໔. ນິຍຕສ຺ສນິຍາມກຖາວຓ຺ຓນາ

໖໖໓-໖໖໔. ເສສາ ເຕຠູມກຘມ຺ມາ ອນິຍຕາ ນາມາຕິ ເອຕ຺ຖ ອປ຺ປຕ຺ຕນິຍາມານໍ ຘມ຺ເມ ສນ຺ຘາຍ ‘‘ເຕຠູມກຘມ຺ມາ’’ຕິ ອາຫ. ເອເຕວ ຫິ ສນ຺ຘາຍ ‘‘ເຕຫິ ສມນ຺ນາຄໂຕປິ ອນິຍໂຕເຍວາ’’ຕິ ວຸຕ຺ຕນ຺ຕິ. ອິຕິ ອິມໍ ໂວຫາຣມຕ຺ຕໍ ຄເຫຕ຺ວາ ‘‘ນິຍໂຕ ໂພຘິສຕ຺ໂຕ ປຈ຺ຉິມຠວິໂກ ຠພ຺ໂພ ຘມ຺ມໍ ອຠິສເມຕຸໍ ໂອກ຺ກມິຕຸ’’ນ຺ຕິ ອຘິປ຺ປາເຍນ ‘‘ນິຍາມໍ ໂອກ຺ກມຕີ’’ຕິ ເຍສໍ ລທ຺ຘີຕິ ອຕ຺ຖໂຍຊນາ. ເອວໍ ປນ ໂວຫາຣມຕ຺ຕສພ຺ຠາໂວ ‘‘ນິຍໂຕ’’ຕິ ວຈນສ຺ສ, ຘມ຺ມໍ ອຠິສເມຕຸໍ ຠພ຺ພຕາ ຈ ‘‘ນິຍາມໍ ໂອກ຺ກມຕີ’’ຕິ ວຈນສ຺ສ ກາຣຓຠາເວນ ວຸຕ຺ຕາ ໂຫຕິ, ຠພ຺ພຕາເຍວ ປນ ອຸຠຍສ຺ສປິ ກາຣຓນ຺ຕິ ຍຸຕ຺ຕໍ. ອຎ຺ເຎນາຕິ ຍທິ ນິຍໂຕ ນິຍາມໍ ໂອກ຺ກເມຍ຺ຍ, ມິຈ຺ຉຕ຺ຕນິຍໂຕ ສມ຺ມຕ຺ຕນິຍາມໍ, ສມ຺ມຕ຺ຕນິຍໂຕ ວາ ມິຈ຺ຉຕ຺ຕນິຍາມໍ ໂອກ຺ກເມຍ຺ຍ, ນ ຈ ຕໍ ອຕ຺ຖີຕິ ທສ຺ສນຕ຺ຖນ຺ຕິ ອຕ຺ໂຖ.

ນິຍຕສ຺ສນິຍາມກຖາວຓ຺ຓນາ ນິຏ຺ຐິຕາ.