໕-໑໓. ມຈ຺ຉຣິນີສຸຕ຺ຕາທິວຓ຺ຓນາ

໑໑໕-໑໒໓. ປຎ຺ຈເມ ອາວາສມຈ຺ຉຣິຍາທີນິ ປຎ຺ຈ ອິຘ ຠິກ຺ຂຸນິຍາ ວເສນ ອາຄຕານິ, ຠິກ຺ຂຸສ຺ສ ວເສນປິ ຕານິ ເວທິຕພ຺ພານິ. ອາວາສມຈ຺ຉຣິເຍນ ຫິ ສມນ຺ນາຄໂຕ ຠິກ຺ຂຸ ອາຄນ຺ຕຸກໍ ທິສ຺ວາ ‘‘ເອຕ຺ຖ ເຈຕິຍສ຺ສ ວາ ສງ຺ຆສ຺ສ ວາ ປຣິກ຺ຂາໂຣ ຐປິໂຕ’’ຕິອາທີນິ ວຕ຺ວາ ສງ຺ຆິກອາວາສໍ ນ ເທຕິ. ກຸລມຈ຺ຉຣິເຍນ ສມນ຺ນາຄໂຕ ຠິກ຺ຂຸ ເຕຫິ ເຕຫິ ກາຣເຓຫິ ອາທີນວໍ ທສ຺ເສຕ຺ວາ ອຕ຺ຕໂນ ອຸປຏ຺ຐາເກ ກຸເລ ອຎ຺ເຎສໍ ປເວສມ຺ປິ ນິວາເຣຕິ. ລາຠມຈ຺ຉຣິເຍນ ສມນ຺ນາຄໂຕ ສງ຺ຆິກມ຺ປິ ລາຠໍ ມຈ຺ຉຣາຍນ຺ໂຕ ຍຖາ ອຎ຺ເຎ ນ ລຠນ຺ຕິ, ເອວໍ ກໂຣຕິ ອຕ຺ຕນາ ວິສມນິສ຺ສິຕຕາຍ ພລວນິສ຺ສິຕຕາຍ ຈ. ວຓ຺ຓມຈ຺ຉຣິເຍນ ສມນ຺ນາຄໂຕ ອຕ຺ຕໂນ ວຓ຺ຓໍ ວຓ຺ເຓຕິ, ປເຣສໍ ວຓ຺ເຓ ‘‘ກິໍ ວຓ຺ໂຓ ເອໂສ’’ຕິ ຕໍ ຕໍ ໂທສໍ ວທຕິ. ວຓ຺ໂຓຕິ ເຈຕ຺ຖ ສຣີຣວຓ຺ໂຓປິ, ຄຸຓວຓ຺ໂຓປິ ເວທິຕພ຺ໂພ.

ຘມ຺ມມຈ຺ຉຣິເຍນ ສມນ຺ນາຄໂຕ – ‘‘ອິມໍ ຘມ຺ມໍ ປຣິຍາປຸຓິຕ຺ວາ ເອໂສ ມໍ ອຠິຠວິສ຺ສຕີ’’ຕິ ອຎ຺ຎສ຺ສ ນ ເທຕິ. ໂຍ ປນ – ‘‘ອຍໍ ອິມໍ ຘມ຺ມໍ ອຸຄ຺ຄເຫຕ຺ວາ ອຎ຺ຎຖາ ອຕ຺ຖໍ ວິປຣິວຕ຺ເຕຕ຺ວາ ນາເສສ຺ສຕີ’’ຕິ ຘມ຺ມນຸຄ຺ຄເຫນ ວາ – ‘‘ອຍໍ ອິມໍ ຘມ຺ມໍ ອຸຄ຺ຄເຫຕ຺ວາ ອຸທ຺ຘໂຕ ອຸນ຺ນໂຬ ອວູປສນ຺ຕຈິຕ຺ໂຕ ອປຸຎ຺ຎໍ ປສວິສ຺ສຕີ’’ຕິ ປຸຄ຺ຄລານຸຄ຺ຄເຫນ ວາ ນ ເທຕິ, ນ ຕໍ ມຈ຺ຉຣິຍໍ. ຘມ຺ໂມຕິ ເຈຕ຺ຖ ປຣິຍຕ຺ຕິຘມ຺ໂມ ອຘິປ຺ເປໂຕ. ປຏິເວຘຘມ຺ໂມ ຫິ ອຣິຍານໍເຍວ ໂຫຕິ, ເຕ ຈ ນໍ ນ ມຈ຺ຉຣາຍນ຺ຕິ ມຈ຺ຉຣິຍສ຺ສ ສພ຺ພໂສ ປຫີນຕ຺ຕາຕິ ຕສ຺ສ ອສມ຺ຠໂວ ເອວ. ຕຕ຺ຖ ອາວາສມຈ຺ຉຣິເຍນ ໂລຫເຄເຫ ປຈ຺ຈຕິ, ຍກ຺ໂຂ ວາ ເປໂຕ ວາ ຫຸຕ຺ວາ ຕສ຺ເສວ ອາວາສສ຺ສ ສງ຺ກາຣໍ ສີເສນ ອຸກ຺ຂິປິຕ຺ວາ ຈຣຕິ. ກຸລມຈ຺ຉຣິເຍນ ອປ຺ປໂຠໂຄ ໂຫຕິ. ລາຠມຈ຺ຉຣິເຍນ ຄູຖນິຣເຍ ນິພ຺ພຕ຺ຕຕິ, ສງ຺ຆສ຺ສ ວາ ຄຓສ຺ສ ວາ ລາຠໍ ມຈ຺ຉຣາຍິຕ຺ວາ ປຸຄ຺ຄລິກປຣິໂຠເຄນ ວາ ປຣິຠຸຎ຺ຊິຕ຺ວາ ຍກ຺ໂຂ ວາ ເປໂຕ ວາ ມຫາອຊຄໂຣ ວາ ຫຸຕ຺ວາ ນິພ຺ພຕ຺ຕຕິ. ວຓ຺ຓມຈ຺ຉຣິເຍນ ຠເວສຸ ນິພ຺ພຕ຺ຕສ຺ສ ວຓ຺ໂຓ ນາມ ນ ໂຫຕິ. ຘມ຺ມມຈ຺ຉຣິເຍນ ກຸກ຺ກຸຬນິຣເຍ ນິພ຺ພຕ຺ຕຕິ. ຉຏ຺ຐາທີນິ ອຸຕ຺ຕານຕ຺ຖາເນວ.

ມຈ຺ຉຣິນີສຸຕ຺ຕາທິວຓ຺ຓນາ ນິຏ຺ຐິຕາ.

ອນ຺ຘກວິນ຺ທວຄ຺ຄວຓ຺ຓນາ ນິຏ຺ຐິຕາ.