໘. ກລ຺ຍາຓມິຕ຺ຕາທິວຄ຺ຄວຓ຺ຓນາ

໗໑. ອຏ຺ຐມສ຺ສ ປຐເມ ພຸທ຺ຘາ, ສາຣິປຸຕ຺ຕາທໂຍ ວາ ກລ຺ຍາຓມິຕ຺ຕາ. ວຸຕ຺ຕປຏິປກ຺ຂນເຍນາຕິ ‘‘ປາປມິຕ຺ຕຕາ’’ຕິ ປເທ ວຸຕ຺ຕສ຺ສ ປຏິປກ຺ຂນເຍນ.

໗໒-໗໓. ທຸຕິເຍ ໂຍໂຄຕິ ສມງ຺ຄີຠາໂວ. ປໂຍໂຄຕິ ປຍຸຎ຺ຊນໍ ປຏິປຕ຺ຕິ. ອໂຍໂຄຕິ ອສມງ຺ຄີຠາໂວ. ອປ຺ປໂຍໂຄຕິ ອປ຺ປຍຸຎ຺ຊນໍ ອປ຺ປຏິປຕ຺ຕິ. ອນຸໂຍເຄນາຕິ ອນຸໂຍຄເຫຕຸ.

໗໔. ຈຕຸຕ຺ເຖ ພຸຊ຺ຌນກສຕ຺ຕສ຺ສາຕິ ຈຕຸນ຺ນໍ ອຣິຍສຈ຺ຈານໍ ປຏິວິຊ຺ຌນກປຸຄ຺ຄລສ຺ສ. ອງ຺ຄຠູຕາຕິ ຕສ຺ເສວ ປຏິເວຘສ຺ສ ກາຣຓຠູຕາ. ເອຕ຺ຖ ຈ ຈຕ຺ຕາຣິ ອຣິຍສຈ຺ຈານິ ພຸຊ຺ຌຕິ, ອຎ຺ຎາຓນິທ຺ທາຍ ວາປິ ພຸຊ຺ຌຕີຕິ ໂພຘີຕິ ລທ຺ຘນາໂມ ອຣິຍສາວໂກ ພຸຊ຺ຌນກສຕ຺ໂຕ, ຕສ຺ສ ພຸຊ຺ຌນກສຕ຺ຕສ຺ສ. ໂພຘິຍາຕິ ຕສ຺ສາ ຘມ຺ມສາມຄ຺ຄິສງ຺ຂາຕາຍ ໂພຘິຍາ. ພຸຊ຺ຌນຏ຺ເຐນ ໂພຘິໂຍ, ໂພຘິໂຍ ເອວ ສຈ຺ຈສມ຺ປຏິໂພຘສ຺ສ ອງ຺ຄາຕິ ວຸຕ຺ຕໍ. ‘‘ພຸຊ຺ຌນ຺ຕີຕິ ໂພຊ຺ຌງ຺ຄາ’’ຕິ. ວິປສ຺ສນາທີນໍ ກາຣຓານໍ ພຸຊ຺ຌິຕພ຺ພານຎ຺ຈ ສຈ຺ຈານໍ ອນຸຣູປໍ ພຸຊ຺ຌນໂຕ ອນຸພຸຊ຺ຌນ຺ຕີຕິ ໂພຊ຺ຌງ຺ຄາ, ປຏິມຸຂໍ ປຈ຺ຈກ຺ຂຠາເວນ ອຠິມຸຂໍ ພຸຊ຺ຌນໂຕ ປຏິພຸຊ຺ຌນ຺ຕີຕິ ໂພຊ຺ຌງ຺ຄາ, ສມ຺ມາ ອວິປຣີຕໂຕ ພຸຊ຺ຌນໂຕ ສມ຺ພຸຊ຺ຌນ຺ຕີຕິ ໂພຊ຺ຌງ຺ຄາຕິ ເອວໍ ອຕ຺ຖວິເສສທີປເກຫິ ອຸປສຄ຺ເຄຫິ ອນຸພຸຊ຺ຌນ຺ຕີຕິອາທິ ວຸຕ຺ຕໍ. ໂພຘິສທ຺ໂທ ສພ຺ພວິເສສຍຸຕ຺ຕໍ ພຸຊ຺ຌນສາມຎ຺ເຎນ ສງ຺ຄຓ຺ຫາຕິ. ໂພຘາຍ ສໍວຕ຺ຕນ຺ຕີຕິ ອິມິນາ ຕສ຺ສາ ຘມ຺ມສາມຄ຺ຄິຍາ ພຸຊ຺ຌນສ຺ສ ເອກນ຺ຕກາຣຓຕໍ ທສ຺ເສຕິ. ເອວໍ ປເນຕໍ ປທໍ ວິຠຕ຺ຕເມວາຕິ ວຸຕ຺ຕປ຺ປກາເຣນ ເອຕໍ ‘‘ໂພຊ຺ຌງ຺ຄາ’’ຕິ (ປຏິ. ມ. ໒.໑໗) ປທໍ ນິທ຺ເທເສ ປຏິສມ຺ຠິທາມຄ຺ເຄ ວິຠຕ຺ຕເມວ.

໗໕. ປຎ຺ຈເມ ຍາຖາວສຣສຠູມີຕິ ຍາຖາວໂຕ ສກິຈ຺ຈກຣຓຠູມິ. ສາຕິ ຍາຖາວສຣສຠູມິ. ວິປສ຺ສນາຕິ ພລວວິປສ຺ສນາ. ເກຈິ ‘‘ຠງ຺ຄຎາຓໂຕ ປຏ຺ຐາຍາ’’ຕິ ວທນ຺ຕິ. ວິປສ຺ສນາຍ ປາທກຊ຺ຌາເນ ຈ ສຕິອາທໂຍ ໂພຊ຺ຌງ຺ຄປກ຺ຂິກາ ເອວ ປຣິຍາຍໂພຘິປກ຺ຂິຍຠາວໂຕ. ຕຕ຺ຖາຕິອາທິ ຈຕຸພ຺ພິຘານໍ ໂພຊ຺ຌງ຺ຄານໍ ຠູມິວິຠາຄທສ຺ສນໍ.

໗໖. ຉຏ຺ເຐ ເຕສໍ ອນ຺ຕເຣຕິ ເຕສໍ ຠິກ຺ຂູນໍ ອນ຺ຕເຣ. ກາມໍ ສງ຺ຄີຕິອາຣຸຬ຺ຫວເສນ ອປ຺ປກມິທໍ ສຸຕ຺ຕປທໍ, ຠຄວາ ປເນຕ຺ຖ ສນ຺ນິປຕິຕປຣິສາຍ ອຊ຺ຌາສຍານຸຣູປໍ ວິຕ຺ຖາຣິກໍ ກໂຣຕີຕິ ກຕ຺ວາ ອິທໍ ວຸຕ຺ຕໍ – ‘‘ມຫຕີ ເທສນາ ຠວິສ຺ສຕີ’’ຕິ. ຄາມນິຄມາທິກຖາ ນຕ຺ຖີຕິ ຕສ຺ສາ ກຖາຍ ອຕິຣຈ຺ຉານກຖາຠາວມາຫຸ. ຕຖາ ຫິ ສາ ປຸພ຺ເພ ພຫຸຎາຕິກໍ ອໂຫສິ ພຫຸປກ຺ຂໍ, ອິທານິ ອປ຺ປຎາຕິກໍ ອປ຺ປປກ຺ຂນ຺ຕິ ອນິຈ຺ຈຕາມຸເຂນ ນິຍ຺ຍານິກປກ຺ຂິກາ ຊາຕາ. ເອຕາຍາຕິ ຍຖາວຸຕ຺ຕາຍ ປຣິຫານິຍາ. ປຕິກິຏ຺ຐນ຺ຕິ ນິຫີນໍ. ມມ ສາສເນຕິ ອິທໍ ກມ຺ມສ຺ສກຕຊ຺ຌານປຎ຺ຎານມ຺ປິ ວິເສສນເມວ. ຕທຸຠຍມ຺ປິ ຫິ ພາຫິຣການໍ ຕປ຺ປຎ຺ຎາທ຺ວຍໂຕ ສາຕິສຍເມວ ສພ຺ພຎ຺ຎຸພຸທ຺ຘານໍ ເທສນາຍ ລທ຺ຘວິເສສໂຕ ວິວຏ຺ຏູປນິສ຺ສຍໂຕ ຈ.

໗໗. ສຕ຺ຕເມ ເຕສໍ ຈິຕ຺ຕາຈາຣໍ ຎຕ຺ວາຕິ ຕຖາ ກເຖນ຺ຕານໍ ເຕສໍ ຠິກ຺ຂູນໍ ຕຕ຺ຖ ອຸປຄມເນນ ອຕ຺ຕໂນ ເທສນາຍ ຠາຊນຠູຕໍ ຈິຕ຺ຕປ຺ປວຕ຺ຕິໍ ຎຕ຺ວາ. ກມ຺ມສ຺ສກຕາທີຕິ ອາທິສທ຺ເທນ ຌານປຎ຺ຎາທີນໍ ຈຕຸນ຺ນມ຺ປິ ປຎ຺ຎານໍ ຄຫຓໍ.

໗໘-໘໐. ອຏ຺ຐມາທີສຸ ເຫຏ຺ຐາ ວຸຕ຺ຕນເຍເນວາຕິ ‘‘ຍາ ເອສ ມມ ສາສເນ’’ຕິອາທິນາ ເຫຏ຺ຐາ ວຸຕ຺ຕນເຍເນວ. ເສສເມຕ຺ຖ ອຸຕ຺ຕານຕ຺ຖເມວ.

ກລ຺ຍາຓມິຕ຺ຕາທິວຄ຺ຄວຓ຺ຓນາ ນິຏ຺ຐິຕາ.

໘໑-໘໒. ນວເມ ວຄ຺ເຄ ນຕ຺ຖິ ວຕ຺ຕພ຺ພໍ.