໑-໘. ປຐມວິນຍຘຣສຸຕ຺ຕາທິວຓ຺ຓນາ

໗໕-໘໒. ອຏ຺ຐມສ຺ສ ປຐມໍ ທຸຕິຍຎ຺ຈ ອຸຕ຺ຕານຕ຺ຖເມວ. ຕຕິເຍ ວິນຍລກ຺ຂເຓ ປຕິຏ຺ຐິໂຕ ລຊ຺ຊິຠາເວນ ວິນຍລກ຺ຂເຓ ຐິໂຕ ໂຫຕິ. ອລຊ຺ຊີ (ປາຣາ. ອຏ຺ຐ. ໑.໔໕) ຫິ ພຫຸສ຺ສຸໂຕປິ ສມາໂນ ລາຠຄຣຸກຕາຍ ຕນ຺ຕິໍ ວິສໍວາເທຕ຺ວາ ອຸທ຺ຘມ຺ມໍ ອຸພ຺ພິນຍໍ ສຕ຺ຖຸສາສນໍ ທີເປຕ຺ວາ ສາສເນ ມຫນ຺ຕໍ ອຸປທ຺ທວໍ ກໂຣຕິ, ສງ຺ຆເຠທມ຺ປິ ສງ຺ຆຣາຊິມ຺ປິ ອຸປ຺ປາເທຕິ. ລຊ຺ຊີ ປນ ກຸກ຺ກຸຈ຺ຈໂກ ສິກ຺ຂາກາໂມ ຊີວິຕເຫຕຸປິ ຕນ຺ຕິໍ ອວິສໍວາເທຕ຺ວາ ຘມ຺ມເມວ ວິນຍເມວ ຈ ທີເປຕິ, ສຕ຺ຖຸສາສນໍ ຄຣຸໍ ກຕ຺ວາ ຐເປຕິ. ເອວໍ ໂຍ ລຊ຺ຊີ, ໂສ ວິນຍໍ ອຊຫນ຺ໂຕ ອໂວກ຺ກມນ຺ໂຕວ ລຊ຺ຊິຠາເວນ ວິນຍລກ຺ຂເຓ ຐິໂຕ ໂຫຕິ ປຕິຏ຺ຐິໂຕ.

ອສໍຫີໂຣຕິ ເອຕ຺ຖ ສໍຫີໂຣ ນາມ ໂຍ ປາຬິຍໍ ວາ ອຏ຺ຐກຖາຍໍ ວາ ເຫຏ຺ຐາ ວາ ອຸປຣິໂຕ ວາ ປທປຏິປາຏິຍາ ວາ ປຸຈ຺ຉິຍມາໂນ ວິຕ຺ຖຸນຕິ ວິປ຺ຜນ຺ທຕິ, ສຓ຺ຐາຕຸໍ ນ ສກ຺ໂກຕິ, ຍໍ ຍໍ ປເຣນ ວຸຈ຺ຈຕິ, ຕໍ ຕໍ ອນຸຊານາຕິ, ສກວາທໍ ຉຑ຺ເຑຕ຺ວາ ປຣວາທໍ ຄຓ຺ຫາຕິ. ໂຍ ປນ ປາຬິຍໍ ວາ ອຏ຺ຐກຖາຍໍ ວາ ເຫຏ຺ຐຸປຣິຍວເສນ ວາ ປທປຏິປາຏິຍາ ວາ ປຸຈ຺ຉິຍມາໂນ ນ ວິຕ຺ຖຸນຕິ ນ ວິປ຺ຜນ຺ທຕິ, ເອເກກໂລມໍ ສຓ຺ຑາເສນ ຄຓ຺ຫນ຺ໂຕ ວິຍ ‘‘ເອວໍ ມຍໍ ວທາມ, ເອວໍ ໂນ ອາຈຣິຍາ ວທນ຺ຕີ’’ຕິ ວິສ຺ສຊ຺ເຊຕິ. ຍມ຺ຫິ ປາຬິ ຈ ປາຬິວິນິຈ຺ຉໂຍ ຈ ສຸວຓ຺ຓຠາຊເນ ປກ຺ຂິຕ຺ຕສີຫວສາ ວິຍ ປຣິກ຺ຂຍໍ ປຣິຍາທານໍ ອຄຈ຺ຉນ຺ໂຕ ຕິຏ຺ຐຕິ, ອຍໍ ວຸຈ຺ຈຕິ ອສໍຫີໂຣ. ຍສ຺ມາ ປນ ເອວຣູໂປ ຍໍ ຍໍ ປເຣນ ວຸຈ຺ຈຕິ, ຕໍ ຕໍ ນານຸຊານາຕິ, ອຕ຺ຕນາ ສຸວິນິຈ຺ຉິນິຕໍ ກຕ຺ວາ ຄຫິຕໍ ອວິປຣີຕມຕ຺ຖໍ ນ ວິສ຺ສຊ຺ເຊຕິ, ຕສ຺ມາ ວຸຕ຺ຕໍ ‘‘ນ ສກ຺ໂກຕິ ຄຫິຕຄ຺ຄຫຓໍ ວິສ຺ສຊ຺ຊາເປຕຸ’’ນ຺ຕິ. ຈຕຸຕ຺ຖາທີນິ ສຸວິຎ຺ເຎຍ຺ຍານິ.

ປຐມວິນຍຘຣສຸຕ຺ຕາທິວຓ຺ຓນາ ນິຏ຺ຐິຕາ.