໑໘. ມຄ຺ຄປຈ຺ຈຍນິທ຺ເທສວຓ຺ຓນາ

໑໘. ປຎ຺ຎາ ວິຕກ຺ໂກ ສມ຺ມາວາຈາກມ຺ມນ຺ຕາຊີວາ ວີຣິຍໍ ສຕິ ສມາຘິ ມິຈ຺ຉາທິຏ຺ຐິ ມິຈ຺ຉາວາຈາກມ຺ມນ຺ຕາຊີວາຕິ ອິມານິ ທ຺ວາທສງ຺ຄານີຕິ ເອຕ຺ຖ ທຸວິຘມ຺ປິ ສງ຺ກປ຺ປໍ ວີຣິຍໍ ສມາຘິຎ຺ຈ ວິຕກ຺ກວີຣິຍສມາຘິວຈເນຫິ ສງ຺ຄຓ຺ຫິຕ຺ວາ ‘‘ອຍເມວ ໂຂ, ອາວຸໂສ, ອຏ຺ຐງ຺ຄິໂກ ມິຈ຺ຉາມຄ຺ໂຄ ອພ຺ຣຫ຺ມຈຣິຍໍ. ເສຍ຺ຍຖິທໍ – ມິຈ຺ຉາທິຏ຺ຐິ…ເປ… ມິຈ຺ຉາສມາຘີ’’ຕິອາທີຫິ (ສໍ. ນິ. ໕.໑໘) ສຸຕ຺ຕວຈເນຫິ ມິຈ຺ຉາວາຈາກມ຺ມນ຺ຕາຊີເວສຸປິ ມຄ຺ຄງ຺ຄໂວຫາຣສິທ຺ຘິໂຕ ເຕຫິ ສຫ ທ຺ວາທສງ຺ຄານິ ອິຘ ລພ຺ຠມານານິ ຈ ອລພ຺ຠມານານິ ຈ ມຄ຺ຄງ຺ຄວຈນສາມຎ຺ເຎນ ສງ຺ຄຓ຺ຫິຕ຺ວາ ວຸຕ຺ຕານິ. ເອວຎ຺ຫິ ສຸຕ຺ຕນ຺ຕໂວຫາໂຣປິ ທສ຺ສິໂຕ ໂຫຕິ, ເອວໍ ປນ ທສ຺ເສນ຺ເຕນ ‘‘ມຄ຺ຄປຈ຺ຈຍນິທ຺ເທເສ ມຄ຺ຄງ຺ຄານີ’’ຕິ ເອວໍ ອຸທ຺ຘຣິຕ຺ວາ ຕສ຺ສ ປາຐຄຕສ຺ສ ມຄ຺ຄງ຺ຄສທ຺ທສ຺ສ ອຕ຺ຖຠາເວນ ອິມານິ ທ຺ວາທສງ຺ຄານິ ນ ທສ຺ເສຕພ຺ພານິ. ນ ຫິ ປາຬິຍໍ ມຄ຺ຄງ຺ຄສທ຺ທສ຺ສ ມິຈ຺ຉາວາຈາກມ຺ມນ຺ຕາຊີໂວຕິ ອຕ຺ໂຖ ວຕ຺ຕພ຺ໂພ. ເຕຫິ ສມ຺ມາວາຈາທີຫິ ປຏິປກ຺ຂາ ເຈຕນາຘມ຺ມາ ຕປ຺ປຏິປກ຺ຂຠາວໂຕເຍວ ‘‘ມິຈ຺ຉາມຄ຺ຄງ຺ຄານີ’’ຕິ ສຸຕ຺ເຕ ວຸຕ຺ຕານິ, ນ ປນ ມຄ຺ຄປຈ຺ຈຍຠາເວນ. ມຄ຺ຄງ຺ຄານິ ມຄ຺ຄປຈ຺ຈຍຠູຕານິ ຈ ອິຘ ປາຬິຍໍ ‘‘ມຄ຺ຄງ຺ຄານີ’’ຕິ ວຸຕ຺ຕານິ, ນ ຈ ອຎ຺ຎໍ ອຸທ຺ຘຣິຕ຺ວາ ອຎ຺ຎສ຺ສ ອຕ຺ໂຖ ວຕ຺ຕພ຺ໂພ. ປຣິຍາຍນິປ຺ປຣິຍາຍມຄ຺ຄງ຺ຄທສ຺ສນຕ຺ຖໍ ປນ ອິຈ຺ຉນ຺ເຕນ ປາຬິຄຕມຄ຺ຄງ຺ຄສທ຺ທປຕິຣູປໂກ ອຎ຺ໂຎ ມຄ຺ຄງ຺ຄສທ຺ໂທ ອຸຠຍປທຕ຺ໂຖ ອຸທ຺ຘຣິຕພ຺ໂພ ຍຖາ ‘‘ອຘິກຣຓໍ ນາມ ຈຕ຺ຕາຣິ ອຘິກຣຓານີ’’ຕິ (ປາຣາ. ໓໘໖, ໔໐໕). ອິຘ ປນ ‘‘ມຄ຺ຄປຈ຺ຈຍນິທ຺ເທເສ ມຄ຺ຄງ຺ຄານີ’’ຕິ ປາຬິຄໂຕເຍວ ມຄ຺ຄງ຺ຄສທ຺ໂທ ອຸທ຺ຘໂຏ, ນ ຈ ອຕ຺ຖຸທ຺ຘຣຓວເສນ ທສ຺ເສຕ຺ວາ ອຘິປ຺ເປຕຕ຺ຖນິຍມນໍ ກຕໍ, ຕສ຺ມາ ປາຬິຍໍ ມຄ຺ຄງ຺ຄສທ຺ທສ຺ສ ມິຈ຺ຉາວາຈາທີນໍ ອຕ຺ຖຠາໂວ ມາ ໂຫຕູຕິ ‘‘ສມ຺ມາທິຏ຺ຐິສງ຺ກປ຺ປວາຈາກມ຺ມນ຺ຕາຊີວວາຍາມສຕິສມາຘິມິຈ຺ຉາທິຏ຺ຐິສງ຺ກປ຺ປວາຍາມສມາຘໂຍຕິ ອິມານິ ທ຺ວາທສງ຺ຄານີ’’ຕິ ປຐນ຺ຕິ. ນນຸ ເອວໍ ‘‘ອເຫຕຸກຈິຕ຺ຕຸປ຺ປາທວຊ຺ເຊສູ’’ຕິ ນ ວຕ຺ຕພ຺ພໍ. ນ ຫິ ເຕສຸ ສມ຺ມາທິຏ຺ຐິອາທໂຍ ຍຖາວຸຕ຺ຕາ ສນ຺ຕິ, ເຍ ວຊ຺ເຊຕພ຺ພາ ສິຍຸນ຺ຕິ? ນ, ອຸປ຺ປຕ຺ຕິຏ຺ຐານນິຍມນຕ຺ຖຕ຺ຕາ. ອເຫຕຸກຈິຕ຺ຕຸປ຺ປາທວຊ຺ເຊສ຺ເວວ ເອຕານິ ອຸປ຺ປຊ຺ຊນ຺ຕິ, ນາເຫຕຸກຈິຕ຺ຕຸປ຺ປາເທສຸ. ຕຕ຺ຖຸປ຺ປນ຺ນານິ ທ຺ວາທສງ຺ຄານີຕິ ອຍຎ຺ເຫຕ຺ຖ ອຕ຺ໂຖ.

ມຄ຺ຄປຈ຺ຈຍນິທ຺ເທສວຓ຺ຓນາ ນິຏ຺ຐິຕາ.