໑. ພລກຖາວຓ຺ຓນາ

໓໕໔. ອິນ຺ທ຺ຣິຍປໂຣປຣິຍຕ຺ຕໍ ອສາຘາຣຓນ຺ຕິ ຍຖາ ນິທ຺ເທສໂຕ ວິຕ຺ຖາຣໂຕ ສພ຺ພໍ ສພ຺ພາກາຣໍ ຐານາຏ຺ຐານາທິໍ ອຊານນ຺ຕາປິ ‘‘ອຏ຺ຐານເມຕໍ ອນວກາໂສ, ຍໍ ທິຏ຺ຐິສມ຺ປນ຺ໂນ ປຸຄ຺ຄໂລ ກຎ຺ຈິ ສງ຺ຂາຣໍ ນິຈ຺ຈໂຕ ອຸປຄຈ຺ເຉຍ຺ຍາ’’ຕິອາທິນາ (ອ. ນິ. ໑.໒໖໘) ຐານາຏ຺ຐານານິ ອຸທ຺ເທສໂຕ ສງ຺ເຂປໂຕ ສາວກາ ຊານນ຺ຕິ, ນ ເອວໍ ‘‘ອາສຍໍ ຊານາຕິ ອນຸສຍໍ ຊານາຕີ’’ຕິອາທິນາ (ປຏິ. ມ. ໑.໑໑໓) ອຸທ຺ເທສມຕ຺ເຕນປິ ອິນ຺ທ຺ຣິຍປໂຣປຣິຍຕ຺ຕໍ ຊານນ຺ຕີຕິ ‘‘ອສາຘາຣຓ’’ນ຺ຕິ ອາຫ. ເຖເຣນ ປນ ສທ຺ຘາທີນໍ ອິນ຺ທ຺ຣິຍານໍ ຕິກ຺ຂມຸທຸຠາວຊານນມຕ຺ຕໍ ສນ຺ຘາຍ ‘‘ສຕ຺ຕານໍ ອິນ຺ທ຺ຣິຍປໂຣປຣິຍຕ຺ຕໍ ຍຖາຠູຕໍ ປຊານາມີ’’ຕິ (ປຏິ. ມ. ໒.໔໔) ວຸຕ຺ຕໍ, ນ ຍຖາວຸຕ຺ຕໍ ອິນ຺ທ຺ຣິຍປໂຣປຣິຍຕ຺ຕຎາຓໍ ຕຖາຄຕພລນ຺ຕິ ອຍເມຕ຺ຖ ອຘິປ຺ປາໂຍ ທຏ຺ຐພ຺ໂພ. ‘‘ອຸທ຺ເທສໂຕ ຐານາຏ຺ຐານາທິມຕ຺ຕຊານນວເສນ ປຏິຊານາຕີ’’ຕິ ວຸຕ຺ຕໍ, ເອວໍ ປນ ປຏິຊານນ຺ເຕນ ‘‘ຕຖາຄຕພລໍ ສາວກສາຘາຣຓ’’ນ຺ຕິ ອິທມ຺ປິ ເອວເມວ ປຏິຎ຺ຎາຕໍ ສິຍາຕິ ກຖມຍໍ ໂຈເທຕພ຺ໂພ ສິຍາ.

໓໕໖. ເສເສສຸ ປຏິກ຺ເຂໂປ ສກວາທິສ຺ສ ຐານາຏ຺ຐານຎາຓາທີນໍ ສາຘາຣຓາສາຘາຣຓຕ຺ຕາ ຕຕ຺ຖ ສາຘາຣຓປກ຺ຂໍ ສນ຺ຘາຍາຕິ ອຘິປ຺ປາໂຍ.

ພລກຖາວຓ຺ຓນາ ນິຏ຺ຐິຕາ.