໔. ຈຕຸຕ຺ໂຖ ປຣິຈ຺ເຉໂທ

ເອກວິຘາທິນິທ຺ເທໂສ

໑໒໗. ອິໂຕ ປຣໍ ປວກ຺ຂາມິ, ນຍເມກວິຘາທິກໍ;

ອາຠິຘມ຺ມິກຠິກ຺ຂູນໍ, ພຸທ຺ຘິຍາ ປນ ວຸທ຺ຘິຍາ.

໑໒໘. ສພ຺ພເມກວິຘໍ ຈິຕ຺ຕໍ, ວິຊານນສຠາວໂຕ;

ທຸວິຘຎ຺ຈ ຠເວ ຈິຕ຺ຕໍ, ອເຫຕຸກສເຫຕຸໂຕ.

໑໒໙. ປຸຎ຺ຎາປຸຎ຺ຎວິປາກາ ຫິ, ກາເມ ທສ ຈ ປຎ຺ຈ ຈ;

ກ຺ຣິຍາ ຕິສ຺ໂສຕິ ສພ຺ເພປິ, ອຏ຺ຐາຣສ ອເຫຕຸກາ.

໑໓໐. ເອກສຕ຺ຕຕິ ເສສານິ, ຈິຕ຺ຕຸປ຺ປາທາ ມເຫສິນາ;

ສເຫຕຸກາຕິ ນິທ຺ທິຏ຺ຐາ, ຕາທິນາ ເຫຕຸວາທິນາ.

໑໓໑. ສວຕ຺ຖຸກາວຕ຺ຖຸກໂຕ, ຕໂຖຠຍວເສນ ຈ;

ສພ຺ພໍ ວຸຕ຺ຕປກາຣໍ ຕຸ, ຕິວິຘໍ ໂຫຕິ ມານສໍ.

໑໓໒. ສພ຺ໂພ ກາມວິປາໂກ ຈ, ຣູເປ ປຎ຺ຈທສາປິ ຈ;

ອາທິມຄ຺ໂຄ ສິຕຸປ຺ປາໂທ, ມໂນຘາຕຸ ກ຺ຣິຍາປິ ຈ.

໑໓໓. ໂທມນສ຺ສທ຺ວຍຎ຺ຈາປິ, ເຕຈຕ຺ຕາລີສ ມານສາ;

ນຸປ຺ປຊ຺ຊນ຺ຕິ ວິນາ ວຕ຺ຖຸໍ, ເອກນ຺ເຕນ ສວຕ຺ຖຸກາ.

໑໓໔. ອຣູປາວຈຣປາກາ ຈ, ເອກນ຺ເຕນ ອວຕ຺ຖຸກາ;

ທ຺ວາຈຕ຺ຕາລີສ ເສສານິ, ຈິຕ຺ຕານຸຠຍຖາ ສິຍຸໍ.

໑໓໕. ເອເກກາຣມ຺ມຓໍ ຈິຕ຺ຕໍ, ປຎ຺ຈາຣມ຺ມຓເມວ ຈ;

ຉຬາຣມ຺ມຓກຎ຺ເຈຕິ, ເອວມ຺ປິ ຕິວິຘໍ ສິຍາ.

໑໓໖. ວິຎ຺ຎາຓານິ ຈ ທ຺ເວປຎ຺ຈ, ອຏ຺ຐ ໂລກຸຕ຺ຕຣານິ ຈ;

ສພ຺ພໍ ມຫຄ຺ຄຕຎ຺ເຈວ, ຐເປຕ຺ວາຠິຎ຺ຎມານສໍ.

໑໓໗. ເຕຈຕ຺ຕາລີສ ວິຎ຺ເຎຍ຺ຍາ, ເອເກກາຣມ຺ມຓາ ປນ;

ມໂນຘາຕຸຕ຺ຕຍໍ ຕຕ຺ຖ, ປຎ຺ຈາຣມ຺ມຓມີຣິຕໍ.

໑໓໘. ເຕຈຕ຺ຕາລີສ ເສສານິ, ຉຬາຣມ຺ມຓິກາ ມຕາ;

ຕຖາ ຈ ຕິວິຘໍ ຈິຕ຺ຕໍ, ກຸສລາກຸສລາທິໂຕ.

໑໓໙. ອເຫຕຸໍ ເອກເຫຕຸຎ຺ຈ, ທ຺ວິເຫຕຸຎ຺ຈ ຕິເຫຕຸກໍ;

ເອວໍ ຈຕຸພ຺ພິຘໍ ຈິຕ຺ຕໍ, ວິຎ຺ຎາຕພ຺ພໍ ວິຠາວິນາ.

໑໔໐. ເຫຏ຺ຐາ ມຍາປິ ນິທ຺ທິຏ຺ຐາ, ອຏ຺ຐາຣສ ອເຫຕຸກາ;

ວິຈິກິຈ຺ຉຸທ຺ຘຈ຺ຈສໍຍຸຕ຺ຕໍ, ເອກເຫຕຸມຸທີຣິຕໍ.

໑໔໑. ກາເມ ທ຺ວາທສຘາ ປຸຎ຺ຎ-ວິປາກກ຺ຣິຍໂຕ ປນ;

ທສຘາກຸສລາ ຈາຕິ, ພາວີສຕິ ທຸເຫຕຸກາ.

໑໔໒. ກາເມ ທ຺ວາທສຘາ ປຸຎ຺ຎ-ວິປາກກ຺ຣິຍໂຕ ປນ;

ສພ຺ພໍ ມຫຄ຺ຄຕຎ຺ເຈວ, ອປ຺ປມາຓໍ ຕິເຫຕຸກໍ.

໑໔໓. ຣູປີຣິຍາປຖວິຎ຺ຎຕ຺ຕິ-ຊນກາຊນກາທິໂຕ;

ເອວຎ຺ຈາປິ ຫິ ຕໍ ຈິຕ຺ຕໍ, ໂຫຕິ ສພ຺ພໍ ຈຕຸພ຺ພິຘໍ.

໑໔໔. ທ຺ວາທສາກຸສລາ ຕຕ຺ຖ, ກຸສລາ ກາມຘາຕຸຍາ;

ຕຖາ ທສ ກ຺ຣິຍາ ກາເມ, ອຠິຎ຺ຎາມານສໍ ທ຺ວຍໍ.

໑໔໕. ສມຸຏ຺ຐາເປນ຺ຕິ ຣູປານິ, ກປ຺ເປນ຺ຕິ ອິຣິຍາປຖໍ;

ຊນຍນ຺ຕິ ຈ ວິຎ຺ຎຕ຺ຕິໍ, ອິເມ ທ຺ວຕ຺ຕິໍສ ມານສາ.

໑໔໖. ກຸສລາ ຈ ກ຺ຣິຍາ ເຈວ, ເຕ ມຫຄ຺ຄຕມານສາ;

ອຏ຺ຐານາສວຈິຕ຺ຕານິ, ຉພ຺ພີສຕິ ຈ ມານສາ.

໑໔໗. ສມຸຏ຺ຐາເປນ຺ຕິ ຣູປານິ, ກປ຺ເປນ຺ຕິ ອິຣິຍາປຖໍ;

ໂຈປນໍ ນ ຈ ປາເປນ຺ຕິ, ທ຺ວິກິຈ຺ຈາ ນິຍຕາ ອິເມ.

໑໔໘. ຐເປຕ຺ວາ ທສ ວິຎ຺ຎາເຓ, ວິປາກາ ທ຺ວີສຸ ຠູມິສຸ;

ກ຺ຣິຍາ ເຈວ ມໂນຘາຕຸ, ອິມາເນກູນວີສຕິ.

໑໔໙. ສມຸຏ຺ຐາເປນ຺ຕິ ຣູປານິ, ນ ກໂຣນ຺ຕິຕຣທ຺ວຍໍ;

ປຸນ ທ຺ເວປຎ຺ຈວິຎ຺ຎາຓາ, ວິປາກາ ຈ ອຣູປິສຸ.

໑໕໐. ສພ຺ເພສໍ ສນ຺ຘິຈິຕ຺ຕຎ຺ຈ, ຈຸຕິຈິຕ຺ຕຎ຺ຈາຣຫໂຕ;

ນ ກໂຣນ຺ຕິ ຕິກິຈ຺ຈານິ, ອິເມ ໂສຬສ ມານສາ.

໑໕໑. ເອກທ຺ວິຕິຈຕຸຏ຺ຐານ-ປຎ຺ຈຏ຺ຐານປເຠທໂຕ;

ປຎ຺ຈຘາ ຈິຕ຺ຕມກ຺ຂາສິ, ປຎ຺ຈນິມ຺ມລໂລຈໂນ.

໑໕໒. ກຸສລາກຸສລາ ສພ຺ເພ, ຈິຕ຺ຕຸປ຺ປາທາ ມຫາກ຺ຣິຍາ;

ມຫຄ຺ຄຕາ ກ຺ຣິຍາ ເຈວ, ຈຕ຺ຕາໂຣ ຜລມານສາ.

໑໕໓. ສພ຺ເພວ ປຎ຺ຈປຎ຺ຎາສ, ນິປ຺ປປຎ຺ເຈນ ສຕ຺ຖຸນາ;

ຊວນຏ຺ຐານໂຕເຍວ, ເອກຏ຺ຐາເນ ນິຍາມິຕາ.

໑໕໔. ປຸນ ທ຺ເວປຎ຺ຈວິຎ຺ຎາຓາ, ທສ຺ສເນ ສວເນ ຕຖາ;

ຆາຍເນ ສາຍເນ ຐາເນ, ຜຸສເນ ປຏິປາຏິຍາ.

໑໕໕. ມໂນຘາຕຸຕ຺ຕິກໍ ຐາເນ, ອາວຊ຺ຊເນ ປຏິຈ຺ຉເນ;

ອຏ຺ຐສຏ຺ຐິ ຠວນ຺ເຕເຕ, ເອກຏ຺ຐານິກຕໍ ຄຕາ.

໑໕໖. ປຸນ ທ຺ວິຏ຺ຐານິກໍ ນາມ, ຈິຕ຺ຕທ຺ວຍມຸທີຣິຕໍ;

ໂສມນສ຺ສຍຸຕໍ ປຎ຺ຈ-ທ຺ວາເຣ ສນ຺ຕີຣຓໍ ສິຍາ.

໑໕໗. ຕທາຣມ຺ມຓໍ ຉທ຺ວາເຣ, ພລວາຣມ຺ມເຓ ສຕິ;

ຕຖາ ໂວຏ຺ຐພ຺ພນໍ ໂຫຕິ, ປຎ຺ຈທ຺ວາເຣສຸ ໂວຏ຺ຐໂພ.

໑໕໘. ມໂນທ຺ວາເຣສຸ ສພ຺ເພສໍ, ໂຫຕິ ອາວຊ຺ຊນໍ ປນ;

ອິທໍ ທ຺ວິຏ຺ຐານິກໍ ນາມ, ໂຫຕິ ຈິຕ຺ຕທ຺ວຍໍ ປນ.

໑໕໙. ປຏິສນ຺ຘິຠວງ຺ຄສ຺ສ, ຈຸຕິຍາ ຐານໂຕ ປນ;

ມຫຄ຺ຄຕວິປາກາ ເຕ, ນວ ຕິຏ຺ຐານິກາ ມຕາ.

໑໖໐. ອຏ຺ຐ ກາມາ ມຫາປາກາ, ປຏິສນ຺ຘິຠວງ຺ຄໂຕ;

ຕທາຣມ຺ມຓໂຕ ເຈວ, ຈຸຕິຏ຺ຐານວເສນ ຈ.

໑໖໑. ຈຕຸຏ຺ຐານິກຈິຕ຺ຕານິ, ອຏ຺ຐ ໂຫນ຺ຕີຕິ ນິທ຺ທິເສ;

ກຸສລາກຸສລປາກໍ ຕຸ-ເປກ຺ຂາສຫຄຕທ຺ວຍໍ.

໑໖໒. ສນ຺ຕີຣຓໍ ຠເວ ປຎ຺ຈ-ທ຺ວາເຣ ຉທ຺ວາຣິເກສຸ ຈ;

ຕທາຣມ຺ມຓຕໍ ຍາຕິ, ພລວາຣມ຺ມເຓ ສຕິ.

໑໖໓. ປຏິສນ຺ຘິຠວງ຺ຄານໍ, ຈຸຕິຏ຺ຐານວເສນ ຈ;

ປຎ຺ຈຏ຺ຐານິກຈິຕ຺ຕນ຺ຕິ, ອິທໍ ທ຺ວຍມຸທີຣິຕໍ.

໑໖໔. ປຎ຺ຈກິຈ຺ຈໍ ທ຺ວຍໍ ຈິຕ຺ຕໍ, ຈຕຸກິຈ຺ຈໍ ປນຏ຺ຐກໍ;

ຕິກິຈ຺ຈໍ ນວກໍ ທ຺ເວ ຕຸ, ທ຺ວິກິຈ຺ຈາ ເສສເມກກໍ.

໑໖໕. ຠວງ຺ຄາວຊ຺ຊນຎ຺ເຈວ, ທສ຺ສນໍ ສມ຺ປຏິຈ຺ຉນໍ;

ສນ຺ຕີຣຓໍ ໂວຏ຺ຐພ຺ພນໍ, ຊວນໍ ຠວຕິ ສຕ຺ຕມໍ.

໑໖໖. ຉພ຺ພິຘໍ ໂຫຕິ ຕໍ ຉນ຺ນໍ, ວິຎ຺ຎາຓານໍ ປເຠທໂຕ;

ສຕ຺ຕຘາ ສຕ຺ຕວິຎ຺ຎາຓ-ຘາຕູນໍ ຕຸ ປເຠທໂຕ.

໑໖໗. ເອເກກາຣມ຺ມຓໍ ຉກ຺ກໍ, ປຎ຺ຈາຣມ຺ມຓເຠທໂຕ;

ຉຬາຣມ຺ມຓໂຕ ເຈວ, ໂຫຕິ ອຏ຺ຐວິຘໍ ມໂນ.

໑໖໘. ຕຕ຺ຖ ທ຺ເວປຎ຺ຈວິຎ຺ຎາຓາ, ໂຫນ຺ຕິ ເອເກກໂຄຈຣາ;

ຣູປາຣມ຺ມຓິກາ ທ຺ເວ ຕຸ, ທ຺ເວ ທ຺ເວ ສທ຺ທາທິໂຄຈຣາ.

໑໖໙. ສພ຺ພໍ ມຫຄ຺ຄຕໍ ຈິຕ຺ຕໍ, ປຎ຺ຈາຠິຎ຺ຎາວິວຊ຺ຊິຕໍ;

ສພ຺ພໍ ໂລກຸຕ຺ຕຣຎ຺ເຈຕິ, ເອເກກາຣມ຺ມຓໍ ຠເວ.

໑໗໐. ເອເກກາຣມ຺ມຓໍ ຉກ຺ກ-ມິທໍ ເຎຍ຺ຍໍ ວິຠາວິນາ;

ປຎ຺ຈາຣມ຺ມຓິກໍ ນາມ, ມໂນຘາຕຸຕ຺ຕຍໍ ຠເວ.

໑໗໑. ກາມາວຈຣຈິຕ຺ຕານິ, ຈຕ຺ຕາລີສໍ ຕເຖກກໍ;

ອຠິຎ຺ຎານິ ຈ ສພ຺ພານິ, ຉຬາຣມ຺ມຓິການິຕິ.

໑໗໒. ຈິຕ຺ຕໍ ນວວິຘໍ ໂຫຕິ, ສຕ຺ຕວິຎ຺ຎາຓຘາຕຸສຸ;

ປຈ຺ຉິມຎ຺ຈ ຕິຘາ ກຕ຺ວາ, ກຸສລາກຸສລາທິໂຕ.

໑໗໓. ປຸຎ຺ຎາປຸຎ຺ຎວເສເນວ, ວິປາກກ຺ຣິຍເຠທໂຕ;

ຉສຕ຺ຕຕິວິໂຘ ເຠໂທ, ມໂນວິຎ຺ຎາຓຘາຕຸຍາ.

໑໗໔. ມໂນຘາຕຸໍ ທ຺ວິຘາ ກຕ຺ວາ, ວິປາກກ຺ຣິຍເຠທໂຕ;

ນວຘາ ປຸພ຺ພວຸຕ຺ເຕຫິ, ທສຘາ ໂຫຕິ ມານສໍ.

໑໗໕. ຘາຕຸທ຺ວຍໍ ຕິຘາ ກຕ຺ວາ, ປຈ຺ຉິມໍ ປຸນ ປຓ຺ຑິໂຕ;

ເອກາທສວິຘໍ ຈິຕ຺ຕໍ, ໂຫຕີຕິ ປຣິທີປເຍ.

໑໗໖. ມໂນວິຎ຺ຎາຓຘາຕຸມ຺ປິ, ກຸສລາກຸສລາທິໂຕ;

ຈຕຸຘາ ວິຠຊິຕ຺ວານ, ວເທ ທ຺ວາທສຘາ ຐິຕໍ.

໑໗໗. ຠເວ ຈຸທ຺ທສຘາ ຈິຕ຺ຕໍ, ຈຸທ຺ທສຏ຺ຐານເຠທໂຕ;

ປຏິສນ຺ຘິຠວງ຺ຄສ຺ສ, ຈຸຕິຍາວຊ຺ຊນສ຺ສ ຈ.

໑໗໘. ປຎ຺ຈນ຺ນໍ ທສ຺ສນາທີນໍ, ສມ຺ປຏິຈ຺ຉນເຈຕໂສ;

ສນ຺ຕີຣຓສ຺ສ ໂວຏ຺ຐພ຺ພ-ຊວນານໍ ວເສນ ຈ.

໑໗໙. ຕທາຣມ຺ມຓຈິຕ຺ຕສ຺ສ, ຕເຖວ ຐານເຠທໂຕ;

ເອວໍ ຈຸທ຺ທສຘາ ຈິຕ຺ຕໍ, ໂຫຕີຕິ ປຣິທີປເຍ.

໑໘໐. ຠູມິປຸຄ຺ຄລນານາຕ຺ຕ-ວເສນ ຈ ປວຕ຺ຕິໂຕ;

ພຫຸຘາ ປນິທໍ ຈິຕ຺ຕໍ, ໂຫຕີຕິ ຈ ວິຠາວເຍ.

໑໘໑. ເອກວິຘາທິນເຍ ປນິມສ຺ມິໍ,

ໂຍ ກຸສໂລ ມຕິມາ ອິຘ ຠິກ຺ຂຸ;

ຕສ຺ສຠິຘມ຺ມຄຕາ ປນ ອຕ຺ຖາ,

ຫຕ຺ຖຄຕາມລກາ ວິຍ ໂຫນ຺ຕິ.

ອິຕິ ອຠິຘມ຺ມາວຕາເຣ ເອກວິຘາທິນິທ຺ເທໂສ ນາມ

ຈຕຸຕ຺ໂຖ ປຣິຈ຺ເຉໂທ.