(໑໔) ໔. ປຸຄ຺ຄລວຄ຺ໂຄ

໑. ສໍໂຍຊນສຸຕ຺ຕວຓ຺ຓນາ

໑໓໑. ຈຕຸຕ຺ຖສ຺ສ ປຐເມ ອຸປປຕ຺ຕິປ຺ປຏິລາຠໍ ສໍວຕ຺ຕນິການີຕິ ອຸປປຕ຺ຕິປຏິລາຠິຍານິ. ຠວປຏິລາຠິຍານີຕິ ເອຕ຺ຖາປິ ເອເສວ ນໂຍ. ເຍຫີຕິ ເຍຫິ ສໍໂຍຊເນຫິ ເຫຕຸຠູເຕຫິ, ກຣຓຠູເຕຫິ ວາ. ນນຸ ຈ ໂສຕາປນ຺ນສ຺ສປິ ໂອຣມ຺ຠາຄິຍານິ ສໍໂຍຊນານິ ອປ຺ປຫີນານິ, ກສ຺ມາ ປນ ສກທາຄາມີເຍວ ອິຘ ຄຫິໂຕຕິ ອາຫ ‘‘ສກທາຄາມິສ຺ສາຕິ ອິທໍ ອປ຺ປຫີນສໍໂຍຊເນສຸ ອຣິເຍສຸ ອຸຕ຺ຕມໂກຏິຍາ ຄຫິຕ’’ນ຺ຕິ. ຕຕ຺ຖ ອປ຺ປຫີນສໍໂຍຊເນສູຕິ ອປ຺ປຫີນໂອຣມ຺ຠາຄິຍສໍໂຍຊເນສຸ. ອຸຕ຺ຕມໂກຏິຍາ ຄຫິຕນ຺ຕິ ອຸກ຺ກຏ຺ຐປຣິຈ຺ເຉເທນ ຄຫິຕໍ. ສກທາຄາມິໂຕ ປຣຎ຺ຫິ ອປ຺ປຫີນໂອຣມ຺ຠາຄິຍສໍໂຍຊໂນ ອຣິໂຍ ນາມ ນຕ຺ຖິ. ນນຸ ຈ ສກທາຄາມິສ຺ສ ປຫີນານິປິ ໂອຣມ຺ຠາຄິຍານິ ສໍໂຍຊນານິ ອຕ຺ຖິ ທິຏ຺ຐິວິຈິກິຈ຺ຉາສີລພ຺ພຕປຣາມາສສໍໂຍຊນານໍ ປຫີນຕ຺ຕາ, ຕສ຺ມາ ‘‘ໂອຣມ຺ຠາຄິຍານິ ສໍໂຍຊນານິ ອປ຺ປຫີນານີ’’ຕິ ກສ຺ມາ ວຸຕ຺ຕນ຺ຕິ ອາຫ ‘‘ໂອຣມ຺ຠາຄິເຍສຸ ຈ ອປ຺ປຫີນໍ ອຸປາທາຍາ’’ຕິອາທິ. ຍສ຺ມາ ກາມຣາຄພ຺ຍາປາທສໍໂຍຊນານິ ສກທາຄາມິສ຺ສ ອປ຺ປຫີນານິ, ຕສ຺ມາ ຕານິ ອປ຺ປຫີນານິ ອຸປາທາຍ ‘‘ໂອຣມ຺ຠາຄິຍານິ ສໍໂຍຊນານິ ອປ຺ປຫີນານີ’’ຕິ ວຸຕ຺ຕໍ, ນ ສພ຺ເພສໍ ອປ຺ປຫີນຕ຺ຕາຕິ ອຘິປ຺ປາໂຍ.

ສໍໂຍຊນສຸຕ຺ຕວຓ຺ຓນາ ນິຏ຺ຐິຕາ.

໒. ປຏິຠານສຸຕ຺ຕວຓ຺ຓນາ

໑໓໒. ທຸຕິເຍ ປຏິຠານໍ ວຸຈ຺ຈຕິ ຎາຓມ຺ປິ ຎາຓສ຺ສ ອຸປຏ຺ຐິຕວຈນມ຺ປິ, ຕໍ ອິຘ ອຘິປ຺ເປຕໍ, ອຕ຺ຖຍຸຕ຺ຕໍ ກາຣຓຍຸຕ຺ຕຎ຺ຈ ປຏິຠານມສ຺ສາຕິ ຍຸຕ຺ຕປ຺ປຏິຠາໂນ. ປຸຈ຺ຉານນ຺ຕຣເມວ ສີຆໍ ພ຺ຍາກາຕຸໍ ອສມຕ຺ຖຕາຍ ໂນມຸຕ຺ຕປ຺ປຏິຠານມສ຺ສາຕິ ໂນມຸຕ຺ຕປ຺ປຏິຠາໂນ. ອິມິນາ ນເຍນ ເສສາ ເວທິຕພ຺ພາ. ເອຕ຺ຖ ປນ ປຐໂມ ກຎ຺ຈິ ກາລໍ ວີມໍສິຕ຺ວາ ຍຸຕ຺ຕເມວ ເປກ຺ຂຕິ ຕິປິຏກຈູຬນາຄຕ຺ເຖໂຣ ວິຍ. ໂສ ປນ ປຎ຺ຫໍ ປຸຏ຺ໂຐ ປຣິຄ຺ຄເຫຕ຺ວາ ຍຸຕ຺ຕປ຺ປຕ຺ຕກາຣຓເມວ ກເຖຕິ. ທຸຕິໂຍ ປຸຈ຺ຉານນ຺ຕຣເມວ ເຍນ ວາ ເຕນ ວາ ວຈເນນ ປຏິພາຫຕິ, ວີມໍສິຕ຺ວາປິ ຈ ຍຸຕ຺ຕໍ ນ ປກ຺ເຂຕິ ຈຕຸນິກາຍິກປິຓ຺ຑຕິສ຺ສຕ຺ເຖໂຣ ວິຍ. ໂສ ປນ ປຎ຺ຫໍ ປຸຏ຺ໂຐ ປຎ຺ຫປຣິໂຍສານມ຺ປິ ນາຄເມຕິ, ຍໍ ວາ ຕໍ ວາ ກເຖຕິເຍວ, ວຈນຕ຺ຖໍ ປນສ຺ສ ວີມໍສິຍມານໍ ກຕ຺ຖຈິ ນ ລຄຕິ. ຕຕິໂຍ ປຸຈ຺ຉາສມກາລເມວ ຍຸຕ຺ຕໍ ເປກ຺ຂຕິ, ຕໍຂຓໍເຍວ ຈ ນໍ ພ຺ຍາກໂຣຕິ ຕິປິຏກຈູຬາຠຍຕ຺ເຖໂຣ ວິຍ. ໂສ ປນ ປຎ຺ຫໍ ປຸຏ຺ໂຐ ສີຆເມວ ກເຖຕິ, ຍຸຕ຺ຕປ຺ປຕ຺ຕກາຣໂຓ ຈ ໂຫຕິ. ຈຕຸຕ຺ໂຖ ປຸຏ຺ໂຐ ສມາໂນ ເນວ ຍຸຕ຺ຕໍ ເປກ຺ຂຕິ, ນ ເຍນ ວາ ເຕນ ວາ ປຏິພາຫິຕຸໍ ສກ຺ໂກຕິ, ຕິພ຺ພນ຺ຘກາຣນິມຸຄ຺ໂຄ ວິຍ ໂຫຕິ ລາຬຸທາຍິຕ຺ເຖໂຣ ວິຍ.

ປຏິຠານສຸຕ຺ຕວຓ຺ຓນາ ນິຏ຺ຐິຕາ.

໓-໔. ອຸຄ຺ຆຏິຕຎ຺ຎູສຸຕ຺ຕາທິວຓ຺ຓນາ

໑໓໓-໔. ຕຕິເຍ ອຸຄ຺ຆຏິຕຎ຺ຎູຕິ ເອຕ຺ຖ ອຸຄ຺ຆຏນໍ ນາມ ຎາຓຸຄ຺ຆຏນໍ, ຎາເຓນ ອຸຄ຺ຆຏິຕມຕ຺ເຕເຍວ ຊານາຕີຕິ ອຕ຺ໂຖ. ສຫ ອຸທາຫຏເວລາຍາຕິ ອຸທາຫາເຣ ອຸທາຫຏມຕ຺ເຕເຍວ. ຘມ຺ມາຠິສມໂຍ ໂຫຕີຕິ ຈຕຸສຈ຺ຈຘມ຺ມສ຺ສ ຎາເຓນ ສທ຺ຘິໍ ອຠິສມໂຍ. ອຍໍ ວຸຈ຺ຈຕີຕິ ອຍໍ ‘‘ຈຕ຺ຕາໂຣ ສຕິປຏ຺ຐານາ’’ຕິອາທິນາ (ວິຠ. ໓໕໕) ນເຍນ ສໍຂິຕ຺ເຕນ ມາຕິກາຍ ຐປິຍມານາຍ ເທສນານຸສາເຣນ ຎາຓໍ ເປເສຕ຺ວາ ອຣຫຕ຺ຕໍ ຄຓ຺ຫິຕຸໍ ສມຕ຺ໂຖ ປຸຄ຺ຄໂລ ‘‘ອຸຄ຺ຆຏິຕຎ຺ຎູ’’ຕິ ວຸຈ຺ຈຕິ. ວິປຎ຺ຈິຕໍ ວິຕ຺ຖາຣິຕເມວ ອຕ຺ຖໍ ຊານາຕີຕິ ວິປຎ຺ຈິຕຎ຺ຎູ. ອຍໍ ວຸຈ຺ຈຕີຕິ ອຍໍ ສໍຂິຕ຺ເຕນ ມາຕິກໍ ຐເປຕ຺ວາ ວິຕ຺ຖາເຣນ ອຕ຺ເຖ ຠາຊິຍມາເນ ອຣຫຕ຺ຕໍ ປາປຸຓິຕຸໍ ສມຕ຺ໂຖ ປຸຄ຺ຄໂລ ‘‘ວິປຎ຺ຈິຕຎ຺ຎູ’’ຕິ ວຸຈ຺ຈຕິ. ອຸທ຺ເທສາທີຫິ ເນຕພ຺ໂພຕິ ເນຍ຺ໂຍ. ອນຸປຸພ຺ເພນ ຘມ຺ມາຠິສມໂຍຕິ ອນຸກ຺ກເມນ ອຣຫຕ຺ຕປ຺ປຕ຺ຕິ. ພ຺ຍຎ຺ຊນປທເມວ ປຣມໍ ອສ຺ສາຕິ ປທປຣໂມ. ນ ຕາຍ ຊາຕິຍາ ຘມ຺ມາຠິສມໂຍ ໂຫຕີຕິ ເຕນ ອຕ຺ຕຠາເວນ ຌານໍ ວາ ວິປສ຺ສນໍ ວາ ມຄ຺ຄໍ ວາ ຜລໍ ວາ ນິພ຺ພຕ຺ເຕຕຸໍ ນ ສກ຺ໂກຕີຕິ ອຕ຺ໂຖ. ຈຕຸຕ຺ຖໍ ອຸຕ຺ຕານເມວ.

ອຸຄ຺ຆຏິຕຎ຺ຎູສຸຕ຺ຕາທິວຓ຺ຓນາ ນິຏ຺ຐິຕາ.

໕-໘. ສາວຊ຺ຊສຸຕ຺ຕາທິວຓ຺ຓນາ

໑໓໕-໘. ປຎ຺ຈເມ ສາວຊ຺ໂຊຕິ ສໂທໂສ. ສາວຊ຺ເຊນ ກາຍກມ຺ເມນາຕິ ສໂທເສນ ປາຓາຕິປາຕາທິນາ ກາຍກມ຺ເມນ. ອິຕເຣສຸປິ ເອເສວ ນໂຍ. ອຍໍ ວຸຈ຺ຈຕີຕິ ອຍໍ ປຸຄ຺ຄໂລ ຕີຫິ ທ຺ວາເຣຫິ ອາຍູຫນກມ຺ມສ຺ສ ສໂທສຕ຺ຕາ ຄູຖກຸຓປາທິຠຣິໂຕ ປເທໂສ ວິຍ ‘‘ສາວຊ຺ໂຊ’’ຕິ ວຸຈ຺ຈຕິ. ສາວຊ຺ເຊນ ພຫຸລນ຺ຕິ ຍສ຺ສ ສາວຊ຺ຊເມວ ກາຍກມ຺ມໍ ພຫຸລໍ ໂຫຕິ, ອປ຺ປໍ ອນວຊ຺ຊໍ. ໂສ ‘‘ສາວຊ຺ເຊນ ພຫຸລໍ ກາຍກມ຺ເມນ ສມນ຺ນາຄໂຕ ອປ຺ປໍ ອນວຊ຺ເຊນາ’’ຕິ ວຸຈ຺ຈຕິ. ອິຕເຣສຸປິ ເອເສວ ນໂຍ. ໂກ ປນ ເອວຣູໂປ ໂຫຕີຕິ? ໂຍ ຄາມຘມ຺ມຕາຍ ວາ ນິຄມຘມ຺ມຕາຍ ວາ ກທາຈິ ກຣຫຈິ ອຸໂປສຖໍ ສມາທິຍຕິ, ສີລານິ ປູເຣຕິ. ອຍໍ ວຸຈ຺ຈຕີຕິ ອຍໍ ປຸຄ຺ຄໂລ ຕີຫິ ທ຺ວາເຣຫິ ອາຍູຫນກມ຺ເມສຸ ສາວຊ຺ຊສ຺ເສວ ພຫຸລຕາຍ ອນວຊ຺ຊສ຺ສ ອປ຺ປຕາຍ ‘‘ວຊ຺ຊພຫຸໂລ’’ຕິ ວຸຈ຺ຈຕິ. ຍຖາ ຫິ ເອກສ຺ມິໍ ປເທເສ ທຸພ຺ພຓ຺ຓານິ ທຸຄ຺ຄນ຺ຘານິ ປຸປ຺ຜານິ ຣາສິກຕານສ຺ສຸ, ເຕສໍ ອຸປຣິ ຕຫໍ ຕຫໍ ອຘິມຸຕ຺ຕກວສ຺ສິກປາຏລານິ ປຕິຕານິ ຠເວຍ຺ຍຸໍ, ເອວຣູໂປ ອຍໍ ປຸຄ຺ຄໂລ ເວທິຕພ຺ໂພ. ຍຖາ ປນ ເອກສ຺ມິໍ ປເທເສ ອຘິມຸຕ຺ຕກວສ຺ສິກປາຏລານິ ຣາສິກຕານສ຺ສຸ, ເຕສໍ ອຸປຣິ ຕຫໍ ຕຫໍ ທຸຄ຺ຄນ຺ຘານິ ພທຣປຸປ຺ຜາທີນິ ປຕິຕານິ ຠເວຍ຺ຍຸໍ. ເອວຣູໂປ ຕຕິໂຍ ປຸຄ຺ຄໂລ ເວທິຕພ຺ໂພ. ຈຕຸຕ຺ໂຖ ປນ ຕີຫິ ທ຺ວາເຣຫິ ອາຍູຫນກມ຺ມສ຺ສ ນິທ຺ໂທສຕ຺ຕາ ຈ ຈຕຸມຘຸຣຠຣິຕສຸວຓ຺ຓວາຕິ ວິຍ ທຏ຺ຐພ຺ໂພ. ຉຏ຺ຐາທີນິ ອຸຕ຺ຕານຕ຺ຖາເນວ.

ສາວຊ຺ຊສຸຕ຺ຕາທິວຓ຺ຓນາ ນິຏ຺ຐິຕາ.

໙-໑໐. ຘມ຺ມກຖິກສຸຕ຺ຕາທິວຓ຺ຓນາ

໑໓໙-໑໔໐. ນວເມ ອປ຺ປຎ຺ຈ ຠາສຕີຕິ ສມ຺ປຕ຺ຕປຣິສາຍ ໂຖກເມວ ກເຖຕິ. ອສຫິຕຎ຺ຈາຕິ ກເຖນ຺ໂຕ ຈ ປນ ນ ອຕ຺ຖຍຸຕ຺ຕໍ ກາລຍຸຕ຺ຕໍ ກເຖຕິ. ປຣິສາ ຈສ຺ສ ນ ກຸສລາ ໂຫຕີຕິ ໂສຕຸໍ ນິສິນ຺ນປຣິສາ ຈສ຺ສ ຍຸຕ຺ຕາຍຸຕ຺ຕໍ ກາຣຓາກາຣຓໍ ສິລິຏ຺ຐາສິລິຏ຺ຐໍ ນ ຊານາຕີຕິ ອຕ຺ໂຖ. ເອວຣູໂປຕິ ອຍໍ ເອວໍຊາຕິໂກ ພາລຘມ຺ມກຖິໂກ ເອວໍຊາຕິກາຍ ພາລປຣິສາຍ ຘມ຺ມກຖິໂກຕ຺ເວວ ນາມໍ ລຠຕິ. ອິມິນາ ນເຍນ ສພ຺ພຕ຺ຖ ອຕ຺ໂຖ ເວທິຕພ຺ໂພ. ເອຕ຺ຖ ຈ ທ຺ເວເຍວ ຊນາ ສຠາວຘມ຺ມກຖິກາ, ນ ອິຕເຣ. ອິຕເຣ ປນ ຘມ຺ມກຖິການໍ ອນ຺ໂຕ ປວິຏ຺ຐຕ຺ຕາ ເອວໍ ວຸຕ຺ຕາ. ທສມໍ ອຸຕ຺ຕານເມວ.

ຘມ຺ມກຖິກສຸຕ຺ຕາທິວຓ຺ຓນາ ນິຏ຺ຐິຕາ.

ປຸຄ຺ຄລວຄ຺ຄວຓ຺ຓນາ ນິຏ຺ຐິຕາ.