໓. ນິສ຺ສາຣຓີຍສຸຕ຺ຕວຓ຺ຓນາ

໑໓. ຕຕິເຍ ວຑ຺ຒິຕາຕິ ຠາວນາປາຣິປູຣິວເສນ ປຣິພ຺ຣູຫິຕາ. ປຸນປ຺ປຸນໍ ກຕາຕິ ຠາວນາຍ ພຫຸລີກຣເຓນ ອປຣາປຣໍ ປວຕ຺ຕິຕາ. ຍຸຕ຺ຕຍານສທິສາ ກຕາຕິ ຍຖາ ຍຸຕ຺ຕມາຊຎ຺ຎຍານໍ ເຉເກນ ສາຣຖິນາ ອຘິຏ຺ຐິຕໍ ຍຖາຣຸຈິ ປວຕ຺ຕຕິ, ເອວໍ ຍຖາຣຸຈິ ປວຕ຺ຕິຣຫໍ ຄຫິຕາ. ວຕ຺ຖຸກຕາຕິ ວາ ອຘິຏ຺ຐານຏ຺ເຐນ ວຕ຺ຖຸ ວິຍ ກຕາ, ສພ຺ພໂສ ອຸປກ຺ກິເລສວິໂສຘເນນ ອິທ຺ຘິວິເສສຕາຍ ປວຕ຺ຕິຏ຺ຐານຠາວໂຕ ສຸວິໂສຘິຕປຣິສ຺ສຍວຕ຺ຖຸ ວິຍ ກຕາຕິ ວຸຕ຺ຕໍ ໂຫຕິ. ອຘິຏ຺ຐິຕາຕິ ປຏິປກ຺ຂທູຣີຠາວໂຕ ສຸຠາວິຕຠາເວນ ຕໍຕໍອຘິຏ຺ຐານໂຍຄ຺ຍຕາຍ ຐປິຕາ. ສມນ຺ຕໂຕ ຈິຕາຕິ ສພ຺ພຠາເຄນ ຠາວນູປຈຍໍ ຄມິຕາ. ເຕນາຫ ‘‘ອຸປຈິຕາ’ຕິ. ສຸຏ຺ຐຸ ສມາຣທ຺ຘາຕິ ອິທ຺ຘິຠາວນາສິຂາປ຺ປຕ຺ຕິຍາ ສມ຺ມເທວ ສມ຺ຠາວິຕາ. ອຠູຕພ຺ຍາກຣຓໍ ພ຺ຍາກໂຣຕີຕິ ‘‘ເມຕ຺ຕາ ຫິ ໂຂ ເມ ເຈໂຕວິມຸຕ຺ຕິ ຠາວິຕາ’’ຕິອາທິນາ ອຕ຺ຕນິ ອວິຊ຺ຊມານຄຸຓາຠິພ຺ຍາຫາຣໍ ພ຺ຍາຫຣຕິ. ເຈໂຕວິມຸຕ຺ຕິສທ຺ທໍ ອເປກ຺ຂິຕ຺ວາ ‘‘ນິສ຺ສຏາ’’ຕິ ວຸຕ຺ຕໍ. ປຸນ ພ຺ຍາປາໂທ ນຕ຺ຖີຕິ ອິທານິ ມມ ພ຺ຍາປາໂທ ນາມ ສພ຺ພໂສ ນຕ຺ຖີຕິ ຎຕ຺ວາ.

ພລວວິປສ຺ສນາຕິ ຠຍຕຸປຏ຺ຐາເນ ຎາຓໍ, ອາທີນວານຸປສ຺ສເນ ຎາຓໍ ມຸຈ຺ຈິຕຸກມ຺ຍຕາຎາຓໍ, ຠງ຺ຄຎາຓນ຺ຕິ ຈຕຸນ຺ນໍ ຎາຓານໍ ອຘິວຈນໍ. ເຍສໍ ນິມິຕ຺ຕານໍ ອຠາເວນ ອຣຫຕ຺ຕຜລສມາປຕ຺ຕິຍາ ອນິມິຕ຺ຕຕາ, ຕໍ ທສ຺ເສຕຸໍ ‘‘ສາ ຫີ’’ຕິອາທິ ວຸຕ຺ຕໍ. ຕຕ຺ຖ ຣາຄສ຺ສ ນິມິຕ຺ຕໍ, ຣາໂຄ ເອວ ວາ ນິມິຕ຺ຕໍ ຣາຄນິມິຕ຺ຕໍ. ອາທິ-ສທ຺ເທນ ໂທສນິມິຕ຺ຕາທີນໍ ສງ຺ຄໂຫ ທຏ຺ຐພ຺ໂພ. ຣູປເວທນາທິສງ຺ຂາຣນິມິຕ຺ຕໍ ຣູປນິມິຕ຺ຕາທິ. ເຕສໍເຍວ ນິຈ຺ຈາທິວເສນ ອຸປຏ຺ຐານໍ ນິຈ຺ຈນິມິຕ຺ຕາທິ. ຕຍິທໍ ນິມິຕ຺ຕໍ ຍສ຺ມາ ສພ຺ເພນ ສພ຺ພໍ ອຣຫຕ຺ຕຜເລ ນຕ຺ຖິ, ຕສ຺ມາ ວຸຕ຺ຕໍ ‘‘ສາ ຫິ…ເປ… ອນິມິຕ຺ຕາ’’ຕິ. ນິມິຕ຺ຕໍ ອນຸສ຺ສຣຕິ ອນຸຄຈ຺ຉຕິ ອາຣພ຺ຠ ປວຕ຺ຕຕິ ສີເລນາຕິ ນິມິຕ຺ຕານຸສາຣີ. ເຕນາຫ ‘‘ວຸຕ຺ຕປ຺ປເຠທໍ ນິມິຕ຺ຕໍ ອນຸສຣຓສຠາວ’’ນ຺ຕິ.

ອສ຺ມິມາໂນຕິ ‘‘ອສ຺ມີ’’ຕິ ປວຕ຺ໂຕ ອຕ຺ຕວິສໂຍ ມາໂນ. ອຍໍ ນາມ ອຫມສ຺ມີຕິ ຣູປລກ຺ຂໂຓ ເວທນາທີສຸ ວາ ອຎ຺ຎຕຣລກ຺ຂໂຓ ອຍໍ ນາມ ອຕ຺ຕາ ອຫໍ ອສ຺ມີຕິ. ອສ຺ມິມາໂນ ສມຸຄ຺ຆາຕີຍຕິ ເອເຕນາຕິ ອສ຺ມິມານສມຸຄ຺ຆາໂຕ, ອຣຫຕ຺ຕມຄ຺ໂຄ. ປຸນ ອສ຺ມິມາໂນ ນຕ຺ຖີຕິ ຕສ຺ສ ອນຸປ຺ປຕ຺ຕິຘມ຺ມຕາປາທນໍ ກິຕ຺ເຕນ຺ໂຕ ສມຸຄ຺ຆາຕຕ຺ຕເມວ ວິຠາເວຕິ.

ນິສ຺ສາຣຓີຍສຸຕ຺ຕວຓ຺ຓນາ ນິຏ຺ຐິຕາ.