໕. ປຎ຺ຈໂມ ປຣິຈ຺ເຉໂທ

ກມ຺ມວິຠາໂຄ

໓໒໘. ວິຠາຄໍ ປນ ກມ຺ມານໍ,

ປວກ຺ຂາມິ ອິໂຕ ປຣໍ;

ກມ຺ມປາກກ຺ຣິຍາເຠເທ,

ອໂມຫາຍ ສມາສໂຕ.

໓໒໙. ກມ຺ມປຈ຺ຈຍກມ຺ມນ຺ຕິ, ເຈຕນາວ ສມີຣິຕາ;

ຕຕ຺ຖາປິ ນານກ຺ຂຓິກາ, ປຸຎ຺ຎາປຸຎ຺ຎາວ ເຈຕນາ.

໓໓໐. ເທຕິ ປາກມຘິຏ຺ຐາຍ, ສມ຺ປຍຸຕ຺ເຕ ຍຖາຣຫໍ;

ກມ຺ມສ຺ສາຍູຫນຏ຺ເຐນ, ປວຕ຺ຕຕ຺ຕາ ຫິ ເຈຕນາ.

໓໓໑. ກ຺ເລສານຸສຍສນ຺ຕາເນ, ປາກຘມ຺ມາ ຫິ ຊາຍເຣ;

ປຫີນານຸສຍານໍ ຕຸ, ກ຺ຣິຍາມຕ຺ຕໍ ປວຕ຺ຕຕິ.

໓໓໒. ມູລຠາວາ ຈ ສພ຺ເພສໍ, ຕເຖວາວຊ຺ຊນທ຺ວຍໍ;

ຊນິຕານິ ຈ ກມ຺ເມຫິ, ວິປາການິ ປວຕ຺ຕເຣ.

໓໓໓. ຈິຕ຺ຕຸປ຺ປາທວເສເນວ, ກມ຺ມໍ ເຕຕ຺ຕິໍສຘາ ຐິຕໍ;

ກມ຺ມຈຕຸກ຺ກເຠເທຫິ, ວິຠາເວຍ຺ຍ ວິຈກ຺ຂໂຓ.

໓໓໔. ປຈ຺ຈຸປ຺ປນ຺ນາທິກຓ຺ຫາທິ-ຊນກາທິຄຣາທິໂຕ;

ທິຏ຺ຐຘມ຺ມາທິກາມາທິ-ເຠທາ ຉຘາ ຍຖາກ຺ກມໍ.

໓໓໕. ຍໍ ປາປໍ ສຸຂໂວກິຓ຺ຓໍ, ອກິຈ຺ເຉນ ກຣີຍຕິ;

ປຈ຺ຈຸປ຺ປນ຺ນສຸຂໍ ກມ຺ມໍ, ອາຍຕິໍ ທຸກ຺ຂປາກຊໍ.

໓໓໖. ກິຈ຺ເຉນ ທຸກ຺ຂໂວກິຓ຺ຓໍ, ຍທິ ປາປໍ ກຣີຍຕິ;

ປຈ຺ຈຸປ຺ປນ຺ເນ ຈ ຕໍ ທຸກ຺ຂໍ, ອາຍຕິໍ ທຸກ຺ຂປາກຊໍ.

໓໓໗. ກິຈ຺ເຉນ ທຸກ຺ຂໂວກິຓ຺ຓໍ, ຍທິ ປຸຎ຺ຎໍ ກຣີຍຕິ;

ປຈ຺ຈຸປ຺ປນ຺ນມ຺ຫິ ຕໍ ທຸກ຺ຂໍ, ອາຍຕິໍ ສຸຂປາກຊໍ.

໓໓໘. ຍໍ ປຸຎ຺ຎໍ ສຸຂໂວກິຓ຺ຓໍ, ອກິຈ຺ເຉນ ກຣີຍຕິ;

ປຈ຺ຈຸປ຺ປນ຺ນສຸຂຎ຺ເຈວ, ອາຍຕິໍ ສຸຂປາກຊໍ.

໓໓໙. ວິສສໍສຏ຺ຐມຘຸຣໍ, ສວິສໍ ຕິຕ຺ຕກໍ ຕຖາ;

ໂຄມຸຕ຺ຕມຘຸເຠສຊ຺ຊ-ມິຈ຺ໂຈປມ຺ມໍ ຍຖາກ຺ກມໍ.

໓໔໐. ສມາທາເນ ວິປາເກ ຈ, ສຸຂທຸກ຺ຂປ຺ປເຠທິຕໍ;

ກມ຺ມເມວໍ ຈຕຸທ຺ຘາຕິ, ປກາເສນ຺ຕິ ຕຖາຄຕາ.

໓໔໑. ອານນ຺ຕຣິຍກມ຺ມາທິ, ເອກນ຺ຕກຏຸກາວຫໍ;

ກຓ຺ຫໍ ກຓ຺ຫວິປາກນ຺ຕິ, ກມ຺ມໍ ທຸຄ຺ຄຕິຄາມິກໍ.

໓໔໒. ປຐມຊ຺ຌານກມ຺ມາທິ, ເອກນ຺ເຕນ ສຸຂາວຫໍ;

ສຸກ຺ກໍ ສຸກ຺ກວິປາກນ຺ຕິ, ກມ຺ມໍ ສຄ຺ຄູປປຕ຺ຕິກໍ.

໓໔໓. ໂວກິຓ຺ຓກມ຺ມ ໂວກິຓ຺ຓ-ສຸຂທຸກ຺ຂູປປຕ຺ຕິກໍ;

ກຓ຺ຫສຸກ຺ກໍ ກຓ຺ຫສຸກ຺ກ-ວິປາກນ຺ຕິ ສມີຣິຕໍ.

໓໔໔. ອກຓ຺ຫສຸກ຺ກມີເຣນ຺ຕິ, ອກຓ຺ຫສຸກ຺ກປາກທໍ;

ກມ຺ມໍ ໂລກຸຕ຺ຕຣໍ ໂລເກ, ຄຕິກມ຺ມກ຺ຂຍາວຫໍ.

໓໔໕. ອິຕິ ວຏ຺ຏປ຺ປວຕ຺ຕມ຺ຫິ, ກ຺ເລສໂວທານເຠທິຕໍ;

ກມ຺ມກ຺ຂເຍນ ສງ຺ຄຍ຺ຫ, ຈຕຸຘາ ກມ຺ມມີຣິຕໍ.

໓໔໖. ຊນກຎ຺ເຈວຸປຕ຺ຖມ຺ຠ-ມຸປປີໂຬປຆາຕກໍ;

ຈຕຸຘາ ກິຈ຺ຈເຠເທນ, ກມ຺ມເມວໍ ປວຸຈ຺ຈຕິ.

໓໔໗. ຊເນຕິ ຊນກໍ ປາກໍ, ຕໍ ຉິນ຺ທຕຸປປີຬກໍ;

ຕໍ ປວຕ຺ເຕຕຸປຕ຺ຖມ຺ຠໍ, ຕໍ ຆາເຕໂຕປຆາຕກໍ.

໓໔໘. ກໂຣຕິ ອຕ຺ຕໂນ ປາກ-ສ຺ສາວກາສນ຺ຕິ ຠາສິຕໍ;

ປາກທາຍກກມ຺ມໍ ຕຸ, ຍໍ ກິຎ຺ຈິ ຊນກໍ ຠເວ.

໓໔໙. ພາຘມານກກມ຺ມໍ ຕຸ, ຕໍ ປາກມຸປປີຬກໍ;

ອຸປຆາຕກມີເຣນ຺ຕິ, ຕທຸປຈ຺ເຉທກໍປເຣ.

໓໕໐. ຄຣຸກາສນ຺ນມາຈິຓ຺ຓໍ, ກຏຕ຺ຕາກມ຺ມຸນາ ສຫ;

ກມ຺ມໍ ຈຕຸພ຺ພິຘໍ ປາກ-ປຣິຍາຍປ຺ປເຠທໂຕ.

໓໕໑. ມຫຄ຺ຄຕານນ຺ຕຣິຍໍ, ຄຣຸກມ຺ມນ຺ຕິ ວຸຈ຺ຈຕິ;

ກຕໍ ຈິນ຺ຕິຕມາສນ຺ນ-ມາສນ຺ນມຣເຓນ ຕຸ.

໓໕໒. ພາຫຸລ຺ເລນ ສມາຈິຓ຺ຓມາຈິຓ຺ຓນ຺ຕິ ປວຸຈ຺ຈຕິ;

ເສສໍ ປຸຎ຺ຎມປຸຎ຺ຎຎ຺ຈ, ກຏຕ຺ຕາກມ຺ມມີຣິຕໍ.

໓໕໓. ທິຏ຺ຐຘມ຺ເມ ເວທນີຍມຸປປຊ຺ຊາປເຣ ຕຖາ;

ປຣິຍາຍເວທນີຍມິຕິ ຈາໂຫສິກມ຺ມຸນາ.

໓໕໔. ປາກກາລວເສນາຖ, ກາລາຕີຕວເສນ ຈ;

ຈຕຸເຘວມ຺ປິ ອກ຺ຂາຕໍ, ກມ຺ມມາທິຈ຺ຈພນ຺ຘຸນາ.

໓໕໕. ທິຏ຺ຐຘມ຺ເມ ເວທນີຍໍ, ປຐມໍ ຊວນໍ ຠເວ;

ອລທ຺ຘາເສວນຕ຺ຕາວ, ອສມຕ຺ຖໍ ຠວນ຺ຕເຣ.

໓໕໖. ເວທນີຍໍ ຕຸປປຊ຺ຊປຣິໂຍສານມີຣິຕໍ;

ປຣິນິຏ຺ຐິຕກມ຺ມຕ຺ຕາ, ວິປຈ຺ຈຕິ ອນນ຺ຕເຣ.

໓໕໗. ເສສານິ ເວທນີຍານິ, ປຣິຍາຍາປເຣ ປນ;

ລທ຺ຘາເສວນໂຕ ປາກໍ, ຊເນນ຺ຕິ ສຕິ ປຈ຺ຈເຍ.

໓໕໘. ວຸຈ຺ຈນ຺ຕາໂຫສິກມ຺ມານິ, ກາລາຕີຕານິ ສພ຺ພຖາ;

ອຸຈ຺ຉິນ຺ນຕຓ຺ຫາມູລານິ, ປຈ຺ຈຍາລາຠໂຕ ຕຖາ.

໓໕໙. ຈຕຸຘາ ປຸນ ກາມາທິຠູມິເຠເທນ ຠາສິຕໍ;

ປຸຎ຺ຎາປຸຎ຺ຎວສາ ທ຺ເວຘາ, ກາມາວຈຣິກໍ ຠເວ.

໓໖໐. ອປຸຎ຺ຎໍ ຕຕ຺ຖ ສາວຊ຺ຊ-ມນິຏ຺ຐຜລທາຍກໍ;

ຕໍ ກມ຺ມຜສ຺ສທ຺ວາເຣຫິ, ທຸວິຘໍ ສມ຺ປວຕ຺ຕຕິ.+

໓໖໑. ກາຍທ຺ວາຣໍ ວຈີທ຺ວາຣໍ, ມໂນທ຺ວາຣນ຺ຕິ ຕາທິນາ;

ກມ຺ມທ຺ວາຣຕ຺ຕຍໍ ວຸຕ຺ຕໍ, ຜສ຺ສທ຺ວາຣາ ຉ ທີປິຕາ.

໓໖໒. ກມ຺ມທ຺ວາເຣ ມໂນທ຺ວາເຣ, ປຎ຺ຈທ຺ວາຣາ ສໂມຫິຕາ;

ຜສ຺ສທ຺ວາຣມໂນທ຺ວາຣໍ, ກມ຺ມທ຺ວາຣຕ຺ຕຍໍ ກຕໍ.

໓໖໓. ຕຖາ ຫິ ກາຍວິຎ຺ຎຕ຺ຕິໍ, ຊເນຕ຺ວາ ຊາຕເຈຕນາ;

ກາຍກມ຺ມໍ ວຈີກມ຺ມໍ, ວຈີເຠທປວຕ຺ຕິກາ.

໓໖໔. ວິຎ຺ຎຕ຺ຕິທ຺ວຍສມ຺ປຕ຺ຕາ, ມໂນກມ຺ມນ຺ຕິ ວຸຈ຺ຈຕິ;

ເຠໂທຍໍ ປຣິຍາເຍນ, ກມ຺ມານມິຕິ ທີປິໂຕ.

໓໖໕. ປາຓຆາຕາທິກໍ ກມ຺ມໍ, ກາເຍ ພາຫຸລ຺ລວຸຕ຺ຕິໂຕ;

ກາຍກມ຺ມໍ ວຈີກມ຺ມໍ, ມຸສາວາທາທິກໍ ຕຖາ.

໓໖໖. ອຠິຊ຺ຌາທິ ມໂນກມ຺ມໍ, ຕີສຸ ທ຺ວາເຣສຸ ຊາຍຕິ;

ທ຺ວີສຸ ທ຺ວາເຣສຸ ເສສານິ, ເຠໂທຍໍ ປຣມຕ຺ຖໂຕ.

໓໖໗. ຜສ຺ສທ຺ວາຣມໂນທ຺ວາເຣ, ວິຎ຺ຎຕ຺ຕິທ຺ວຍມີຣິຕໍ;

ປຎ຺ຈທ຺ວາເຣ ທ຺ວຍໍ ນຕ຺ຖິ, ອຍເມຕ຺ຖ ວິນິຈ຺ຉໂຍ.

໓໖໘. ອກ຺ຂນ຺ຕິຎາຓ ໂກສຊ຺ຊໍ, ທຸສ຺ສິລ຺ຍໍ ມຸຏ຺ຐສຈ຺ຈຕາ;

ອິຈ຺ຈາສໍວຣເຠເທນ, ອຏ຺ຐທ຺ວາເຣສຸ ຊາຍຕິ.

໓໖໙. ກມ຺ມທ຺ວາຣຕ຺ຕຍຎ຺ເຈວ, ປຎ຺ຈທ຺ວາຣາ ຕຖາປເຣ;

ອສໍວຣານໍ ປຎ຺ຈນ຺ນໍ, ອຏ຺ຐ ທ຺ວາຣາ ປກາສິຕາ.

໓໗໐. ຕຕ຺ຖ ກມ຺ມປຖປ຺ປຕ຺ຕໍ, ປຏິສນ຺ຘິຜລາວຫໍ;

ປາຓຆາຕາທິເຠເທນ, ທສຘາ ສມ຺ປວຕ຺ຕຕິ.

໓໗໑. ປາຓາຕິປາໂຕ ຜຣຸສໍ, ພ຺ຍາປາໂທ ຈ ຕຖາປໂຣ;

ອິຈ຺ເຈວໍ ຕິວິຘໍ ກມ຺ມໍ, ໂທສມູເລຫິ ຊາຍຕິ.

໓໗໒. ມິຈ຺ຉາຈາໂຣ ອຠິຊ຺ຌາ ຈ, ມິຈ຺ຉາທິຏ຺ຐິ ຕຖາປຣາ;

ອິຈ຺ເຈວໍ ຕິວິຘໍ ກມ຺ມໍ, ໂລຠມູເລຫິ ຊາຍຕິ.

໓໗໓. ເຖຍ຺ຍາທານໍ ມຸສາວາໂທ, ປິສຸຓໍ ສມ຺ຜລາປນໍ;

ກມ຺ມໍ ຈຕຸພ຺ພິຘມ຺ເມຕໍ, ທ຺ວິມູເລຫິ ປວຕ຺ຕຕິ.

໓໗໔. ຉນ຺ທາໂທສາ ຠຍາ ໂມຫາ, ປາປໍ ກຸພ຺ພນ຺ຕິ ປາຓິໂນ;

ຕສ຺ມາ ຉນ຺ທາທິເຠເທນ, ຈຕ຺ຕາລີສວິຘໍ ຠເວ.

໓໗໕. ອິຈ຺ຈາປຸຎ຺ຎໍ ປກາເສນ຺ຕິ, ຈຕຸຣາປາຍສາຘກໍ;

ອຎ຺ຎຕ຺ຖາປິ ປວຕ຺ຕມ຺ຫິ, ວິປຕ຺ຕິຜລສາຘນໍ.

໓໗໖. ຕິວິຘໍ ປນ ປຸຎ຺ຎໍ ຕຸ, ອນວຊ຺ຊິຏ຺ຐປາກທໍ;

ທານໍ ສີລໍ ຠາວນາ ຈ, ຕີສຸ ທ຺ວາເຣສຸ ຊາຍຕິ.

໓໗໗. ມຫຕ຺ຕຄາຣວາ ສ຺ເນຫາ, ທຍາ ສທ຺ຘຸປກາຣໂຕ;

ໂຠຄຊີວາຠຍຘມ຺ມໍ, ທທໂຕ ທານມີຣິຕໍ.

໓໗໘. ປຸຎ຺ຎມາຈາຣວາຣິຕ຺ຕ-ວຕ຺ຕມາຣພ຺ຠ ກຸພ຺ພໂຕ;

ປາປາ ຈ ວິຣມນ຺ຕສ຺ສ, ໂຫຕິ ສີລມຍໍ ຕທາ.

໓໗໙. ທານສີລວິນິມຸຕ຺ຕໍ, ຠາວນາຕິ ປວຸຈ຺ຈຕິ;

ປຸຎ຺ຎໍ ຠາເວນ຺ຕິ ສນ຺ຕາເນ, ຍສ຺ມາ ເຕນ ຫິຕາວຫໍ.

໓໘໐. ຊເນຕ຺ວາ ກາຍວິຎ຺ຎຕ຺ຕິໍ, ຍທາ ປຸຎ຺ຎໍ ກຣີຍຕິ;

ກາຍກມ຺ມໍ ຕທາ ໂຫຕິ, ທານໍ ສີລຎ຺ຈ ຠາວນາ.

໓໘໑. ວຈີວິຎ຺ຎຕ຺ຕິຍາ ສທ຺ຘິໍ, ຍທາ ປຸຎ຺ຎໍ ກຣີຍຕິ;

ວຈີກມ຺ມໍ ມໂນກມ຺ມໍ, ວິນາ ວິຎ຺ຎຕ຺ຕິຍາ ກຕໍ.

໓໘໒. ຕໍຕໍທ຺ວາຣິກເມວາຫຸ, ຕໍຕໍທ຺ວາຣິກປາປໂຕ;

ວິຣມນ຺ຕສ຺ສ ວິຎ຺ຎຕ຺ຕິໍ, ວິນາ ວາ ສຫ ວາ ປຸນ.

໓໘໓. ທານໍ ສີລໍ ຠາວນາ ຈ, ເວຍ຺ຍາວຈ຺ຈາປຈາຍນາ;

ປຕ຺ຕານຸໂມທນາ ປຕ຺ຕິ-ທານໍ ຘມ຺ມສ຺ສ ເທສນາ;

ສວນໍ ທິຏ຺ຐິຊຸກມ຺ມ-ມິຈ຺ເຈວໍ ທສຘາ ຐິຕໍ.

໓໘໔. ກາມປຸຎ຺ຎໍ ປກາເສນ຺ຕິ, ກາເມ ສຸຄຕິສາຘກໍ;

ອຎ຺ຎຕ຺ຖາປິ ປວຕ຺ຕມ຺ຫິ, ສມ຺ປຕ຺ຕິຜລສາຘກໍ.

໓໘໕. ຈິຕ຺ຕຸປ຺ປາທປ຺ປເຠເທນ, ກມ຺ມໍ ວີສຕິຘາ ຐິຕໍ;

ກາມາວຈຣມິຈ຺ເຈວໍ, ວິຠາເວນ຺ຕິ ວິຠາວິໂນ.

໓໘໖. ຣູປາວຈຣິກໍ ກມ຺ມ-ມປ຺ປນາຠາວນາມຍໍ;

ກສິຓາທິກມາຣພ຺ຠ, ມໂນທ຺ວາເຣ ປວຕ຺ຕຕິ.

໓໘໗. ປຖວາໂປ ຈ ເຕໂຊ ຈ,

ວາໂຍ ນີລຎ຺ຈ ປີຕກໍ;

ໂລຫິໂຕທາຕມາກາສໍ,

ອາໂລໂກຕິ ວິສາຣທາ.

໓໘໘. ກສິຓານິ ທສີເຣນ຺ຕິ, ອາທິກມ຺ມິກໂຍຄິໂນ;

ອຸທ຺ຘຸມາຕໍ ວິນີລຎ຺ຈ, ວິປຸພ຺ພກໍ ວິຂາທິຕໍ.

໓໘໙. ວິຈ຺ຉິທ຺ທກຎ຺ຈ ວິກ຺ຂິຕ຺ຕໍ, ຫຕວິກ຺ຂິຕ຺ຕໂລຫິຕໍ;

ປຸຬວໍ ອຏ຺ຐິກຎ຺ເຈຕິ, ອສຸຠໍ ທສຘາ ຐິຕໍ.

໓໙໐. ພຸທ຺ເຘ ຘມ຺ເມ ຈ ສງ຺ເຆ ຈ, ສີເລ ຈາເຄ ຈ ອຕ຺ຕໂນ;

ເທວໂຕປສມາຍຎ຺ຈ, ວຸຕ຺ຕານຸສ຺ສຕິຠາວນາ.

໓໙໑. ມຣເຓ ສຕິ ນາເມກາ, ຕຖາ ກາຍຄຕາສຕິ;

ອານາປານສຕິຈ຺ເຈວໍ, ທສຘານຸສ຺ສຕີຣິຕາ.

໓໙໒. ເມຕ຺ຕາ ກຣຸຓາ ມຸທິຕາ, ອຸເປກ຺ຂາ ຠາວນາຕິ ຈ;

ຈຕຸພ຺ຣຫ຺ມວິຫາຣາ ຈ, ອປ຺ປມຎ຺ຎາຕິ ຠາສິຕາ.

໓໙໓. ອາຫາເຣ ຕຸ ປຏິກ຺ກູລ-ສຎ຺ເຎກາຕິ ປກາສິຕາ;

ຈຕຸຘາຕຸວວຕ຺ຖານໍ, ຈຕຸຘາຕຸປຣິຄ຺ຄໂຫ.

໓໙໔. ຈຕ຺ຕາໂຣຣຸປ຺ປກາ ເຈຕິ, ຈຕ຺ຕາລີສ ສມາສໂຕ;

ກມ຺ມຏ຺ຐານານິ ວຸຕ຺ຕານິ, ສມເຖ ຠາວນານເຍ.

໓໙໕. ອານາປານຎ຺ຈ ກສິຓໍ, ປຎ຺ຈກຊ຺ຌານິກໍ ຕຫິໍ;

ປຐມຊ຺ຌານິກາ ວຸຕ຺ຕາ, ໂກຏ຺ຐາສາສຸຠຠາວນາ.

໓໙໖. ເມຕ຺ຕາທໂຍ ຈຕຸຊ຺ຌານາ, ອຸເປກ຺ຂາ ປຎ຺ຈມີ ມຕາ;

ອາຣຸປ຺ປາຣຸປ຺ປກາ ເສສາ, ອຸປຈາຣສມາຘິກາ.

໓໙໗. ກສິຓາສຸຠໂກຏ຺ຐາເສ,

ອານາປາເນ ຈ ຊາຍຕິ;

ປຏິຠາໂຄ ຕມາຣພ຺ຠ,

ຕຕ຺ຖ ວຕ຺ຕຕິ ອປ຺ປນາ.

໓໙໘. ກມ຺ມຏ຺ຐາເນສຸ ເສເສສຸ, ປຏິຠາໂຄ ນ ວິຊ຺ຊຕິ;