(໑໐) ໕. ອສຸຣວຄ຺ໂຄ
໑-໒. ອສຸຣສຸຕ຺ຕາທິວຓ຺ຓນາ
໙໑-໙໒. ປຎ຺ຈມສ຺ສ ປຐມທຸຕິຍານິ ອຸຕ຺ຕານຕ຺ຖາເນວ.
ອສຸຣສຸຕ຺ຕາທິວຓ຺ຓນາ ນິຏ຺ຐິຕາ.
໓. ທຸຕິຍສມາຘິສຸຕ຺ຕວຓ຺ຓນາ
໙໓. ຕຕິເຍ ອປ຺ປຏິວານີຕິ ຠາວປ຺ປຘາໂນ ນິທ຺ເທໂສຕິ ອາຫ ‘‘ອນິວຕ຺ຕນຕາ’’ຕິ. ‘‘ອປ຺ປຏິວານິຕາ’’ຕິ ວຕ຺ຕພ຺ເພ ‘‘ອປ຺ປຏິວານີ’’ຕິ ວຸຕ຺ຕໍ. ຕຖາ ຫິ ວີຣິຍປ຺ປວາເຫ ວຕ຺ຕມາເນ ອນ຺ຕຣາ ເອວ ປຏິຄມນໍ ນິວຕ຺ຕນໍ ປຏິວານໍ, ຕໍ ອສ຺ສ ອຕ຺ຖີຕິ ປຏິວານີ, ນ ປຏິວານີ ອປ຺ປຏິວານີ, ຕສ຺ສ ຠາໂວ ອປ຺ປຏິວານິຕາ, ອນິວຕ຺ຕນາຕິ ອຕ຺ໂຖ. ອປ຺ປຏິວານີຕິ ວາ ອິຕ຺ຖິລິງ຺ຄວເສເນວາຍໍ ນິທ຺ເທໂສ. ອນ຺ຕຣາເຍວ ປຏິຄມນໍ ນິວຕ຺ຕນໍ ປຏິວານີ, ນ ປຏິວານີ ອປ຺ປຏິວານີ, ອນິວຕ຺ຕນາຕິ ອຕ຺ໂຖ.
ທຸຕິຍສມາຘິສຸຕ຺ຕວຓ຺ຓນາ ນິຏ຺ຐິຕາ.
໔. ຕຕິຍສມາຘິສຸຕ຺ຕວຓ຺ຓນາ
໙໔. ຈຕຸຕ຺ເຖ ສຓ຺ຐເປຕພ຺ພນ຺ຕິ ສມ຺ມເທວ ຐເປຕພ຺ພໍ. ຍຖາ ປນ ຐປິຕໍ ສຓ຺ຐປິຕໍ ໂຫຕິ, ຕໍ ທສ຺ເສຕຸໍ ‘‘ສນ຺ນິສາເທຕພ຺ພ’’ນ຺ຕິອາທິ ວຸຕ຺ຕໍ. ຕຕ຺ຖ ສນ຺ນິສາເທຕພ຺ພນ຺ຕິ ສມາຘິປ຺ປຏິປກ຺ເຂ ກິເລເສ ສນ຺ນິສີທາເປນ຺ເຕນ ຈິຕ຺ຕໍ ໂຄຈຣຊ຺ຌຕ຺ເຕ ສນ຺ນິສີທາເປຕພ຺ພນ຺ຕິ. ເອໂກທິ ກາຕພ຺ພນ຺ຕິ ອພ຺ຍຄ຺ຄຠາວາປາທເນນ ເອກຄ຺ຄໍ ກາຕພ຺ພໍ. ສມາທຫິຕພ຺ພນ຺ຕິ ຍຖາ ອາຣມ຺ມເຓ ສຸຏ຺ຐຸ ອປ຺ປິຕໍ ໂຫຕິ, ເອວໍ ສມ຺ມາ ສມ຺ມເທວ ອາທຫິຕພ຺ພໍ, ສຸຏ຺ຐຸ ອາໂຣເປຕພ຺ພໍ ສມາຫິຕໍ ກາຕພ຺ພນ຺ຕິ ອຕ຺ໂຖ.
ຕຕິຍສມາຘິສຸຕ຺ຕວຓ຺ຓນາ ນິຏ຺ຐິຕາ.
໕-໖. ຉວາລາຕສຸຕ຺ຕາທິວຓ຺ຓນາ
໙໕-໙໖. ປຎ຺ຈເມ ຉວາລາຕນ຺ຕິ ຉວານໍ ທຑ຺ຒຏ຺ຐາເນ ອລາຕໍ. ເຕເນວາຫ ‘‘ສຸສາເນ ອລາຕ’’ນ຺ຕິ. ມຊ຺ຌຏ຺ຐາເນ ຄູຖມກ຺ຂິຕນ຺ຕິ ປມາເຓນ ອຏ຺ຐງ຺ຄຸລມຕ຺ຕໍ ທ຺ວີສຸ ຐາເນສຸ ອາທິຕ຺ຕໍ ມຊ຺ເຌ ຄູຖມກ຺ຂິຕໍ. ກຏ຺ຐຕ຺ຖນ຺ຕິ ກຏ຺ເຐນ ກາຕພ຺ພກິຈ຺ຈໍ. ເສສເມຕ຺ຖ ອຸຕ຺ຕານເມວ. ຉຏ຺ຐໍ ອຸຕ຺ຕານເມວ.
ຉວາລາຕສຸຕ຺ຕາທິວຓ຺ຓນາ ນິຏ຺ຐິຕາ.
໗-໑໐. ຂິປ຺ປນິສນ຺ຕິສຸຕ຺ຕາທິວຓ຺ຓນາ
໙໗-໑໐໐. ສຕ຺ຕເມ ຂິປ຺ປນິສນ຺ຕີຕິ ຂິປ຺ປປຎ຺ໂຎ. ເຕນາຫ ‘‘ຂິປ຺ປນິສາມໂນ’’ຕິອາທິ. ອນຸຣູປຘມ຺ມນ຺ຕິ ໂລກຸຕ຺ຕຣາຘິຄມສ຺ສ ອນຸຈ຺ຉວິກສຠາວໍ. ກລ຺ຍາຓາ ສຸນ຺ທຣາ ປຣິມຓ຺ຑລປທພ຺ຍຎ຺ຊນາ ວາຈາ ອສ຺ສາຕິ ກລ຺ຍາຓວາໂຈ. ເຕນາຫ ‘‘ສຸນ຺ທຣວຈໂນ’’ຕິ. ກລ຺ຍາຓໍ ມຘຸຣໍ ວາກ຺ກຣຓໍ ອຸທາຫາຣໂຆໂສ ອສ຺ສາຕິ ກລ຺ຍາຓວາກ຺ກຣໂຓ. ຄຸຓປຣິປຸຓ຺ຓຠາເວນ ປູເຣ ປຸຓ຺ຓຠາເວ ຠວາຕິ ໂປຣີ, ຕາຍ ໂປຣິຍາ. ເຕນາຫ ‘‘ຄຸຓປຣິປຸຓ຺ຓາຍາ’’ຕິ. ປຸເຣ ຠວຕ຺ຕາ ໂປຣິຍາ ນາຄຣິກິຕ຺ຖິຍາ ສຸຂຸມາລຕ຺ຕເນນ ສທິສາຕິ ໂປຣີ, ຕາຍ ໂປຣິຍາ. ‘‘ສຸຂຸມາລຕ຺ຕເນນາ’’ຕິ ອິມິນາ ຕສ຺ສາ ວາຈາຍ ມຸທຸສຓ຺ຫຠາໂວ ວຸຕ຺ໂຕ. ອປລິພຸທ຺ຘາຍາຕິ ປິຕ຺ຕເສມ຺ຫາທີຫິ ນ ປລິເວຐິຕາຍ. ອໂທສາຍາຕິ ສນ຺ທິທ຺ຘວິລມ຺ພິຕາທິໂທສຣຫິຕາຍ ອຄຬິຕປທພ຺ຍຎ຺ຊນາຍາຕິ ອປຕິຕປທພ຺ຍຎ຺ຊນາຍ ອວິຣຫິຕປທພ຺ຍຎ຺ຊນາຍ. ອຸຠຍເມຕໍ ອເນລຄລາຍາຕິ ອິມສ຺ເສວ ອຕ຺ຖວຈນໍ. ອເນລຄລາຍາຕິ ຫິ ອເນລາຍ ເຈວ ອຄລາຍ ຈາຕິ ອຕ຺ໂຖ. ອຕ຺ຖໍ ວິຎ຺ຎາເປຕຸໍ ສມຕ຺ຖາຍາຕິ ອາທິມຊ຺ຌປຣິໂຍສານໍ ປາກຏໍ ກຕ຺ວາ ຠາສິຕຕ຺ຖສ຺ສ ວິຎ຺ຎາປນສຕ຺ຖາຍ. ອຏ຺ຐມນວມທສມານິ ອຸຕ຺ຕານຕ຺ຖາເນວ.
ຂິປ຺ປນິສນ຺ຕິສຸຕ຺ຕາທິວຓ຺ຓນາ ນິຏ຺ຐິຕາ.
ອສຸຣວຄ຺ຄວຓ຺ຓນາ ນິຏ຺ຐິຕາ.
ທຸຕິຍປຓ຺ຓາສກໍ ນິຏ຺ຐິຕໍ.