໑໐. ໂວຫາຣກຖາວຓ຺ຓນາ

໓໔໗. ໂວຫາຣກຖາຍໍ ອຸທາຫຸ ໂສຕາທີນິປີຕິ ເອກນ຺ຕໂລກິເຍສຸ ວິສຍວິສຍີສຸ ວິສຍສ຺ເສວ ໂລກຸຕ຺ຕຣຠາໂວ, ນ ວິສຍີນນ຺ຕິ ນຕ຺ເຖຕ຺ຖ ກາຣຓໍ. ຍຖາ ຈ ວິສຍີນໍ ໂລກຸຕ຺ຕຣຠາໂວ ອສິທ຺ໂຘ, ຕຖາ ວິສຍສ຺ສ ສທ຺ທາຍຕນສ຺ສ. ຕຕ຺ຖ ຍຖາ ອສິທ຺ຘໂລກຸຕ຺ຕຣຠາວສ຺ສ ຕສ຺ສ ໂລກຸຕ຺ຕຣຕາ, ເອວໍ ໂສຕາທີນໍ ອາປນ຺ນາຕິ ກິນ຺ຕິ ຕານິປິ ໂລກຸຕ຺ຕຣານີຕິ ອຕ຺ໂຖ ທຏ຺ຐພ຺ໂພ.

ຍທິ ໂລກຸຕ຺ຕເຣ ປຏິຫຎ຺ເຎຍ຺ຍ, ໂລກຸຕ຺ຕໂຣ ສິຍາຕິ ອຕ຺ໂຖ ນ ຄເຫຕພ຺ໂພ. ນ ຫິ ໂລກຸຕ຺ຕເຣ ປຏິຫຎ຺ຎຕີຕິ ປຣິກປ຺ປິເຕປິ ສທ຺ທສ຺ສ ໂລກຸຕ຺ຕຣຠາໂວ ອຕ຺ຖີຕິ ອຘິປ຺ປາໂຍ. ‘‘ໂລກິເຍນ ຎາເຓນາ’’ຕິ ອຸທ຺ຘຏໍ, ‘‘ວິຎ຺ຎາເຓນາ’’ຕິ ປນ ປາຬິ, ຕຎ຺ຈ ວິຎ຺ຎາຓໍ ໂສຕສມ຺ພນ຺ເຘນ ໂສຕວິຎ຺ຎາຓນ຺ຕິ ວິຎ຺ຎາຍຕີຕິ. ອເນກນ຺ຕຕາຕິ ໂລກິເຍນ ຎາເຓນ ຊານິຕພ຺ພໂຕ ໂລກິໂຍຕິ ເອຕສ຺ສ ເຫຕຸສ຺ສ ໂລກິເຍ ໂລກຸຕ຺ຕເຣ ຈ ສມ຺ຠວໂຕ ອເນກນ຺ຕຠາໂວ ສິຍາຕິ ອຘິປ຺ປາໂຍ.

ໂວຫາຣກຖາວຓ຺ຓນາ ນິຏ຺ຐິຕາ.