໑-໑໐. ສິກ຺ຂາປທສຸຕ຺ຕາທິວຓ຺ຓນາ

໒໐໑-໒໑໐. ປຎ຺ຈມສ຺ສ ປຐເມ ອສປ຺ປຸຣິໂສຕິ ລາມກປຸຣິໂສ. ປາຓໍ ອຕິປາເຕຕີຕິ ປາຓາຕິປາຕີ. ອທິນ຺ນໍ ອາທິຍຕີຕິ ອທິນ຺ນາທາຍີ. ກາເມສຸ ມິຈ຺ຉາ ຈຣຕີຕິ ກາເມສຸມິຈ຺ຉາຈາຣີ. ມຸສາ ວທຕີຕິ ມຸສາວາທີ. ສຸຣາເມຣຍມຊ຺ຊປມາເທ ຕິຏ຺ຐຕີຕິ ສຸຣາເມຣຍມຊ຺ຊປມາທຏ຺ຐາຍີ. ປາຓາຕິປາເຕ ສມາທເປຕີຕິ ຍຖາ ປາຓໍ ອຕິປາເຕຕິ, ຕຖາ ນໍ ຕຕ຺ຖ ຄຫຓໍ ຄຓ຺ຫາເປຕິ. ເສເສສຸປິ ເອເສວ ນໂຍ. ອຍໍ ວຸຈ຺ຈຕີຕິ ອຍໍ ເອວຣູໂປ ປຸຄ຺ຄໂລ ຍສ຺ມາ ສຍໍກເຕນ ຈ ທຸສ຺ສີລ຺ເຍນ ສມນ຺ນາຄໂຕ, ຍຎ຺ຈ ສມາທປິເຕນ ກຕໍ, ຕໂຕ ອຸປຑ຺ຒສ຺ສ ທາຍາໂທ, ຕສ຺ມາ ‘‘ອສປ຺ປຸຣິເສນ ອສປ຺ປຸຣິສຕໂຣ’’ຕິ ວຸຈ຺ຈຕິ. ສປ຺ປຸຣິໂສຕິ ອຸຕ຺ຕມປຸຣິໂສ. ສປ຺ປຸຣິເສນ ສປ຺ປຸຣິສຕໂຣຕິ ອຕ຺ຕນາ ຈ ກເຕນ ສຸສີລ຺ເຍນ ສມນ຺ນາຄຕຕ຺ຕາ ຍຎ຺ຈ ສມາທປິໂຕ ກໂຣຕິ, ຕໂຕ ອຸປຑ຺ຒສ຺ສ ທາຍາທຕ຺ຕາ ອຸຕ຺ຕມປຸຣິເສນ ອຸຕ຺ຕມປຸຣິສຕໂຣ. ເອຕ຺ຖ ຈ ປເຣນ ກຕໍ ທຸສ຺ສີລ຺ຍໍ ສຸສີລ຺ຍໍ ວາ ອາຓຕ຺ຕິຍາ ອຕ຺ຕນາ ຈ ວຈິປ຺ປໂຍເຄນ ກຕນ຺ຕິ ອາຓາປນວເສນ ປສຸຕປາປສ຺ສ ປຸຎ຺ຎສ຺ສ ວາ ທາຍາໂທ ‘‘ຕໂຕ ອຸປຑ຺ຒສ຺ສ ທາຍາໂທ’’ຕິ ວຸຕ຺ໂຕ. ທຸຕິຍາທີນິ ອຸຕ຺ຕານຕ຺ຖາເນວ.

ສິກ຺ຂາປທສຸຕ຺ຕາທິວຓ຺ຓນາ ນິຏ຺ຐິຕາ.

ສປ຺ປຸຣິສວຄ຺ຄວຓ຺ຓນາ ນິຏ຺ຐິຕາ.

໒໑໑-໒໒໐. ທຸຕິໂຍ ປຣິສາວຄ຺ໂຄ ອຸຕ຺ຕານຕ຺ໂຖເຍວ.