໑໓. ເຕຣສໂມ ປຣິຈ຺ເຉໂທ

ກາຣກປຏິເວຘວຓ຺ຓນາ

ນິທ຺ທິຏ຺ຐາຕິ ອຸທ຺ເທສນິທ຺ເທສາທິວເສນ ທສ຺ສິຕາ. ກຸສລາທໂຍຕິ ກຸສລາກຸສລາ. ເອເຕສໍ ປນ ນ ນິທ຺ທິຏ຺ໂຐຕິ ສມ຺ພນ຺ໂຘ. ປຸພ຺ເພ ‘‘ກາຣໂກ’’ຕິ ວຈນໍ ວິຍ ‘‘ເວທໂກ’’ຕິ ອວຸຕ຺ເຕປິ ‘‘ອຕ຺ຕາ ກາຣໂກ ເວທໂກ’’ຕິ ອຕ຺ຕໂນ ລທ຺ຘິຕາຍ ‘‘ຕສ຺ສ ຫິ ກາຣກສ຺ສ ເວທກສ຺ສາ’’ຕິ ວຸຕ຺ຕໍ. ກຸສລາກຸສລານມຠາໂວປິ ສິຍາ, ອິຕຣຖາ ອເຫຕຸກໂທສາປຕ຺ຕິໂຕຕິ ອຘິປ຺ປາໂຍ. ເຕສໍ ກຸສລາກຸສລານໍ ອາຍຕ຺ຕາ ວຸຕ຺ຕິ ເອເຕສນ຺ຕິ ຕທາຍຕ຺ຕວຸຕ຺ຕິໂນ. ເຕສນ຺ຕິ ກຸສລາກຸສລາທີນໍ. ຕສ຺ມາຕິ ກາຣກາຠາເວ ກຸສລາກຸສລານໍ, ຕພ຺ພິປາການຎ຺ຈ ອຠາວໂຕ. ນິຣຕ຺ຖິກາຕິ ເທເສຕ຺ວາປິ ໂພເຘຕພ຺ພາຠາວໂຕ ນິຣຕ຺ຖິກາ. ‘‘ນາຍໍ ນິຣຕ຺ຖິກາ’’ຕິ ວຕ຺ວາປິ ‘‘ສາຕ຺ຖິກາ’’ຕິ ວຈນໍ ປນ ປຣສ຺ສ ທຬ຺ຫຄ຺ຄາຫຕ຺ຖໍ. ໂລເກປິ ຫິ ເອວໍ ໂວຫາຣໍ ໂວຫຣນ຺ຕິ, ເອວເມວ ຠວຕິ, ນາຎ຺ຎຖາຕິອາທິ. ຕຕ຺ຖາຕິ ກາຣກາຠາເວປິ ອຕ຺ຕາ ອຕ຺ຖີຕິ ຄຫເຓ. ອນຸໂຣໂຘຕິ ອນຸກູລປກ຺ຂປາໂຕຕິ ອຕ຺ໂຖ. ອິຘາຕິ ກາຣກາຠາເວປິ ກຸສລາທໂຍ ອຕ຺ຖີຕິ ຄຫເຓ. ວິໂຣໂຘຕິ ປຏິໂຆ.

ເອວໍ ກາຣກາຠາເວປິ ກຸສລາທີນໍ ສພ຺ຠາວໍ ຍຸຕ຺ຕິໂຕ ສາເຘຕ຺ວາ ອິທານິ ໂລກສິທ຺ເຘນ ນິທສ຺ສເນນ ສາເຘຕຸໍ ‘‘ອຖາປີ’’ຕິອາທິ ວຸຕ຺ຕໍ. ອຖາປີຕິ ກາຣກາຠາເວປິ. ປຖວິ-ຄ຺ຄຫເຓນ ປຖໂວຊໍ ທສ຺ເສຕິ. ຕຖາ ອາປ-ຄ຺ຄຫເຓນ ອາໂປຊໍ. ເຕໂຊຕິ ສີຕຸຓ຺ຫວເສນ ທຸວິຘາ ເຕໂຊຘາຕຸ. ອຸຕູຕິ ເຫມນ຺ຕາທິອຸຕຸ. ອາທິ-ຄ຺ຄຫເຓນ ພີຊາທິເກ ສງ຺ຄຓ຺ຫາຕິ. ຊນກປຈ຺ຈໂຍ ເຫຕຸ, ອນຸປາລນກປຈ຺ຈໂຍ ປຈ຺ຈໂຍ ນາມາຕິ ອາຫ ‘‘ເຫຕຸປຈ຺ຈຍສາມຄ຺ຄິຍາ’’ຕິ. ‘‘ຜລນິພ຺ພຕ຺ຕໂກ ເຫຕຸ, ປຈ຺ຈໂຍ ອນຸປາລນໂກ’’ຕິ ຫິ ວຸຕ຺ຕໍ.

ເອວໍ ກາຣກາຠາເວປິ ກຸສລາກຸສລປ຺ປວຕ຺ຕິໍ ສາເຘຕ຺ວາ ອິທານິ ປຣປຣິກປ຺ປິຕໍ ອຕ຺ຕານເມວ ຕາວ ປຏິກ຺ຂິປິຕຸໍ ‘‘ອຖາປິ ເຈຕ຺ຖາ’’ຕິອາທິ ອາຣທ຺ຘໍ. ກາມໍ ປຎ຺ຎາປຣິພາຫິຣທິຏ຺ຐິຍາ ເອວ ອຕ຺ຕາ ປຣິກປ຺ປີຍຕິ, ປໂຣ ປນ ‘‘ປຎ຺ຎາຍ ປຣິກປ຺ເປມີ’’ຕິ ມຎ຺ຎຕີຕິ ຕສ຺ສ ລທ຺ຘິວເສນ ‘‘ປຎ຺ຎາຍ ປຣິກປ຺ປິໂຕ’’ຕິ ວຸຕ຺ຕໍ. ຕໍ ອຸປປຣິກ຺ຂິສ຺ສາມ ຕາວາຕິ ຕິຏ຺ຐຕຸ ຕາວ ເຈສາ ກາຣກາຠາເວປິ ກຸສລາທີນໍ ຠາວາຠາວວິຈາຣຓາ ປຐມໍ ຕເມວ ອຕ຺ຕານໍ ອຸປປຣິກ຺ຂິສ຺ສາມາຕິ ອຕ຺ໂຖ. ໂທສເມຕ຺ຖ ວຕ຺ຕຸກາໂມ ປຸຈ຺ຉຕີຕິ ອຘິປ຺ປາເຍນ ປຏິຎ຺ຎໍ ອທຕ຺ວາວ ປຸຈ຺ຉນ຺ໂຕ ອາຫ ‘‘ກິຎ຺ເຈຕ຺ຖາ’’ຕິ. ສເຈຕໂນ ວາ ອຸທາຫຸ ອເຈຕໂນ ວາຕິ ເອຕ຺ຖ ໂກ ໂທໂສຕິ ອຕ຺ໂຖ. ອິຕໂຣ ອຸຠຍຖາປິ ໂທໂສເຍວ. ຍຎ຺ຫິ ອເຈຕນໍ ອຕ຺ຕານໍ, ນ ຕໍ ກາຣກໍ, ເວທກຎ຺ຈ, ຍຖາ ຕໍ ປາກາຣຕຣຸອາທໂຍ. ‘‘ອເຈຕໂນວາຍໍ ອຕ຺ຕາ’’ຕິ ອນຸມາເນນ ກາຣກເວທກຕ຺ຕາຠາວສິທ຺ຘິໂຕຕິ ທສ຺ເສຕຸໍ ‘‘ຍທິ ອເຈຕໂນ’’ຕິອາທິ ວຸຕ຺ຕໍ. ອນຎ຺ໂຎຕິ ອວິນິພ຺ໂຠຄວເສນ ອນຎ຺ໂຎ. ອິຕຣຖາ ‘‘ສເຈຕໂນ’’ຕິ ວຈນເມວ ນ ອຸປປຊ຺ເຊຍ຺ຍ. ສຫຠາວີ ນາມ ອຎ຺ໂຎ ນ ໂຫຕີຕິ. ອຕ຺ຕໂນປິ ນາໂສ ສິຍາຕິ ອວິນິພ຺ໂຠຄວຸຕ຺ຕິຣູເປສຸ ເອກສ຺ສ ນາເສ ອິຕຣສ຺ສາປິ ວິນາໂສ ວິຍ. ເຈຕນາຍປິ ນາໂສ ນ ຠວຕິ ອວິນິພ຺ໂຠຄຣູເປສຸ ເອກສ຺ສ ອວິນາເສ ອິຕຣສ຺ສາປິ ອວິນາໂສ ວິຍາຕິ ອຘິປ຺ປາໂຍ.

‘‘ເຈຕນາຍ ອນຎ຺ຎຕ຺ຕາ’’ຕິ ກາຣຓໍ ວຕ຺ວາ ຕເມວ ສມຕ຺ເຖຕຸໍ ‘‘ເຈຕນຕ຺ຕານ’’ນ຺ຕິອາທິ ວຸຕ຺ຕໍ. ‘‘ອຕ຺ຕໂນ ອນາເສ ສຕິ ເຈຕນາຍປິ ວິນາໂສ ນ ຠວຕີ’’ຕິ ສຸຕ຺ວາປິ ປຣສ຺ສ ນິຣຸຕ຺ຕຣຠາໂວ, ເຈຕນາຍ ນາເສ ວິເສສກາຣຓາຠາວໂຕຕິ ອຘິປ຺ປາເຍນາຫ ‘‘ອຖ ເຈຕນາຍເຍວາ’’ຕິອາທິ. ອຕ຺ຕາວ ນສ຺ສຕຸ, ຕິຏ຺ຐຕຸ ເຈຕນາ. ໂກ ຫິ ວິເສສກາຣຓາຠາເວ ອຕ຺ຕນິ ອນຸໂຣໂຘ, ເຈຕນາຍ ວິໂຣໂຘຕິ ອຘິປ຺ປາໂຍ. ປຏິຎ຺ຎາ ຫີນາຕິ ປຸພ຺ເພ ທິນ຺ນປຏິຎ຺ຎາ ປຣິຫີນາ. ອຖ ນ ຠວຕິ, ‘‘ປຏິຎ຺ຎາ ຫີນາ’’ຕິ ຍທິ ອຕ຺ຕໂນ ວິນາເສ ເຈຕນາຍ ອວິນາໂສ ນ ຠວຕິ. ເຈຕນຕ຺ຕານໍ ອນຎ຺ຎຠາເວນ ເຈຕນາຍ ນາເສ ອຕ຺ຕໂນປິ ວິນາສປ຺ປສງ຺ຄໂຕ ອຕ຺ຕາ ນ ນສ຺ສຕີຕິ ຕວ ປຏິຎ຺ຎາ ຫີນາ. ວຸຕ຺ຕປ຺ປກາຣໂຕ ວິປຣີຕໍ ວາຕິ ຍຖາວຸຕ຺ຕປ຺ປກາຣໂຕ ວິປຣີຕໍ. ເຈຕນາຍ ວິນາເສປິ ອຕ຺ຕາ ນ ນສ຺ສຕິ, ອຕ຺ຕໂນ ປນ ອວິນາເສປິ ເຈຕນາ ນສ຺ສຕີຕິ ເອວໍ ວາ ຕວ ອຘິປ຺ປາໂຍ ສິຍາຕິ ອຕ຺ໂຖ. ອຕ຺ຕາ ນສ຺ສຕຸ, ເຈຕນາ ຕິຏ຺ຐຕຸ ອຎ຺ຎຠາເວ ອຸຠິນ຺ນໍ ສມານໂຍຄກ຺ຂມຕາຍ ຠວິຕພ຺ພໂຕຕິ ອຘິປ຺ປາໂຍ. ປຏິຎ຺ຎາຫີໂນ ຠວສີຕິ ເຈຕນາເຍວ ນສ຺ສຕິ, ອຕ຺ຕາ ນ ນສ຺ສຕິ ປຏິຎ຺ຎາຍ ຫີໂນ ຠວສິ.

ອິຘາຕິ ອຎ຺ຎຕ຺ຖ ປກ຺ເຂ. ລກ຺ຂຓກຕນ຺ຕິ ອຎ຺ຎມຎ຺ຎວິສທິເສຫິ ຠິນ຺ນລກ຺ຂເຓຫິ ກຕໍ. ເທສນ຺ຕຣກຕນ຺ຕິ ຠິນ຺ນເທສກຕໍ. ຊາໂຕ ເວທີຍຕິ ຎາຍຕີຕິ ຊາຕເວໂທ, ອຄ຺ຄິສ຺ເສຕໍ ອຘິວຈນໍ. ຑຍ຺ຫມາເນຕິ ອຸທ຺ຘເນ ປກ຺ຂິປິຕ຺ວາ ປຈ຺ຈມາເນ. ເອໂກ ປວຕ຺ຕິປເທໂສ ອິເມສນ຺ຕິ ເອກເທສາ, ເຕສໍ ຠາໂວຕິ ເອກເທສຕ຺ຕໍ.

ອວິນິພ຺ໂຠຄໂຕຕິ ລກ຺ຂຓໂຕ ເຠເທປິ ຐານວເສນ ອວິນິພ຺ຠຸຊ຺ຊນໂຕ ອວິສໍສຏ຺ຐຕ຺ຕາ ‘‘ເອກເທສຕ຺ເຕ’’ຕິອິມສ຺ເສວ ເວວຈນວເສນ ‘‘ອວິນິພ຺ໂຠຄຠາເວປີ’’ຕິ ວຸຕ຺ຕໍ. ຕໍ ອຍຸຕ຺ຕນ຺ຕິ ຕໍ ‘‘ອຸຠິນ຺ນໍ ເອກເທສຕາ ນຕ຺ຖີ’’ຕິ ອິມິນາ ສຫ ນ ຍຸຊ຺ຊຕິ. ປຏິຎ຺ຎາ ຫີນາຕິ ຍທິ ປຸພ຺ພປຏິຎ຺ຎາ ປມາຓໍ, ອຍໍ ປຏິຎ຺ຎາ ຫີນາ. ຍທິ ວາ ປນ ອຍໍ ປມາຓໍ, ອິຕຣາ ຫີນາຕິ ອຕ຺ໂຖ. ອຖ ວາ ເຈຕນາຍ ອຕ຺ຕໂນ ປເທສວເສນ ນານຕ຺ເຕ ອຕ຺ຕໂນ ອເຈຕນຕ຺ຕຠາວປ຺ປຕ຺ຕິໂຕ ‘‘ສເຈຕໂນ ອຕ຺ຕາ’’ຕິ ເຫຏ຺ຐາ ຕຍາ ທິນ຺ນປຏິຎ຺ຎາ ປຣິຫີນາຕິ ເອວເມຕ຺ຖ ອຕ຺ໂຖ ທຏ຺ຐພ຺ໂພ.

ອເຈຕໂນ ອຕ຺ຕາຕິ ອຕ຺ຕາ ອເຈຕໂນຕິ ກຕ຺ວາ. ປຸພ຺ເພ ວຸຕ຺ຕໂທສໂຕຕິ ‘‘ຍທິ ອເຈຕໂນ ສິຍາ’’ຕິອາທິນາ ອາທິໂຕ ວຸຕ຺ຕໂທສໂຕ. ຕສ຺ມາຕິ ຍສ຺ມາ ເອວໍ ອຸປປຣິກ຺ຂິຍມາເນ ວິມທ຺ທນສໂຫ ໂຫຕິ, ຕສ຺ມາ.

໗໗໙. ຍທິ ເອວນ຺ຕິ ຍທິ ປຣມຕ຺ຖໂຕ ກຸສລາກຸສລານໍ ກາຣໂກ, ຕພ຺ພິປາການຎ຺ຈ ເວທໂກ ນຕ຺ຖິ, ເອວໍ ສນ຺ເຕ ອຖ ກສ຺ມາ ຠຄວຕາ ວຸຕ຺ຕນ຺ຕິ ສມ຺ພນ຺ໂຘ.

ສນ຺ຘາວຕີຕິ ສໍສຣຕິ. ອຕ຺ຕນາ ກຕກຸສລາກຸສລກມ຺ມປຈ຺ຈຍຕ຺ຕາ ວິປາກຠູຕໍ ສຸຂທຸກ຺ຂມ຺ປິ ອຕ຺ຕນາ ກຕເມວ ນາມ ໂຫຕີຕິ ວຸຕ຺ຕໍ ‘‘ສຸຂທຸກ຺ຂໍ ສຍໍກຕ’’ນ຺ຕິ.

໗໘໐. ສໍສາຣມາປນ຺ໂນຕິ –

‘‘ຂນ຺ຘານຎ຺ຈ ປຏິປາຏິ, ຘາຕຸອາຍຕນານ ຈ;

ອພ຺ໂພຈ຺ຉິນ຺ນໍ ວຕ຺ຕມານາ, ‘ສໍສາໂຣ’ຕິ ປວຸຈ຺ຈຕີ’’ຕິ. (ຘ. ສ. ອຏ຺ຐ. ນິທານກຖາ; ວິສຸທ຺ຘິ. ໒.໖໑໙) –

ເອວໍ ວຸຕ຺ຕຂນ຺ຘປຏິປາຏິອາທິວສປ຺ປວຕ຺ຕໍ ສໍສາຣໍ ປຸນປ຺ປຸນໍ ປວຕ຺ຕິວເສນ ປຏິປນ຺ໂນ. ທຸກ຺ຂມສ຺ສ ມຫພ຺ຠຍນ຺ຕິ ອສ຺ສ ສໍສາຣາປນ຺ນສ຺ສ ສຕ຺ຕສ຺ສ ຊາຕິອາທິທຸກ຺ຂໍ ມຫພ຺ຠຍໍ ມຫາຠຍສໍວຕ຺ຕນກນ຺ຕິ ອຕ຺ໂຖ. ໂອປປາຕິໂກຕິ ອຸປ຺ປຊ຺ຊມາໂນ.

໗໘໑. ຠາຣາ ຫເວ ປຎ຺ຈກ຺ຂນ຺ຘາຕິ ຣູປາທໂຍ ປຎ຺ຈກ຺ຂນ຺ຘາ ຠາຣຠູຕາ, ສີເສ ນິກ຺ຂິຕ຺ຕຠາຣສທິສາຕິ ວຸຕ຺ຕໍ ໂຫຕິ. ຠາຣຫາໂຣ ຈ ປຸຄ຺ຄໂລ ຕສ຺ສ ປຎ຺ຈກ຺ຂນ຺ຘຠາຣສ຺ສ ຫາຣໂກ. ຠາຣາທານນ຺ຕິ ປຏິສນ຺ຘິວເສນ ປຎ຺ຈກ຺ຂນ຺ຘຠາຣຄ຺ຄຫຓໍ. ຠາຣນິກ຺ເຂປນນ຺ຕິ ປຸນ ອຄ຺ຄເຫຕພ຺ພຕາປາທເນນ ອນຸປາທາປຣິນິພ຺ພານວເສນ ຠາຣສ຺ສ ນິກ຺ຂິປນໍ.

໗໘໒. ຍນ຺ຕິ ກຸສລາກຸສລກມ຺ມໍ. ສກນ຺ຕິ ອາຍຕ຺ຕໍ.

໗໘໓. ເອກສ຺ສ ປຸຄ຺ຄລສ຺ສາຕິ ສມ຺ພນ຺ໂຘ. ເອເກນ ກປ຺ເປນາຕິ ເອກສ຺ມິໍ ກປ຺ເປ.

໗໘໔. ອສ຺ສທ຺ໂຘຕິອາທິ ເຫຏ຺ຐາ ວຸຕ຺ຕຕ຺ຖໍ.

‘‘ຕຎ຺ຈ ໂຂ ສມ຺ມຸຕິວເສນ, ນ ປຣມຕ຺ຖໂຕ’’ຕິ ວຕ຺ວາ ຕເທວ ປຕິຏ຺ຐາເປຕຸໍ ‘‘ນນຸ ຠຄວຕາ’’ຕິອາທິ ວຸຕ຺ຕໍ. ‘‘ກິໍ ນຸ ສຕ຺ໂຕ’’ຕິ ຄາຖາ ວຊິຣາຍ ເຖຣິຍາ ວຸຕ຺ຕາປິ ຠຄວໂຕ ອຘິປ຺ປາຍວເສເນວ ວຸຕ຺ຕຕ຺ຕາ ຠຄວຕາ ວຸຕ຺ຕາ ນາມ ໂຫຕີຕິ ກຕ຺ວາ ວຸຕ຺ຕໍ ‘‘ຠຄວຕາ ອິທມ຺ປິ ວຸຕ຺ຕ’’ນ຺ຕິ.

໗໘໕. ກິໍ ນຸ ສຕ຺ໂຕຕິ ປຈ຺ເຈສີຕິ ຣູປເວທນາທີສຸ ກິໍ ນາມ ສຕ຺ໂຕ ປຸຄ຺ຄໂລຕິ ຄຓ຺ຫາສິ.

໗໘໖. ອງ຺ຄສມ຺ຠາຣາຕິ ຈກ຺ກາທິອວຍວສມ຺ຠາເຣສຸ, ຈກ຺ກາທິອວຍວານໍ ສໂມຘາເນວາຕິ ອຕ຺ໂຖ. ສທ຺ໂທຕິ ໂວຫາໂຣ.

ຕສ຺ມາຕິ ຍສ຺ມາ ເອວໍ ປຣມຕ຺ຖໂຕ ສຕ຺ຕສ຺ສ ອຠາໂວ ຠຄວຕາ ວຸຕ຺ໂຕ, ຕສ຺ມາ. ນ ວຈນມຕ຺ຕເມວ ອາລມ຺ພິຕພ຺ພໍ ອຘິປ຺ປາຍໍ ປຫາຍາຕິ ອຕ຺ໂຖ. ທຬ຺ຫມູຬ຺ໂຫວ ຫຸຕ຺ວາ ຄຓ຺ຫາຕີຕິ ທຬ຺ຫມູຬ຺ຫຄ຺ຄາຫີ, ກາຣເຓ ທສ຺ສິເຕປິ ອປຣິຈ຺ຈຊນວເສນ ຄຫຓໍ ທຬ຺ຫຄ຺ຄຫຓໍ. ກາຣຓສ຺ເສວ ທຏ຺ຐຸມສມຕ຺ຖຕາວເສນ ຄຫຓໍ ມູຬ຺ຫຄ຺ຄຫຓໍ. ຕາທິເສນ ນ ຠວິຕພ຺ພນ຺ຕິ ອາຫ ‘‘ນ ຈ…ເປ… ຠວິຕພ຺ພ’’ນ຺ຕິ. ສຸຕ຺ຕປທານນ຺ຕິ ເນຍ຺ຍຕ຺ຖນີຕຕ຺ຖວເສນ ອຸຠຍຖາ ຐິຕານໍ ສຸຕ຺ຕນ຺ຕານໍ.

ທ຺ເວ ສຈ຺ຈານິ ວຸຕ຺ຕານິ ຕຖາ ຕຖາ ວິເນຕພ຺ພານໍ ປຸຄ຺ຄລານໍ ວເສນາຕິ ອຘິປ຺ປາໂຍ. ເຍສຎ຺ຫິ ສມ຺ມຸຕິເທສນາຍ ວິເສສາຘິຄໂມ ໂຫຕິ, ເຕສໍ ສມ຺ມຸຕິສຈ຺ຈວເສນ ເທເສຕິ. ເຍສຎ຺ຈ ປຣມຕ຺ຖເທສນາຍ, ເຕສໍ ປຣມຕ຺ຖວເສນ ເທເສຕິ. ເທສຠາສາກຸສໂລ ວິຍ ອາຈຣິໂຍ ຕໍຕໍເທສວາສິມາຓວານໍ ຕາຍ ຕາຍ ຠາສາຍ. ສມ຺ມຸຕິສຈ຺ຈໍ ປຣມຕ຺ຖສຈ຺ຈຎ຺ຈາຕິ ເອຕ຺ຖ ‘‘ປຸຄ຺ຄໂລ ສຕ຺ໂຕ ອິຕ຺ຖີ ປຸຣິໂສ ຂຕ຺ຕິໂຍ ພ຺ຣາຫ຺ມໂຓ ເທໂວ’’ຕິເອວມາທິ ປຣມຕ຺ຖໂຕ ອວິຊ຺ຊມານມ຺ປິ ໂລເກ ກຕສງ຺ເກຕວເສນ ຕຖຕ຺ຕາ ສມ຺ມຸຕິສຈ຺ຈໍ. ຂນ຺ຘຘາຕຸອາຍຕນານິ ສຕິປຏ຺ຐານາຕິເອວມາທິ ປຣມຕ຺ຖວເສເນວ ຕຖຕ຺ຖາ ປຣມຕ຺ຖສຈ຺ຈໍ. ເຕນາຫຸ ອຏ຺ຐກຖາຈຣິຍາ –

‘‘ສງ຺ເກຕວຈນໍ ສຈ຺ຈໍ, ໂລກສມ຺ມຸຕິກາຣຓໍ;

ປຣມຕ຺ຖວຈນໍ ສຈ຺ຈໍ, ຘມ຺ມານໍ ຠູຕກາຣຓໍ. (ທີ. ນິ. ອຏ຺ຐ. ໑.໔໓໙-໔໔໓);

‘‘ຕສ຺ມາ ໂວຫາຣກຸສລສ຺ສ, ໂລກນາຖສ຺ສ ສຕ຺ຖຸໂນ;

ສມ຺ມຸຕິໍ ໂວຫຣນ຺ຕສ຺ສ, ມຸສາວາໂທ ນ ຊາຍຕີ’’ຕິ.

໗໘໗-໘. ໂຍ ໂສ ອິມໍ ຄນ຺ຖໍ ອຈ຺ຈນ຺ຕໍ ສຕຕມ຺ປິ ຈິນ຺ເຕຕິ, ຕສ຺ສ ຕໂຕ ສິທ຺ຘາ ປຣມາ ປຎ຺ຎາ ເວປຸລ຺ລຠາວໍ ຄຈ຺ຉຕິ. ອຘິໍ ຈິຕ຺ຕສນ຺ຕາປໍ ນີຫຣຕິ ອປເນຕີຕິ ອຘິນີຫຣໍ. ວິມຕິຍາ ວິຈິກິຈ຺ຉາຍ, ໂມຫສ຺ສ ວາ ວິນາສໍ ກໂຣຕິ ອຸປນິສ຺ສຍຠາວໂຕຕິ ວິມຕິວິນາສກຣໍ. ອຕ຺ຖພ຺ຍຎ຺ຊນສມ຺ປທາຍ ມນວຑ຺ຒນໂຕ ປິຍກຣໍ. ວິກສຕີຕິ ທິພ຺ພຕິ. ອິຘາຕິ ອິມສ຺ມິໍ ສາສເນ, ອຠິຘມ຺ເມ ວາ.

ອິຕິ ອຠິຘມ຺ມຕ຺ຖວິກາສິນິຍາ ນາມ

ອຠິຘມ຺ມາວຕາຣສໍວຓ຺ຓນາຍ

ກາຣກປຏິເວຘວຓ຺ຓນາ ນິຏ຺ຐິຕາ.