(໖) ໑. ປຸຄ຺ຄລວຄ຺ຄວຓ຺ຓນາ

໕໓. ທຸຕິຍປຓ຺ຓາສກສ຺ສ ປຐເມ ຫິຕຄ຺ຄຫເຓນ ເມຕ຺ຕາ ວຸຕ຺ຕາ ໂຫຕິ, ນ ກຣຸຓາ, ອນຸກມ຺ປາຄຫເຓນ ປນ ກຣຸຓາຕິ ຈກ຺ກວຕ຺ຕິນາ ສທ຺ຘິໍ ຄຫິຕຕ຺ຕາ ‘‘ໂລການຸກມ຺ປາຍາ’’ຕິ ນ ວຸຕ຺ຕໍ. ນິປ຺ປຣິຍາຍໂຕ ໂລການຸກມ຺ປາ ນາມ ສມ຺ມາສມ຺ພຸທ຺ຘາຘີນາຕິ. ທ຺ເວຕິ ມນຸສ຺ສເທວສມ຺ປຕ຺ຕິວເສນ ທ຺ເວ ສມ຺ປຕ຺ຕິໂຍ. ຕາ ທ຺ເວ, ນິພ຺ພານສມ຺ປຕ຺ຕິ ຈາຕິ ຕິສ຺ໂສ.

໕໔. ທຸຕິເຍ ພຫຸໂສ ໂລເກ ນ ຈິຓ຺ຓາ ນ ປວຕ຺ຕາ ມນຸສ຺ສາຕິ ອາຈິຓ຺ຓມນຸສ຺ສາ. ກທາຈິເທວ ຫິ ເນສໍ ໂລເກ ນິພ຺ພຕ຺ຕິ ອຠູຕປຸພ຺ພາ ຠູຕາຕິ ອພ຺ຠຸຕມນຸສ຺ສາ.

໕໕. ຕຕິເຍ ທສສຸ ຈກ຺ກວາຬສຫສ຺ເສສຸ ອນຸຕາປໍ ກໂຣຕິ ຕສ຺ສ ເອກພຸທ຺ຘເຂຕ຺ຕຠາວໂຕ.

໕໖. ຈຕຸຕ຺ເຖ ຖູປສ຺ສ ຍຸຕ຺ຕາຕິ ຘາຕຸໂຍ ປກ຺ຂິປິຕ຺ວາ ຖູປກຣຓສ຺ສ ຍຸຕ຺ຕາ.

໕໗. ປຎ຺ຈເມ ອຕ຺ຕໂນ ອານຸຠາເວນາຕິ ສຍມ຺ຠຸຎາເຓນ. ພຸທ຺ຘາຕິ ພຸທ຺ຘວນ຺ໂຕ.

໕໘. ຉຏ຺ເຐ ປຫີນຕ຺ຕາ ນ ຠາຍຕີຕິ ອຕ຺ຕສິເນຫາຠາວໂຕ ນ ຠາຍຕິ. ສກ຺ກາຍທິຏ຺ຐິຄ຺ຄຫຓຎ຺ເຈຕ຺ຖ ນິທສ຺ສນມຕ຺ຕໍ, ອຕ຺ຕສິເນຫສ຺ສ ປຏິຆສ຺ສ ຕເທກຏ຺ຐສມ຺ໂມຫສ຺ສ ຈ ວເສນ ຠາຍນໍ ໂຫຕີຕິ ເຕສມ຺ປິ ປຫີນຕ຺ຕາ ນ ຠາຍຕິ, ອຎ຺ຎຖາ ໂສຕາປນ຺ນາທີນໍ ອຠເຍນ ຠວິຕພ຺ພໍ ສິຍາ. ສກ຺ກາຍທິຏ຺ຐິຍາ ພລວຕ຺ຕາຕິ ເອຕ຺ຖ ອຫໍກາຣສມ຺ໂມຫນຕາທີນມ຺ປິ ພລວຕ຺ຕາຕິ ວຕ຺ຕພ຺ພໍ.

໕໙. ສຕ຺ຕເມ ອສ຺ສາຊານີໂຍຕິ ລິຂນ຺ຕິ, ອຸສຠາຊານີໂຍຕິ ປນ ປາໂຐຕິ.

໖໑. ນວເມ ຕຕ຺ຖາຕິ ອນ຺ຕຣາປເຓ. ເອໂກຕິ ທ຺ວີສຸ ກິນ຺ນເຣສຸ ເອໂກ. ອມ຺ພິລິກາຜລຎ຺ຈ ອທ຺ທສາຕິ ອາເນຕ຺ວາ ສມ຺ພນ຺ໂຘ. ອມ຺ພິລິກາຜລນ຺ຕິ ຕິນ຺ຕິຓີຜລນ຺ຕິ ວທນ຺ຕິ, ຈຕຸຣມ຺ພິລນ຺ຕິ ອປເຣ. ທ຺ເວ ອຕ຺ເຖຕິ ປາຬິຍໍ ວຸຕ຺ເຕ ທ຺ເວ ອຕ຺ເຖ.

໖໒. ທສເມ ຍຖາອາຣທ຺ເຘ ກິຈ຺ເຈ ວຕ຺ຕມາເນ ອນ຺ຕຣາ ເອວ ປຏິຄມນໍ ປຏິວານໍ, ນຕ຺ຖິ ເອຕສ຺ສ ປຏິວານນ຺ຕິ ອປ຺ປຏິວາໂນ. ຕຕ຺ຖ ອສໍໂກຈປ຺ປຕ຺ໂຕ. ເຕນາຫ ‘‘ອນຸກ຺ກຓ຺ຐິໂຕ’’ຕິອາທິ.

໖໓. ເອກາທສເມ ສນ຺ນິວາສນ຺ຕິ ສຫວາສໍ. ຍຖາ ອສປ຺ປຸຣິສາ ສຫ ວສນ຺ຕາ ອຎ຺ຎມຎ຺ຎໍ ອຄາຣເວນ ອນາທຣິຍໍ ກໂຣນ຺ຕິ, ຕປ຺ປຏິກ຺ເຂເປນ ສປ຺ປຸຣິສານໍ ສຄາຣວປ຺ປຏິປຕ຺ຕິທສ຺ສນປຣມິທໍ ສຸຕ຺ຕໍ ທຏ຺ຐພ຺ພໍ.

໖໔. ທ຺ວາທສເມ ທ຺ວີສຸປິ ປກ຺ເຂສູຕິ ວິວາທາປນ຺ນານໍ ຠິກ຺ຂູນໍ ທ຺ວີສຸປິ ປກ຺ເຂສຸ. ສໍສຣມານາຕິ ປວຕ຺ຕມານາ. ທິຏ຺ຐິປຬາໂສຕິ ທິຏ຺ຐິສນ຺ນິສ຺ສໂຍ ປຬາໂສ ຍຸຄຄ຺ຄາໂຫ. ອາຆາເຕນ຺ໂຕຕິ ອາຫນນ຺ໂຕ ພາເຘນ຺ໂຕ. ອນຠິຣາຘນວເສນາຕິ ຍສ຺ສ ອຸປ຺ປຊ຺ຊຕິ, ຕສ຺ສ ຕທຎ຺ເຎສຎ຺ຈ ອຕ຺ຖສ຺ສ ອນຠິຣາຘນວເສນ. ສພ຺ພມ຺ເປຕນ຺ຕິ ວຈີສໍສາໂຣຕິ ສພ຺ພມ຺ເປຕໍ. ອຕ຺ຕໂນ ຈິຕ຺ເຕ ປຣິສາຍ ຈ ຈິຕ຺ເຕຕິ ອາເນຕ຺ວາ ສມ຺ພນ຺ໂຘ.

ປຸຄ຺ຄລວຄ຺ຄວຓ຺ຓນາ ນິຏ຺ຐິຕາ.