໙-໑໐. ປຐມກຖາວຕ຺ຖຸສຸຕ຺ຕາທິວຓ຺ຓນາ

໖໙-໗໐. ນວເມ (ທີ. ນິ. ຏີ. ໑.໑໗; ທີ. ນິ. ອຠິ. ຏີ. ໑.໑໗; ສໍ. ນິ. ຏີ. ໒.໕.໑໐໘໐) ທຸຄ຺ຄຕິໂຕ ສໍສາຣໂຕ ຈ ນິຍ຺ຍາຕິ ເອເຕນາຕິ ນິຍ຺ຍານໍ, ສຄ຺ຄມຄ຺ໂຄ, ໂມກ຺ຂມຄ຺ໂຄ ຈ. ຕໍ ນິຍ຺ຍານໍ ອຣຫຕິ, ນິຍ຺ຍາເນ ວາ ນິຍຸຕ຺ຕາ, ນິຍ຺ຍານໍ ວາ ຜລຠູຕໍ ເອຕິສ຺ສາ ອຕ຺ຖີຕິ ນິຍ຺ຍານິກາ. ວຈີທຸຈ຺ຈຣິຕສໍກິເລສໂຕ ນິຍ຺ຍາຕີຕິ ວາ ອີກາຣສ຺ສ ຣສ຺ສຕ຺ຕໍ, ຍກາຣສ຺ສ ຈ ກກາຣໍ ກຕ຺ວາ ນິຍ຺ຍານິກາ, ເຈຕນາຍ ສທ຺ຘິໍ ສມ຺ຜປ຺ປລາປາ ເວຣມຓິ. ຕປ຺ປຏິປກ຺ຂໂຕ ອນິຍ຺ຍານິກາ, ຕສ຺ສາ ຠາໂວ ອນິຍ຺ຍານິກຕ຺ຕໍ, ຕສ຺ມາ ອນິຍ຺ຍານິກຕ຺ຕາ. ຕິຣຈ຺ຉານຠູຕນ຺ຕິ ຕິໂຣກຣຓຠູຕໍ. ເຄຫສ຺ສິຕກຖາຕິ ເຄຫປ຺ປຏິສໍຍຸຕ຺ຕາ. ກມ຺ມຏ຺ຐານຠາເວຕິ ອນິຈ຺ຈຕາປຏິສໍຍຸຕ຺ຕຈຕຸສຈ຺ຈກມ຺ມຏ຺ຐານຠາເວ.

ສຫ ອຕ຺ເຖນາຕິ ສາຕ຺ຖກໍ, ຫິຕປ຺ປຏິສໍຍຸຕ຺ຕນ຺ຕິ ອຕ຺ໂຖ. ‘‘ສຸຣາກຖາ’’ຕິປິ ປາໂຐຕິ ອາຫ ‘‘ສຸຣາກຖນ຺ຕິ ປາຬິຍໍ ປນາ’’ຕິ. ສາ ປເນສາ ກຖາ ‘‘ເອວຣູປາ ນວສຸຣາ ປີຕາ ຣຕິຊນນີ ໂຫຕີ’’ຕິ ອສ຺ສາທວເສນ ນ ວຏ຺ຏຕິ, ອາທີນວວເສນ ປນ ‘‘ອຸມ຺ມຕ຺ຕກສໍວຕ຺ຕນິກາ’’ຕິອາທິນາ ນເຍນ ວຏ຺ຏຕິ. ເຕນາຫ ‘‘ອເນກວິຘໍ…ເປ… ອາທີນວວເສນ ວຏ຺ຏຕີ’’ຕິ. ວິສິຂາຕິ ຆຣສນ຺ນິເວໂສ. ວິສິຂາຄຫເຓນ ຈ ຕນ຺ນິວາສິໂນ ຄຫິຕາ ‘‘ຄາໂມ ອາຄໂຕ’’ຕິອາທີສຸ ວິຍ. ເຕເນວາຫ ‘‘ສູຣາ ສມຕ຺ຖາ’’ຕິ ຈ ‘‘ສທ຺ຘາ ປສນ຺ນາ’’ຕິ ຈ. ກຸມ຺ຠຏ຺ຐານປ຺ປເທເສນ ກຸມ຺ຠທາສິໂຍ ວຸຕ຺ຕາຕິ ອາຫ ‘‘ກຸມ຺ຠທາສິກຖາ ວາ’’ຕິ.

ຣາຊກຖາທິປຸຣິມກຖາຍ, ໂລກກ຺ຂາຍິກາທິປຈ຺ຉິມກຖາຍ ວາ ວິນິມຸຕ຺ຕາ ປຸຣິມປຈ຺ຉິມກຖາ ວິມຸຕ຺ຕາ. ອຸປ຺ປຕ຺ຕິຐິຕິສໍຫາຣາທິວເສນ ໂລກໍ ອກ຺ຂາຍຕີຕິ ໂລກກ຺ຂາຍິກາ. ອສຸເກນ ນາມາຕິ ປຊາປຕິນາ ພ຺ຣຫ຺ມຸນາ, ອິສ຺ສເຣນ ວາ. ວິຕຓ຺ຑສລ຺ລາປກຖາຕິ ‘‘ອຏ຺ຐີນໍ ເສຕຕ຺ຕາ ເສໂຕຕິ ນ ວຕ຺ຕພ຺ໂພ, ປຕ຺ຕານໍ ກາຬຕ຺ຕາ ກາໂຬຕິ ປນ ວຕ຺ຕພ຺ໂພ’’ຕິ ເອວມາທິກາ. ອາທິ-ສທ຺ເທນ ‘‘ເສລປຸປ຺ຜລການິ ວິຍ ຊີວິທາວິຣປາຣຍຕ຺ຕິວິສາລາ ນຕ຺ຖິ, ຍໍ ໂຍ ໂກຈິ ຕິຣິຍາມານາ ກຕຕ຺ຕາ’’ຕິ ເອວມາທີນໍ ສງ຺ຄໂຫ ທຏ຺ຐພ຺ໂພ. ສາຄຣເທເວນາຕິ ສາຄຣປຸຕ຺ຕຣາຊູຫິ. ຂໂຕຕິ ເອຕໍ ເອກວຈນໍ ເຕຫິ ປຈ຺ເຈກໍ ຂຕຕ຺ຕາ ‘‘ສາຄຣເທເວນ ຂຕຕ຺ຕາ’’ຕິ ວຸຕ຺ຕໍ. ສຫມຸທ຺ທາ ສມຸທ຺ໂທຕິ ວຸຕ຺ໂຕ. ຠວຕິ ວທ຺ຘຕິ ເອເຕນາຕິ ຠໂວ. ຠວາຠວາ ໂຫນ຺ຕີຕິ ອິຕິຠວາຠວກຖາ. ເອຕ຺ຖ ຈ ຠໂວຕິ ສສ຺ສຕໍ, ອຠໂວຕິ ອຸຈ຺ເຉທໍ. ຠໂວຕິ ວຸທ຺ຘິ, ອຠໂວຕິ ຫານິ. ຠໂວຕິ ກາມສຸຂໍ, ອຠໂວຕິ ອຕ຺ຕກິລມໂຖຕິ ອິຕິ ອິມາຍ ຉພ຺ພິຘາຍ ອິຕິຠວາຠວກຖາຍ ສທ຺ຘິໍ ພາຕ຺ຕິໍສ ຕິຣຈ຺ຉານກຖາ ນາມ ໂຫນ຺ຕິ. ອຖ ວາ ປາຬິຍໍ ສຣູປໂຕ ອນາຄຕາປິ ອຣຎ຺ຎປພ຺ພຕນທີທີປກຖາ ອິຕິສທ຺ເທນ ສງ຺ຄຓ຺ຫິຕ຺ວາ ພາຕ຺ຕິໍສ ຕິຣຈ຺ຉານກຖາ ວຸຕ຺ຕາ. ທສເມ ນຕ຺ຖິ ວຕ຺ຕພ຺ພໍ.

ປຐມກຖາວຕ຺ຖຸສຸຕ຺ຕາທິວຓ຺ຓນາ ນິຏ຺ຐິຕາ.

ຍມກວຄ຺ຄວຓ຺ຓນາ ນິຏ຺ຐິຕາ.