໕. ສຕ຺ຕກ຺ຂຕ຺ຕຸປຣມກຖາວຓ຺ຓນາ

໖໔໑-໖໔໕. ສຕ຺ຕກ຺ຂຕ຺ຕຸປຣມຕານິຍໂຕຕິ ສຕ຺ຕກ຺ຂຕ຺ຕຸປຣມຕາຍ ນິຍໂຕ. ອິມໍ ວິຠາຄນ຺ຕິ ອິມໍ ວິເສສໍ. ຕ຺ວໍ ປນສ຺ສ ນິຍາມໍ ອິຈ຺ຉສີຕິ ອວິນິປາຕຘມ຺ມຕາຜລປ຺ປຕ຺ຕີຫິ ອຎ຺ຎສ຺ມິໍ ສຕ຺ຕກ຺ຂຕ຺ຕຸປຣມຠາເວ ຈ ນິຍາມໍ ອິຈ຺ຉສີຕິ ອຕ຺ໂຖ.

ອານນ຺ຕຣິຍາຠາວນ຺ຕິ ເຍນ ໂສ ຘມ຺ມາຠິສມເຍນ ຠພ຺ໂພ ນາມ ໂຫຕິ, ຕສ຺ສ ອານນ຺ຕຣິຍກມ຺ມສ຺ສ ອຠາວນ຺ຕິ ອຕ຺ໂຖ, ປຸຄ຺ຄລສ຺ສ ວາ ອານນ຺ຕຣິຍຠາວສ຺ສ ອຠາວນ຺ຕິ. ກິໍ ປນ ໂສ ອນ຺ຕຣາຘມ຺ມໍ ອຠິສມິສ຺ສຕີຕິ? ເກຈິ ວທນ຺ຕິ ‘‘ສຕ຺ຕກ຺ຂຕ຺ຕຸປຣໂມ ສຕ຺ຕມໍ ຠວໍ ນາຕິກ຺ກມຕິ, ໂອຣໂຕ ປນ ນຕ຺ຖິ ປຏິເສໂຘ’’ຕິ. ອປເຣ ‘‘ໂຍ ຠຄວຕາ ຎາຓພເລນ ພ຺ຍາກໂຕ, ຕສ຺ສ ອນ຺ຕຣາ ອຠິສມໂຍ ນາມ ນຕ຺ຖິ, ຕຖາປິ ຠວນິຍາມສ຺ສ ກສ຺ສຈິ ອຠາວາ ຠພ຺ໂພຕິ ວຸຈ຺ຈຕິ. ຍຖາ ກຸສລາ ອຠິຎ຺ຎາເຈຕນາ ກທາຈິ ວິປາກໍ ອທທມານາປິ ສຕິ ກາຣເຓ ທາຕຸໍ ຠພ຺ພຕາຍ ວິປາກຘມ຺ມຘມ຺ມາ ນາມ, ຕຖາ ອິນ຺ທ຺ຣິຍານໍ ມຸທຸຕາຍ ສຕ຺ຕກ຺ຂຕ຺ຕຸປຣໂມ, ນ ນິຍາມສພ຺ຠາວາ ນາປິ ຠຄວຕາ ພ຺ຍາກຕຕ຺ຕາ, ນ ຈ ອິນ຺ທ຺ຣິຍມຸທຸຕາ ອຠພ຺ພຕາກໂຣ ຘມ຺ໂມຕິ ນ ໂສ ອຠພ຺ໂພ ນາມ. ອຠພ຺ພຕາກຣຘມ຺ມາຠາວໂຕ ເຈຕ຺ຖ ອຠພ຺ພຕາ ປຏິເສຘິຕາ, ນ ປນ ອນ຺ຕຣາ ອຠິສເມຕຸໍ ຠພ຺ພຕາ ວຸຕ຺ຕາ. ຍທິ ຈ ສຕ຺ຕກ຺ຂຕ຺ຕຸປຣໂມ ອນ຺ຕຣາ ອຠິສເມຍ຺ຍ, ໂກລໍໂກໂລ ສິຍາ’’ຕິ. ວິເສສໍ ປນ ອກຕ຺ວາ ຠພ຺ພສຠາວຕາຍ ຠພ຺ໂພຕິ ວຕ຺ຕຸໍ ຍຸຕ຺ຕໍ. ນ ຠວນິຍາມກໍ ກິຎ຺ຈີຕິ ເອຕ຺ຖ ປສ຺ສິຕ຺ວາຕິ ວຈນເສໂສ, ພ຺ຍາກໂຣຕີຕິ ວາ ສມ຺ພນ຺ໂຘ.

ສຕ຺ຕກ຺ຂຕ຺ຕຸປຣມກຖາວຓ຺ຓນາ ນິຏ຺ຐິຕາ.

ທ຺ວາທສມວຄ຺ຄວຓ຺ຓນາ ນິຏ຺ຐິຕາ.