໒໒. ພາວີສຕິໂມ ປຣິຈ຺ເຉໂທ

ຎາຓທສ຺ສນວິສຸທ຺ຘິນິທ຺ເທສວຓ຺ຓນາ

໑໓໑໙-໒໑. ອິທານິ ຎາຓທສ຺ສນວິສຸທ຺ຘິຍາ ນິທ຺ເທເສ ອນຸປ຺ປຕ຺ເຕ ສາ ຍສ຺ສ ຎາຓສ຺ສ ອນນ຺ຕຣໍ ອຸປ຺ປຊ຺ຊຕິ, ຕໍ ຕາວ ທສ຺ເສນ຺ໂຕ ‘‘ອິໂຕ ປຣ’’ນ຺ຕິອາທິມາຫ. ອິໂຕ ປຣນ຺ຕິ ອິໂຕ ອນຸໂລມຎາຓໂຕ ອຸປຣິ. ອາວຊ຺ຊນິຍຐານຕ຺ຕາຕິ ອາວຊ຺ຊນກິຈ຺ຈໍ ກໂຣນ຺ຕໍ ກິຣິຍມໂນຘາຕຸ ວິຍ ມຄ຺ຄສ຺ສ ອາວຊ຺ຊນຏ຺ຐາເນ ຐິຕຕ຺ຕາ ອພ຺ໂພຫາຣິກເມວ ອຸຠຍວິສຸທ຺ຘິລກ຺ຂຓາຠາວໂຕ. ກິຎ຺ຈາປິ ເອວໍ, ຕຖາປິ ວຸຏ຺ຐານຄາມິນິວິປສ຺ສນາຍ ປຣິໂຍສານຕ຺ຕາ ວິປສ຺ສນາປກ຺ຂິຍເມວາຕິ ອາຫ ‘‘ວິປສ຺ສນາຍ ໂສຕສ຺ມິໍ, ປຕິຕຕ຺ຕາ ວິປສ຺ສນາ’’ຕິ. ເອເຕນສ຺ສ ປຏິປທາຎາຓທສ຺ສນວິສຸທ຺ຘິຠຊນໍ ທສ຺ເສຕິ.

໑໓໒໒. ປຸຖຸຊ຺ຊເນສຸ ຠວໍ ໂປຖຸຊ຺ຊນິກໍ, ຕເທວ ໂຄຕ຺ຕໍ ອຣິເຍຫິ ອສມ຺ມິສ຺ສາ ປຸຖຸຊ຺ຊນສມຎ຺ຎາຕິ ໂປຖຸຊ຺ຊນິກໂຄຕ຺ຕໍ. ເອກວໍສຊານຎ຺ຫິ ສມານາ ສມຎ຺ຎາ ‘‘ໂຄຕ຺ຕ’’ນ຺ຕິ ວຸຈ຺ຈຕິ, ຄໍ ຕາຍຕິ ພຸທ຺ຘິໍ, ອຠິຘານຎ຺ຈ ເອກໍສິກວິສຍຕາຍ ຣກ຺ຂຕີຕິ ກຕ຺ວາ. ວາ-ສທ຺ໂທ ວກ຺ຂມານຕ຺ຖວິກປ຺ປເນ. ອຠິຠຸຍ຺ຍ ປວຕ຺ຕິໂຕ ໂຄຕ຺ຣຠູຕິ ສມ຺ພນ຺ໂຘ. ໂຄຕ຺ຕໍ ວຸຈ຺ຈຕິ ນິພ຺ພານໍ ‘‘ອຣິໂຍ’’ຕິ ພຸທ຺ຘິຍາ, ອຠິຘານສ຺ສ ຈ ຕາຍນໂຕ ປວຕ຺ຕນໂຕຕິ ອຘິປ຺ປາໂຍ. ຕໂຕ ຠວຕີຕິ ຕໂຕ ໂຄຕ຺ຕໂຕ ອາຣມ຺ມຓປຈ຺ຈຍໂຕ ຠວຕິ. ອິຕິ-ສທ຺ໂທ ເຈຕ຺ຖ ເຫຕຸຕ຺ໂຖ ທຏ຺ຐພ຺ໂພ. ເຕນ ຍສ຺ມາ ຕໂຕ ຠວຕິ, ຕສ຺ມາ ໂຄຕ຺ຣຠູຕິ ອຕ຺ໂຖ.

໑໓໒໓-໕. ຎາຓທສ຺ສນວິສຸທ຺ຘິ ເອວ ຎາຓທສ຺ສນສຸທ຺ຘິກໍ. ຕໍ ສມ຺ປາເທຕຸໍ ປນິຈ຺ຉຕາ ເຕນ ຠິກ຺ຂຸນາ ຍໍ ອຎ຺ຎໍ ກິຎ຺ຈິປິ ກາຕພ຺ພໍ, ຕໍ ນຕ຺ຖີຕິ ສມ຺ພນ຺ໂຘ. ກສ຺ມາ ນຕ຺ຖີຕິ ເຈ ອາຫ ‘‘ຍໍ ຫີ’’ຕິອາທິ. ‘‘ກຕເມວາ’’ຕິ ວຸຕ຺ເຕ ‘‘ກຖ’’ນ຺ຕິ ອນຸໂຍຄສ຺ສ ອຸປຏ຺ຐິຕຕ຺ຕາ ‘‘ອນຸໂລມາວສານໍ ຫີ’’ຕິອາທິນາ ຕໍ ສມຕ຺ເຖຕິ.

໑໓໒໖-໗. ເອວໍ ອຸປ຺ປນ຺ນອນຸໂລມຎາຓສ຺ສ ປນສ຺ສ ເອເຕຫິ ຕີຫິປິ ອນຸໂລມຎາເຓຫິ ອຕ຺ຕໂນ ພລານຸຣູເປນ ຖູລຖູເລ ສຈ຺ຈປຏິຈ຺ຉາທກຕມມ຺ຫິ ອນ຺ຕຣຘາປິເຕ ສພ຺ພສງ຺ຂາຣຄເຕ ຈິຕ຺ຕໍ ນ ປກ຺ຂນ຺ທຕິ, ນ ລຄ຺ຄຕິ, ປທຸມປລາສໂຕ ອຸທກໍ ວິຍ ປຕິກຸຏຕິ ປຕິວຏ຺ຏຕິ, ສພ຺ພໍ ນິມິຕ຺ຕາຣມ຺ມຓມ຺ປິ ສພ຺ພໍ ປວຕ຺ຕາຣມ຺ມຓມ຺ປິ ປລິໂພຘໂຕ ອຸປຏ຺ຐາຕິ, ອຖສ຺ສ ສພ຺ພສ຺ມິໍ ນິມິຕ຺ຕປ຺ປວຕ຺ຕາຣມ຺ມເຓ ປລິໂພຘໂຕ ອຸປຏ຺ຐິເຕ ທຸຕິຍສ຺ສ ວາ ຕຕິຍສ຺ສ ວາ ອນຸໂລມຎາຓສ຺ສ ອນນ຺ຕຣໍ ໂຄຕ຺ຣຠຸຎາຓໍ ອຸປ຺ປຊ຺ຊຕິ. ເຕນາຫ ‘‘ຕສ຺ສາ’’ຕິອາທິ. ປຐມາວຊ຺ຊນຎ຺ເຈວ ປຐມາໂຠຄຕາປິ ຈາຕິ ປຐມາວຊ຺ຊນໍ ປຐມາໂຠຄຠູຕໍ. ສກຕ຺ເຖ ຫິ ອຍໍ ຕາ-ປຈ຺ຈໂຍຕິ. ຕຕ຺ຖ ອາວຊ຺ຊນໍ ຈິຕ຺ຕສນ຺ຕານສ຺ສ ປຣິຓາມນວເສນ, ອາໂຠໂຄ ອຕ຺ຕໂນ ອາຠຸຊນວເສນ ທຏ຺ຐພ຺ໂພ.

໑໓໒໘-໓໓. ອນນ຺ຕຣາທີຫີຕິ ອນນ຺ຕຣສມນນ຺ຕຣອາເສວນອຸປນິສ຺ສຍນຕ຺ຖິວິຄຕວເສນ ຉຫິ ປຈ຺ຈເຍຫິ. ມຸທ຺ຘນ຺ຕິ ມຸທ຺ຘຠູຕໍ. ເອກນ຺ຕິກຕາຍ ເອກວາຣເມວ ຈ ອຸປ຺ປຊ຺ຊນໂຕ ປຸນຣາວຕ຺ຕາຠາເວນ ປນ ອນາວຕ຺ຕໍ. ອນາວຊ຺ຊນມ຺ປິ ຈາຕິ ອນາວຊ຺ຊນມ຺ປິສມານໍ. ສຎ຺ຎໍ ທຕ຺ວາ ວິຍາຕິ ‘‘ເອວໍ ອຸປ຺ປຊ຺ຊາຫີ’’ຕິ ສຎ຺ຎໍ ທຕ຺ວາ ວິຍ. ອນິພ຺ພິທ຺ຘປຸພ຺ພນ຺ຕິ ອປທາລິຕປຸພ຺ພໍ. ວິທ຺ຘໍເສນ຺ໂຕວາຕິ ວິນາເສນ຺ໂຕ ເອວ. ຊາຍຕີຕິ ນິພ຺ພຕ຺ຕຕິ. ເອຕ຺ຖ ຈ ອິມໍ ອຸປມໍ ອາຫຣນ຺ຕິ – ເອໂກ ກິຣ ອິສ຺ສາໂສ ອຏ຺ຐອຸສຠມຕ຺ເຕ ປເທເສ ຜລກສຕໍ ຐປາເປຕ຺ວາ ວຕ຺ເຖນ ມຸຂໍ ເວເຐຕ຺ວາ ສຣໍ ສນ຺ນຍ຺ຫິຕ຺ວາ ຈກ຺ກຍນ຺ເຕ ອຏ຺ຐາສິ, ອຎ຺ໂຎ ປຸຣິໂສ ຈກ຺ກຍນ຺ຕໍ ອາວິຊ຺ຌິຕ຺ວາ ຍທາ ອິສ຺ສາສສ຺ສ ຜລກໍ ອຠິມຸຂໍ ໂຫຕິ, ຕທາ ຕຕ຺ຖ ທຓ຺ຑເກນ ສຎ຺ຎໍ ເທຕິ. ອິສ຺ສາໂສ ທຓ຺ຑກສຎ຺ຎໍ ອມຸຎ຺ຈິຕ຺ວາວ ສຣໍ ຂິປິຕ຺ວາ ຜລກສຕນິພ຺ພິຊ຺ຌຕິ. ຕຕ຺ຖ ທຓ຺ຑກສຎ຺ຎໍ ເທນ຺ໂຕ ວິຍ ໂຄຕ຺ຣຠຸຎາຓໍ, ອິສ຺ສາໂສ ວິຍ ມຄ຺ຄຎາຓໍ, ທຓ຺ຑກສຎ຺ຎໍ ອມຸຎ຺ຈິຕ຺ວາວ ຜລກສຕໍ ນິພ຺ພິຊ຺ຌນໍ ວິຍ ມຄ຺ຄຎາຓສ຺ສ ໂຄຕ຺ຣຠຸຎາເຓນ ທິນ຺ນສຎ຺ຎໍ ອມຸຎ຺ຈິຕ຺ວາວ ນິພ຺ພານໍ ອາຣມ຺ມຓໍ ກຕ຺ວາ ອນິພ຺ພິທ຺ຘປຸພ຺ພານໍ ອປທາລິຕປຸພ຺ພານໍ ໂລຠໂທສໂມຫກ຺ຂນ຺ຘານໍ ນິພ຺ພິຊ຺ຌນນ຺ຕິ.

໑໓໓໕-໘. ອນາມຕຄ຺ຄ…ເປ… ມໂຫທຘິນ຺ຕິ ອຏ຺ຐມຠວໂຕ ປຏ຺ຐາຍ ນິພ຺ພຕ຺ຕກໍ ອຎ຺ຎາຕໂກຏິໍ ສໍສາຣວຏ຺ຏທຸກ຺ຂມຫາສມຸທ຺ທໍ. ປາຓາຕິປາຕາທິປຎ຺ຈເວຣານິ ເຈວ ປຎ຺ຈວີສຕິ ມຫາຠຍານິ ຈາຕິ ສພ຺ພເວຣຠຍານິ. ອເນເກປິ ອານິສໍເສຕິ ຣຕນຕ຺ຕເຍ ນິວິຏ຺ຐສທ຺ຘາທິເກ ອານິສໍເສ. ອາທິມຄ຺ເຄນາຕິ ໂສຕາປຕ຺ຕິມຄ຺ຄສງ຺ຂາເຕນ ປຐມມຄ຺ເຄນ. ປຐມມຄ຺ຄຎາຓວຓ຺ຓນາ.

໑໓໓໙. ຕສ຺ເສວານນ຺ຕຣນ຺ຕິ ຕສ຺ສ ອນນ຺ຕຣໍເຍວ. ທ຺ເວປິ ຕີຓິ ວາຕິ ນາຕິຕິກ຺ຂປຎ຺ຎສ຺ສ ທ຺ເວ, ຕິກ຺ຂປຎ຺ຎສ຺ສ ຕີຓິ ຜລຈິຕ຺ຕານິ.

໑໓໔໐-໓. ‘‘ອຊານິຕ຺ວາ ວທນ຺ຕິ ເຕ’’ຕິ ວຕ຺ວາ ຕຕ຺ຖ ກາຣຓໍ ທສ຺ເສຕຸໍ ‘‘ເອກສ຺ສາ’’ຕິອາທິ ວຸຕ຺ຕໍ. ປຎ຺ຈມໍ ມຄ຺ຄຈິຕ຺ຕນ຺ຕິ ອິມິນາວ ຉຏ຺ຐສ຺ສ ອຠາວທີປເນນ ‘‘ເອກໍ ຜລຈິຕ຺ຕ’’ນ຺ຕິ ວທໂຕ ໂຄທຕ຺ຕຕ຺ເຖຣສ຺ສ ວາໂທປິ ປຏິກ຺ຂິຕ຺ໂຕ.

໑໓໔໔. ‘‘ເອຕ຺ຕາວຕາ’’ຕິ ປຐມມຄ຺ຄສ຺ສ ອຸປ຺ປຕ຺ຕິອນນ຺ຕຣໍ ຜລສ຺ສ ອຸປ຺ປຕ຺ຕິມຕ຺ເຕນ. ໂສຕາປນ຺ໂນຕິ ວຸຈ຺ຈຕີຕິ ໂສຕາປນ຺ໂນ ນາມ ທຸຕິໂຍ ອຣິຍປຸຄ຺ຄໂລຕິ ວຸຈ຺ຈຕິ. ໂສ ເທວຣຊ຺ຊຈກ຺ກວຕ຺ຕິຣຊ຺ຊາທິປມາທຏ຺ຐານໍ ອາຄມ຺ມ ຠຸສໍ ປມຕ຺ໂຕປິ ຫຸຕ຺ວາ ກາມສຸຄຕິຍໍ ສຕ຺ຕກ຺ຂຕ຺ຕຸເມວ ສນ຺ຘາວິຕ຺ວາ ສໍສຣິຕ຺ວາ ທຸກ຺ຂສ຺ສນ຺ຕກຣຓສມຕ຺ໂຖ ໂຫຕິ. ຍຖາຫ –

‘‘ກິຎ຺ຈາປິ ເຕ ໂຫນ຺ຕິ ຠຸສໍ ປມຕ຺ຕາ,

ນ ເຕ ຠວໍ ອຏ຺ຐມມາທິຍນ຺ຕີ’’ຕິ. (ຂຸ. ປາ. ໖.໙; ສຸ. ນິ. ໒໓໒; ເນຕ຺ຕິ. ໑໑໕);

ຣູປາຣູປໂລເກສຸ ປນ ນ ຕຖາ ນິຍໂມຕິ ອາຈຣິຍາ.

໑໓໔໗. ຜລາທີນນ຺ຕິ ອາທິ-ສທ຺ເທນ ປຫີນກິເລສາທິເກ ສງ຺ຄຓ຺ຫາຕິ. ຕຖາ ຈ ‘‘ອິມິນາ ວຕາຫໍ ມຄ຺ເຄນ ອາຄໂຕ’’ຕິ ປຐມໍ ມຄ຺ຄໍ ປຈ຺ຈເວກ຺ຂຕິ, ຕໂຕ ‘‘ອຍໍ ເມ ອານິສໍໂສ ລທ຺ໂຘ’’ຕິ ຜລໍ ປຈ຺ຈເວກ຺ຂຕິ, ຕໂຕ ‘‘ອິເມ ນາມ ເມ ກິເລສາ ປຫີນາ’’ຕິ ປຫີນກິເລເສ ປຈ຺ຈເວກ຺ຂຕິ, ຕໂຕ ‘‘ອິເມ ນາມ ເມ ກິເລສາ ອວສິຏ຺ຐາ’’ຕິ ອຸປຣິມຄ຺ຄຕ຺ຕຍວຊ຺ເຌ ກິເລເສ ປຈ຺ຈເວກ຺ຂຕິ, ອວສາເນ ‘‘ອຍໍ ເມ ຘມ຺ໂມ ອາຣມ຺ມຓໂຕ ປຏິວິທ຺ໂຘ’’ຕິ ອມຕໍ ນິພ຺ພານໍ ປຈ຺ຈເວກ຺ຂຕິ. ອິຕິ ໂສຕາປນ຺ນສ຺ສ ປຎ຺ຈ ປຈ຺ຈເວກ຺ຂຓຎາຓານິ ໂຫນ຺ຕິ. ຍຖາ ຈ ໂສຕາປນ຺ນສ຺ສ, ເອວໍ ສກທາຄາມິອນາຄາມີນມ຺ປິ. ອຣຫໂຕ ປນ ອວສິຏ຺ຐກິເລສປຈ຺ຈເວກ຺ຂຓໍ ນາມ ນຕ຺ຖິ. ເອວໍ ສພ຺ພານິປິ ເອກູນວີສຕິ ປຈ຺ຈເວກ຺ຂຓຎາຓານິ. ເຕນາຫ ‘‘ປຈ຺ຈເວກ຺ຂຓຎາຓານິ, ຠວນ຺ເຕກູນວີສຕີ’’ຕິ.

໑໓໔໘-໕໐. ຍາສໍ ປຈ຺ຈເວກ຺ຂຓວເສນ ອິມານິ ຎາຓານິ ປວຕ຺ຕນ຺ຕິ, ຕາ ທສ຺ເສຕຸໍ ‘‘ມຄ຺ໂຄ ຜລຎ຺ຈາ’’ຕິອາທິມາຫ. ອຸກ຺ກຏ຺ຐປຣິຈ຺ເຉໂທເຍວ ເຈໂສ. ປຫີນາວສິຏ຺ຐກິເລສປຈ຺ຈເວກ຺ຂຓຎ຺ຫິ ເສຂານມ຺ປິ ໂຫຕິ ວາ ນ ວາ. ນ ຫິ ສພ຺ເພວ ຕຕ຺ຖ ສມຕ຺ຖາ ໂຫນ຺ຕິ. ເຕເນວ ຫິ ມຫານາໂມ ຠຄວນ຺ຕໍ ປຸຈ຺ຉິ ‘‘ໂກ ສຸ ນາມ ເມ ຘມ຺ໂມ ອຊ຺ຌຕ຺ຕໍ ອປ຺ປຫີໂນ, ເຍນ ເມ ເອກທາ ໂລຠຘມ຺ມາປິ ຈິຕ຺ຕໍ ປຣິຍາທາຍ ຕິຏ຺ຐນ຺ຕີ’’ຕິອາທິ (ມ. ນິ. ໑.໑໗໕). ໂຍຄມາຣຠເຕຕິ ຕສ຺ມິໍເຍວ ວາ ອາສເນ ນິສິນ຺ໂນ, ອປເຣນ ວາ ສມເຍນ ກາມຣາຄພ຺ຍາປາທານໍ ຕນຸຠາວກຣາຍ ສກທາຄາມິມຄ຺ຄສງ຺ຂາຕາຍ ທຸຕິຍາຍ ຠູມິຍາ ອຘິຄມຕ຺ຖາຍ ວິປສ຺ສນາໂຍຄໍ ກໂຣຕິ, ທຸຕິຍຠາໂວ ຈສ຺ສ ເທສນາວເສນ, ອຸປ຺ປຕ຺ຕິວເສນ ຈ ເວທິຕພ຺ໂພ. ສມ຺ປຍຸຕ຺ຕານໍ ປນ ນິສ຺ສຍຠາເວນ ເຕ ຘມ຺ມາ ຠວນ຺ຕິ ເອຕ຺ຖາຕິ ຠູມິ, ຍສ຺ມາ ວາ ສມາເນປິ ໂລກຸຕ຺ຕຣຠາເວ ສຍມ຺ປິ ຠວຕິ, ນ ນິພ຺ພານໍ ວິຍ ອປາຕຸຠູຕໍ, ຕສ຺ມາປິ ‘‘ຠູມີ’’ຕິ ວຸຈ຺ຈຕິ. ຎາເຓນ ປຣິມຊ຺ຊຕີຕິ ເຕນ ເຕນາກາເຣນ ອິນ຺ທ຺ຣິຍານໍ ຕິກ຺ຂຕຣຕໍ ສມ຺ປາເທຕ຺ວາ, ພລໂພຊ຺ຌງ຺ຄານຎ຺ຈ ປຏຸຕຣຠາວໍ ສາເຘຕ຺ວາ ລກ຺ຂຓຕ຺ຕຍໍ ຕີຣຓວເສນ ປຣິມຊ຺ຊຕິ.

໑໓໕໑-໒. ຕຕ຺ຖ ອປຣາປຣໍ ຎາຓໍ ຈາເຣນ຺ໂຕ ປຣິວຕ຺ເຕຕິ. ເຕນາຫ ‘‘ວິປສ຺ສນາວີຖິໍ ໂອຄາຫຕີ’’ຕິ. ເຫຏ຺ຐາ ວຸຕ຺ຕນເຍນາຕິ ອຸທຍພ຺ພຍຎາຓາທີນໍ ອຸປ຺ປາທເນ ວຸຕ຺ຕນເຍເນວ. ໂຄຕ຺ຣຠຸສ຺ສ ອນນ຺ຕຣນ຺ຕິ ເອຕ຺ຖ ໂຄຕ຺ຣຠຸ ວິຍ ໂຄຕ຺ຣຠຸ. ປຐມມຄ຺ຄປຸເຣຈາຣິກຎາຓຎ຺ຫິ ປຸຖຸຊ຺ຊນໂຄຕ຺ຕາຠິຠວນໂຕ, ອຣິຍໂຄຕ຺ຕຠວນໂຕ ຈ ນິປ຺ປຣິຍາຍໂຕ ‘‘ໂຄຕ຺ຣຠູ’’ຕິ ວຸຈ຺ຈຕິ, ອິທໍ ປນ ຕໍສທິສຕາຍ ປຣິຍາຍໂຕ ໂຄຕ຺ຣຠຸ. ເອກຈ຺ຈສໍກິເລສວິສຸທ຺ຘິຍາ, ປນ ອຈ຺ຈນ຺ຕວິສຸທ຺ຘິຍາ ອາຣມ຺ມຓກຣຓໂຕ ຈ ‘‘ໂວທານ’’ນ຺ຕິ ວຸຈ຺ຈຕິ. ເຕນາຫ ປຏ຺ຐາເນ ‘‘ອນຸໂລມໍ ໂວທານສ຺ສ ອນນ຺ຕຣປຈ຺ຈເຍນ ປຈ຺ຈໂຍ’’ຕິ (ປຏ຺ຐາ. ໑.໑.໔໑໗). ຍສ຺ມາ ປນ ປຏິສມ຺ຠິທາມຄ຺ເຄ ‘‘ອຸປ຺ປາທາທິອຠິຠວນຏ຺ຐໍ ອຸປາທາຍ ອຏ຺ຐ ໂຄຕ຺ຣຠຸຘມ຺ມາ ສມາຘິວເສນ ອຸປ຺ປຊ຺ຊນ຺ຕິ, ທສ ໂຄຕ຺ຣຠຸຘມ຺ມາ ວິປສ຺ສນາວເສນ ອຸປ຺ປຊ຺ຊນ຺ຕີ’’ຕິອາທີສຸ (ປຏິ. ມ. ໑.໖໐) ໂຄຕ຺ຣຠຸນາມວເສເນວ ອາຄຕໍ, ຕສ຺ມາ ອິຘາປິ ‘‘ໂຄຕ຺ຣຠຸສ຺ສ ອນນ຺ຕຣ’’ນ຺ຕິ ວຸຕ຺ຕໍ ໂຄຕ຺ຕສງ຺ຂາຕນິພ຺ພານໂຕ ຠູຕນ຺ຕິ ກຕ຺ວາ. ທຸຕິຍມຄ຺ຄຎາຓວຓ຺ຓນາ.

໑໓໕໕-໗. ຍນ຺ຕິ ຍສ຺ມາ. ສກິເທວາຕິ ເອກວາຣເມວ. ອິມໍ ໂລກໍ ອາຄນ຺ຕ຺ວາຕິ ອິມິນາ ປຎ຺ຈສຸ ສກທາຄາມີສຸ ຈຕ຺ຕາໂຣ ວຊ຺ເຊຕ຺ວາ ເອໂກວ ຄຫິໂຕ. ເອກຈ຺ໂຈ ຫິ ອິຘ ສກທາຄາມິຜລໍ ປຕ຺ວາ ອິເຘວ ປຣິນິພ຺ພາຍຕິ, ເອກຈ຺ໂຈ ອິຘ ປຕ຺ວາ ເທວໂລເກ ປຣິນິພ຺ພາຍຕິ, ເອກຈ຺ໂຈ ເທວໂລເກ ປຕ຺ວາ ຕຕ຺ເຖວ ປຣິນິພ຺ພາຍຕິ, ເອກຈ຺ໂຈ ເທວໂລເກ ປຕ຺ວາ ອິຘູປປຊ຺ຊິຕ຺ວາ ປຣິນິພ຺ພາຍຕີຕິ ອິເມ ຈຕ຺ຕາໂຣປິ ອິຘ ນ ຄຫິຕາ. ໂຍ ປນ ອິຘ ປຕ຺ວາ ເທວໂລເກ ຍາວຕາຍຸກໍ ວສິຕ຺ວາ ອິຘູປປຊ຺ຊິຕ຺ວາ ປຣິນິພ຺ພາຍຕິ, ອຍເມໂກວ ອິຘ ຄຫິໂຕຕິ. ອນ຺ຕກໂຣ ຠເວຕິ ທຸກ຺ຂສ຺ສນ຺ຕກໂຣ ຠເວຍ຺ຍ, ຠເວ ວາ ອນ຺ຕກໂຣ ຠວສ຺ສ ອນ຺ຕກໂຣຕິ ອຕ຺ໂຖ. ຕຕິຍາຍ ຠູມິຍາ ປຕ຺ຕິຍາຕິ ສມ຺ພນ຺ໂຘ. ພ຺ຍາປາທກາມຣາຄານໍ ປຫານາຍາຕິ ເຕສໍເຍວ ສກທາຄາມິມຄ຺ເຄນ ຕນຸກຣານໍ ສໍໂຍຊນານໍ ນິຣວເສສປ຺ປຫານາຍ. ຕຕິຍມຄ຺ຄຎາຓວຓ຺ຓນາ.

໑໓໖໓-໗. ປຏິສນ຺ຘິວເສນ ກາມຠວສ຺ສ ອນາຄມນໂຕ ອນາຄາມີ. ເຕນາຫ ‘‘ຕຕ຺ເຖວ ປຣິນິພ຺ພາຍີ’’ຕິ. ຕຕ຺ເຖວາຕິ ສຸທ຺ຘາວາເສ ວາ ອຎ຺ຎຕ຺ຖ ວາ ຍຕ຺ຖ ອຸປ຺ປນ຺ໂນ, ຕຕ຺ເຖວ ປຣິນິພ຺ພາຍິ. ອນາວຕ຺ຕິສຠາໂວຕິ ຕສ຺ມາ ໂລກາ ອິຘ ປຏິສນ຺ຘິຄ຺ຄຫຓວເສນ ອິມໍ ໂລກໍ ປຸນຣາຄມນາຠາວໂຕ ອນາວຕ຺ຕນສຠາໂວ, ພຸທ຺ຘທສ຺ສນເຖຣທສ຺ສນຘມ຺ມສ຺ສວນານໍ ປນຕ຺ຖາຍ ອາຄມນໍ ໂຫຕິເຍວ. ຣູປຣາຄາທິປຫານາຍາຕິ ຣູປຣາຄອຣູປຣາຄມານອຸທ຺ຘຈ຺ຈອວິຊ຺ຊາສງ຺ຂາຕານໍ ປຎ຺ຈນ຺ນໍ ອຸທ຺ຘມ຺ຠາຄິຍສໍໂຍຊນານໍ ນິຣວເສສປ຺ປຫານາຍ. ວິທ຺ຘໍສາຍາຕິ ວິນາສາຍ. ຈຕຸຕ຺ຖມຄ຺ຄຎາຓວຓ຺ຓນາ.

໑໓໗໑-໔. ມຫາຂີຓາສໂວຕິ ມຫານຸຠາວໂຕ ນິພທ຺ຘປູຊາວຈນເມຕໍ, ນ ອຸປາທາຍວຈນໍ ‘‘ຍຖາ ມຫາໂມຄ຺ຄລ຺ລາໂນ’’ຕິ. ນ ຫິ ຈູຬຂີຓາສໂວ ນາມ ອຕ຺ຖິ. ອນຸປ຺ປຕ຺ໂຕ ສທຕ຺ໂຖ ສກຕ຺ໂຖ, ປູຊຕ຺ໂຖ ວາ ເອເຕນາຕິ ອນຸປ຺ປຕ຺ຕສທຕ຺ໂຖ, ສທຕ຺ໂຖຕິ ຈ ອຣຫຕ຺ຕໍ ເວທິຕພ຺ພໍ. ຕຎ຺ຫິ ອຕ຺ຕຸປນິພນ຺ຘນຏ຺ເຐນ, ອຕ຺ຕານໍ ອວິຊຫນຏ຺ເຐນ, ອຕ຺ຕໂນ ປຣມຕ຺ຖຏ຺ເຐນ ຈ ອຕ຺ຕໂນ ອຕ຺ຖຕ຺ຕາ ‘‘ສທຕ຺ໂຖ’’ຕິ ວຸຈ຺ຈຕິ. ຂີຓານິ ທສປິ ຠວສໍໂຍຊນານິ ເອຕສ຺ສາຕິ ຂີຓສໍໂຍຊໂນ. ທກ຺ຂິຓໍ ອຣຫຕີຕິ ທກ຺ຂິເຓຍ຺ໂຍ. ຈຕສ຺ໂສປີຕິ ໂສຕາປຕ຺ຕິມຄ຺ໂຄ ສກທາຄາມິມຄ຺ໂຄ ອນາຄາມິມຄ຺ໂຄ ອຣຫຕ຺ຕມຄ຺ໂຄຕິ ຈຕສ຺ໂສປິ. ວິສຸທ຺ຘິກາເມນາຕິ ອຕ຺ຕໂນ ວິສຸທ຺ຘິໍ ອິຈ຺ຉນ຺ເຕນ. ຕໂປເຍວ ຘນມສ຺ສາຕິ ຕໂປຘໂນ, ເຕນ.

ອິຕິ ອຠິຘມ຺ມຕ຺ຖວິກາສິນິຍາ ນາມ

ອຠິຘມ຺ມາວຕາຣສໍວຓ຺ຓນາຍ

ຎາຓທສ຺ສນວິສຸທ຺ຘິນິທ຺ເທສວຓ຺ຓນາ ນິຏ຺ຐິຕາ.