໙. ນວມນໂຍ ສມ຺ປຍຸຕ຺ເຕນສມ຺ປຍຸຕ຺ຕປທວຓ຺ຓນາ

໓໑໙. ສມ຺ປຍຸຕ຺ເຕນສມ຺ປຍຸຕ຺ຕປທວຓ຺ຓນາຍໍ ຍໍຂນ຺ຘາທິວເສນາຕິ ສມາສປທໍ ອິທໍ ທຏ຺ຐພ຺ພໍ, ຍສ຺ສ ຂນ຺ຘາທິໂນ ວເສນາຕິ ອຕ຺ໂຖ. ຕສ຺ເສວາຕິ ຈ ຕສ຺ເສວ ຂນ຺ຘາທິໂນຕິ ອຕ຺ໂຖ. ອິທໍ ວຸຕ຺ຕໍ ໂຫຕິ – ຍໍ ອິຘ ສມ຺ປຍຸຕ຺ຕໍ ວຸຕ຺ຕໍ, ຕໍ ຣູປກ຺ຂນ຺ຘາທີສຸ ອຣຓນ຺ເຕສຸ ເຍນ ເວທນາກ຺ຂນ຺ຘາທິນາ ສມ຺ປຍຸຕ຺ຕໍ, ປຸນ ຕສ຺ເສວ ເວທນາກ຺ຂນ຺ຘາທິໂນ ຂນ຺ຘາທີຫິ ສມ຺ປໂຍຄໍ ປຸຈ຺ຉິຕ຺ວາ ວິສ຺ສຊ຺ຊນໍ ກຕໍ. ຕຎ຺ຫິ ອຕ຺ຕນາ ສມ຺ປຍຸຕ຺ເຕນ ສມ຺ປຍຸຕ຺ຕຕ຺ຕາ ‘‘ສມ຺ປຍຸຕ຺ເຕນ ສມ຺ປຍຸຕ຺ຕ’’ນ຺ຕິ ນິທ຺ຘາຣິຕນ຺ຕິ. ຣູເປນ ວາຕິ ເອເຕນ ນິໂຣຘສຈ຺ຈອປ຺ປຈ຺ຈຍອສງ຺ຂເຕຫິປິ ອໂຍໂຄ ວຸຕ຺ໂຕ ໂຫຕີຕິ ທຏ຺ຐພ຺ໂພ, ຕຖາ ຣູປມິສ຺ສເກຫິ ວາຕິ ເອເຕນ ອນຸປາທິນ຺ນອນຸປາທານິຍາທີຫິ ນິພ຺ພານມິສ຺ສເກຫິປິ. ວກ຺ຂຕິ ຫິ ‘‘ນິພ຺ພານໍ ປນ ສຸຂຸມຣູປຄຕິກເມວາ’’ຕິ. ສພ຺ພາຣູປກ຺ຂນ຺ຘສງ຺ຄາຫເກຫີຕິ ວຕ຺ຕມານານເມວ ສມ຺ປໂຍໂຄ ລພ຺ຠຕີຕິ ວຕ຺ຕມາເນສຸ ເອກມ຺ປິ ຘມ຺ມໍ ອນປເນຕ຺ວາ ອວິກລຈຕຸກ຺ຂນ຺ຘສງ຺ຄາຫເກຫິ ອຣູປຠວາທີຫີຕິ ອຕ຺ໂຖ. ອຍໍ ປເນຕ຺ຖ ສງ຺ເຂໂປ – ເຍ ສມ຺ປໂຍຄໍ ນ ລຠນ຺ຕິ ຣູປກ຺ຂນ຺ຘາທໂຍ, ເຕ ສພ຺ເພ ນ ຄຫິຕາ, ອິຕເຣ ຈ ເວທນາກ຺ຂນ຺ຘາທໂຍ ສພ຺ເພ ຄຫິຕາຕິ.

ນວມນຍສມ຺ປຍຸຕ຺ເຕນສມ຺ປຍຸຕ຺ຕປທວຓ຺ຓນາ ນິຏ຺ຐິຕາ.