໗. ມູສິກສຸຕ຺ຕວຓ຺ຓນາ

໑໐໗. ສຕ຺ຕເມ ອາວາຏໍ ຂນຕີຕິ ອຕ຺ຕໂນ ອາສຍໍ ພິລກູປໍ ຂນຕິ. ນ ຈ ຕຕ຺ຖ ວສຕີຕິ ຕຕ຺ຖ ອວສິຕ຺ວາ ກິສ຺ມິຎ຺ຈິເທວ ຐາເນ ວສຕິ, ເອວໍ ພິຬາຣາທິອມິຕ຺ຕວສໍ ຄຈ຺ຉຕິ. ວສິຕາ ໂນ ຄາຘໍ ກຕ຺ຕາຕິ ສຍໍ ນ ຂນຕິ, ປເຣນ ກເຕ ພິເລ ວສຕິ, ເອວໍ ຊີວິຕໍ ຣກ຺ຂຕິ. ຕຕິຍາ ທ຺ເວປິ ກໂຣນ຺ຕີ ຊີວິຕໍ ຣກ຺ຂຕິ. ຈຕຸຕ຺ຖີ ທ຺ເວປິ ອກໂຣນ຺ຕີ ອມິຕ຺ຕວສໍ ຄຈ຺ຉຕິ. ອິມາຍ ປນ ອຸປມາຍ ອຸປມິເຕສຸ ປຸຄ຺ຄເລສຸ ປຐໂມ ຍຖາ ສາ ມູສິກາ ຄາຘໍ ຂນຕິ, ເອວໍ ນວງ຺ຄໍ ສຕ຺ຖຸສາສນໍ ອຸຄ຺ຄຓ຺ຫາຕິ. ຍຖາ ປນ ສາ ຕຕ຺ຖ ນ ວສຕິ, ກິສ຺ມິຎ຺ຈິເທວ ຐາເນ ວສນ຺ຕີ ອມິຕ຺ຕວສໍ ຄຈ຺ຉຕິ, ຕຖາ ອຍມ຺ປິ ປຣິຍຕ຺ຕິວເສນ ຎາຓໍ ເປເສຕ຺ວາ ຈຕຸສຈ຺ຈຘມ຺ມໍ ນ ປຏິວິຊ຺ຌຕິ, ໂລກາມິສຏ຺ຐາເນສຸ ວິຈຣນ຺ໂຕ ມຈ຺ຈຸມາຣກິເລສມາຣເທວປຸຕ຺ຕມາຣສງ຺ຂາຕານໍ ວສໍ ຄຈ຺ຉຕິ. ທຸຕິໂຍ ຍຖາ ມູສິກາ ຄາຘໍ ນ ຂນຕິ, ເອວໍ ນວງ຺ຄໍ ສຕ຺ຖຸສາສນໍ ນ ອຸຄ຺ຄຓ຺ຫາຕິ. ຍຖາ ປນ ປເຣນ ຂນິເຕ ພິເລ ວສນ຺ຕີ ຊີວິຕໍ ຣກ຺ຂຕິ, ເອວໍ ປຣສ຺ສ ກຖໍ ສຸຕ຺ວາ ຈຕຸສຈ຺ຈຘມ຺ມໍ ປຏິວິຊ຺ຌິຕ຺ວາ ຕິຓ຺ຓໍ ມາຣານໍ ວສໍ ອຕິກ຺ກມຕິ. ອິມິນາ ນເຍນ ຕຕິຍຈຕຸຕ຺ເຖສຸປິ ໂອປມ຺ມສໍສນ຺ທນໍ ເວທິຕພ຺ພໍ.

ມູສິກສຸຕ຺ຕວຓ຺ຓນາ ນິຏ຺ຐິຕາ.