໓-໔. ອສ຺ສາຊານີຍສຸຕ຺ຕາທິວຓ຺ຓນາ

໑໓-໑໔. ຕຕິເຍ ສາເຐຍ຺ຍານີຕິ ສຐຕ຺ຕານິ. ເສສປເທສຸປິ ເອເສວ ນໂຍ. ຕານິ ປນສ຺ສ ສາເຐຍ຺ຍາທີນິ ກາຍຈິຕ຺ຕຸຊຸກຕາປຏິປກ຺ຂຠູຕາ ໂລຠສຫຄຕຈິຕ຺ຕຸປ຺ປາທສ຺ສ ປວຕ຺ຕິອາກາຣວິເສສາ. ຕຕ຺ຖ ຍສ຺ສ ກິສ຺ມິຎ຺ຈິເທວ ຐາເນ ຐາຕຸກາມສ຺ສ ສໂຕ ຍໍ ຐານໍ ມນຸສ຺ສານໍ ສປ຺ປຏິຠຍໍ, ປຸຣໂຕ ຄນ຺ຕ຺ວາ ຕເຖວ ສປ຺ປຏິຠຍຏ຺ຐາເນວ ຐສ຺ສາມີຕິ ນ ໂຫຕິ, ວຎ຺ຈນາຘິປ຺ປາຍຠາວໂຕ ຐາຕຸກາມຏ຺ຐາເນເຍວ ນິຂາຕຕ຺ຖມ຺ໂຠ ວິຍ ຈຕ຺ຕາໂຣ ປາເທ ນິຈ຺ຈາເລຕ຺ວາ ຕິຏ຺ຐຕິ, ອຍໍ ສໂຐ ນາມ, ອິມສ຺ສ ສາເຐຍ຺ຍສ຺ສ ປາກຏກຣຓໍ. ຕຖາ ຍສ຺ສ ກິສ຺ມິຎ຺ຈິເທວ ຐາເນ ນິວຕ຺ຕິຕ຺ວາ ຂນ຺ຘຄຕໍ ປາເຕຕຸກາມສ຺ສ ສໂຕ ຍໍ ຐານໍ ມນຸສ຺ສານໍ ສປ຺ປຏິຠຍໍ, ປຸຣໂຕ ຄນ຺ຕ຺ວາ ຕເຖວ ປາເຕສ຺ສາມີຕິ ນ ໂຫຕິ, ປາເຕຕຸກາມຏ຺ຐາເນເຍວ ນິວຕ຺ຕິຕ຺ວາ ປາເຕຕິ, ອຍໍ ກູໂຏ ນາມ. ຍສ຺ສ ກາເລນ ວາມໂຕ, ກາເລນ ທກ຺ຂິຓໂຕ, ກາເລນ ອຸຊຸມຄ຺ເຄເນວ ຈ ຄນ຺ຕຸກາມສ຺ສ ສໂຕ ຍໍ ຐານໍ ມນຸສ຺ສານໍ ສປ຺ປຏິຠຍໍ, ປຸຣໂຕ ຄນ຺ຕ຺ວາ ຕເຖວ ເອວໍ ກຣິສ຺ສາມີຕິ ນ ໂຫຕິ, ຍທິຈ຺ຉກໍ ຄນ຺ຕຸກາມຏ຺ຐາເນເຍວ ກາເລນ ວາມໂຕ, ກາເລນ ທກ຺ຂິຓໂຕ, ກາເລນ ອຸຊຸມຄ຺ຄໍ ຄຈ຺ຉຕິ, ຕຖາ ເລຓ຺ຑໍ ວາ ປສ຺ສາວໍ ວາ ວິສ຺ສຊ຺ເຊຕຸກາມສ຺ສ ອິທໍ ຐານໍ ສຸສມ຺ມຏ຺ຐໍ ອາກິຓ຺ຓມນຸສ຺ສໍ ຣມຓີຍໍ. ອິມສ຺ມິໍ ຐາເນ ເອວຣູປໍ ກາຕຸໍ ນ ຍຸຕ຺ຕໍ, ປຸຣໂຕ ຄນ຺ຕ຺ວາ ປຏິຈ຺ຉນ຺ນຏ຺ຐາເນ ກຣິສ຺ສາມີຕິ ນ ໂຫຕິ, ຕຕ຺ເຖວ ກໂຣຕິ, ອຍໍ ຊິມ຺ໂຫ ນາມ. ຍສ຺ສ ປນ ກິສ຺ມິຎ຺ຈິ ຐາເນ ມຄ຺ຄາ ອຸກ຺ກມ຺ມ ນິວຕ຺ຕິຕ຺ວາ ປຏິມຄ຺ຄໍ ອາໂຣຫິຕຸກາມສ຺ສ ສໂຕ ຍໍ ຐານໍ ມນຸສ຺ສານໍ ສປ຺ປຏິຠຍໍ, ປຸຣໂຕ ຄນ຺ຕ຺ວາ ຕຕ຺ເຖວ ເອວໍ ກຣິສ຺ສາມີຕິ ນ ໂຫຕິ, ປຏິມຄ຺ຄໍ ອາໂຣຫິຕຸກາມຏ຺ຐາເນເຍວ ມຄ຺ຄາ ອຸກ຺ກມ຺ມ ນິວຕ຺ຕິຕ຺ວາ ປຏິມຄ຺ຄໍ ອາໂຣຫຕິ, ອຍໍ ວງ຺ໂກ ນາມ. ອິຕິ ອິມໍ ຈຕຸພ຺ພິຘມ຺ປິ ກິຣິຍໍ ສນ຺ຘາເຍຕໍ ວຸຕ຺ຕໍ ‘‘ຍານິ ໂຂ ປນສ຺ສ ຕານິ ສາເຐຍ຺ຍານິ…ເປ… ອາວິກຕ຺ຕາ ໂຫຕີ’’ຕິ. ຈຕຸຕ຺ເຖ ນຕ຺ຖິ ວຕ຺ຕພ຺ພໍ.

ອສ຺ສາຊານີຍສຸຕ຺ຕາທິວຓ຺ຓນາ ນິຏ຺ຐິຕາ.