໘. ທກ຺ຂິຓສຸຕ຺ຕວຓ຺ຓນາ

໗໘. ອຏ຺ຐເມ ທານສງ຺ຂາຕາຍ ທກ຺ຂິຓາຍາຕິ ເທຍ຺ຍຘມ຺ມສງ຺ຂາຕາຍ ທກ຺ຂິຓາຍ. ວິສຸທ຺ຘິ ນາມ ມຫາຊຸຕິກຕາ. ສາ ປນ ມຫປ຺ຜລຕາຍ ເວທິຕພ຺ພາຕິ ອາຫ ‘‘ມຫປ຺ຜລຠາເວນາ’’ຕິ. ວິສຸຊ຺ຌຕີຕິ ນ ກິລິສ຺ສຕິ, ອມລິນາ ມຫາຊຸຕິກາ ມຫາວິປ຺ຜາຣາ ໂຫຕີຕິ ອຕ຺ໂຖ. ສຸຈິຘມ຺ໂມຕິ ຣາຄາທິອສຸຈິວິຘມເນນ ສຸຈິສຠາໂວ. ລາມກຘມ຺ໂມຕິ ຫີນສຠາໂວ ປາປກິຣິຍາຍ. ອກຸສລຘມ຺ມາ ຫິ ເອກນ຺ຕນິຫີນາ. ຊູຊໂກ ສີລວາ ກລ຺ຍາຓຘມ຺ໂມ ນ ໂຫຕິ, ຕສ຺ສ ມຫາໂພຘິສຕ຺ຕສ຺ສ ອຕ຺ຕໂນ ປຸຕ຺ຕທານໍ ທານປາຣມິຍາ ມຕ຺ຖກໍ ຄຓ຺ຫນ຺ຕໍ ມຫາປຖວິກມ຺ປນສມຕ຺ຖໍ ຊາຕໍ. ສ຺ວາຍໍ ທາຍກຄຸໂຓຕິ ອາຫ ‘‘ເວສ຺ສນ຺ຕຣມຫາຣາຊາ ກເຖຕພ຺ໂພ’’ຕິອາທິ. ອຸທ຺ຘຣຕີຕິ ພຫຸລໍ ປາປກມ຺ມວເສນ ລທ຺ຘພ຺ພວິນິປາຕໂຕ ອຸທ຺ຘຣຕິ, ຕສ຺ມາ ນຕ຺ຖິ ມຍ຺ຫໍ ກິຎ຺ຈິ ຈິຕ຺ຕສ຺ສ ອຎ຺ຎຕ຺ຖຕ຺ຕນ຺ຕິ ອຘິປ຺ປາໂຍ.

ເປຕທກ຺ຂິຓນ຺ຕິ ເປເຕ ອຸທ຺ທິສ຺ສ ທາຕພ຺ພທກ຺ຂິຓໍ. ປາປິຕກາເລເຍວາຕິ ‘‘ອິທໍ ທານໍ ອສຸກສ຺ສ ເປຕສ຺ສ ໂຫຕູ’’ຕິ ຕໍອຸທ຺ທິສນວເສນ ປຕ຺ຕິຍາ ປາປິຕກາເລເຍວ. ອສ຺ສາຕິ ເປຕສ຺ສ. ປາປຸຓີຕິ ຜລສມ຺ປຕ຺ຕິລຠາປນວເສນ ປາປຸຓິ. ອຍຎ຺ຫິ ເປເຕ ອຸທ຺ທິສ຺ສ ທາເນ ຘມ຺ມຕາ. ຕທາ ໂກສລຣຎ຺ໂຎ ປຣິຈ຺ຈາຄວເສນ ອຕິວິຍ ທານຊ຺ຌາສຍຕໍ ພຸທ຺ຘປ຺ປມຸຂສ຺ສ ຈ ສງ຺ຆສ຺ສ ອຸກ຺ກໍສຄຕຄຸຓວິສິຏ຺ຐຕໍ ສນ຺ຘາຍາຫ ‘‘ອສທິສທານໍ ກເຖຕພ຺ພ’’ນ຺ຕິ.

ທກ຺ຂິຓສຸຕ຺ຕວຓ຺ຓນາ ນິຏ຺ຐິຕາ.