໔. ຈຕຸຕ຺ໂຖ ປຣິຈ຺ເຉໂທ

ເອກວິຘາທິນິທ຺ເທສວຓ຺ຓນາ

໑໒໗. ອິໂຕ ປຣໍ ປວກ຺ຂາມິ, ນຍເມກວິຘາທິກໍ;

ອາຠິຘມ຺ມິກຠິກ຺ຂູນໍ, ພຸທ຺ຘິຍາ ປນ ວຸທ຺ຘິຍາ.

ອຫໍ ອິໂຕ ປຣໍ ອິໂຕ ປຣິຈ຺ເຉທໂຕ ປຣໍ ເອກວິຘາທິກໍ ນຍໍ ອາຠິຘມ຺ມິກຠິກ຺ຂູນໍ ພຸທ຺ຘິຍາ ວຸທ຺ຘິຕ຺ຖາຍ ປວກ຺ຂາມິ ເທເສສ຺ສາມິ.

໑໒໘. ສພ຺ພເມກວິຘໍ ຈິຕ຺ຕໍ, ວິຊານນສຠາວໂຕ ສພ຺ພໍ ຈິຕ຺ຕໍ ວິຊານນສຠາວໂຕ ເອກວິຘໍ, ທຸວິຘຎ຺ຈ ຠເວ ຈິຕ຺ຕໍ ອເຫຕຸກສເຫຕຸກໂຕ ອິທໍ ຈິຕ຺ຕໍ ທຸວິຘໍ ຠເວຍ຺ຍ.

໑໒໙. ປຸຎ຺ຎາປຸຎ຺ຎວິປາກາ ຫິ, ກາເມ ທສ ຈ ປຎ຺ຈ ຈ ຫິ ສຈ຺ຈໍ ກາເມ ກາມາວຈເຣ ກຸສລາກຸສລວິປາກາ ທສ ປຎ຺ຈ ຈ ກິຣິຍາ ຕິສ຺ໂສ ອິຕິ ສພ຺ເພ ອຏ຺ຐາຣສ ຈິຕ຺ຕຸປ຺ປາທາ ອເຫຕຸກາ.

໑໓໐. ອເຫຕຸກໂຕ ຈິຕ຺ຕຸປ຺ປາທໂຕ ເສສາ ເອກສຕ຺ຕຕິ ຈິຕ຺ຕຸປ຺ປາທາ ສເຫຕຸກາຕິ ສເຫຕຸກາ ນາມາຕິ ມເຫສິນາ ຕາທິນາ ອວິປຣີຕສຠາເວນ ເຫຕຸວາທິນາ ປຈ຺ຈຍວາທິນາ ນິທ຺ທິຏ຺ຐາ.

໑໓໑. ສວຕ຺ຖຸກາວຕ຺ຖຸກໂຕ ສວຕ຺ຖຸກອວຕ຺ຖຸກວເສນ ຕຖາ ອຸຠຍວເສນ ສວຕ຺ຖຸກວເສນ, ອວຕ຺ຖຸກວເສນ ຈ ສພ຺ພໍ ວຸຕ຺ຕປ຺ປກາເຣນ ຈ ມານສໍ ຕິວິຘໍ ໂຫຕິ.

໑໓໒-໔. ສພ຺ໂພ ກາມວິປາໂກ ຈ, ຣູເປ ປຎ຺ຈທສາປິ ຈ ຈິຕ຺ຕຸປ຺ປາທາ ອາທິມຄ຺ໂຄ ປຐມມຄ຺ໂຄ ຫສິຕຸປ຺ປາໂທ ມໂນຘາຕຸກິຣິຍາປິ ຈ ໂທມນສ຺ສທ຺ວຍຎ຺ຈາປິ ເຕຈຕ຺ຕາລີສ ມານສາ ວິນາ ວຕ຺ຖຸໍ ວຕ຺ຖຸໍ ວຊ຺ເຊຕ຺ວາ ນ ອຸປ຺ປຊ຺ຊນ຺ຕິ, ເອກນ຺ເຕນ ສວຕ຺ຖຸກາ ນາມ. ອຣູປາວຈຣວິປາກາ ຈ ເອກນ຺ເຕນ ອວຕ຺ຖຸກາ, ມຍາ ວຸຕ຺ຕໂຕ ຈິຕ຺ຕຸປ຺ປາທໂຕ ເສສານິ ທ຺ເວຈຕ຺ຕາລີສ ຈິຕ຺ຕານິ ອຸຠຍຖາ ສວຕ຺ຖຸກາວຕ຺ຖຸກວເສນ ສິຍຸໍ.

໑໓໕. ເອເກກາຣມ຺ມຓໍ ຈິຕ຺ຕໍ, ປຎ຺ຈາຣມ຺ມຓເມວ ຈ ຈິຕ຺ຕໍ ຉຬາຣມ຺ມຓກຎ຺ເຈຕິ ເອວໍ ອິມິນາ ມຍາ ວຸຕ຺ຕປ຺ປກາເຣນາປິ ຕິວິຘໍ ຈິຕ຺ຕໍ ສິຍາ.

໑໓໖-໘. ວິຎ຺ຎາຓານິ ຈ ທ຺ເວ ປຎ຺ຈ, ອຏ຺ຐ ໂລກຸຕ຺ຕຣານິ ຈ ອຠິຎ຺ຎາມານສໍ ຐເປຕ຺ວາ ສພ຺ພໍ ມຫຄ຺ຄຕຎ຺ເຈວາຕິ ເຕຈຕ຺ຕາລີສ ຈິຕ຺ຕຸປ຺ປາທາ ປນ ເອເກກາຣມ຺ມຓາ ວິຎ຺ເຎຍ຺ຍາ ຘີເຣນ. ຕຕ຺ຖ ຈິຕ຺ເຕ ມໂນຘາຕຸຕ຺ຕຍໍ ປຎ຺ຈາຣມ຺ມຓໍ ອີຣິຕໍ ຠຄວຕາ. ມຍາ ວຸຕ຺ຕຈິຕ຺ຕໂຕ ເສສານິ ເຕຈຕ຺ຕາລີສ ຈິຕ຺ຕານິ ຉຬາຣມ຺ມຓິການິ ມຕານິ ສຕ຺ຖຸນາ, ຕຖາ ເອວໍ ຈິຕ຺ຕໍ ກຸສລາກຸສລາທິໂຕ ຕິວິຘໍ. ອາທິ-ສທ຺ເທນ ອພ຺ຍາກຕໍ ຄເຫຕພ຺ພໍ.

໑໓໙. ອເຫຕຸກໍ ຈິຕ຺ຕໍ ເອກເຫຕຸກຎ຺ຈ ຈິຕ຺ຕໍ ທ຺ວິເຫຕຸກຎ຺ຈ ຈິຕ຺ຕໍ ຕິເຫຕຸກຎ຺ຈ ຈິຕ຺ຕນ຺ຕິ ເອວໍ ອິມິນາ ປກາເຣນ ຈິຕ຺ຕໍ ຈຕຸພ຺ພິຘໍ ວິຠາວິນາ ວິຎ຺ຎາຕພ຺ພໍ.

໑໔໐-໒. ເຫຏ຺ຐາ ມຍາປິ ນິທ຺ທິຏ຺ຐາ ອຏ຺ຐາຣສ ຈິຕ຺ຕຸປ຺ປາທາ ອເຫຕຸກາ, ວິຈິກິຈ຺ຉຸທ຺ຘຈ຺ຈສໍຍຸຕ຺ຕໍ ຈິຕ຺ຕໍ ເອກເຫຕຸກໍ ເອວໍ ອຸທີຣິຕໍ ຠຄວຕາ. ກາເມ ກາມາວຈເຣ ປຸຎ຺ຎວິປາກກ຺ຣິຍໂຕ ກຸສລວເສນ ຈ ວິປາກວເສນ ຈ ກິຣິຍາວເສນ ຈ ທ຺ວາທສຘາ ຈິຕ຺ຕຸປ຺ປາທາ ອກຸສລາ ຈ ທສຘາ ຈາຕິ ພາວີສຕິ ຈິຕ຺ຕຸປ຺ປາທາ ທຸເຫຕຸກາ. ກາເມ ກາມາວຈເຣ ປຸຎ຺ຎວິປາກກ຺ຣິຍໂຕ ປຸຎ຺ຎວເສນ ຈ ວິປາກວເສນ ຈ ກິຣິຍາວເສນ ຈ ທ຺ວາທສຘາ ຈິຕ຺ຕຸປ຺ປາທາ. ສພ຺ພໍ ມຫຄ຺ຄຕຎ຺ເຈວ ອປ຺ປມາຓໍ ໂລກຸຕ຺ຕຣຈິຕ຺ຕຎ຺ຈ ຕິເຫຕຸກໍ.

໑໔໓-໕໐. ຣູປີຣິຍາປຖວິຎ຺ຎຕ຺ຕິ-ຊນກາຊນກາທິໂຕຕິ ຣູປອິຣິຍາປຖວິຎ຺ຎຕ຺ຕິຊນກວເສນ ຣູປອິຣິຍາປຖຊນກວເສນ ຈ ຣູປຊນກວເສນ ຈ ຕິກິຈ຺ຈາຊນກວເສນ ຈາຕິອາທີຫິ ປກາເຣຫິ ສພ຺ພໍ ຈິຕ຺ຕໍ ຈຕຸພ຺ພິຘໍ ໂຫຕິ. ຕຕ຺ຖ ຕສ຺ມິໍ ຈິຕ຺ເຕ ທ຺ວາທສາກຸສລາ, ກາມຘາຕຸຍາ ກຸສລາ, ຕຖາ ກາເມ ທສ ກິຣິຍາ, ອຠິຎ຺ຎາມານສໍ ທ຺ວຍໍ, ອິເມ ພາຕ຺ຕິໍສ ມານສາ ຣູປານິ ສມຸຏ຺ຐາເປນ຺ຕິ, ອິຣິຍາປຖໍ ກປ຺ເປນ຺ຕິ, ວິຎ຺ຎຕ຺ຕິໍ ຊນຍນ຺ຕິ. ກຸສລາ ມຫຄ຺ຄຕມານສາ ກິຣິຍາ ຈ ມຫຄ຺ຄຕມານສາ, ອຏ຺ຐ ອນາສວຈິຕ຺ຕານິ, ຉພ຺ພີສຕິ ຈ ມານສາ ຣູປານິ ສມຸຏ຺ຐາເປນ຺ຕິ, ອິຣິຍາປຖໍ ກປ຺ເປນ຺ຕິ. ໂຈປນໍ ນ ປາເປນ຺ຕິ ວິຎ຺ຎຕ຺ຕິໍ ນ ຊນຍນ຺ຕີຕິ ອຕ຺ໂຖ. ອິເມ ຈິຕ຺ຕຸປ຺ປາທາ ທຸກິຈ຺ຈນິຍຕາ, ທສ ວິຎ຺ຎາເຓ ຐເປຕ຺ວາ ທ຺ວີສຸ ຠູມີສຸ ວິປາກາ ມໂນຘາຕຸທ຺ວຍສນ຺ຕີຣຓຕ຺ຕຍມຫາວິປາກຣູປວິປາການໍ ວເສນ ອຏ຺ຐາຣສ ປາກາ ມໂນຘາຕຸ ກິຣິຍາ ເຈວາຕິ ອິມານິ ເອກູນວີສຕິ ຈິຕ຺ຕານິ ຣູປານິ ສມຸຏ຺ຐາເປນ຺ຕິ, ອິຕຣທ຺ວຍໍ ນ ກໂຣນ຺ຕິ, ປຸນ ທ຺ເວປຎ຺ຈວິຎ຺ຎາຓາ ປຐມໍ ‘‘ທສ ວິຎ຺ຎາເຓ’’ຕິ ວຸຕ຺ຕຕ຺ຕາ ‘‘ປຸນາ’’ຕິ ວຸຕ຺ຕາ. ອຣູປີສຸ ວິປາກາ ຈ ສພ຺ເພສໍ ສຕ຺ຕານໍ ປຏິສນ຺ຘິຈິຕ຺ຕຎ຺ຈ ອຣຫໂຕ ຈຸຕິຈິຕ຺ຕຎ຺ຈ ອິເມ ໂສຬສ ມານສາ ຕິກິຈ຺ຈານິ ນ ກໂຣນ຺ຕິ.

໑໕໑. ເອກທ຺ວິຕິຈຕຸຏ຺ຐານ-ປຎ຺ຈຏ຺ຐານປ຺ປເຠທໂຕ ເອກກິຈ຺ຈທ຺ວິກິຈ຺ຈຕິກິຈ຺ຈຈຕຸກິຈ຺ຈປຎ຺ຈກິຈ຺ຈເຠເທນ ປຎ຺ຈຘາ ຈິຕ຺ຕໍ ປຎ຺ຈປກາຣໍ ຈິຕ຺ຕໍ ປຎ຺ຈນິມ຺ມລໂລຈໂນ ພຸທ຺ໂຘ ອກ຺ຂາສິ ກເຖສິ.

໑໕໒. ກຸສລາກຸສລາ ສພ຺ເພ, ຈິຕ຺ຕຸປ຺ປາທາ ມຫາກ຺ຣິຍາ;

ມຫຄ຺ຄຕາ ກ຺ຣິຍາ ເຈວ, ຈຕ຺ຕາໂຣ ຜລມານສາ.

໑໕໓. ສພ຺ເພວ ປຎ຺ຈປຎ຺ຎາສ ຈິຕ຺ຕຸປ຺ປາທາ ຊວນຏ຺ຐານໂຕເຍວ ຊວນກິຈ຺ຈວເສເນວ ເອກຏ຺ຐາເນ ເອກກິຈ຺ເຈ ນິປ຺ປປຎ຺ເຈນ ສຕ຺ຖຸນາ ຕຓ຺ຫາມານທິຏ຺ຐິວິຣຫິເຕນ ສຕ຺ຖຸນາ ນິຍາມິຕາ ກຖິຕາ.

໑໕໔. ປຸນ ທ຺ເວປຎ຺ຈວິຎ຺ຎາຓາ ຈິຕ຺ຕຸປ຺ປາທາ ທສ຺ສເນ ສວເນ ຕຖາ ຆາຍເນ ສາຍນຏ຺ຐາເນ ຜຸສເນ ປຏິປາຏິຍາ ສຕ຺ຖຸນາ ນິຍາມິຕາ.

໑໕໕. ມໂນຘາຕຸຕ຺ຕິກໍ ອາວຊ຺ຊເນ ປຏິຈ຺ຉເນ, ເອເຕ ອຏ຺ຐສຏ຺ຐິ ຈິຕ຺ຕຸປ຺ປາທາ ເອກຏ຺ຐານິກຕໍ ເອກກິຈ຺ຈຠາວໍ ຄຕາ ປຕ຺ຕາ ຠວນ຺ຕິ.

໑໕໖-໘. ຈິຕ຺ຕທ຺ວຍໍ ທ຺ວິຏ຺ຐານິກໍ ນາມ ອຸທີຣິຕໍ ຠຄວຕາ, ໂສມນສ຺ສຍຸຕໍ ຈິຕ຺ຕໍ ປຎ຺ຈທ຺ວາເຣ ສນ຺ຕີຣຓໍ ສິຍາ. ຉທ຺ວາເຣ ຕທາລມ຺ພຓຎ຺ຈ ພລວາຣມ຺ມເຓ ອຕິມຫນ຺ຕາຣມ຺ມເຓ ສຕິ ສິຍາ, ຕຖາ ໂວຏ຺ຐພ຺ພນໍ ປຎ຺ຈທ຺ວາເຣສຸ ໂວຏ຺ຐພ຺ພນໍ ໂຫຕິ. ມໂນທ຺ວາເຣສຸ ປນ ສພ຺ເພສໍ ອາຣມ຺ມຓານໍ ອາວຊ຺ຊນໍ ໂຫຕິ, ອິທໍ ຈິຕ຺ຕທ຺ວຍໍ ທ຺ວິຏ຺ຐານິກໍ ນາມ ໂຫຕິ.

໑໕໙. ປຏິສນ຺ຘິຍາ ຐານໂຕ ປຏິສນ຺ຘິຍາ ກິຈ຺ຈວເສນ ຠວງ຺ຄສ຺ສ ຐານໂຕ ຠວງ຺ຄສ຺ສ ກິຈ຺ຈວເສນ ຈຸຕິຍາ ຐານໂຕ ຈຸຕິຍາ ກິຈ຺ຈວເສນ ເຕ ມຫຄ຺ຄຕວິປາກາ ນວ ຕິຏ຺ຐານິກາ ຕິກິຈ຺ຈາຕິ ມຸນິນາ ມຕາ.

໑໖໐-໓. ອຏ຺ຐ ກາມາ ມຫາປາກາ, ປຏິສນ຺ຘິຠວງ຺ຄໂຕ ປຏິສນ຺ຘິຠວງ຺ຄວເສນ ຕທາຣມ຺ມຓໂຕ ເຈວ ຕທາຣມ຺ມຓວເສນ ຈ ເອວ ຈຸຕິຏ຺ຐານວເສນ ຈ ອຏ຺ຐ ຈິຕ຺ຕານິ ຈຕຸຏ຺ຐານິກຈິຕ຺ຕານິ ໂຫນ຺ຕິ, ອິຕິ ວຈນໍ ຘີໂຣ ນິທ຺ທິເສ, ກຸສລາກຸສລປາໂກເປກ຺ຂາສຫຄຕທ຺ວຍໍ ປຎ຺ຈທ຺ວາເຣ ສນ຺ຕີຣຓໍ ຠເວ, ຉທ຺ວາຣິເກສຸປິ ພລວາຣມ຺ມເຓ ສຕິ ຕທາຣມ຺ມຓຕາ ສິຍາ. ປຏິສນ຺ຘິຠວງ຺ຄານໍ ຐານວເສນ ຈ ຈຸຕິຏ຺ຐານວເສນ ຈ ອິທໍ ຈິຕ຺ຕທ຺ວຍໍ ປຎ຺ຈຏ຺ຐານິກຈິຕ຺ຕໍ ນາມາຕິ ອຸທີຣິຕໍ ມຸນິນາ.

໑໖໔. ປຎ຺ຈກິຈ຺ຈໍ ທ຺ວຍໍ ຈິຕ຺ຕໍ, ອຏ຺ຐກໍ ປນ ຈຕຸກິຈ຺ຈໍ, ນວກໍ ຕິກິຈ຺ຈໍ, ທ຺ເວ ຈິຕ຺ຕຸປ຺ປາທາ ທ຺ວິກິຈ຺ຈາ, ອິເມສໍ ອິເມຫິ ຈິຕ຺ຕຸປ຺ປາເທຫິ ເສສໍ ເອກກໍ ກິຈ຺ຈໍ.

໑໖໕. ຠວງ຺ຄາວຊ຺ຊນຎ຺ເຈວ, ທສ຺ສນໍ ສມ຺ປຏິຈ຺ຉນໍ;

ສນ຺ຕີຣຓໍ ໂວຏ຺ຐພ຺ພນໍ, ຊວນໍ ຠວຕິ ສຕ຺ຕມໍ.

໑໖໖. ຉພ຺ພິຘໍ ໂຫຕິ ຕໍ ຉນ຺ນໍ ຕໍ ຈິຕ຺ຕໍ ຉນ຺ນໍ ຈກ຺ຂຸໂສຕຆານຊິວ຺ຫາກາຍມໂນວິຎ຺ຎາຓານໍ ປເຠທໂຕ ຉພ຺ພິຘໍ ໂຫຕິ, ຈກ຺ຂຸໂສຕຆານຊິວ຺ຫາກາຍມໂນຘາຕຸມໂນວິຎ຺ຎາຓຘາຕູນໍ ສຕ຺ຕນ຺ນໍ ວເສນ ຈິຕ຺ຕໍ ສຕ຺ຕຘາ ໂຫຕິ.

໑໖໗. ເອເກກາຣມ຺ມຓໍ ຉກ຺ກໍ, ປຎ຺ຈາຣມ຺ມຓເຠທໂຕ ຉຬາຣມ຺ມຓໂຕ ເຈວ ຉຬາຣມ຺ມຓຈິຕ຺ຕວເສນ ມໂນ ຈິຕ຺ຕໍ ອຏ຺ຐວິຘໍ ໂຫຕິ.

໑໖໘. ຕຕ຺ຖ ຕສ຺ມິໍ ຈິຕ຺ເຕ ທ຺ເວປຎ຺ຈວິຎ຺ຎາຓາ ເອເກກໂຄຈຣາ ໂຫນ຺ຕິ, ທ຺ເວ ຈິຕ຺ຕຸປ຺ປາທາ ຣູປາຣມ຺ມຓິກາ, ທ຺ເວ ທ຺ເວ ຈິຕ຺ຕຸປ຺ປາທາ ສທ຺ທາທິໂຄຈຣາ.

໑໖໙. ປຎ຺ຈາຠິຎ຺ຎາວິວຊ຺ຊິຕໍ ສພ຺ພໍ ມຫຄ຺ຄຕໍ, ສພ຺ພໍ ໂລກຸຕ຺ຕຣຎ຺ຈ ອິຕິ ອິທໍ ຈິຕ຺ຕໍ ເອເກກາຣມ຺ມຓໍ ຠເວ.

໑໗໐. ອິທໍ ຉກ຺ກໍ ເອເກກາຣມ຺ມຓໍ ວິຠາວິນາ ເຎຍ຺ຍໍ, ມໂນຘາຕຸຕ຺ຕຍໍ ປຎ຺ຈາຣມ຺ມຓິກໍ ນາມ ຠເວ.

໑໗໑. ກາມາວຈຣຈິຕ຺ຕານິ ຈຕ຺ຕາລີສໍ ຕຖາ ເອເກກໍ ສພ຺ພານິ ອຠິຎ຺ຎານິ ຈ ຉຬາຣມ຺ມຓິການີຕິ ຉຬາຣມ຺ມຓິການິ ນາມ ປຓ຺ຑິເຕນ ວິຎ຺ເຎຍ຺ຍານິ.

໑໗໒. ສຕ຺ຕວິຎ຺ຎາຓຘາຕູສຸ ປຈ຺ຉິມໍ ມໂນວິຎ຺ຎາຓຘາຕຸຎ຺ຈ ກຸສລາກຸສລາພ຺ຍາກຕວເສນ ຕິຘາ ກຕ຺ວາ ນວວິຘໍ ຈິຕ຺ຕໍ ໂຫຕິ.

໑໗໓. ມໂນວິຎ຺ຎາຓຘາຕຸຍາ ເຠໂທ ປຸຎ຺ຎາປຸຎ຺ຎວເສເນວ ວິປາກກິຣິຍເຠທໂຕ ຉສຕ຺ຕຕິວິໂຘ ໂຫຕິ.

໑໗໔. ມໂນຘາຕຸໍ ວິປາກກິຣິຍເຠທໂຕ ທ຺ວິຘາ ກຕ຺ວາ ປຸພ຺ເພ ວຸຕ຺ເຕຫິ ນວຘາ ຈິຕ຺ເຕຫິ ມານສໍ ທສຘາ ໂຫຕິ.

໑໗໕. ປຈ຺ຉິມໍ ຘາຕຸທ຺ວຍໍ ມໂນຘາຕຸມໂນວິຎ຺ຎາຓຘາຕຸທ຺ວຍໍ, ມໂນຘາຕຸໍ ກຸສລວິປາກອກຸສລວິປາກກິຣິຍາວເສນ ຕິຘາ ກຕ຺ວາ, ມໂນວິຎ຺ຎາຓຘາຕຸຎ຺ຈ ກຸສລາກຸສລາພ຺ຍາກຕວເສນ ຕິວິຘາ ກຕ຺ວາ ຈກ຺ຂຸໂສຕຆານຊິວ຺ຫາກາຍວິຎ຺ຎາເຓຫິ ສຫ ຈິຕ຺ຕໍ ເອກາທສວິຘໍ ໂຫຕິ, ອິຕິ ອິທໍ ວຈນໍ ປຓ຺ຑິໂຕ ປຣິທີປເຍ.

໑໗໖. ມໂນວິຎ຺ຎາຓຘາຕຸມ຺ປິ ກຸສລາກຸສລາທິໂຕ ກຸສລາກຸສລວິປາກກິຣິຍາວເສນ ຈຕຸຘາ ວິຠຊິຕ຺ວານ ຕໍ ຈິຕ຺ຕໍ ຈກ຺ຂຸໂສຕຆານຊິວ຺ຫາກາຍວິຎ຺ຎາເຓຫິ ສຫ ຕິປ຺ປກາຣາຍ ມໂນຘາຕຸຍາ ຈ ສຫ ທ຺ວາທສຘາປິ ຘີໂຣ ວເທ.

໑໗໗-໙. ຈິຕ຺ຕໍ ຈຸທ຺ທສຏ຺ຐານເຠເທນ ຈຸທ຺ທສຘາ ຠເວ, ປຏິສນ຺ຘິຍາ ວເສນ ຈ ຠວງ຺ຄວເສນ ຈ ຈຸຕິຍາ ວເສນ ຈ ອາວຊ຺ຊນສ຺ສ ວເສນ ຈ ປຎ຺ຈນ຺ນໍ ທສ຺ສນາທີນໍ ກິຈ຺ຈານໍ ວເສນ ຈ ສມ຺ປຏິຈ຺ຉນເຈຕໂສ ວເສນ ຈ ສນ຺ຕີຣຓສ຺ສ ວເສນ ຈ ໂວຏ຺ຐພ຺ພນຊວນານໍ ວເສນ ຈ, ຍຖາ ເອວໍ ຕທາຣມ຺ມຓຈິຕ຺ຕສ຺ສ ວເສນ ຈາຕິ ເອວໍ ອິມິນາ ປກາເຣນ ຐານເຠທໂຕ ກິຈ຺ຈເຠເທນ ຈຸທ຺ທສຘາ ຈິຕ຺ຕໍ ໂຫຕິ, ອິຕິ ອິທໍ ວຈນໍ ຘີໂຣ ປຣິທີປເຍ ປຣິທີເປຍ຺ຍ.

໑໘໐. ຠູມິປຸຄ຺ຄລນານຕ຺ຕວເສນ ຠູມິນານຕ຺ຕວເສນ, ປຸຄ຺ຄລນານຕ຺ຕວເສນ ຈ ຈິຕ຺ຕານໍ ປວຕ຺ຕິໂຕ ອິທໍ ຈິຕ຺ຕໍ ພຫຸຘາ ໂຫຕິ, ອິຕິ ວຈນຎ຺ຈ ຘີໂຣ ວິຠາວເຍ ປກາເສຍ຺ຍ.

໑໘໑. ອິຘ ອິມສ຺ມິໍ ສາສເນ ໂຍ ຠິກ຺ຂຸ ມຕິມາ ອິມສ຺ມິໍ ເອກວິຘາທິນເຍ ກຸສໂລ ເຉໂກ ໂຫຕິ, ອຠິຘມ຺ເມ ປວຕ຺ຕາ ອຕ຺ຖາ ຕສ຺ສ ຠິກ຺ຂຸໂນ ຫຕ຺ຖຄຕາ ຫຕ຺ຖປວິຏ຺ຐາ ອາມລກາ ວິຍ ສຸທ຺ຘມຓິກາ ວິຍ ໂຫນ຺ຕິ.

ອິຕິ ອຠິຘມ຺ມາວຕາຣຏີກາຍ

ເອກວິຘາທິນິທ຺ເທສວຓ຺ຓນາ ນິຏ຺ຐິຕາ.

ຈຕຸຕ຺ໂຖ ປຣິຈ຺ເຉໂທ.