໗. ປຖວີກມ຺ມວິປາໂກຕິກຖາວຓ຺ຓນາ

໔໙໒. ຜສ຺ໂສ ສຸຂເວທນີຍາທິເຠໂທ ໂຫຕີຕິ ຜສ຺ເສນ ສພ຺ພມ຺ປິ ກມ຺ມວິປາກໍ ທສ຺ເສຕ຺ວາ ປຸນ ອຕ຺ຕວຊ຺ເຊຫິ ສມ຺ປໂຍຄທສ຺ສນຕ຺ຖໍ ‘‘ໂສ ຈ ສຎ຺ຎາທໂຍ ຈາ’’ຕິອາທິ ວຸຕ຺ຕໍ. ອຕ຺ຖິ ຈ ເນສນ຺ຕິ ສາວຊ຺ຊເນ ຈກ຺ຂຸວິຎ຺ຎາຓາທິສຫຊາຕຘມ຺ເມ ສນ຺ຘາຍ ວຸຕ຺ຕໍ. ໂຍ ຕຕ຺ຖ ອິຏ຺ຐວິປາໂກ, ຕສ຺ສ ປຕ຺ຖນາຕິ ອິຏ຺ຐວິປາເກ ເອວ ປຕ຺ຖນໍ ກຕ຺ວາ ກມ຺ມໍ ກໂຣນ຺ຕີຕິ ກມ຺ມູປນິສ຺ສຍຠູຕເມວ ປຕ຺ຖນໍ ທສ຺ເສຕິ, ປຈ຺ຈຸປ຺ປນ຺ນເວທນາປຈ຺ຈຍໍ ວາ ຕຓ຺ຫໍ ອຸປາທານາທິນິພ຺ພຕ຺ຕນວເສນ ທຸກ຺ຂສ຺ສ ປຠາວິຕໍ. ມູລຕຓ຺ຫາຕິ ປຈ຺ຈຸປ຺ປນ຺ນວິປາກວຏ຺ຏນິພ຺ພຕ຺ຕກກມ຺ມສ຺ສ ອຸປນິສ຺ສຍຠູຕໍ ປຸຣິມຕຓ຺ຫໍ, ກມ຺ມສຫາຍໍ ວາ ວິປາກສ຺ສ ອຸປນິສ຺ສຍຠູຕໍ.

໔໙໓. ສກສມຍວເສນ ຈ ໂຈທນາຍ ປຍຸຊ຺ຊມານຕໍ ທສ຺ເສຕຸໍ ‘‘ເຕສຎ຺ຈ ລທ຺ຘິຍາ’’ຕິອາທິມາຫ.

໔໙໔. ປຏິລາຠວເສນາຕິ ກມ຺ເມ ສຕິ ປຖວິຍາທີນໍ ປຏິລາໂຠ ໂຫຕີຕິ ກມ຺ມໍ ຕໍສໍວຕ຺ຕນິກໍ ນາມ ໂຫຕີຕິ ທສ຺ເສຕິ.

ປຖວີກມ຺ມວິປາໂກຕິກຖາວຓ຺ຓນາ ນິຏ຺ຐິຕາ.