໒. ອພ຺ຠນ຺ຕຣມາຕິກາວຓ຺ຓນາ

໒. ‘‘ປຎ຺ຈກ຺ຂນ຺ຘາ’’ຕິອາທີຫິ ຣູປກ຺ຂນ຺ຘາທິປທານິ ທສ຺ສິຕານິ, ປຏິຈ຺ຈສມຸປ຺ປາທວຈເນນ ຈ ເຍສຸ ທ຺ວາທສສຸ ອງ຺ເຄສຸ ປຈ຺ເຈກໍ ປຏິຈ຺ຈສມຸປ຺ປາທສທ຺ໂທ ວຕ຺ຕຕິ, ຕທຕ຺ຖານິ ທ຺ວາທສ ປທານິ ທສ຺ສິຕານີຕິ ເຕສໍ ຕຖາທສ຺ສິຕານໍ ສຣູເປເນວ ທສ຺ສິຕານໍ ຜສ຺ສາທີນຎ຺ຈ ປທານໍ ວເສນ ອາຫ ‘‘ປຎ຺ຈວີສາຘິເກນ ປທສເຕນາ’’ຕິ. ຕຕ຺ຖ ກມ຺ມຸປປຕ຺ຕິກາມຠວາທີນໍ ອິຘ ວິຠຕ຺ຕານໍ ຠາວນຠວນຠາເວນ ຠເວ ວິຍ ໂສກາທີນໍ ຊຣາມຣຓສ຺ສ ວິຍ ອນິຏ຺ຐຕ຺ຕາ ຕນ຺ນິທານທຸກ຺ຂຠາເວນ ຈ ຊຣາມຣເຓ ອນ຺ໂຕຄຘຕາຍ ປຏິຈ຺ຈສມຸປ຺ປາທສ຺ສ ທ຺ວາທສປທຕາ ທຏ຺ຐພ຺ພາ. ເອຕ຺ຖ ຈ ປາຬິຍໍ ຠິນ຺ທິຕ຺ວາ ອວິສ຺ສຊ຺ຊິຕານມ຺ປິ ສຕິປຏ຺ຐານາທີນໍ ຠິນ຺ທິຕ຺ວາ ຄຫຓໍ ກໂຣນ຺ໂຕ ເຕສໍ ຠິນ຺ທິຕ຺ວາປິ ວິສ຺ສຊ຺ຊິຕພ຺ພຕໍ ທສ຺ເສຕີຕິ ເວທິຕພ຺ພໍ.

ນຍມາຕິກາທິກາ ລກ຺ຂຓມາຕິກນ຺ຕາ ມາຕິກາ ປກຣຓນ຺ຕຣາສາຘາຣຓຕາຍ ຘາຕຸກຖາຍ ມາຕິກາ ນາມ, ຕສ຺ສາ ອພ຺ຠນ຺ຕເຣ ວຸຕ຺ໂຕ ວິຠຊິຕພ຺ພານໍ ອຸທ຺ເທໂສ ອພ຺ຠນ຺ຕຣມາຕິກາ ນາມາຕິ ອິມມຕ຺ຖໍ ປກາເສນ຺ໂຕ ‘‘ອຍຎ຺ຫີ’’ຕິອາທິມາຫ. ຕຕ຺ຖ ເອວໍ ອວຕ຺ວາຕິ ຍຖາ ‘‘ສພ຺ພາປິ…ເປ… ມາຕິກາ’’ຕິ ອຍໍ ຘາຕຸກຖາມາຕິກໂຕ ພຫິທ຺ຘາ ວຸຕ຺ຕາ, ເອວໍ ອວຕ຺ວາຕິ ອຕ຺ໂຖ. ຘາຕຸກຖາຍ ອພ຺ຠນ຺ຕເຣເຍວາຕິ ຈ ຘາຕຸກຖາມາຕິກາຍ ອພ຺ຠນ຺ຕເຣເຍວາຕິ ອຕ຺ໂຖ ທຏ຺ຐພ຺ໂພ. ຕທາເວຓິກມາຕິກາອພ຺ຠນ຺ຕເຣ ຫິ ຐປິຕາ ຕສ຺ສາເຍວ ອພ຺ຠນ຺ຕເຣ ຐປິຕາຕິ ວຸຕ຺ຕາ. ອຖ ວາ ເອວໍ ອວຕ຺ວາຕິ ຍຖາ ‘‘ສພ຺ພາປິ…ເປ… ມາຕິກາ’’ຕິ ເອເຕນ ວຈເນນ ຘາຕຸກຖາໂຕ ພຫິຠູຕາ ກຸສລາທິອຣຓນ຺ຕາ ມາຕິກາ ປກຣຓນ຺ຕຣຄຕາ ວຸຕ຺ຕາ, ເອວໍ ອວຕ຺ວາຕິ ອຕ຺ໂຖ. ຘາຕຸກຖາຍ ອພ຺ຠນ຺ຕເຣເຍວາຕິ ຈ ອິມສ຺ສ ປກຣຓສ຺ສ ອພ຺ຠນ຺ຕເຣ ເອວ ສຣູປໂຕ ທສ຺ເສຕ຺ວາ ຐປິຕຕ຺ຕາຕິ ອຕ຺ໂຖ. ສພ຺ພສ຺ສ ອຠິຘມ຺ມສ຺ສ ມາຕິກາຍ ອສງ຺ຄຫິຕຕ຺ຕາ ວິກິຓ຺ຓຠາເວນ ປກິຓ຺ຓກຕາ ເວທິຕພ຺ພາ.