໑-໒. ວລາຫກສຸຕ຺ຕທ຺ວຍວຓ຺ຓນາ

໑໐໑-໒. ຕຕິຍປຓ຺ຓາສກສ຺ສ ປຐເມ ຄຊ຺ຊິຕາຕິ ຖນິຕາ. ຕຕ຺ຖ ຄຊ຺ຊິຕ຺ວາ ໂນວສ຺ສນຠາໂວ ນາມ ປາປໂກ. ມນຸສ຺ສາ ຫິ ຍທາ ເທໂວ ຄຊ຺ຊຕິ, ຕທາ ‘‘ສຸວຸຏ຺ຐິຕາ ຠວິສ຺ສຕີ’’ຕິ ພີຊານິ ນີຫຣິຕ຺ວາ ວປນ຺ຕິ. ອຖ ເທເວ ອວສ຺ສນ຺ເຕ ເຂຕ຺ເຕ ພີຊານິ ເຂຕ຺ເຕເຍວ ນສ຺ສນ຺ຕິ, ເຄເຫ ພີຊານິ ເຄເຫເຍວ ນສ຺ສນ຺ຕີຕິ ທຸພ຺ຠິກ຺ຂໍ ໂຫຕິ. ໂນຄຊ຺ຊິຕ຺ວາ ວສ຺ສນຠາໂວປິ ປາປໂກ. ມນຸສ຺ສາ ຫິ ອິມສ຺ມິໍ ກາເລ ‘‘ທຸພ຺ພຸຏ຺ຐິກາ ຠວິສ຺ສຕີ’’ຕິ ນິນ຺ນຏ຺ຐາເນສຸເຍວ ວປ຺ປໍ ກໂຣນ຺ຕິ. ອຖ ເທໂວ ວສ຺ສິຕ຺ວາ ສພ຺ພພີຊານິ ມຫາສມຸທ຺ທໍ ປາເປຕິ, ທຸພ຺ຠິກ຺ຂເມວ ໂຫຕິ. ຄຊ຺ຊິຕ຺ວາ ວສ຺ສນຠາໂວ ປນ ຠທ຺ທໂກ. ຕທາ ຫິ ສຸຠິກ຺ຂໍ ໂຫຕິ. ໂນຄຊ຺ຊິຕ຺ວາ ໂນວສ຺ສນຠາໂວ ເອກນ຺ຕປາປໂກວ. ຠາສິຕາ ໂຫຕິ ໂນ ກຕ຺ຕາຕິ ‘‘ອິທານິ ຄນ຺ຖຘຸຣໍ ປູເຣສ຺ສາມິ, ວາສຘຸຣໍ ປູເຣສ຺ສາມີ’’ຕິ ກເຖຕິເຍວ, ນ ອຸທ຺ເທສໍ ຄຓ຺ຫາຕິ, ນ ກມ຺ມຏ຺ຐານໍ ຠາເວຕິ.

ກຕ຺ຕາ ໂຫຕິ ໂນ ຠາສິຕາຕິ ‘‘ຄນ຺ຖຘຸຣໍ ປູເຣສ຺ສາມິ, ວາສຘຸຣໍ ວາ’’ຕິ ນ ຠາສຕິ, ສມ຺ປຕ຺ເຕ ປນ ກາເລ ສມຕ຺ຕໍ ສມ຺ປາເທຕິ. ອິມິນາ ນເຍນ ອິຕເຣປິ ເວທິຕພ຺ພາ. ອຖ ວາ ສພ຺ພໍ ປເນຕໍ ປຈ຺ຈຍທາຍເກເຫວ ກຖິຕໍ. ເອໂກ ຫິ ‘‘ອສຸກທິວເສ ນາມ ທານໍ ທສ຺ສາມີ’’ຕິ ສງ຺ຆໍ ນິມນ຺ເຕຕິ, ສມ຺ປຕ຺ເຕ ກາເລ ໂນ ກໂຣຕິ. ອຍໍ ປຸຄ຺ຄໂລ ປຸຎ຺ເຎນ ປຣິຫາຍຕິ, ຠິກ຺ຂຸສງ຺ໂຆ ປນ ລາເຠນ ປຣິຫາຍຕິ. ອປໂຣ ສງ຺ຆໍ ອນິມນ຺ເຕຕ຺ວາ ສກ຺ກາຣໍ ກຕ຺ວາ ‘‘ຠິກ຺ຂູ ອາເນສ຺ສາມີ’’ຕິ ນ ລຠິ, ສພ຺ເພ ອຎ຺ຎຕ຺ຖ ນິມນ຺ຕິຕາ ໂຫນ຺ຕິ. ອຍມ຺ປິ ປຸຎ຺ເຎນ ປຣິຫາຍຕິ, ສງ຺ໂຆປິ ລາເຠນ ປຣິຫາຍຕິ. ອປໂຣ ປຐມໍ ສງ຺ຆໍ ນິມນ຺ເຕຕ຺ວາ ປຈ຺ຉາ ສກ຺ກາຣໍ ກຕ຺ວາ ທານໍ ເທຕິ, ອຍໍ ກິຈ຺ຈກາຣີ ໂຫຕິ. ອປໂຣ ເນວ ສງ຺ຆໍ ນິມນ຺ເຕຕິ, ນ ທານໍ ເທຕິ, ອຍໍ ປາປປຸຄ຺ຄໂລຕິ ເວທິຕພ຺ໂພ. ທຸຕິຍໍ ອຸຕ຺ຕານເມວ.

ວລາຫກສຸຕ຺ຕທ຺ວຍວຓ຺ຓນາ ນິຏ຺ຐິຕາ.