຈິ ອຠາວໂຕ ກຕ຺ຖຈິ ອຠາວາຠາວໂຕ ‘‘ວຕ຺ຖຸຣູປມຕ຺ຕມ຺ປິ ວິນາ’’ຕິ ອາຫ. ສສ຺ສາມິເກຕິ ເອຕສ຺ເສວ ວິເສສນຕ຺ຖໍ ‘‘ສຣາຊເກ’’ຕິ ວຸຕ຺ຕໍ.

ປວຕ຺ຕິຍໍ ກຏຕ຺ຕາຣູປາທີນໍ ປຈ຺ຈຍຠາວປຏິພາຫນໂຕຕິ ອິທໍ ກສ຺ມາ ວຸຕ຺ຕໍ, ນນຸ ເຕສໍ ປຈ຺ຈຍຠາວປ຺ປສງ຺ໂຄເຍວ ນຕ຺ຖິ ‘‘ເຫຕູ ສຫຊາຕານ’’ນ຺ຕິ (ປຏ຺ຐາ. ອຏ຺ຐ. ໑.໑) ວຈນໂຕ. ນ ຫິ ເຍສໍ ເຫຕູ ສຫຊາຕປຈ຺ຈໂຍ ນ ໂຫນ຺ຕິ, ຕານິ ເຫຕຸສຫຊາຕານິ ນາມ ໂຫນ຺ຕິ. ຍທິ ສິຍຸໍ, ‘‘ກຸສລໍ ຘມ຺ມໍ ສຫຊາໂຕ ອພ຺ຍາກໂຕ ຘມ຺ໂມ ອຸປ຺ປຊ຺ຊຕິ ນ ເຫຕຸປຈ຺ຈຍາ’’ຕິອາທິ ຈ ລພ຺ເຠຍ຺ຍ, ນ ປນ ລພ຺ຠຕິ, ຕສ຺ມາ ນ ຕານິ ເຫຕຸສຫຊາຕານີຕິ? ສຈ຺ຈເມຕໍ, ໂຍ ປນ ເຫຕູຫິ ສມານກາລຸປ຺ປຕ຺ຕິມຕ຺ຕໍ ຄເຫຕ຺ວາ ເຫຕຸສຫຊາຕຠາວໍ ມຎ຺ເຎຍ຺ຍ, ຕສ຺ສາຍໍ ປສງ຺ໂຄ ອຕ຺ຖີຕິ ອິທໍ ວຸຕ຺ຕນ຺ຕິ ທຏ຺ຐພ຺ພໍ. ຠຄວາ ປນ ວຈນານໍ ລຫຸຄຣຸຠາວໍ ນ ຄເຓຕິ, ໂພຘເນຍ຺ຍານໍ ປນ ອຊ຺ຌາສຍານຸຣູປໂຕ ຘມ຺ມສຠາວໍ ອວິໂລເມນ຺ໂຕ ຕຖາ ຕຖາ ເທສນໍ ນິຍາເມຕີຕິ ນ ກຕ຺ຖຈິ ອກ຺ຂຣານໍ ພຫຸຕາ ວາ ອປ຺ປຕາ ວາ ໂຈເທຕພ຺ພາຕິ.

ເຫຕຸປຈ຺ຈຍນິທ຺ເທສວຓ຺ຓນາ ນິຏ຺ຐິຕາ.