໗. ສຕ຺ຕມນໂຍ ສມ຺ປຍຸຕ຺ເຕນວິປ຺ປຍຸຕ຺ຕປທວຓ຺ຓນາ

໓໐໖. ສມ຺ປຍຸຕ຺ເຕນວິປ຺ປຍຸຕ຺ຕປທນິທ຺ເທເສ ຣູປກ຺ຂນ຺ຘາທໂຍ ເຕຫິ ສມ຺ປຍຸຕ຺ຕາຠາວໂຕ ນ ຄຫິຕາ. ສມຸທຍສຈ຺ຈາທີນິ ສຕິປິ ເຕຫິ ສມ຺ປຍຸຕ຺ເຕ, ສມ຺ປຍຸຕ຺ເຕຫິ ຈ ວິປ຺ປຍຸຕ຺ເຕ ສມ຺ປຍຸຕ຺ເຕນວິປ຺ປຍຸຕ຺ຕານໍ ຂນ຺ຘາທີຫິ ວິປ຺ປໂຍຄາຠາວໂຕ. ນ ຫິ ສມຸທຍສຈ຺ເຈນ ສມ຺ປຍຸຕ຺ເຕຫິ ໂລຠສຫຄຕຈິຕ຺ຕຸປ຺ປາເທຫິ ວິປ຺ປຍຸຕ຺ຕານໍ ຕໂຕ ອຎ຺ຎຘມ຺ມານໍ ຂນ຺ຘາທີສຸ ເກນຈິ ວິປ຺ປໂຍໂຄ ອຕ຺ຖິ. ນນຸ ຈ ເຕ ເອວ ຈິຕ຺ຕຸປ຺ປາທາ ຈຕ຺ຕາໂຣ ຂນ຺ຘາ ອຑ຺ຒທຸຕິຍານິ ອາຍຕນານິ ອຑ຺ຒທຸຕິຍາ ຘາຕຸໂຍ ຈ ໂຫນ຺ຕີຕິ ເຕຫິ ວິປ຺ປໂຍໂຄ ວຕ຺ຕພ຺ໂພຕິ? ນ, ຕທຎ຺ຎຘມ຺ມານໍ ຂນ຺ຘາທິຠາວໂຕ. ນ ຫິ ເຕ ເອວ ຘມ຺ມາ ຈຕ຺ຕາໂຣ ຂນ຺ຘາ, ອຖ ໂຂ ເຕ ຈ ຕໂຕ ອຎ຺ເຎ ຈ, ຕຖາ ອຑ຺ຒທຸຕິຍາຍຕນຘາຕຸໂຍປິ. ນ ຈ ຕທຎ຺ຎສມຸທາເຍຫິ ອຎ຺ເຎ ວິປ຺ປຍຸຕ຺ຕາ ໂຫນ຺ຕິ ສມຸທາເຍກເທສານໍ ເອກເທສຎ຺ຎສມຸທາຍານຎ຺ຈ ວິປ຺ປໂຍຄາຠາວໂຕ. ເອສ ນໂຍ ມຄ຺ຄສຈ຺ຈສຸຂິນ຺ທ຺ຣິຍາທີສຸ. ອວິຕກ຺ກວິຈາຣມຕ຺ເຕສຸປິ ນິຣວເສເສສຸ ອຘິປ຺ເປເຕສຸ ເຕສໍ ສວິຕກ຺ກສວິຈາຣສມານຄຕິກຕ຺ຕາ ອຄ຺ຄຫເຓ ກາຣຓໍ ນ ທິສ຺ສຕິ.

ອຏ຺ຐກຖາຍໍ ປນ ເອວຣູປານີຕິ ຍຖາ ຣູປກ຺ຂນ຺ເຘ ວິສ຺ສຊ຺ຊນໍ ນ ຍຸຊ຺ຊຕິ, ເອວໍ ເຍສຸ ອຎ຺ເຎສຸປິ ນ ຍຸຊ຺ຊຕິ, ຕານິ ວິສ຺ສຊ຺ຊນສ຺ສ ອໂຍເຄນ ‘‘ເອວຣູປານີ’’ຕິ ວຸຕ຺ຕານິ, ນ ສມ຺ປຍຸຕ຺ຕາຠາເວນາຕິ ທຏ຺ຐພ຺ພໍ. ຍານິ ປນ ປທານິ ຘມ຺ມຘາຕຸຍາ ສມ຺ປຍຸຕ຺ເຕ ຘມ຺ເມ ທີເປນ຺ຕີຕິ ເອເຕນ ເວທນາກ຺ຂນ຺ຘາທິປທານິ ທສ຺ເສຕິ, ວິຎ຺ຎາຓຎ຺ຈ ອຎ຺ເຎນ ອສມ຺ມິສ຺ສນ຺ຕິ ວິຎ຺ຎາຓກ຺ຂນ຺ຘມນາຍຕນາທິປທານິ. ຕຕ຺ຖ ອຎ຺ເຎນ ອສມ຺ມິສ຺ສນ຺ຕິ ອສມ຺ປຍຸຕ຺ເຕນ ອສມ຺ມິສ຺ສນ຺ຕິ ອຕ຺ໂຖ. ອທຸກ຺ຂມສຸຂາຍເວທນາຍສມ຺ປຍຸຕ຺ຕປທານິປິ ຫິ ສມ຺ປຍຸຕ຺ເຕຫິ ສມ຺ມິສ຺ສວິຎ຺ຎາຓທີປການິ ອິຘ ຄຫິຕານີຕິ. ເອເຕນ ຈ ລກ຺ຂເຓນ ເອວຣູປາເນວ ຄຫິຕານີຕິ ທສ຺ເສຕິ, ນ ເອວຣູປານິ ຄຫິຕາເນວາຕິ ສມຸທຍສຈ຺ຈາທິອິທ຺ຘິປາທາທິປທານໍ ອສງ຺ຄຫິຕຕ຺ຕາ. ‘‘ອຖ ຜສ຺ສສຕ຺ຕກໍ ຈິຕ຺ຕໍ ສຫ ຍຸຕ຺ຕປເທຫິ ສຕ຺ຕາ’’ຕິ ປຸຣາຓປາໂຐ, ອຍໍ ປນ ອູໂນຕິ ກຕ຺ວາ ‘‘ອຖ ຜສ຺ສສຕ຺ຕກໍ, ຕິເກ ຕໂຍ ສຕ຺ຕ ມຫນ຺ຕເຣ ຈາ’’ຕິ ປາໂຐ ກໂຕ.

໓໐໙. ປຸຈ຺ຉາຍ ອຸທ຺ຘຏປເທເນວ ສທ຺ຘິໍ ວິປ຺ປຍຸຕ຺ຕານໍ ວເສນາຕິ ອິທໍ ປຸຈ຺ຉາຍ ອຸທ຺ຘຏປເທນ ສມ຺ປຍຸຕ຺ເຕຫິ ວິປ຺ປຍຸຕ຺ຕາ ເຕນ ສທ຺ຘິໍ ວິປ຺ປຍຸຕ຺ຕາ ໂຫນ຺ຕີຕິ ກຕ຺ວາ ວຸຕ຺ຕໍ. ປາຬິອຸທ຺ທານຄາຖາຍໍ ທ຺ເວ ຈ ມເນນ ຍຸຕ຺ຕາ, ວິຕກ຺ກວິຈາຣຓາຕິ ມໂນຘາຕຸຍາ ເອກນ຺ຕສມ຺ປຍຸຕ຺ຕາ ທ຺ເວ ວິຕກ຺ກວິຈາຣາຕິ ສວິຕກ຺ກປທໍ ສວິຈາຣປທຎ຺ຈ ທສ຺ເສຕິ.

ສຕ຺ຕມນຍສມ຺ປຍຸຕ຺ເຕນວິປ຺ປຍຸຕ຺ຕປທວຓ຺ຓນາ ນິຏ຺ຐິຕາ.