໗. ວີຣິຍາຣມ຺ຠາທິວຄ຺ຄວຓ຺ຓນາ

໖໑. ສຕ຺ຕມສ຺ສ ປຐເມ ວີຣານໍ ກມ຺ມນ຺ຕິ ວີຣິຍໍ, ວິຘິນາ ວາ ອີຣຍິຕພ຺ພໍ ປວຕ຺ເຕຕພ຺ພນ຺ຕິ ວີຣິຍໍ, ຕເທວ ກຸສລກິຣິຍາຍ ປຘານຏ຺ເຐນ ອາຣມ຺ໂຠ ວີຣິຍາຣມ຺ໂຠ. ອາຣທ຺ຘວີຣິຍຕາ ປຄ຺ຄຫິຕວີຣິຍຕາ ປຣິປຸຓ຺ຓວີຣິຍຕາຕິ ປຈ຺ເຈກໍ ວີຣິຍຕາສທ຺ໂທ ໂຍເຊຕພ຺ໂພ.

໖໒. ທຸຕິເຍ ມຫຕີ ອິຈ຺ຉາ ເອຕສ຺ສາຕິ ມຫິຈ຺ໂຉ, ຕສ຺ສ ຠາໂວ ມຫິຈ຺ຉຕາ. ມຫາວິສໂຍ ໂລໂຠ ມຫາໂລໂຠ ມຫນ຺ຕານໍ ວຕ຺ຖູນໍ ພຫູນຎ຺ຈ ອຠິຄິຊ຺ຌນໂຕ. ອິຕຣີຕຣາຕິອາທິນາ ປພ຺ພຊິຕານໍ ອຸປ຺ປຊ຺ຊນມຫິຈ຺ຉຕາ ວຸຕ຺ຕາ. ປຎ຺ຈຫິ ກາມຄຸເຓຫີຕິອາທິ ຄຫຏ຺ຐານໍ ວເສນ ວຸຕ຺ຕໍ. ອິຈ຺ຉາຕິ ສຠາວນິທ຺ເທໂສ. ອິຈ຺ຉາຄຕາຕິ ອິຈ຺ຉາປວຕ຺ຕາ. ມຫິຈ຺ຉຕາຕິ ມຫາອິຈ຺ຉຕາ. ອຕ຺ຖໂຕ ປນາຍໍ ຣາໂຄ ເອວາຕິ ວຸຕ຺ຕໍ – ‘‘ຣາໂຄ ສາຣາໂຄ’’ຕິອາທິ.

໖໓. ຕຕິເຍ ອປ຺ປິຈ຺ຉສ຺ສາຕິ ເອຕ຺ຖ ອປ຺ປ-ສທ຺ໂທ ອຠາວຕ຺ໂຖ ‘‘ອປ຺ປາພາໂຘ ໂຫຕິ ອປ຺ປາຕງ຺ໂກ’’ຕິອາທີສຸ (ມ. ນິ. ໒.໓໐໔) ວິຍາຕິ ອາຫ – ‘‘ອນິຈ຺ຉສ຺ສາ’’ຕິ. ໂລເກ ປາກຏສ຺ສ ຫິ ອກ຺ຂິໂຣຄກຸຈ຺ຉິໂຣຄາທິເຠທສ຺ສ ອາພາຘສ຺ສ ອຠາວໍ ສນ຺ຘາຍ ‘‘ອປ຺ປາພາໂຘ’’ຕິ ວຸຕ຺ຕໍ. ອິທານິ ວຸຕ຺ຕເມວຕ຺ຖໍ ປາກຏຕຣໍ ກາຕຸໍ ‘‘ເອຕ຺ຖ ຫີ’’ຕິອາທິ ວຸຕ຺ຕໍ. ພ຺ຍຎ຺ຊນໍ ສາວເສສໍ ວິຍ ປຣິຕ຺ຕເກປິ ອປ຺ປສທ຺ທສ຺ສ ທິສ຺ສມານຕ຺ຕາ. ອຕ຺ໂຖ ປນ ນິຣວເສໂສ ສພ຺ພໂສ ປຈ຺ຈຍິຈ຺ຉາຍ ອຠາວສ຺ສ ອຘິປ຺ເປຕຕ຺ຕາ. ເຕນາຫ – ‘‘ນ ຫີ’’ຕິອາທິ.

ອິຈ຺ຉາຍ ອຠາເວເນວ ອປ຺ປິຈ຺ໂຉ ນາມ ໂຫຕີຕິ ອິມມຕ຺ຖໍ ປກາຣນ຺ຕເຣນ ທີເປຕຸໍ – ‘‘ອປິຈາ’’ຕິອາທິ ວຸຕ຺ຕໍ. ອຕ຺ຣິຈ຺ຉຕາ ນາມ ອຕ຺ຣ ອຕ຺ຣ ອິຈ຺ຉາ. ອສນ຺ຕຄຸຓສມ຺ຠາວນຕາຍ ປາປາ ລາມິກາ ນິຫີນາ ອິຈ຺ຉາ ປາປິຈ຺ຉຕາ. ຍາຍ ປຈ຺ຈຍຸປ຺ປາທນຕ຺ຖໍ ອຕ຺ຕນິ ວິຊ຺ຊມານຄຸເຓ ສມ຺ຠາເວຕິ, ປຈ຺ຈຍານໍ ປຏິຄ຺ຄຫເຓ ຈ ນ ມຕ຺ຕໍ ຊານາຕິ, ອຍໍ ມຫິຈ຺ຉຕາ. ອສນ຺ຕຄຸຓສມ຺ຠາວນຕາຕິ ອຕ຺ຕນິ ອວິຊ຺ຊມານານໍ ຄຸຓານໍ ວິຊ຺ຊມານານໍ ວິຍ ປເຣສໍ ປກາສນາ. ສນ຺ຕຄຸຓສມ຺ຠາວນຕາຕິ ອິຈ຺ຉາຈາເຣ ຐຕ຺ວາ ອຕ຺ຕນິ ວິຊ຺ຊມານສີລຘຸຕຘມ຺ມາທິຄຸຓວິຠາວນາ. ຕາທິສສ຺ສປິ ປຏິຄ຺ຄຫເຓ ອມຕ຺ຕຎ຺ຎຸຕາປິ ໂຫຕິ, ສາປິ ອຠິຘມ຺ເມ ອາຄຕາເຍວາຕິ ສມ຺ພນ຺ໂຘ. ທຸສ຺ສນ຺ຕປ຺ປໂຍຕິ ທຸຕ຺ຕປ຺ປໂຍ.

ອຕິລູຂຠາວນ຺ຕິ ປຕ຺ຕຈີວຣວເສນ ອຕິວິຍ ລູຂຠາວໍ. ຕທສ຺ສ ທິສ຺ວາ ມນຸສ຺ສາ ‘‘ອຍໍ ອມງ຺ຄລທິວໂສ, ສຸມ຺ຠກສິນິທ຺ຘປຕ຺ຕຈີວໂຣ ອຍ຺ໂຍ ປຸພ຺ພງ຺ຄໂມ ກາຕພ຺ໂພ’’ຕິ ຈິນ຺ເຕຕ຺ວາ, ‘‘ຠນ຺ເຕ, ໂຖກໍ ພຫິ ໂຫຖາ’’ຕິ ອາຫໍສຸ. ອຸມ຺ມຸຊ຺ຊີຕິ ມນຸສ຺ສານໍ ອຊານນ຺ຕານໍເຍວ ປຖວິຍໍ ນິມຸຊ຺ຊິຕ຺ວາ ຄຓ຺ຫນ຺ໂຕເຍວ ອຸມ຺ມຸຊ຺ຊິ. ຍທິ ເຖໂຣ ‘‘ຂີຓາສວຠາວໍ ຊານນ຺ຕູ’’ຕິ ອິຈ຺ເຉຍ຺ຍ, ນ ນໍ ມນຸສ຺ສາ ‘‘ພຫິ ໂຫຖາ’’ຕິ ວເທຍ຺ຍຸໍ, ຂີຓາສວານໍ ປນ ຕຖາຈິຕ຺ຕເມວ ນ ອຸປ຺ປຊ຺ເຊຍ຺ຍ.

ອປ຺ປິຈ຺ຉຕາປຘານໍ ປຸຄ຺ຄລາຘິຏ຺ຐານໍ ຈຕຸພ຺ພິຘອິຈ຺ຉາປເຠທໍ ທສ຺ເສຕ຺ວາ ປຸນປິ ປຸຄ຺ຄລາຘິຏ຺ຐາເນນ ຈຕຸພ຺ພິຘໍ ອິຈ຺ຉາເຠທໍ ທສ຺ເສນ຺ໂຕ ‘‘ອປໂຣປິ ຈຕຸພ຺ພິໂຘ ອປ຺ປິຈ຺ໂຉ’’ຕິອາທິມາຫ. ປຈ຺ຈຍອປ຺ປິຈ຺ໂຉຕິ ປຈ຺ຈເຍສຸ ອິຈ຺ຉາຣຫິໂຕ. ຘຸຕງ຺ຄອປ຺ປິຈ຺ໂຉຕິ ຘຸຕຄຸຓສມ຺ຠາວນາຍ ອິຈ຺ຉາຣຫິໂຕ. ປຣິຍຕ຺ຕິອປ຺ປິຈ຺ໂຉຕິ ພຫຸສ຺ສຸຕສມ຺ຠາວນາຍ ອິຈ຺ຉາຣຫິໂຕ. ອຘິຄມອປ຺ປິຈ຺ໂຉຕິ ‘‘ອຣິໂຍ’’ຕິ ສມ຺ຠາວນາຍ ອິຈ຺ຉາຣຫິໂຕ. ທາຍກສ຺ສ ວສນ຺ຕິ ອປ຺ປໍ ວາ ຍໍ ທາຕຸກາໂມ ພຫຸໍ ວາຕິ ທາຍກສ຺ສ ຈິຕ຺ຕສ຺ສ ວສໍ, ອຊ຺ຌາສຍນ຺ຕິ ອຕ຺ໂຖ. ເທຍ຺ຍຘມ຺ມສ຺ສ ວສນ຺ຕິ ເທຍ຺ຍຘມ຺ມສ຺ສ ອພຫຸຠາວໍ. ອຕ຺ຕໂນ ຖາມນ຺ຕິ ອຕ຺ຕໂນ ປມາຓໍ. ຍຕ຺ຕເກນ ອຕ຺ຕາ ຍາເປຕິ, ຕຕ຺ຕກສ຺ເສວ ຄຫຓໍ. ຍທິ ຫີຕິອາທິ ສງ຺ເຂປໂຕ ວຸຕ຺ຕສ຺ສ ອຕ຺ຖສ຺ສ ວິວຣຓໍ. ປມາເຓເນວາຕິ ຍາປນປ຺ປມາເຓເນວ.

ເອກຠິກ຺ຂຸປິ ນາຎ຺ຎາສີຕິ ໂສສານິກວຕ຺ເຕ ສມ຺ມເທວ ວຕ຺ຕິຕຕ຺ຕາ ເອໂກປິ ຠິກ຺ຂຸ ນ ອຎ຺ຎາສິ. ອພ຺ໂພກິຓ຺ຓນ຺ຕິ ອວິຈ຺ເຉທໍ. ທຸຕິໂຍ ມໍ ຊາເນຍ຺ຍາຕິ ທຸຕິໂຍ ສຫາຍຠູໂຕປິ ຍຖາ ມໍ ຊານິຕຸໍ ນ ສກ຺ກຸເຓຍ຺ຍ, ຕຖາ ສຏ຺ຐິ ວສ຺ສານິ ນິຣນ຺ຕຣໍ ສຸສາເນ ວສາມິ, ຕສ຺ມາ ອຫໍ ອໂຫ ໂສສານິກຸຕ຺ຕໂມ. ອຸປກາໂຣ ຫຸຕ຺ວາຕິ ອຸຄ຺ຄຫປຣິປຸຈ຺ຉາທີຫິ ປຣິຍຕ຺ຕິຘມ຺ມວເສນ ອຸປກາໂຣ ຫຸຕ຺ວາ. ຘມ຺ມກຖາຍ ຊນປທໍ ໂຂເຠຕ຺ວາຕິ ໂລມຫໍສນສາຘຸກາຣທານເຈລຸກ຺ເຂປາທິວເສນ ສນ຺ນິປຕິຕໍ ອິຕຣຎ຺ຈ ‘‘ກຖໍ ນຸ ໂຂ ອປ຺ປໍ ອຍ຺ຍສ຺ສ ສນ຺ຕິເກ ຘມ຺ມໍ ໂສສ຺ສາມາ’’ຕິ ໂກລາຫລວເສນ ມຫາຊນໍ ໂຂເຠຕ຺ວາ? ຍທິ ເຖໂຣ ພຫຸສ຺ສຸຕຠາວໍ ຊານາເປຕຸໍ ອິຈ຺ເຉຍ຺ຍ, ປຸພ຺ເພວ ຊນປທໍ ໂຂເຠນ຺ໂຕ ຘມ຺ມໍ ກເຖຍ຺ຍ. ຄໂຕຕິ ‘‘ອຍໍ ໂສ, ເຍນ ຣຕ຺ຕິຍໍ ຘມ຺ມກຖາ ກຕາ’’ຕິ ຊານນຠາເວນ ປຣິຍຕ຺ຕິອປ຺ປິຈ຺ຉຕາຍ ປຸຣາຣຸຓາວ ຄໂຕ.

ຕໂຍ ກຸລປຸຕ຺ຕາ ວິຍາຕິ ປາຈີນວໍສທາເຍ ສາມຄ຺ຄິວາສໍວຸຏ຺ຐາ ອນຸຣຸທ຺ໂຘ, ນນ຺ທິໂຍ, ກິມິໂລຕິ ອິເມ ຕໂຍ ກຸລປຸຕ຺ຕາ ວິຍ. ເອເຕສຸປິ ຫິ ອນຸຣຸທ຺ຘຕ຺ເຖເຣນ ຠຄວຕາ ‘‘ອຕ຺ຖິ ປນ ໂວ ອນຸຣຸທ຺ຘາ ເອວໍ ອປ຺ປມຕ຺ຕານໍ ອາຕາປີນໍ ປຫິຕຕ຺ຕານໍ ວິຫຣນ຺ຕານໍ ອຸຕ຺ຕຣິມນຸສ຺ສຘມ຺ໂມ ອລມຣິຍຎາຓທສ຺ສນວິເສໂສ ອຘິຄໂຕ ຜາສຸວິຫາໂຣ’’ຕິ (ມ. ນິ. ໑.໓໒໘) ປຸຏ຺ເຐນ ‘‘ອິຘ ປນ ມຍໍ, ຠນ຺ເຕ, ຍາວເທວ ອາກງ຺ຂາມ, ວິວິຈ຺ເຈວ ກາເມຫິ ວິວິຈ຺ຈ ອກຸສເລຫິ ຘມ຺ເມຫິ ສວິຕກ຺ກໍ ສວິຈາຣໍ ວິເວກຊໍ ປີຕິສຸຂໍ ປຐມໍ ຌານໍ ອຸປສມ຺ປຊ຺ຊ ວິຫຣາມາ’’ຕິອາທິນາ (ມ. ນິ. ໑.໓໒໘) ອນຸປຸພ຺ພວິຫາຣສມາປຕ຺ຕີສຸ ອາໂຣຈິຕາສຸ ອິຕເຣ ເຖຣາ ນ ອິຈ຺ຉິໍສຸ. ຕຖາ ຫິ ເຕ ປກ຺ກນ຺ເຕ ຠຄວຕິ ອາຍສ຺ມນ຺ຕໍ ອນຸຣຸທ຺ຘໍ ເອຕທໂວຈຸໍ – ‘‘ກິນ຺ນຸ ມຍໍ ອາຍສ຺ມໂຕ ອນຸຣຸທ຺ຘສ຺ສ ເອວມາໂຣຈິມ຺ຫ ‘ອິມາສຎ຺ຈ ອິມາສຎ຺ຈ ວິຫາຣສມາປຕ຺ຕີນໍ ມຍໍ ລາຠິໂນ’ຕິ? ຍໍ ໂນ ອາຍສ຺ມາ ອນຸຣຸທ຺ໂຘ ຠຄວໂຕ ສມ຺ມຸຂາປິ ອາສວານໍ ຂຍໍ ປກາເສຕີ’’ຕິ? ຆຏີກາໂຣປິ ອຕ຺ຕໂນ ອຣິຍຠາເວ ກິກິສ຺ສ ຣຎ຺ໂຎ ຠຄວຕາ ອາໂຣຈິເຕ ນ ອຕ຺ຕມໂນ ອໂຫສິ? ເຕນາຫ – ‘‘ຆຏີກາຣກຸມ຺ຠກາໂຣ ວິຍາ’’ຕິ. ອິມສ຺ມິໍ ປນຕ຺ເຖຕິ ‘‘ຍຖຍິທໍ, ຠິກ຺ຂເວ, ອປ຺ປິຈ຺ຉຕາ’’ຕິ ວຸຕ຺ເຕ ອປ຺ປິຈ຺ຉຕາສງ຺ຂາເຕ ອຕ຺ເຖ. ພລວອໂລເຠນາຕິ ທຬ຺ຫຕຣປ຺ປວຕ຺ຕິເກນ ອໂລເຠນ.

໖໔. ຈຕຸຕ຺ເຖ ນຕ຺ຖິ ເອຕສ຺ສ ສນ຺ຕຸຏ຺ຐີຕິ ອສນ຺ຕຸຏ຺ຐິ, ຕສ຺ສ ຠາໂວ ອສນ຺ຕຸຏ຺ຐິຕາ. ຕໍ ປນ ສຣູປໂຕ ທສ຺ເສນ຺ໂຕ ‘‘ອສນ຺ຕຸຏ຺ເຐ ປຸຄ຺ຄເລ…ເປ… ໂລໂຠ’’ຕິ ອາຫ. ເສວນ຺ຕສ຺ສາຕິອາທີນິ ອຎ຺ຎມຎ຺ຎເວວຈນານິ.

໖໕-໖໗. ປຎ຺ຈເມ ຕຸສ຺ສນໍ ຕຸຏ຺ຐິ, ສມໍ, ສເກນ, ສນ຺ເຕນ ວາ ຕຸຏ຺ຐິ ເອຕສ຺ສາຕິ ສນ຺ຕຸຏ຺ຐິ, ຕສ຺ສ ຠາໂວ ສນ຺ຕຸຏ຺ຐິຕາ. ຍສ຺ສ ສນ຺ໂຕສສ຺ສ ອຕ຺ຖິຕາຍ ຠິກ຺ຂຸ ‘‘ສນ຺ຕຸຏ຺ໂຐ’’ຕິ ວຸຈ຺ຈຕິ, ຕໍ ທສ຺ເສນ຺ໂຕ ‘‘ອິຕຣີຕຣປຈ຺ຈຍສນ຺ໂຕເສນ ສມນ຺ນາຄຕສ຺ສາ’’ຕິ ອາຫ – ຈີວຣາທິເກ ຍຕ຺ຖ ກຕ຺ຖຈິ ກປ຺ປິເຍ ປຈ຺ຈເຍ ສນ຺ຕຸສ຺ສເນນ ສມງ຺ຄີຠູຕສ຺ສາຕິ ອຕ຺ໂຖ. ອຖ ວາ ອິຕຣໍ ວຸຈ຺ຈຕິ ຫີນໍ ປຓີຕໂຕ ອຎ຺ຎຕ຺ຕາ, ຕຖາ ປຓີຕມ຺ປິ ອິຕຣໍ ຫີນໂຕ ອຎ຺ຎຕ຺ຕາ. ອເປກ຺ຂາສິທ຺ຘາ ຫິ ອິຕຣຕາ. ອິຕິ ເຍນ ຘມ຺ເມນ ຫີເນນ ວາ ປຓີເຕນ ວາ ຈີວຣາທິປຈ຺ຈເຍນ ສນ຺ຕຸສ຺ສຕິ, ໂສ ຕຖາ ປວຕ຺ໂຕ ອໂລໂຠ ອິຕຣີຕຣປຈ຺ຈຍສນ຺ໂຕໂສ, ເຕນ ສມນ຺ນາຄຕສ຺ສ. ຍຖາລາຠໍ ອຕ຺ຕໂນ ລາຠານຸຣູປໍ ສນ຺ໂຕໂສ ຍຖາລາຠສນ຺ໂຕໂສ. ເສສປທທ຺ວເຍປິ ເອເສວ ນໂຍ. ລພ຺ຠຕີຕິ ວາ ລາໂຠ, ໂຍ ໂຍ ລາໂຠ ຍຖາລາໂຠ, ເຕນ ສນ຺ໂຕໂສ ຍຖາລາຠສນ຺ໂຕໂສ. ພລນ຺ຕິ ກາຍພລໍ. ສາຣຸປ຺ປນ຺ຕິ ຠິກ຺ຂຸໂນ ອນຸຈ຺ຉວິກຕາ.

ຍຖາລທ຺ຘໂຕ ອຎ຺ຎສ຺ສ ອປຕ຺ຖນາ ນາມ ສິຍາ ອປ຺ປິຈ຺ຉຕາປິ ປວຕ຺ຕິອາກາໂຣຕິ ຕໂຕ ວິນິເວຈິຕເມວ ສນ຺ໂຕສສ຺ສ ສຣູປໍ ທສ຺ເສນ຺ໂຕ ‘‘ລຠນ຺ໂຕປິ ນ ຄຓ຺ຫາຕີ’’ຕິ ອາຫ. ຕໍ ປຣິວຕ຺ເຕຕ຺ວາ ປກຕິທຸພ຺ພລາທີນໍ ຄຣຸຈີວຣໍ ອຜາສຸຠາວາວຫໍ ສຣີຣເຂທາວຫຎ຺ຈ ໂຫຕີຕິ ປໂຍຊນວເສນ ນ ອຕ຺ຣິຈ຺ຉຕາທິວເສນ ຕໍ ປຣິວຕ຺ເຕຕ຺ວາ ລຫຸກຈີວຣປຣິໂຠໂຄ ສນ຺ໂຕສວິໂຣຘິ ນ ໂຫຕີຕິ ອາຫ – ‘‘ລຫຸເກນ ຍາເປນ຺ໂຕປິ ສນ຺ຕຸຏ຺ໂຐວ ໂຫຕີ’’ຕິ. ມຫຄ຺ຆຈີວຣໍ ພຫູນິ ວາ ຈີວຣານິ ລຠິຕ຺ວາ ຕານິ ວິສ຺ສຊ຺ເຊຕ຺ວາ ຕທຎ຺ຎສ຺ສ ຄຫຓໍ ຍຖາສາຣຸປ຺ປນເຍ ຐິຕຕ຺ຕາ ນ ສນ຺ໂຕສວິໂຣຘີຕິ ອາຫ – ‘‘ເຕສໍ…ເປ… ຘາເຣນ຺ໂຕປິ ສນ຺ຕຸຏ຺ໂຐວ ໂຫຕີ’’ຕິ. ເອວໍ ເສສປຈ຺ຈເຍສຸປິ ຍຖາສາຣຸປ຺ປນິທ຺ເທເສ ອປິ-ສທ຺ທຄ຺ຄຫເຓ ອຘິປ຺ປາໂຍ ເວທິຕພ຺ໂພ. ມຸຕ຺ຕຫຣີຕກນ຺ຕິ ໂຄມຸຕ຺ຕປຣິຠາວິຕໍ, ປູຕິຠາເວນ ວາ ຉຑ຺ຑິຕໍ ຫຣີຕກໍ. ພຸທ຺ຘາທີຫິ ວຓ຺ຓິຕນ຺ຕິ ອປ຺ປິຈ຺ຉຕາສນ຺ຕຸຏ຺ຐີສຸ ຠິກ຺ຂູ ນິໂຍເຊຕຸໍ ‘‘ປູຕິມຸຕ຺ຕເຠສຊ຺ຊໍ ນິສ຺ສາຍ ປພ຺ພຊ຺ຊາ’’ຕິອາທິນາ (ມຫາວ. ໗໓, ໑໒໘) ພຸທ຺ຘາທີຫິ ປສຕ຺ຖໍ. ປຣມສນ຺ຕຸຏ຺ໂຐວ ໂຫຕິ ປຣເມນ ອຸກ຺ກໍສຄເຕນ ສນ຺ໂຕເສນ ສມນ຺ນາຄຕຕ຺ຕາ. ຍຖາສາຣຸປ຺ປສນ຺ໂຕໂສວ ອຄ຺ໂຄຕິ ຕຕ຺ຖ ຕຕ຺ຖ ຠິກ຺ຂຸ ສາຣຸປ຺ປໍເຍວ ນິສ຺ສາຍ ສນ຺ຕຸສ຺ສນວເສນ ປວຕ຺ຕນໂຕ ອຄ຺ໂຄ. ຉຏ຺ຐສຕ຺ຕເມສຸ ນຕ຺ຖິ ວຕ຺ຕພ຺ພໍ.

໖໘-໖໙. ອຏ຺ຐມນວເມສຸ ນ ສມ຺ປຊານາຕີຕິ ອສມ຺ປຊາໂນ, ຕສ຺ສ ຠາໂວ ອສມ຺ປຊຎ຺ຎໍ. ວຸຕ຺ຕປ຺ປຏິປກ຺ເຂນ ສມ຺ປຊຎ຺ຎໍ ເວທິຕພ຺ພໍ.

໗໐. ທສເມ ປາປມິຕ຺ຕາ ເທວທຕ຺ຕສທິສາ. ເຕ ຫິ ຫີນາຈາຣຕາຍ, ທຸກ຺ຂສ຺ສ ວາ ສມ຺ປາປກຕາຍ ‘‘ປາປາ’’ຕິ ວຸຈ຺ຈນ຺ຕິ. ເຕນາກາເຣນ ປວຕ຺ຕານນ຺ຕິ ໂຍ ປາປມິຕ຺ຕສ຺ສ ຂນ຺ຕິ ຣຸຈິ ອຘິມຸຕ຺ຕິ ຕນ຺ນິນ຺ນຕາຕໍສມ຺ປວງ຺ກຕາທິອາກາໂຣ, ເຕນາກາເຣນ ປວຕ຺ຕານໍ. ຈຕຸນ຺ນໍ ຂນ຺ຘານເມເວຕໍ ນາມນ຺ຕິ ຈຕຸນ຺ນໍ ອຣູປກ຺ຂນ຺ຘານໍ ‘‘ປາປມິຕ຺ຕຕາ’’ຕິ ເອຕໍ ນາມໍ. ຍສ຺ມາ ອສ຺ສທ຺ຘິຍາທິປາປຘມ຺ມສມນ຺ນາຄຕາ ປຸຄ຺ຄລາ ວິເສສໂຕ ປາປາ ປຸຎ຺ຎຘມ຺ມວິໂມກ຺ຂຕາຍ, ເຕ ຍສ຺ສ ມິຕ຺ຕາ ສຫາຍາ, ໂສ ປາປມິຕ຺ໂຕ, ຕສ຺ສ ຠາໂວ ປາປມິຕ຺ຕຕາ. ເຕນາຫ – ‘‘ເຍ ເຕ ປຸຄ຺ຄລາ ອສ຺ສທ຺ຘາ’’ຕິອາທິ.

ວີຣິຍາຣມ຺ຠາທິວຄ຺ຄວຓ຺ຓນາ ນິຏ຺ຐິຕາ.