໓. ຕຕິໂຍ ປຣິຈ຺ເຉໂທ

ເຈຕສິກວິຠາຄນິທ຺ເທສວຓ຺ຓນາ

໘໙. ສພ຺ເພ ເຈຕສິກາ ວຸຕ຺ຕາ, ພຸທ຺ເຘນາທິຈ຺ຈພນ຺ຘຸນາ ເຍ ສພ຺ເພ ເຈຕສິກາ ອາທິຈ຺ຈພນ຺ຘຸນາ ພຸທ຺ເຘນ ວຸຕ຺ຕາ, ເຕ ສພ຺ເພ ເຈຕສິກາ ນາມສາມຎ຺ຎໂຕ ນາມສມານຠາເວນ ທ຺ເວປຎ຺ຎາສຠວນ຺ຕິ ເຕ, ອໂນຕ຺ຕປ຺ປປຣິໂຍສານາ ທ຺ວິປຎ຺ຎາສ ຠວນ຺ຕິ.

໙໐-໙໒. ຈຕຸປຎ຺ຎາສຘາ ກາເມ, ຣູເປ ປຎ຺ຈທເສຣິຕາ ກາເມ ກາມາວຈເຣ ຈຕຸປຎ຺ຎາສ ຈິຕ຺ຕານິ ອີຣິຕາ. ຣູເປ ຣູປາວຈເຣ ປຎ຺ຈທສ ຈິຕ຺ຕານິ ອີຣິຕາ ຠວນ຺ຕິ. ທ຺ວາທສາຣູເປ ອຣູປາວຈເຣ ທ຺ວາທສ ຈິຕ຺ຕານິ ຠວນ຺ຕິ. ຈຕ຺ຕາລີສ ມນາສວາ ໂລກຸຕ຺ຕຣຈິຕ຺ຕານິ ຈຕ຺ຕາລີສ ຠວນ຺ຕິ, ເອກວີສສຕໍ ສພ຺ເພ ຈິຕ຺ຕຸປ຺ປາທາ ສມາສໂຕ ສງ຺ເຂປໂຕ ເອກວີສສຕໍ ໂຫຕິ. ເອເຕສຸ ເຕສມຸປ຺ປຕ຺ຕິໍ ອິໂຕ ປຣໍ ເອເຕສຸ ມຍາ ວຸຕ຺ເຕສຸ ຈິຕ຺ເຕສຸ ເຕສໍ ຜສ຺ສາທີນໍ ຘມ຺ມານໍ ອຸປ຺ປຕ຺ຕິໍ ເອກໍ ເອກໍ ອຸທ຺ຘຣິຕ຺ວາ ຈິຕ຺ຕເຈຕສິເກສຸ ຠິກ຺ຂູນໍ ປາຏວຕ຺ຖາຍ ອຫໍ ປວກ຺ຂາມິ ເທສິສ຺ສາມິ.

໙໓. ເອກຄ຺ຄຕາ ຈິຕ຺ເຕກຄ຺ຄຕາ ມນກ຺ກາໂຣ ມນສິກາໂຣ ຊີວິຕໍ ຜສ຺ສປຎ຺ຈກໍ ເອເຕ ອຏ຺ຐ ເຈຕສິກາ ອວິນິພ຺ໂຠຄາ ອຎ຺ຎມຎ຺ຎໂຕ ອວິຄຕາ ເອກຸປ຺ປາທາ ສມານຸປ຺ປາທາ ສຫກ຺ຂຍາ ສຫວຍາ.

໙໔. ຜສ຺ໂສ ຈ ເວທນາ ສຎ຺ຎາ, ເຈຕນາ ຊີວິຕິນ຺ທ຺ຣິຍໍ ເອກຄ຺ຄຕາ ມນກ຺ກາໂຣ ອິເມ ເຈຕສິກາ ສພ຺ພສາຘາຣຓາ ສພ຺ພຈິຕ຺ເຕຫິ ສາຘາຣຓາ, ສພ຺ພຈິຕ຺ຕານໍ ສາຘາຣຓາ ວາ.

໙໕. ວິຕກ຺ໂກ ປຎ຺ຈປຎ຺ຎາສ-ຈິຕ຺ເຕສຸ ສມຸທີຣິໂຕ. ຈາໂຣ ຉສຏ຺ຐິຈິຕ຺ເຕສຸ ວິຕກ຺ໂກ ຕາວ ທ຺ວິປຎ຺ຈວິຎ຺ຎາຓວຊ຺ຊິຕກາມາວຈເຣສຸ ເຈວ ເອກາທສສຸ ປຐມຊ຺ຌານຈິຕ຺ເຕສຸ ຈາຕິ ປຎ຺ຈປຎ຺ຎາສຈິຕ຺ເຕສຸ ຠຄວຕາ ສມຸທີຣິໂຕ. ວິຈາໂຣ ທ຺ວິປຎ຺ຈວິຎ຺ຎາຓວຊ຺ຊິຕກາມາວຈຣຈິຕ຺ເຕສຸ ເອກາທສສຸ ປຐມຊ຺ຌານຈິຕ຺ເຕສຸ ຈ ເອກາທສສຸ ທຸຕິຍຊ຺ຌານຈິຕ຺ເຕສຸ ຈາຕິ ຉສຏ຺ຐິຈິຕ຺ເຕສຸ ຊາຍຕິ. ເອຕ຺ຖ ເອຕສ຺ມິໍ ວຈເນ ສໍສໂຍ ນຕ຺ຖິ.

໙໖. ເອກປຎ຺ຎາສຈິຕ຺ເຕສຸ, ປີຕິ ເຕສຏ຺ຐິຍາ ສຸຂໍ ປີຕິໂທມນສ຺ສຸເປກ຺ຂາສຫຄຕກາຍວິຎ຺ຎາຓຈຕຸຕ຺ຖຊ຺ຌານວຊ຺ຊິເຕສຸ ເອກປຎ຺ຎາສຈິຕ຺ເຕສຸ ຊາຍຕິ. ສຸຂໍ ໂທມນສ຺ສທຸກ຺ຂຸເປກ຺ຂາສຫຄຕວຊ຺ຊິເຕສຸ ເຕສຏ຺ຐິຈິຕ຺ເຕສຸ ຊາຍຕິ. ອຸເປກ຺ຂາ ໂສມນສ຺ສສຸຂທຸກ຺ຂສຫຄຕວຊ຺ຊິເຕສຸ ປຎ຺ຈປຎ຺ຎາສຈິຕ຺ເຕສຸ ຊາຍຕິ. ທຸກ຺ຂໍ ອກຸສລວິປາກກາຍວິຎ຺ຎາຓປຏິຆສຫຄເຕສຸ ຕີສຸ ຈິຕ຺ເຕສຸ ຊາຍຕິ.

໙໗. ໂຫຕິ ທ຺ວາສຏ຺ຐິຈິຕ຺ເຕສຸ, ໂສມນສ຺ສິນ຺ທ຺ຣິຍໍ ປນ ໂທມນສ຺ສທຸກ຺ຂສຸຂຸເປກ຺ຂາສຫຄຕວຊ຺ຊິເຕສຸ ທ຺ວາສຏ຺ຐິຈິຕ຺ເຕສຸ ຊາຍຕິ. ທຸກ຺ຂິນ຺ທ຺ຣິຍໍ ປເນກສ຺ມິໍ ອກຸສລວິປາເກ ກາຍວິຎ຺ຎາເຓ ຊາຍຕິ. ຕເຖກມ຺ຫິ ສຸຂິນ຺ທ຺ຣິຍໍ ຕຖາ ເອກສ຺ມິໍ ປຸຎ຺ຎປາເກ ກາຍວິຎ຺ຎາເຓ ໂຫຕິ.

໙໘. ປຎ຺ຈຸຕ຺ຕຣສເຕ ຈິຕ຺ເຕ, ວີຣິຍໍ ອາຫ ນາຍໂກ ຊິໂນ ປຎ຺ຈທ຺ວາຣາວຊ຺ຊນທ຺ວິປຎ຺ຈວິຎ຺ຎາຓສມ຺ປຏິຈ຺ຉນສນ຺ຕີຣຓວຊ຺ຊິເຕ ປຎ຺ຈຸຕ຺ຕຣສເຕ ຈິຕ຺ເຕ ວີຣິຍໍ ອາຫ ກເຖສິ. ຈຕຸຕ຺ຕຣສເຕ ຈິຕ຺ເຕ, ສມາຘິນ຺ທ຺ຣິຍມພ຺ຣ຺ວິ ວິຈິກິຈ຺ຉາສຫຄຕທ຺ວິປຎ຺ຈວິຎ຺ຎາຓສມ຺ປຏິຈ຺ຉນສນ຺ຕີຣຓປຎ຺ຈທ຺ວາຣາວຊ຺ຊນວຊ຺ຊິເຕ ຈຕຸຕ຺ຕຣສເຕ ຈິຕ຺ເຕ ສມາຘິນ຺ທ຺ຣິຍໍ ອໂວຈ.

໙໙. ສພ຺ພາເຫຕຸກຈິຕ຺ຕານິ, ຐເປຕ຺ວາ ເຈກເຫຕຸເກ ສພ຺ພານິ ອຏ຺ຐາຣສ ອເຫຕຸກຈິຕ຺ຕານິ ເອກເຫຕຸກຈິຕ຺ຕທ຺ວຍຎ຺ຈ ຐເປຕ຺ວາ ເສສສ຺ມິໍ ເອກຸຕ຺ຕຣສເຕ ຈິຕ຺ເຕ ຉນ຺ທສ຺ສ ອຸປ຺ປຕ຺ຕິໍ ອຸທ຺ທິເສ ປຓ຺ຑິໂຕ ກເຖຍ຺ຍ.

໑໐໐. ຐເປຕ຺ວາ ທສ ວິຎ຺ຎາເຓ ຈກ຺ຂຸວິຎ຺ຎາຓາທິເກ ທສ ວິຎ຺ຎາເຓ ຈ ວິຈິກິຈ຺ຉາຍຸຕມ຺ປິ ຈິຕ຺ຕໍ ຐເປຕ຺ວາ ເສສສ຺ມິໍ ທສຸຕ຺ຕຣສເຕ ຈິຕ຺ເຕ ອຘິໂມກ຺ໂຂ ຠຄວຕາ ອຸທີຣິໂຕ.

໑໐໑-໒. ສທ຺ຘາ ສຕິ ຫິຣີ ໂອຕ຺ຕປ຺ປໍ ອໂລໂຠ ອໂທໂສ ຕຕ຺ຣມຊ຺ຌຕ຺ຕໍ ຉ ຍຸຄຬາ ຈ ອິຕິ ອິເມ ເອກູນວີສຕິ ຘມ຺ມາ ນິຍຕາ ຫຸຕ຺ວາ ເອກນວຸຕິຍາ ຈິຕ຺ເຕ ຊາຍນ຺ຕິ. ເອກູນວີສຕິ ຘມ຺ມາ ອເຫຕຸເກສຸ ອຏ຺ຐາຣສສຸ ອປຸຎ຺ເຎສຸ ທ຺ວາທສສຸ ອກຸສເລສຸ ນ ຊາຍເຣ ນ ຊາຍນ຺ຕິ.

໑໐໓. ເອກູນາສີຕິຍາ ຈິຕ຺ເຕ, ປຎ຺ຎາ ຊາຍຕິ ສພ຺ພທາ ປຎ຺ຎາ ທ຺ວາທສອກຸສລອຏ຺ຐາຣສອເຫຕຸກມຫາກຸສລຎາຓວິປ຺ປຍຸຕ຺ຕມຫາວິປາກຎາຓວິປ຺ປຍຸຕ຺ຕມຫາກິຣິຍາຎາຓວິປ຺ປຍຸຕ຺ຕວຊ຺ຊິເຕ ເອກູນາສີຕິຍາ ຈິຕ຺ເຕ ຊາຍຕິ. ອຏ຺ຐວີສຕິຍາ ຈິຕ຺ເຕ, ກຣຸຓາມຸທິຕາ ສິຍຸໍ ກຣຸຓາມຸທິຕາ ອຏ຺ຐສຸ ມຫາກຸສເລສຸ, ອຏ຺ຐສຸ ມຫາກິຣິຍາສຸ, ຣູປາວຈຣປຎ຺ຈມຊ຺ຌານວຊ຺ຊິເຕສຸ ທ຺ວາທສຣູປາວຈເຣສຸ ຈາຕິ ອຏ຺ຐວີສຕິຍາ ຈິຕ຺ເຕສຸ ສິຍຸໍ ຠເວຍ຺ຍຸໍ.

໑໐໔. ກາມາວຈຣປຸຎ຺ເຎສຸ, ສພ຺ພໂລກຸຕ຺ຕເຣສຸ ຈ ກາມາວຈຣມຫາກຸສເລສຸ ຈິຕ຺ເຕສຸ ສພ຺ເພສຸ ໂລກຸຕ຺ຕເຣສຸ ຈາຕິ ສຫ ອຏ຺ຐເກ ຈຕ຺ຕາລີສວິເຘ ຈິຕ຺ເຕ ວິຣຕິຕ຺ຕຍໍ ໂຫຕິ.

໑໐໕. ສທ຺ຘາ ສຕິ ຫິໂຣຕ຺ຕປ຺ປໍ ອໂລຠາທິຕ຺ຕຍມ຺ປິ ຈ ຍຸຄຬານິ ຉ ຈ ມຊ຺ຌຕ຺ຕໍ ກຣຸຓາມຸທິຕາປິ ຈ.

໑໐໖. ຕຖາ ຕິສ຺ໂສ ວິຣຕິໂຍ ສພ຺ເພ ເຕ ປຎ຺ຈວີສຕິ ຘມ຺ມາ ມຫາກຸສລຈິຕ຺ຕສມ຺ປຍຸຕ຺ຕອພ຺ຍາກຕຈິຕ຺ຕສມ຺ປຍຸຕ຺ຕາຕິ ກຸສເລນ ສພ຺ເພສຸເຍວ ຘມ຺ເມສຸ ເຉເກນ ວິຊິຕງ຺ຄເຓນ ປກາສິຕາ.

໑໐໗. ອຫິຣີກໍ ອໂນຕ຺ຕປ຺ປໍ, ໂມໂຫ ອຸທ຺ຘຈ຺ຈເມວ ຈາຕິ ອິເມ ຈຕ຺ຕາໂຣ ຘມ຺ມາ ນິຍຕາ ຫຸຕ຺ວາ ທ຺ວາທສາປຸຎ຺ຎຈິຕ຺ເຕສຸເຍວ ທ຺ວາທສອກຸສລຈິຕ຺ເຕສຸເຍວ ຊາຍເຣ ຊາຍນ຺ຕິ.

໑໐໘-໙. ໂລໂຠ ໂທໂສ ຈ ໂມໂຫ ຈ, ມາໂນ ທິຏ຺ຐິ ຈ ສໍສໂຍ ວິຈິກິຈ຺ຉາ ມິທ຺ຘໍ ອຸທ຺ຘຈ຺ຈໍ ກຸກ຺ກຸຈ຺ຈໍ ຖິນໍ ມຈ຺ຉຣິຍມ຺ປິ ຈ ອຫິຣິກໍ ອໂນຕ຺ຕປ຺ປໍ ອິສ຺ສາ ຈ ໂທມນສ຺ສກໍ ເອເຕ ຘມ຺ມາ ອກຸສລາ ອກຸສລຈິຕ຺ຕສມ຺ປຍຸຕ຺ຕາ ເອກນ຺ເຕນ ມເຫສິນາ ວິຊິຕງ຺ຄຓວິຄຕມເລນ ວຸຕ຺ຕາ.

໑໑໐. ໂລໂຠ ອຏ຺ຐສຸ ໂລຠມູເລສຸ ຈິຕ຺ເຕສຸ ຠຄວຕາ ນິທ຺ທິຏ຺ໂຐ ທສ຺ສິໂຕ. ທິຏ຺ຐິ ຈຕູສຸ ທິຏ຺ຐິສມ຺ປຍຸຕ຺ເຕສຸ ຈິຕ຺ເຕສຸ ວຸຕ຺ຕາ. ມາໂນ ທິຏ຺ຐິວິປ຺ປຍຸຕ຺ເຕສຸ ຈຕູສຸ ຄາຫູປວາທປ຺ປຠິນ຺ທເນນ ວຸຕ຺ໂຕ. ໂທໂສ ທ຺ວີສຸ ເອວ ປຏິຆສມ຺ປຍຸຕ຺ເຕສຸ ຈິຕ຺ເຕສຸ ມຸນິນ຺ເທນ ວຸຕ຺ໂຕ.

໑໑໑. ອິສ຺ສາມຈ຺ເຉຣກຸກ຺ກຸຈ຺ຈາ ທ຺ວີສຸ ໂທສມູເລສຸ ຈິຕ຺ເຕສຸ ຊາຍນ຺ຕິ, ໂນ ສຫ ສຫ ໂນ ຊາຍນ຺ຕິ, ເອເກໂກວ ຊາຍນ຺ຕີຕິ ອຕ຺ໂຖ. ວິຈິກິຈ຺ຉາ ປເນກສ຺ມິໍ ວິຈິກິຈ຺ຉາ ປນ ເອກສ຺ມິໍ ວິຈິກິຈ຺ຉາສຫຄຕຈິຕ຺ເຕ ຊາຍຕິ. ຖິນມິທ຺ຘໍ ປຎ຺ຈສຸ ສສງ຺ຂາຣິກອກຸສລຈິຕ຺ເຕສຸ ຊາຍຕິ.

໑໑໒-໓. ຜສ຺ໂສ ຈ ເວທນາ ສຎ຺ຎາ, ເຈຕນາ ຊີວິຕໍ ມໂນ ວິຕກ຺ໂກ ຈ ວິຈາໂຣ ຈ ປີຕິ ວີຣິຍໍ ສມາຘິ ຈ ຉນ຺ໂທ ເຈວາຘິໂມກ຺ໂຂ ຈ ມນສິກາໂຣ ຈ ຈຸທ຺ທສ ຘມ຺ມາ ກຸສລາ ຈ ກຸສລເຈຕສິກາ ຈ ໂຫນ຺ຕິ. ອກຸສລາ ເຈວ ອກຸສລເຈຕສິກາ ເຈວ ອພ຺ຍາກຕາປິ ຈ ອພ຺ຍາກຕເຈຕສິກາ ຈ ໂຫນ຺ຕິ.

໑໑໔. ເອກູນຕິໍສຈິຕ຺ເຕສຸ, ຌານໍ ປຎ຺ຈງ຺ຄິກໍ ມຕໍ ຈຕູສຸ ໂສມນສ຺ສສຫຄຕາກຸສເລສຸ, ທ຺ວາທສສຸ ໂສມນສ຺ສສຫຄຕມຫາກຸສລມຫາວິປາກມຫາກິຣິຍຈິຕ຺ເຕສຸ, ສຸຂສນ຺ຕີຣຓຫສິຕຸປ຺ປາທຈິຕ຺ເຕສຸ, ຕີສຸ ຣູປປຐມຊ຺ຌານຈິຕ຺ເຕສຸ, ອຏ຺ຐສຸ ໂລກຸຕ຺ຕຣປຐມຊ຺ຌານຈິຕ຺ເຕສຸ ຈາຕິ ເອກູນຕິໍສຈິຕ຺ເຕສຸ ປຎ຺ຈງ຺ຄິກໍ ປຎ຺ຈາວຍວຌານຍຸຕ຺ຕໍ ຌານໍ ສຸຄເຕນ ມຕໍ. ອຸເປກ຺ຂາສຫຄຕານິ ຈຕ຺ຕາຣິ ໂລຠມູລານິ ຈ ທ຺ເວ ໂທສມູລານິ ຈ ທ຺ເວ ໂມຫມູລານິ ຈ ມໂນຘາຕຸຕ຺ຕິກຎ຺ຈ ອຸເປກ຺ຂາສຫຄຕາ ຕິສ຺ໂສ ອເຫຕຸກມໂນວິຎ຺ຎາຓຘາຕຸໂຍ ຈ ທ຺ວາທສຸເປກ຺ຂາສຫຄຕານິ ມຫາກຸສລມຫາວິປາກກິຣິຍຈິຕ຺ຕານິ ຕີຓິ ຣູປທຸຕິຍຊ຺ຌານຈິຕ຺ຕານິ ອຏ຺ຐ ໂລກຸຕ຺ຕຣທຸຕິຍຊ຺ຌານຈິຕ຺ຕານິ ຈາຕິ ສຕ຺ຕຕິໍສ ຈິຕ຺ຕານິ ຈຕຸຌານງ຺ຄຍຸຕ຺ຕານິ ຈຕຸຌານາວຍວຍຸຕ຺ຕານິ ອິຕິ ເອວໍ ນິທ຺ທິເສ ກເຖຍ຺ຍ.

໑໑໕. ເອກາທສວິຘໍ ຈິຕ຺ຕໍ, ຕິວງ຺ຄິກມຸທີຣິຕໍ ຕີຓິ ຣູປາວຈຣຕຕິຍຊ຺ຌານຈິຕ຺ຕານິ, ອຏ຺ຐໂລກຸຕ຺ຕຣຕຕິຍຊ຺ຌານຈິຕ຺ຕານິ ຈາຕິ ເອກາທສວິຘໍ ຈິຕ຺ຕໍ ຕິວງ຺ຄິກໍ ຕິອວຍວຌານຍຸຕ຺ຕໍ, ຉ ຣູປາວຈຣຈຕຸຕ຺ຖຊ຺ຌານປຎ຺ຈມຊ຺ຌານຈິຕ຺ຕານິ, ທ຺ວາທສາຣູປາວຈຣຈິຕ຺ຕານິ, ໂສຬສ ໂລກຸຕ຺ຕຣຈຕຸຕ຺ຖຊ຺ຌານປຎ຺ຈມຊ຺ຌານຈິຕ຺ຕານິ ຈາຕິ ຈຕຸຕິໍສວິຘໍ ຈິຕ຺ຕໍ ທຸວງ຺ຄິກໍ ທ຺ວິອວຍວຌານຍຸຕ຺ຕໍ ອຸທີຣິຕໍ ຊິເນນ ອີຣິຕໍ.

໑໑໖. ສຠາເວນາວິຕກ຺ເກສຸ, ຌານງ຺ຄານິ ນ ອຸທ຺ຘເຣ ສຠາເວນ ປກຕິຍາ ອວິຕກ຺ເກສຸ ວິຕກ຺ກວິຣຫິເຕສຸ ທ຺ວິປຎ຺ຈວິຎ຺ຎາເຓສຸ ຌານງ຺ຄານິ ຌານາວຍວານິ ຊິໂນ ນ ອຸທ຺ຘເຣ. ອຍເມຕ຺ຖາຘິປ຺ປາໂຍ – ອຎ຺ຎຕ຺ຖ ວິຕກ຺ໂກ ຌານຈິຕ຺ເຕນ ວິປ຺ປຫີໂນ ຠາສິໂຕ, ອິເມສຸ ປນ ເນວ ຌານຈິຕ຺ເຕນ ປຫີນາ, ປກຕິຍາ ວິຕກ຺ກວິຣຫິຕານິ ທ຺ວິປຎ຺ຈວິຎ຺ຎາຓານິ ສພ຺ພາເຫຕຸກຈິຕ຺ເຕສຸ ມຄ຺ຄງ຺ຄານິ ມຄ຺ຄາວຍວານິ ຊິໂນ ນ ອຸທ຺ຘເຣ ນ ເທເສຍ຺ຍ.

໑໑໗. ພຸໂຘ ຊິໂນ ທ຺ວິປຎ຺ຈວິຎ຺ຎາເຓສຸ ມໂນຘາຕຸຕ຺ຕິເກ ຈ ຕີສຸ ສນ຺ຕີຣເຓສຸ ຈາຕິ ໂສຬສຈິຕ຺ເຕສຸ ຕີຓິນ຺ທ຺ຣິຍານິ ວເທ ກເຖຍ຺ຍ. ເອກສ຺ມິໍ ປນ ຈຕ຺ຕາຣິ ເອກສ຺ມິໍ ວິຈິກິຈ຺ຉາສຫຄຕຈິຕ຺ເຕ ຈຕ຺ຕາຣິ ອິນ຺ທ຺ຣິຍານິ ໂຫນ຺ຕິ, ເອກາທສສຸ ອກຸສລຈິຕ຺ເຕສຸ ວິຈິກິຈ຺ຉາຍຸຕ຺ຕຈິຕ຺ຕວຊ຺ຊິເຕສຸ ຫສິຕຸປ຺ປາເທ ເຈວ ໂວຏ຺ຐພ຺ພນຈິຕ຺ເຕ ຈາຕິ ເຕຣສສຸ ຈິຕ຺ເຕສຸ ປຎ຺ຈ ອິນ຺ທ຺ຣິຍານິ ພຸໂຘ ຠຄວາ ອຸທ຺ຘເຣ ອຸທ຺ຘເຣຍ຺ຍ.

໑໑໘. ສຕ຺ຕ ທ຺ວາທສຈິຕ຺ເຕສຸ, ອິນ຺ທ຺ຣິຍານິ ຊິໂນພ຺ຣ຺ວິ ຊິໂນ ພຸທ຺ໂຘ ຎາຓວິປ຺ປຍຸຕ຺ຕມຫາກຸສລມຫາວິປາກມຫາກິຣິຍາສງ຺ຂາເຕສຸ ທ຺ວາທສຈິຕ຺ເຕສຸ ສຕ຺ຕ ອິນ຺ທ຺ຣິຍານິ ອພ຺ຣ຺ວິ ກເຖສິ, ເອເກນູເນສຸ ອຏ຺ເຐວ, ຈຕ຺ຕາລີສມເນສຸ ຈ ຊິໂນ ຎາຓສມ຺ປຍຸຕ຺ຕມຫາກຸສລມຫາວິປາກມຫາກິຣິຍາສງ຺ຂາເຕສຸ ທ຺ວາທສສຸ ຈິຕ຺ເຕສຸ, ປຎ຺ຈທສສຸ ຣູເປສຸ, ທ຺ວາທສສຸ ອຣູເປສຸ ຈາຕິ ເອເກນູເນສຸ ຈຕ຺ຕາລີສມເນສຸ ອຏ຺ເຐວ ອິນ຺ທ຺ຣິຍານິ ອພ຺ຣ຺ວິ.

໑໑໙. ຈຕ຺ຕາລີສາຍ ໂລກຸຕ຺ຕຣຈິຕ຺ເຕສຸ ນວກໍ ອິນ຺ທ຺ຣິຍນວກໍ ນາຍໂກ ອພ຺ຣ຺ວິ ກເຖສິ. ເອວໍ ອິນ຺ທ຺ຣິຍໂຍໂຄປິ, ເວທິຕພ຺ໂພ ວິຠາວິນາ ເອວໍ ອິມິນາ ມຍາ ວຸຕ຺ຕປ຺ປກາເຣນ ຈິຕ຺ເຕສຸ ອິນ຺ທ຺ຣິຍໂຍໂຄ ວິຠາວິນາ ວິເສເສນ ປຎ຺ຎໍ ຠາເວຕຸໍ ປກາເສຕຸໍ ສີລເມຕສ຺ສາຕິ ວິຠາວີ, ເຕນ ເວທິຕພ຺ໂພ.

໑໒໐. ອມຄ຺ຄງ຺ຄານິ ນາເມຕ຺ຖ, ອຏ຺ຐາຣສ ອເຫຕຸກາ ເອຕ຺ຖ ເອເຕສຸ ຈິຕ຺ເຕສຸ ອຏ຺ຐາຣສ ອເຫຕຸກາ ນຕ຺ຖິ ມຄ຺ໂຄ ເອເຕສູຕິ ອມຄ຺ຄງ຺ຄານິ ນາມ, ຌານງ຺ຄານິ ນ ວິຊ຺ຊນ຺ຕິ, ວິຎ຺ຎາເຓສຸ ທ຺ວິປຎ຺ຈສຸ ທ຺ວິປຎ຺ຈວິຎ຺ຎາເຓສຸ ຌານງ຺ຄານິປິ ນ ສໍວິຊ຺ຊນ຺ຕິ.

໑໒໑. ເອກໍ ຈິຕ຺ຕໍ ທຸມຄ຺ຄງ຺ຄໍ ເອກໍ ວິຈິກິຈ຺ຉາສຫຄຕຈິຕ຺ຕໍ ທຸມຄ຺ຄງ຺ຄໍ ທຸມຄ຺ຄາວຍວໍ, ຈຕູສຸ ທິຏ຺ຐິວິປ຺ປຍຸຕ຺ຕາກຸສລຈິຕ຺ເຕສຸ ຈ ທ຺ວີສຸ ປຏິຆຍຸຕ຺ເຕສຸ ຈ ອຸທ຺ຘຈ຺ຈຍຸຕ຺ເຕສຸ ຈາຕິ ສຕ຺ຕສຸ ຈິຕ຺ເຕສຸ ຈ ຕິມຄ຺ຄງ຺ຄານິ ຕິມຄ຺ຄາວຍວານິ ໂຫນ຺ຕິ. ຈຕ຺ຕາລີສາຍຈິຕ຺ເຕສຸ, ມຄ຺ໂຄ ໂສ ຈຕຸຣງ຺ຄິໂກ ຈຕູສຸ ທິຏ຺ຐິສມ຺ປຍຸຕ຺ຕາກຸສເລສຸ ຎາຓວິປ຺ປຍຸຕ຺ຕມຫາກຸສລມຫາວິປາກມຫາກິຣິຍາສງ຺ຂາເຕສຸ ທ຺ວາທສສຸ ຈິຕ຺ເຕສຸ ຈ ຣູປາວຈຣທຸຕິຍຕຕິຍຈຕຸຕ຺ຖປຎ຺ຈມຊ຺ຌານສງ຺ຂາເຕສຸ ທ຺ວາທສສຸ ຣູປາວຈເຣສຸ, ທ຺ວາທສສຸ ອຣູປາວຈເຣສຸ ຈາຕິ ຈຕ຺ຕາລີສາຍ ຈິຕ຺ເຕສຸ ຈຕຸຣງ຺ຄິໂກ ມຄ຺ໂຄ ຈຕຸຣາວຍໂວ ມຄ຺ໂຄ ໂຫຕິ.

໑໒໒. ປຎ຺ຈທ຺ທສສຸ ຈິຕ຺ເຕສຸ, ມຄ຺ໂຄ ປຎ຺ຈງ຺ຄິໂກ ມໂຕ ຎາຓສມ຺ປຍຸຕ຺ຕມຫາກຸສລມຫາວິປາກມຫາກິຣິຍາສງ຺ຂາເຕສຸ ທ຺ວາທສສຸ, ຕີສຸ ຣູປປຐມຊ຺ຌານຈິຕ຺ເຕສຸ ຈາຕິ ປຎ຺ຈທ຺ທສສຸ ຈິຕ຺ເຕສຸ ປຎ຺ຈງ຺ຄິໂກ ປຎ຺ຈາວຍໂວ ມຄ຺ໂຄ ຠຄວຕາ ມໂຕ. ທ຺ວຕ຺ຕິໍສຈິຕ຺ເຕສຸ ມຄ຺ໂຄ ສຕ຺ຕງ຺ຄິໂກປິ ຈ ໂລກຸຕ຺ຕຣທຸຕິຍຕຕິຍຈຕຸຕ຺ຖປຎ຺ຈມຊ຺ຌານສງ຺ຂາເຕສຸ ທ຺ວຕ຺ຕິໍສຈິຕ຺ເຕສຸ ມຄ຺ໂຄ ສຕ຺ຕງ຺ຄິໂກ ສຕ຺ຕາວຍໂວ ໂຫຕິ.

໑໒໓. ມຄ຺ໂຄ ອຏ຺ຐສຸ ຈິຕ຺ເຕສຸ ມຄ຺ຄຜລວເສນ ອຏ຺ຐສຸ ໂລກຸຕ຺ຕຣຈິຕ຺ເຕສຸ ມຄ຺ໂຄ ອຏ຺ຐງ຺ຄິໂກ ອຏ຺ຐາວຍໂວ ໂຫຕິ. ອິຕິ ປຣິສມາປເນ. ຕຸ ປທປູຣເຓ. ເອວໍ ອິມິນາ ມຍາ ວຸຕ຺ຕປ຺ປກາເຣນ ສພ຺ພຈິຕ຺ເຕສຸ ມຄ຺ຄງ຺ຄານິ ມຄ຺ຄາວຍວານິ ຘີໂຣ ອຸທ຺ຘເຣຍ຺ຍ, ເທເສຍ຺ຍາຕິ ອຕ຺ໂຖ.

໑໒໔. ພລານິ ທ຺ເວ ທ຺ວິຈິຕ຺ເຕສຸ ຫສິຕຸປ຺ປາທໂວຏ຺ຐພ຺ພນສງ຺ຂາເຕສຸ ທ຺ວີສຸ ຈິຕ຺ເຕສຸ ທ຺ເວ ພລານິ ໂຫນ຺ຕິ. ເອກສ຺ມິໍ ຕີຓິ ທີປເຍ ເອກສ຺ມິໍ ວິຈິກິຈ຺ຉາຍຸຕ຺ເຕ ຕີຓິ ພລານິ ຘີໂຣ ທີປເຍ ປກາເສຍ຺ຍ. ວິຈິກິຈ຺ຉາຍຸຕ຺ຕໂຕ ເສເສສຸ ເອກາທສສຸ ອກຸສເລສຸ ຈຕ຺ຕາຣິ ພລານິ ໂຫນ຺ຕິ. ຉ ທ຺ວາທສສຸ ຎາຓວິປ຺ປຍຸຕ຺ຕມຫາກຸສລມຫາວິປາກມຫາກິຣິຍາສງ຺ຂາເຕສຸ ທ຺ວາທສສຸ ຈິຕ຺ເຕສຸ ຉ ພລານິ ໂຫນ຺ຕີຕິ ຘີໂຣ ນິທ຺ທິເສ ກເຖຍ຺ຍ.

໑໒໕. ເອກູນາສີຕິຍາ ສຕ຺ຕ ຎາຓສມ຺ປຍຸຕ຺ຕມຫາກຸສລມຫາວິປາກມຫາກິຣິຍາສງ຺ຂາເຕສຸ ທ຺ວາທສສຸ ກາມາວຈຣຈິຕ຺ເຕສຸ, ສຕ຺ຕວີສຕິຍາ ມຫຄ຺ຄຕຈິຕ຺ເຕສຸ, ຈຕ຺ຕາລີສໂລກຸຕ຺ຕຣຈິຕ຺ເຕສຸ ຈາຕິ ເອກູນາສີຕິຍາ ຈິຕ຺ເຕສຸ ສຕ຺ຕ ພລານິ ໂຫນ຺ຕິ. ໂສຬເສວາພລານິ ຕຸ ທ຺ວິປຎ຺ຈວິຎ຺ຎາຓານິ ຈ ຕິສ຺ໂສ ມໂນຘາຕຸໂຍ ຈ ຕີຓິ ສນ຺ຕີຣຓານິ ຈາຕິ ໂສຬສ ເອວ ຈິຕ຺ຕານິ ອພລານິ ພລວິຣຫິຕານິ ໂຫນ຺ຕິ, ເອວໍ ອິມິນາ ມຍາ ວຸຕ຺ຕປ຺ປກາເຣນ ຈິຕ຺ຕໍ ສພລໍ ພເລນ ສຫຄຕໍ ອພລມ຺ປິ ຈ ພລວິຣຫິຕຎ຺ຈາປິ ຈິຕ຺ຕໍ ວິຎ຺ເຎຍ຺ຍໍ ຘີເຣນ ວິຊານິຕພ຺ພໍ.

໑໒໖. ຌານງ຺ຄມຄ຺ຄງ຺ຄພລິນ຺ທ຺ຣິຍານິ, ຈິຕ຺ເຕສຸ ຊາຍນ຺ຕິ ຫິ ເຍສຸ ຍານິ ເຍສຸ ຈິຕ຺ເຕສຸ ຍານິ ຌານງ຺ຄມຄ຺ຄງ຺ຄພລອິນ຺ທ຺ຣິຍານິ ຊາຍນ຺ຕິ, ມຍາ ສມາເສນ ສມຸທ຺ຘຣິຕ຺ວາ ອສໍສຏ຺ຐໍ ອຸທ຺ຘຣິຕ຺ວາ ເຕສຸ ຈິຕ຺ເຕສຸ ສພ຺ພານິປິ ຕານິ ຌານງ຺ຄມຄ຺ຄງ຺ຄພລອິນ຺ທ຺ຣິຍານິ ສມາເສນ ສງ຺ເຂເປນ ມຍາ ພຸທ຺ຘທຕ຺ຕາຈຣິເຍນ ວຸຕ຺ຕານິ ກຖິຕານິ.

ອິຕິ ອຠິຘມ຺ມາວຕາຣຏີກາຍ

ເຈຕສິກວິຠາຄນິທ຺ເທສວຓ຺ຓນາ ນິຏ຺ຐິຕາ.

ຕຕິໂຍ ປຣິຈ຺ເຉໂທ.