(໑໒) ໒. ອາຍາຈນວຄ຺ຄວຓ຺ຓນາ

໑໓໑. ສທ຺ໂຘ ຠິກ຺ຂູຕິ ສທ຺ຘາຍ ສມນ຺ນາຄໂຕ ຠິກ຺ຂຸ. ໂຍ ຠິກ຺ຂຸ ສາຣິປຸຕ຺ຕໂມຄ຺ຄລ຺ລາເນຫິ ສທິສຠາວໍ ປຕ຺ເຖຕິ, ໂສ ເຍຫິ ຄຸເຓຫິ ສາຣິປຸຕ຺ຕໂມຄ຺ຄລ຺ລານາ ເອຕທຄ຺ເຄ ຐປິຕາ, ເຕ ຄຸເຓ ອຕ຺ຕໂນ ອຠິກງ຺ເຂຍ຺ຍາຕິ ອາຫ ‘‘ຍາທິໂສ ສາຣິປຸຕ຺ຕຕ຺ເຖໂຣ ປຎ຺ຎາຍາ’’ຕິອາທິ. ອິໂຕ ອຸຕ຺ຕຣິ ປຕ຺ເຖນ຺ໂຕ ມິຈ຺ຉາ ປຕ຺ເຖຍ຺ຍາຕິ ສາຣິປຸຕ຺ຕໂມຄ຺ຄລ຺ລານານໍ ເຍ ປຎ຺ຎາທໂຍ ຄຸຓາ ອຸປລພ຺ຠນ຺ຕິ, ຕໂຕ ອຸຕ຺ຕຣິ ປຕ຺ເຖນ຺ໂຕ ມິຈ຺ຉາ ປຕ຺ເຖຍ຺ຍ. ອຄ຺ຄສາວກຄຸຓປຣມາ ຫິ ສາວກຄຸຓມຣິຍາທາ. ເຕສໍ ສາວກຄຸຓານໍ ຍທິທໍ ອຄ຺ຄສາວກຄຸຓາ, ນ ຕໂຕ ປຣໍ ສາວກຄຸຓາ ນາມ ອຕ຺ຖິ. ເຕເນວາຫ ‘‘ຍໍ ນຕ຺ຖິ, ຕສ຺ສ ປຕ຺ຖິຕຕ຺ຕາ’’ຕິ. ເສສເມຕ຺ຖ ອຸຕ຺ຕານເມວ.

໑໓໕. ປຎ຺ຈເມ ຍສ຺ສ ຄຸຓາ ຂຕາ ອຸປຫຕາ ຈ, ໂສ ຂໂຕ ອຸປຫໂຕ ນາມ ໂຫຕີຕິ ອາຫ ‘‘ຄຸຓານໍ ຂຕຕ຺ຕາ’’ຕິອາທິ. ຂຕຕ຺ຕາຕິ ຉິນ຺ນຕ຺ຕາ. ອຸປຫຕຕ຺ຕາຕິ ນຏ຺ຐຕ຺ຕາ. ເຕນາຫ ‘‘ຉິນ຺ນຄຸຓໍ ນຏ຺ຐຄຸຓນ຺ຕິ ອຕ຺ໂຖ’’ຕິ. ອປຸຎ຺ຎສ຺ສ ປສໂວ ນາມ ອຕ຺ຖໂຕ ປຏິລາໂຠຕິ ອາຫ ‘‘ປສວຕີຕິ ປຏິລຠຕີ’’ຕິ, ອຕ຺ຕໂນ ສນ຺ຕາເນ ອຸປ຺ປາເທຕີຕິ ອຕ຺ໂຖ. ອນນຸປວິສິຕ຺ວາຕິ ຎາເຓນ ອໂນຄາເຫຕ຺ວາ. ເສສເມຕ຺ຖ ຉຏ຺ຐາທີນິ ຈ ສຸວິຎ຺ເຎຍ຺ຍາເນວ.

ອາຍາຈນວຄ຺ຄວຓ຺ຓນາ ນິຏ຺ຐິຕາ.