໕. ພາຫິຣມາຕິກາວຓ຺ຓນາ

໕. ເອວໍ ຘາຕຸກຖາຍ ມາຕິກໂຕ ພຫິ ຐປິຕຕ຺ຕາຕິ ‘‘ສພ຺ພາປິ…ເປ… ມາຕິກາ’’ຕິ ເອເຕນ ຐປນາກາເຣນ ພຫິ ປິຏ຺ຐິໂຕ ຐປິຕຕ຺ຕາຕິ ອຕ຺ໂຖ. ເອເຕນ ວາ ຐປນາກາເຣນ ກຸສລາທີນໍ ອຣຓນ຺ຕານໍ ອິຘ ອຏ຺ຐເປຕ຺ວາ ຘາຕຸກຖາຍ ມາຕິກໂຕ ພຫິ ປກຣຓນ຺ຕຣມາຕິກາຍ ອິມສ຺ສ ປກຣຓສ຺ສ ມາຕິກາຠາເວນ ຐປິຕຕ຺ຕາ ຕຖາ ປກາສິຕຕ຺ຕາຕິ ອຕ຺ໂຖ.

ສງ຺ຄໂຫ ອສງ຺ຄໂຫຕິອາທີສຸ ສງ຺ຄໂຫ ເອກວິໂຘວ, ໂສ ກສ຺ມາ ‘‘ຈຕຸພ຺ພິໂຘ’’ຕິ ວຸຕ຺ໂຕຕິ? ສງ຺ຄໂຫຕິ ອຕ຺ຖໍ ອວຕ຺ວາ ອນິທ຺ຘາຣິຕຕ຺ຖສ຺ສ ສທ຺ທສ຺ເສວ ວຸຕ຺ຕຕ຺ຕາ. ສງ຺ຄໂຫ ອສງ຺ຄໂຫຕິອາທີສຸ ສທ຺ເທສຸ ສງ຺ຄຫສທ຺ໂທ ຕາວ ອຕ຺ຕໂນ ອຕ຺ຖວເສນ ຈຕຸພ຺ພິໂຘຕິ ອຍຎ຺ເຫຕ຺ຖຕ຺ໂຖ. ອຕ຺ໂຖປິ ວາ ອນິທ຺ຘາຣິຕວິເສໂສ ສາມຎ຺ເຎນ ຄເຫຕພ຺ພຕໍ ປຕ຺ໂຕ ‘‘ສງ຺ຄໂຫ ອສງ຺ຄໂຫ’’ຕິອາທີສຸ ‘‘ສງ຺ຄໂຫ’’ຕິ ວຸຕ຺ໂຕຕິ ນ ໂກຈິ ໂທໂສ. ນິທ຺ຘາຣິເຕ ຫິ ວິເສເສ ຕສ຺ສ ເອກວິຘຕາ ສິຍາ, ນ ຕໂຕ ປຸພ຺ເພຕິ. ຊາຕິສທ຺ທສ຺ສ ສາເປກ຺ຂສທ຺ທຕ຺ຕາ ‘‘ຊາຕິຍາ ສງ຺ຄໂຫ’’ຕິ ວຸຕ຺ເຕ ‘‘ອຕ຺ຕໂນ ຊາຕິຍາ’’ຕິ ວິຎ຺ຎາຍຕິ ສມ຺ພນ຺ຘາຣຫສ຺ສ ອຎ຺ຎສ຺ສ ອວຸຕ຺ຕຕ຺ຕາຕິ ຊາຕິສງ຺ຄໂຫຕິ ຣູປກຓ຺ເຑ ວຸຕ຺ໂຕ ສຊາຕິສງ຺ຄໂຫ ວຸຕ຺ໂຕ ໂຫຕິ.

ເອຕ຺ຖ ນຍມາຕິກາຍ ‘‘ສງ຺ຄໂຫ ອສງ຺ຄໂຫ, ສມ຺ປໂຍໂຄ ວິປ຺ປໂຍໂຄ’’ຕິ ອິເມ ທ຺ເວ ປຸຈ຺ຉິຕພ຺ພວິສ຺ສຊ຺ຊິຕພ຺ພຘມ຺ມວິເສສໍ ອນິທ຺ຘາເຣຕ຺ວາ ສາມຎ຺ເຎນ ຘມ຺ມານໍ ປຸຈ຺ຉນວິສ຺ສຊ຺ຊນນຍອຸທ຺ເທສາ, ອວເສສາ ນິທ຺ຘາເຣຕ຺ວາ. ‘‘ສງ຺ຄຫິເຕນ ອສງ຺ຄຫິຕ’’ນ຺ຕິ ຫິ ‘‘ສງ຺ຄຫິເຕນ ອສງ຺ຄຫິຕໍ ອສງ຺ຄຫິຕ’’ນ຺ຕິ ວຕ຺ຕພ຺ເພ ເອກສ຺ສ ອສງ຺ຄຫິຕສທ຺ທສ຺ສ ໂລໂປ ທຏ຺ຐພ຺ໂພ. ເຕນ ສງ຺ຄຫິຕວິເສສວິສິຏ຺ໂຐ ໂຍ ອສງ຺ຄຫິໂຕ ຘມ຺ມວິເສໂສ, ຕນ຺ນິສ຺ສິໂຕ ອສງ຺ຄຫິຕຕາສງ຺ຂາໂຕ ປຸຈ຺ຉາວິສ຺ສຊ຺ຊນນໂຍ ອຸທ຺ທິຏ຺ໂຐ ໂຫຕິ, ‘‘ສງ຺ຄຫິເຕນາ’’ຕິ ຈ ວິເສສເນ ກຣຓວຈນໍ ທຏ຺ຐພ຺ພໍ. ເອສ ນໂຍ ຕຕິຍາທີສຸ ທສມາວສາເນສຸ ນຍຸທ຺ເທເສສຸ ຉຏ຺ຐວຊ຺ເຊສຸ. ເຕສຸປິ ຫິ ວຸຕ຺ຕນເຍນ ທ຺ວີຫິ ທ຺ວີຫິ ປເທຫິ ປຸຈ຺ຉິຕພ຺ພວິສ຺ສຊ຺ຊິຕພ຺ພຘມ຺ມວິເສສນິທ຺ຘາຣຓໍ ກຕ຺ວາ ຕຕ຺ຖ ຕຕ຺ຖ ອນ຺ຕິມປທສທິເສນ ຕຕິຍປເທນ ປຸຈ຺ຉນວິສ຺ສຊ຺ຊນນຍາ ອຸທ຺ທິຏ຺ຐາຕິ. ຕຕ຺ຖ ຈຕຸຕ຺ຖປຎ຺ຈເມສຸ ກຕ຺ຕຸອຕ຺ເຖ ກຣຓນິທ຺ເທໂສ, ສຕ຺ຕມາທີສຸ ຈ ຈຕູສຸ ສຫໂຍເຄ ທຏ຺ຐພ຺ໂພ, ນ ທຸຕິຍຕຕິເຍສຸ ວິຍ ສມານາຘິກຣເຓ ວິເສສເນ. ຕຕ຺ຖ ຫິ ສຠາວນ຺ຕເຣນ ສຠາວນ຺ຕຣສ຺ສ ວິເສສນໍ ກຕໍ, ເອເຕສຸ ຘມ຺ມນ຺ຕເຣນ ຘມ຺ມນ຺ຕຣສ຺ສາຕິ. ເອກາທສມາທີສຸ ປນ ຈຕູສຸ ອາທິປເທເນວ ຘມ຺ມວິເສສນິທ຺ຘາຣຓໍ ກຕ຺ວາ ອິຕເຣຫິ ປຸຈ຺ຉນວິສ຺ສຊ຺ຊນນຍາ ອຸທ຺ທິຏ຺ຐາ. ວິເສສເນ ເອວ ເຈຕ຺ຖ ກຣຓວຈນໍ ທຏ຺ຐພ຺ພໍ. ປຸຈ຺ຉາວິສ຺ສຊ຺ຊນານຎ຺ຫິ ນິສ຺ສຍຠູຕາ ຘມ຺ມາ ສງ຺ຄຫິຕຕາທິວິເສເສນ ກຣຓຠູເຕນ ສມ຺ປຍຸຕ຺ຕວິປ຺ປຍຸຕ຺ຕາທິຠາວໍ ອຕ຺ຕໂນ ວິເສເສນ຺ຕີຕິ.

ວິກປ຺ປໂຕຕິ ວິວິຘກປ຺ປນໂຕ, ວິຠາຄໂຕຕິ ອຕ຺ໂຖ. ສນ຺ນິຏ຺ຐານວເສນາຕິ ອຘິໂມກ຺ຂສມ຺ປໂຍຄວເສນ. ສນ຺ນິຏ຺ຐານວເສນ ວຸຕ຺ຕາ ຈ ສພ຺ເພ ຈ ຈິຕ຺ຕຸປ຺ປາທາ ສນ຺ນິຏ຺ຐານວເສນ ວຸຕ຺ຕສພ຺ພຈິຕ຺ຕຸປ຺ປາທາ, ເຕສໍ ສາຘາຣຓວເສນາຕິ ເອວເມຕ຺ຖ ອຕ຺ໂຖ ທຏ຺ຐພ຺ໂພ. ອຘິໂມກ຺ໂຂ ຫິ ສນ຺ນິຏ຺ຐານວເສນ ວຸຕ຺ຕານໍ ຈິຕ຺ຕຸປ຺ປາທານໍ ສາຘາຣຓວເສນ ວຸຕ຺ໂຕ, ອິຕເຣ ສພ຺ເພສນ຺ຕິ. ຕຕ຺ຖ ສາຘາຣຓາ ປສຏາ ປາກຏາ ຈາຕິ ອາທິໂຕ ປຣິຄ຺ຄເຫຕພ຺ພາ, ຕສ຺ມາ ເຕສໍ ສງ຺ຄຫາທິປຣິຄ຺ຄຫຕ຺ຖໍ ອຸທ຺ເທໂສ ກໂຕ, ອສາຘາຣຓາປິ ປນ ປຣິຄ຺ຄເຫຕພ຺ພາວາຕິ ເຕສຸ ມຫາວິສເຍນ ອຎ຺ເຎສມ຺ປິ ສງ຺ຄຫາທິປຣິຄ຺ຄຫໍ ທສ຺ເສຕຸໍ ອຘິໂມກ຺ໂຂ ອຸທ຺ທິຏ຺ໂຐ. ‘‘ສນ຺ນິຏ຺ຐານວເສນ ວຸຕ຺ຕາ’’ຕິ ຈ ຘມ຺ມສງ຺ຄຫວຓ຺ຓນາຍໍ ປຏິຈ຺ຈສມຸປ຺ປາທວິຠງ຺ເຄ ຈ ວຈນໍ ສນ຺ຘາຍ ວຸຕ຺ຕນ຺ຕິ ເວທິຕພ຺ພໍ. ສນ຺ນິຏ຺ຐານວເສນ ເຍ ວຸຕ຺ຕາ, ເຕສໍ ສພ຺ເພສໍ ສາຘາຣຓໂຕຕິ ປນ ອຕ຺ເຖ ສຕິ ສາຘາຣຓາສາຘາຣເຓສຸ ວຕ຺ຕພ຺ເພສຸ ໂຍ ອສາຘາຣເຓສຸ ມຫາວິສໂຍ ອຘິໂມກ຺ໂຂ, ຕສ຺ສ ວເສນ ວຸຕ຺ຕສພ຺ພຈິຕ຺ຕຸປ຺ປາທສາຘາຣຓໂຕ ຜສ຺ສາທໂຍ ສພ຺ພສາຘາຣຓາຕິ ອຘິໂມກ຺ໂຂ ຈ ອສາຘາຣເຓສຸ ມຫາວິສໂຍຕິ ກຕ຺ວາ ວຸຕ຺ໂຕ ອຎ຺ຎສ຺ສ ຕາທິສສ຺ສ ອຠາວາຕິ ອຍມຘິປ຺ປາໂຍ ທຏ຺ຐພ຺ໂພ.

ຊີວິຕິນ຺ທ຺ຣິຍໍ ປເນຕ຺ຖ ຣູປມິສ຺ສກຕ຺ຕາ ນ ວຸຕ຺ຕນ຺ຕິ ເວທິຕພ຺ພໍ, ຈິຕ຺ເຕກຄ຺ຄຕາ ປນ ອສມາຘິສຠາວາ ສາມຎ຺ຎສທ຺ເທເນວ ສາມຎ຺ຎວິເສສສທ຺ເທຫິ ຈ ສມາຘິສຠາວາ ວິເສສສທ຺ທວຈນີຍໍ ອຎ຺ຎໍ ພ຺ຍາເປຕພ຺ພໍ ນິວຕ຺ເຕຕພ຺ພຎ຺ຈ ນຕ຺ຖີຕິ ອນຎ຺ຎພ຺ຍາປກນິວຕ຺ຕກສາມຎ຺ຎວິເສສທີປນໂຕ ຕສ຺ເສວ ຘມ຺ມສ຺ສ ເຠທທີປເກຫິ ວຕ຺ຕພ຺ພາ, ນ ສຸຂາທິສຠາວາ ເວທນາ ວິຍ ວຸຕ຺ຕລກ຺ຂຓວິປຣີເຕຫິ ສາມຎ຺ຎວິເສສສທ຺ເທເຫວ, ຕສ຺ມາ ‘‘ຈິຕ຺ເຕກຄ຺ຄຕາ’’ຕິ ອຍໍ ສາມຎ຺ຎສທ຺ໂທ ສມາຘິສຠາເວ ວິເສສສທ຺ທນິຣເປກ຺ໂຂ ປວຕ຺ຕມາໂນ ສຍເມວ ວິເສສສທ຺ທມາປຊ຺ຊິຕ຺ວາ ອສມາຘິສຠາວເມວ ປກາເສຍ຺ຍ, ອິຕໂຣ ຈ ສມາຘິສຠາວເມວາຕິ ທ຺ວິຘາ ຠິນ຺ນາ ຈິຕ຺ເຕກຄ຺ຄຕາ ອສາຘາຣຓາ ເຈວ ອປ຺ປວິສຍາ ຈາຕິ ອິຘ ອຸທ຺ເທສໍ ນ ອຣຫຕິ. ອຠິນ຺ນາປິ ວາ ຜສ຺ສາທີນໍ ວິຍ ປາກຏຕ຺ຕາຠາວໂຕ ອຎ຺ຎຘມ຺ມນິສ຺ສເຍນ ວຕ຺ຕພ຺ພໂຕ ຈ ສາ ຊີວິຕຎ຺ຈ ນ ອຣຫຕີຕິ ນ ອຸທ຺ທິຏ຺ຐາຕິ.

ມາຕິກາວຓ຺ຓນາ ນິຏ຺ຐິຕາ.