໙. ນວໂມ ປຣິຈ຺ເຉໂທ

ປຸຎ຺ຎວິປາກປຈ຺ຈຍນິທ຺ເທໂສ

໕໖໐. ພາຕ຺ຕິໍສ ປາກຈິຕ຺ຕານິ, ໂລກິກາເນວ ຍານິ ຫິ;

ເອເຕສໍ ປາກຈິຕ຺ຕານໍ, ປຏິສນ຺ຘິປວຕ຺ຕິສຸ.

໕໖໑. ປຸຎ຺ຎາປຸຎ຺ຎາທິສງ຺ຂາຣາ, ຍຖາ ເຍສຎ຺ຈ ປຈ຺ຈຍາ;

ຠວາທີສຸ ຕຖາ ເຕປິ, ວິຎ຺ຎາຕພ຺ພາ ວິຠາວິນາ.

໕໖໒. ຕໂຍ ຠວາ ຈຕສ຺ໂສ ຈ, ໂຍນິໂຍ ຄຕິປຎ຺ຈກໍ;

ວິຎ຺ຎາຓຏ຺ຐິຕິໂຍ ສຕ຺ຕ, ສຕ຺ຕາວາສາ ນເວຣິຕາ.

໕໖໓. ກາເມ ປຸຎ຺ຎາຠິສງ຺ຂາຣ-ສຎ຺ຎິຕາ ອຏ຺ຐ ເຈຕນາ;

ນວນ຺ນໍ ປາກຈິຕ຺ຕານໍ, ກາເມ ສຸຄຕິຍໍ ປນ.

໕໖໔. ນານາກ຺ຂຓິກກມ຺ມູປ-ນິສ຺ສຍປຈ຺ຈເຍຫິ ຈ;

ທ຺ເວຘາ ຫິ ປຈ຺ຈຍາ ເຕສໍ, ຠວນ຺ຕິ ປຏິສນ຺ຘິຍໍ.

໕໖໕. ອຸເປກ຺ຂາສຫິຕາເຫຕຸ-ມໂນວິຎ຺ຎາຓຘາຕຸຍາ;

ວິນາ ປຣິຕ຺ຕປາການໍ, ໂຫນ຺ຕິ ທ຺ເວຘາ ປວຕ຺ຕິຍໍ.

໕໖໖. ຕາເຍວ ເຈຕນາ ຣູປ-ຠເວ ທ຺ເວຘາວ ປຈ຺ຈຍາ;

ປຎ຺ຈນ຺ນໍ ປາກຈິຕ຺ຕານໍ, ຠວນ຺ຕິ ຫິ ປວຕ຺ຕິຍໍ.

໕໖໗. ອຏ຺ຐນ຺ນໍ ຕຸ ປຣິຕ຺ຕານໍ, ກາເມ ທຸຄ຺ຄຕິຍໍ ຕຖາ;

ປວຕ຺ເຕ ປຈ຺ຈຍາ ໂຫນ຺ຕິ, ນ ໂຫນ຺ຕິ ປຏິສນ຺ຘິຍໍ.

໕໖໘. ໂຫນ຺ຕິ ວຸຕ຺ຕປ຺ປກາຣາວ, ກາເມ ສຸຄຕິຍໍ ຕຖາ;

ໂສຬສນ຺ນໍ ວິປາການໍ, ປວຕ຺ເຕ ປຏິສນ຺ຘິຍໍ.

໕໖໙. ຣູເປ ປຸຎ຺ຎາຠິສງ຺ຂາຣາ, ຣູປາວຈຣຠູມິຍໍ;

ປຎ຺ຈນ຺ນໍ ປາກຈິຕ຺ຕານໍ, ປຈ຺ຈຍາ ປຏິສນ຺ຘິຍໍ.

໕໗໐. ໂຫນ຺ຕິມາປຸຎ຺ຎສງ຺ຂາຣາ, ກາເມ ທຸຄ຺ຄຕິຍໍ ທ຺ວິຘາ;

ວິຎ຺ຎາຓສ຺ສ ປເນກສ຺ສ, ປຈ຺ຈຍາ ປຏິສນ຺ຘິຍໍ.

໕໗໑. ຉນ຺ນໍ ປນ ປວຕ຺ເຕວ, ໂຫນ຺ຕິ ໂນ ປຏິສນ຺ຘິຍໍ;

ສຕ຺ຕນ຺ນມ຺ປິ ຠວນ຺ເຕວ, ປວຕ຺ເຕ ປຏິສນ຺ຘິຍໍ.

໕໗໒. ກາເມ ສຸຄຕິຍໍ ເຕສໍ, ສຕ຺ຕນ຺ນມ຺ປິ ຕເຖວ ຈ;

ປວຕ຺ເຕ ປຈ຺ຈຍາ ໂຫນ຺ຕິ, ນ ໂຫນ຺ຕິ ປຏິສນ຺ຘິຍໍ.

໕໗໓. ວິຎ຺ຎາຓານໍ ຈຕຸນ຺ນມ຺ປິ, ເຕສໍ ຣູປຠເວ ຕຖາ;

ປວຕ຺ເຕ ປຈ຺ຈຍາ ໂຫນ຺ຕິ, ນ ໂຫນ຺ຕິ ປຏິສນ຺ຘິຍໍ.

໕໗໔. ໂສ ຈ ກາມຠເວນິຏ຺ຐ-ຣູປາທິອຸປລທ຺ຘິຍໍ;

ອນິຏ຺ຐຣູປາທໂຍ ປນ, ພ຺ຣຫ຺ມໂລເກ ນ ວິຊ຺ຊເຣ.

໕໗໕. ຕເຖວາເນຎ຺ຊສງ຺ຂາໂຣ, ອຣູປາວຈຣຠູມິຍໍ;

ຈຕຸນ຺ນໍ ປາກຈິຕ຺ຕານໍ, ປວຕ຺ເຕ ປຏິສນ຺ຘິຍໍ.

໕໗໖. ເອວໍ ຕາວ ຠເວສ຺ເວເຕ, ປຏິສນ຺ຘິປວຕ຺ຕິສຸ;

ຍຖາ ຈ ປຈ຺ຈຍາ ໂຫນ຺ຕິ, ຕຖາ ເຎຍ຺ຍາ ວິຠາວິນາ.

໕໗໗. ເອເສວ ຈ ນໂຍ ເຎຍ຺ໂຍ, ໂຍນິອາທີສຸ ຕຕ຺ຣິທໍ;

ອາທິໂຕ ປນ ປຏ຺ຐາຍ, ມຸຂມຕ຺ຕນິທສ຺ສນໍ.

໕໗໘. ອວິເສເສນ ປຸຎ຺ຎາຠິ-ສງ຺ຂາໂຣ ທ຺ວິຠເວສຸປິ;

ທຕ຺ວານ ປຏິສນ຺ຘິໍ ຕຸ, ສພ຺ພປາກໍ ຊເນຕິ ໂສ.

໕໗໙. ຕຖາ ຈຕູສຸ ວິຎ຺ເຎຍ຺ໂຍ, ອຓ຺ຑຊາທີສຸ ໂຍນິສຸ;

ພຫຸເທວມນຸສ຺ສານໍ, ຄຕີສຸ ທ຺ວີສຸ ເອວ ຈ.

໕໘໐. ຕຖາ ນານຕ຺ຕກາຍາທິ-ວິຎ຺ຎາຓານໍ ຐິຕີສຸປິ;

ຕຖາ ວຸຕ຺ຕປ຺ປກາຣສ຺ມິໍ, ສຕ຺ຕາວາເສ ຈຕຸພ຺ພິເຘ.

໕໘໑. ເອວໍ ປຸຎ຺ຎາຠິສງ຺ຂາໂຣ, ຠວາທີສຸ ຍຖາຣຫໍ;

ເອກວີສຕິປາການໍ, ປຈ຺ຈໂຍ ໂຫຕິ ຈ ທ຺ວິຘາ.

໕໘໒. ກາເມ ອປຸຎ຺ຎສງ຺ຂາໂຣ, ຠເວ ຈຕູສຸ ໂຍນິສຸ;

ຕີສຸ ຄຕີສຸ ເອກິສ຺ສາ, ວິຎ຺ຎາຓຏ຺ຐິຕິຍາປິ ຈ.

໕໘໓. ສຕ຺ຕາວາເສ ປເນກສ຺ມິໍ,

ອຸໂຫຕິ ໂສ ປຈ຺ຈໂຍ ທ຺ວິຘາ;

ສຕ຺ຕນ຺ນໍ ປາກຈິຕ຺ຕານໍ,

ປວຕ຺ເຕ ປຏິສນ຺ຘິຍໍ.

໕໘໔. ຕເຖວາເນຎ຺ຊສງ຺ຂາໂຣ, ເອກາຣູປຠເວ ປຸນ;

ເອກິສ຺ສາ ໂຍນິຍາ ເຈວ, ເອກິສ຺ສາ ຄຕິຍາປິ ຈ.

໕໘໕. ຕີສຸ ຈິຕ຺ຕຏ຺ຐິຕີສ຺ເວວ, ສຕ຺ຕາວາເສ ຈຕຸພ຺ພິເຘ;

ຈຕຸນ຺ນໍ ປາກຈິຕ຺ຕານໍ, ທ຺ເວຘາ ໂສ ໂຫຕິ ປຈ຺ຈໂຍ.

໕໘໖. ປຏິສນ຺ຘິປວຕ຺ຕີນໍ, ວເສເນວ ຠວາທິສຸ;

ວິຊານິຕພ຺ພາ ສງ຺ຂາຣາ, ຍຖາ ເຍສຎ຺ຈ ປຈ຺ຈຍາ.

໕໘໗. ນ ຣູປາຣູປຘມ຺ມານໍ, ສງ຺ກນ຺ຕິ ປນ ວິຊ຺ຊຕິ;

ສງ຺ກນ຺ຕິຠາເວ ອສຕິ, ປຏິສນ຺ຘິ ກຖໍ ສິຍາ.

໕໘໘. ນຕ຺ຖິ ຈິຕ຺ຕສ຺ສ ສງ຺ກນ຺ຕິ, ອຕີຕຠວໂຕ ອິຘ;

ຕໂຕ ເຫຕຸໍ ວິນາ ຕສ຺ສ, ປາຕຸຠາໂວ ນ ວິຊ຺ຊຕິ.

໕໘໙. ສຸລທ຺ຘປຈ຺ຈຍໍ ຣູປາ-ຣູປມຕ຺ຕໍ ຕຸ ຊາຍຕິ;

ອຸປ຺ປຊ຺ຊມານເມວໍ ຕຸ, ລຠິຕ຺ວາ ປຈ຺ຈຍໍ ປນ.

໕໙໐. ຠວນ຺ຕຣມຸເປຕີຕິ, ສມຎ຺ຎາຍ ປວຸຈ຺ຈຕິ;

ນ ຈ ສຕ຺ໂຕ ນ ຈ ຊີໂວ, ນ ອຕ຺ຕາ ວາປິ ວິຊ຺ຊຕິ.

໕໙໑. ຕຍິທໍ ປາກຏໍ ກຕ຺ວາ, ປຏິສນ຺ຘິກ຺ກມໍ ປນ;

ທສ຺ສຍິສ຺ສາມຫໍ ສາຘຸ, ນິໂພຘຖ ສຸທຸພ຺ພຸຘໍ.

໕໙໒. ອຕີຕສ຺ມິໍ ຠເວ ຕສ຺ສ, ອາສນ຺ນມຣຓສ຺ສ ຫິ;

ຫຣິຕໍ ຕາລປຓ຺ຓໍວ, ປກ຺ຂິຕ຺ຕໍ ອາຕເປ ປນ.

໕໙໓. ສຸສ຺ສມາເນ ສຣີຣສ຺ມິໍ, ນຏ຺ເຐ ຈກ຺ຂຸນ຺ທ຺ຣິຍາທິເກ;

ຫທຍວຕ຺ຖຸມຕ຺ຕສ຺ມິໍ, ຐິເຕ ກາຍປ຺ປສາທິເກ.

໕໙໔. ວຕ຺ຖຸສນ຺ນິສ຺ສິຕໍ ຈິຕ຺ຕໍ, ໂຫຕິ ຕສ຺ມິໍ ຂເຓປິ ຈ;

ປຸພ຺ພານຸເສວິຕໍ ກມ຺ມໍ, ປຸຎ຺ຎໍ ວາປຸຎ຺ຎເມວ ວາ.

໕໙໕. ກມ຺ມໍ ກມ຺ມນິມິຕ຺ຕໍ ວາ, ອາລມ຺ພິຕ຺ວາ ປວຕ຺ຕຕິ;

ເອວໍ ປວຕ຺ຕມານໍ ຕໍ, ວິຎ຺ຎາຓໍ ລທ຺ຘປຈ຺ຈຍໍ.

໕໙໖. ອວິຊ຺ຊາຍ ປຏິຈ຺ຉນ຺ນາ-ທີນເວ ວິສເຍ ປນ;

ຕຓ຺ຫາ ນເມຕິ ສງ຺ຂາຣາ, ຂິປນ຺ຕິ ສຫຊາ ປນ.

໕໙໗. ນ ມີຍມານໍ ຕຓ຺ຫາຍ, ຕໍ ສນ຺ຕຕິວສາ ປນ;

ໂອຣິມາ ປນ ຕີຣມ຺ຫາ, ອາລມ຺ພິຕ຺ວານ ຣຊ຺ຊຸກໍ.

໕໙໘. ມາຕິກາຕິກ຺ກໂມເວຕໍ, ປຸຣິມໍ ຊຫຕິ ນິສ຺ສຍໍ;

ອປຣໍ ກມ຺ມສມ຺ຠູຕໍ, ລມ຺ພິຕ຺ວາ ວາປິ ນິສ຺ສຍໍ.

໕໙໙. ຕໍ ປນາຣມ຺ມຓາທີຫິ, ປຈ຺ຈເຍຫິ ປວຕ຺ຕຕິ;

ປຸຣິມໍ ຈວນໍ ເອຕ຺ຖ, ປຈ຺ຉິມໍ ປຏິສນ຺ຘິ ຕຸ.

໖໐໐. ຕເທຕໍ ນາປິ ປຸຣິມາ, ຠວໂຕປິ ອິຘາຄຕໍ;

ກມ຺ມາທິຎ຺ຈ ວິນາ ເຫຕຸໍ, ປາຕຸຠູຕໍ ນ ເຈວ ຕໍ.

໖໐໑. ເອຕ຺ຖ ເຈຕສ຺ສ ຈິຕ຺ຕສ຺ສ, ປຸຣິມາ ຠວໂຕ ປນ;

ອິຘານາຄມເນຕີຕ-ຠວເຫຕູຫິ ສມ຺ຠເວ.

໖໐໒. ປຏິໂຆສທີປມຸທ຺ທາທີ, ຠວນ຺ເຕຕ຺ຖ ນິທສ຺ສນາ;

ຍຖາ ອາຄນ຺ຕ຺ວາ ອຎ຺ຎຕ຺ຣ, ໂຫນ຺ຕິ ສທ຺ທາທິເຫຕຸກາ.

໖໐໓. ເອວເມວ ຈ ວິຎ຺ຎາຓໍ, ເວທິຕພ຺ພໍ ວິຠາວິນາ;

ສນ຺ຕານພນ຺ຘໂຕ ນຕ຺ຖິ, ເອກຕາ ວາປິ ນານຕາ.

໖໐໔. ສຕິ ສນ຺ຕານພນ຺ເຘ ຕຸ, ເອກນ຺ເຕເນກຕາ ສິຍາ;

ຂີຣໂຕ ທຘິສມ຺ຠູຕໍ, ນ ຠເວຍ຺ຍ ກທາຈິປິ.

໖໐໕. ອຖາປິ ປນ ເອກນ຺ຕ-ນານຕາ ສາ ຠເວຍ຺ຍ ເຈ;

ຂີຣສາມີ ນໂຣ ເນວ, ທຘິສາມີ ຠເວຍ຺ຍ ໂສ.

໖໐໖. ຕສ຺ມາ ເອຕ຺ຖ ປເນກນ຺ຕ-ເອກຕານານຕາປິ ວາ;

ນ ເຈວ ອຸປຄນ຺ຕພ຺ພາ, ວິຎ຺ຎຸນາ ສມຍຎ຺ຎຸນາ.

໖໐໗. ນນຸ ເອວມສງ຺ກນ຺ຕິ-ປາຕຸຠາເວ ຕສ຺ສ ສຕິ;

ເຍ ອິມສ຺ມິໍ ມນຸສ຺ສຕ຺ຕ-ຠາເວ ຂນ຺ຘາຠິສມ຺ຠວາ.

໖໐໘. ເຕສໍ ອິຘ ນິຣຸທ຺ຘຕ຺ຕາ, ກມ຺ມສ຺ສ ຜລເຫຕຸໂນ;

ປຣຕ຺ຖາຄມໂຕ ເຈວ, ອິຘ ຕສ຺ສ ກຕສ຺ສ ຫິ.

໖໐໙. ອຎ຺ຎສ຺ສ ອຎ຺ຎໂຕ ເຈວ, ກມ຺ມໂຕ ຕໍ ຜລໍ ສິຍາ;

ຕສ຺ມາ ນ ສຸນ຺ທຣໍ ເອຕໍ, ວິຘານໍ ສພ຺ພເມວ ຈ.

ເອຕ຺ຖາຫ –

໖໑໐. ສນ຺ຕາເນ ຍໍ ຜລໍ ເອຕໍ, ນາຎ຺ຎສ຺ສ ນ ຈ ອຎ຺ຎໂຕ;

ພີຊານໍ ອຠິສງ຺ຂາໂຣ, ເອຕສ຺ສຕ຺ຖສ຺ສ ສາຘໂກ.

໖໑໑. ເອກສ຺ມິໍ ປນ ສນ຺ຕາເນ, ວຕ຺ຕມານໍ ຜລໍ ປນ;

ອຎ຺ຎສ຺ສາຕິປິ ວາ ເນວ, ອຎ຺ຎໂຕ ວາ ນ ໂຫຕິ ຕໍ.

໖໑໒. ພີຊານໍ ອຠິສງ຺ຂາຣາ, ເອຕສ຺ສຕ຺ຖສ຺ສ ສາຘໂກ;

ພີຊານໍ ອຠິສງ຺ຂາເຣ, ກເຕ ຕຸ ມຘຸອາທິນາ.

໖໑໓. ຕສ຺ສ ພີຊສ຺ສ ສນ຺ຕາເນ, ປຐມໍ ລທ຺ຘປຈ຺ຈໂຍ;

ມຘຸໂຣ ຜລໂສ ຕສ຺ສ, ໂຫຕິ ກາລນ຺ຕເຣ ປນ.

໖໑໔. ນ ຫິ ຕານິ ຫິ ພີຊານິ, ອຠິສງ຺ຂຣຓມ຺ປິ ວາ;

ປາປຸຓນ຺ຕິ ຜລຏ຺ຐານໍ, ເອວໍ ເຎຍ຺ຍມິທມ຺ປິ ຈ.

໖໑໕. ພາລກາເລ ປຍຸຕ຺ເຕນ, ວິຊ຺ຊາສິປ຺ໂປສຘາທິນາ;

ທີເປຕພ຺ໂພ ອຍໍ ວຸທ຺ຘ-ກາລສ຺ມິໍ ຜລທາຍິນາ.

໖໑໖. ເອວໍ ສນ຺ເຕປິ ຕໍ ກມ຺ມໍ, ວິຊ຺ຊມານມ຺ປິ ວາ ປນ;

ຜລສ຺ສ ປຈ຺ຈໂຍ ໂຫຕິ, ອຖ ວາວິຊ຺ຊມານກໍ.

໖໑໗. ວິຊ຺ຊມານໍ ສເຈ ໂຫຕິ, ຕປ຺ປວຕ຺ຕິກ຺ຂເຓ ປນ;

ຠວິຕພ຺ພໍ ວິປາເກນ, ສທ຺ຘິເມວ ຈ ເຫຕຸນາ.

໖໑໘. ອຖ ວາວິຊ຺ຊມານໍ ຕໍ, ນິຣຸທ຺ຘໍ ປຈ຺ຈໂຍ ຠເວ;

ປວຕ຺ຕິກ຺ຂຓໂຕ ປຸພ຺ເພ, ປຈ຺ຉາ ນິຈ຺ຈຜລໍ ສິຍາ.

ວຸຈ຺ຈເຕ –

໖໑໙. ກຏຕ຺ຕາ ປຈ຺ຈໂຍ ກມ຺ມໍ, ຕສ຺ມາ ນິຈ຺ຈຜລໍ ນ ຈ;

ປາຏິໂຠຄາທິກໍ ກມ຺ມໍ, ເວທິຕພ຺ພໍ ນິທສ຺ສນໍ.

໖໒໐. ກຏຕ຺ຕາເຍວ ຕໍ ກມ຺ມໍ, ຜລສ຺ສ ປນ ປຈ຺ຈໂຍ;

ນ ຈສ຺ສ ວິຊ຺ຊມານຕ຺ຕໍ, ຕສ຺ສ ວາວິຊ຺ຊມານຕາ.

໖໒໑. ອຠິຘມ຺ມາວຕາໂຣຍໍ, ປຣມຕ຺ຖປກາສໂນ;

ໂສຕພ຺ໂພ ປນ ໂສຕູນໍ, ປີຕິພຸທ຺ຘິວິວຑ຺ຒໂນ.

ອິຕິ ອຠິຘມ຺ມາວຕາເຣ ປຸຎ຺ຎວິປາກປຈ຺ຈຍນິທ຺ເທໂສ ນາມ

ນວໂມ ປຣິຈ຺ເຉໂທ.