໗. ຘມ຺ມກຖາວຓ຺ຓນາ

໘໘໗-໘໘໘. ຘມ຺ມກຖາຍໍ ຣູປຏ຺ຐໂຕ ອຎ຺ຎສ຺ສ ຣູປສ຺ສ ອຠາວາຕິ ໂຍ ຣູປສ຺ສ ນິຍາໂມ ວຸຈ຺ເຈຍ຺ຍ, ໂສ ຣູປຏ຺ໂຐ ນາມ ໂກຈິ ຣູປໂຕ ອຎ຺ໂຎ ນຕ຺ຖີຕິ ຣູປຏ຺ຐໂຕ ອຎ຺ຎໍ ຣູປຎ຺ຈ ນ ໂຫຕິ, ຕສ຺ມາ ຣູປໍ ຣູປເມວ, ນ ເວທນາທິສຠາວນ຺ຕິ ອຘິປ຺ປາເຍນ ‘‘ຣູປໍ ຣູປຏ຺ເຐນ ນິຍຕ’’ນ຺ຕິ ວຕ຺ຕພ຺ພໍ, ນ ອຎ຺ຎຖາ ຣູປຏ຺ເຐນ ນິຍາເມນາຕິ ອຘິປ຺ປາໂຍ. ຕຕ຺ຖ ຣູປໂຕ ອຎ຺ຎສ຺ສ ຣູປຏ຺ຐສ຺ສ ອຠາເວ ທສ຺ສິເຕ ຣູປຏ຺ຐໂຕ ອຎ຺ຎສ຺ສ ຣູປສ຺ສ ອຠາໂວ ທສ຺ສິໂຕເຍວ ນາມ ໂຫຕີຕິ ຕເມວ ຣູປໂຕ ອຎ຺ຎສ຺ສ ຣູປຏ຺ຐສ຺ສ ອຠາວໍ ທສ຺ເສນ຺ໂຕ ‘‘ຣູປສຠາໂວ ຫີ’’ຕິອາທິມາຫ. ເອສ ໂວຫາໂຣຕິ ຣູປສ຺ສ ສຠາໂວ ຣູປສຠາໂວ, ຣູປສ຺ສ ອຕ຺ໂຖ ຣູປຏ຺ໂຐຕິ ເອວໍ ອຎ຺ຎຕ຺ຕໍ ຄເຫຕ຺ວາ ວິຍ ປວຕ຺ໂຕ ຣູປສຠາວໂວຫາໂຣ ຣູປຏ຺ຐໂວຫາໂຣ ວາ ເວທນາທີຫິ ນານຕ຺ຕເມວ ໂສ ສຠາໂວຕິ ນານຕ຺ຕສຎ຺ຎາປນຕ຺ຖໍ ໂຫຕີຕິ ອຕ຺ໂຖ. ຕສ຺ມາຕິ ຣູປສ຺ສ ຣູປຏ຺ເຐນ ອນຎ຺ຎຕ຺ຕາ. ‘‘ຣູປໍ ຣູປເມວ, ນ ເວທນາທິສຠາວ’’ນ຺ຕິ ອວຕ຺ວາ ‘‘ຣູປໍ ຣູປຏ຺ເຐນ ນິຍຕ’’ນ຺ຕິ ວທໂຕ ຕຎ຺ຈ ວຈນໍ ວຸຕ຺ຕປ຺ປກາເຣນ ສໂທສໍ, ອຖ ກສ຺ມາ ‘‘ຣູປຎ຺ຫິ ຣູປຏ຺ເຐນ ນິຍຕນ຺ຕິ ຣູປໍ ຣູປເມວ, ນ ເວທນາທິສຠາວນ຺ຕິ ອຘິປ຺ປາເຍນ ວຕ຺ຕພ຺ພ’’ນ຺ຕິ ວທນ຺ໂຕ ‘‘ຣູປໍ ຣູປຏ຺ເຐນ ນິຍຕ’’ນ຺ຕິ ປຏິຊານາຕີຕິ ອຕ຺ໂຖ ທຏ຺ຐພ຺ໂພ. ນນຸ ເຈຕໍ ອຕ຺ຕນາວ ວຸຕ຺ຕໍ, ນ ປເຣນາຕິ ປຏິຊານາຕີຕິ ນ ວຕ຺ຕພ຺ພນ຺ຕິ? ນ, ອຕ຺ຕານມ຺ປິ ປຣໍ ວິຍ ວຈນໂຕ. ວຕ຺ຕພ຺ພນ຺ຕິ ວາ ສກວາທິນາ ວຕ຺ຕພ຺ພນ຺ຕິ ວຸຕ຺ຕໍ ໂຫຕິ. ຍທິ ຈ ເຕນ ວຕ຺ຕພ຺ພໍ ປຏິຊານາຕິ ຈ ໂສ ເອຕມຕ຺ຖນ຺ຕິ, ອຖ ກສ຺ມາ ປຏິຊານາຕິ ສກວາທີຕິ ອຍເມຕ຺ຖ ອຕ຺ໂຖ. ອຕ຺ຖນ຺ຕຣວເສນາຕິ ຕຕ຺ຖ ວຸຕ຺ຕເມວ ກາຣຓໍ ນິຄູຫິຕ຺ວາ ປເຣນ ໂຈທິຕນ຺ຕິ ຕເມວ ກາຣຓໍ ທສ຺ເສຕ຺ວາ ໂຈທນໍ ນິວຕ຺ເຕຕິ. ອິໂຕ ອຎ຺ຎຖາຕິ ຣູປາທິສຠາວມຕ຺ຕໍ ມຸຎ຺ຈິຕ຺ວາ ເຕນ ປຣິກປ຺ປິຕໍ ນິຍຕໍ ນຕ຺ຖີຕິ ຕສ຺ສ ປຣິກປ຺ປິຕສ຺ສ ນິວຕ຺ຕນຕ຺ຖໍ ປຸນ ເຕເນວ ນເຍນ ໂຈເທຕຸໍ ‘‘ມິຈ຺ຉຕ຺ຕນິຍຕ’’ນ຺ຕິອາທິມາຫາຕິ ອຕ຺ໂຖ.

ຘມ຺ມກຖາວຓ຺ຓນາ ນິຏ຺ຐິຕາ.

ເອກວີສຕິມວຄ຺ຄວຓ຺ຓນາ ນິຏ຺ຐິຕາ.