໕. ປຎ຺ຈໂມ ປຣິຈ຺ເຉໂທ
ຠູມິປຸຄ຺ຄລຈິຕ຺ຕຸປ຺ປຕ຺ຕິນິທ຺ເທສວຓ຺ຓນາ
໑໘໒-໘. ພຸທ຺ຘິຍາ ວຸທ຺ຘິໍ ວິຣຸຬ຺ຫິໍ ກໂຣຕີຕິ ພຸທ຺ຘິວຸທ຺ຘິກຣໍ. ຍສ຺ສ ຍສ຺ສ ນຍສ຺ສ ກຖນໍ ປຏິຎ຺ຎາຕໍ, ຕໍ ຕໍ ທສ຺ເສນ຺ໂຕ ອາຫ ‘‘ຈິຕ຺ຕານໍ ຠູມີສຸປ຺ປຕ຺ຕິ’’ນ຺ຕິ. ຕໍ ວຕ຺ວາ ຠູມີນໍ ອາຘາຣວເສນ ປສງ຺ຄາຄຕໍ ຄຕິເຠທໍ, ຠວເຠທຎ຺ຈ ທສ຺ເສຕຸໍ ‘‘ເທວາ ເຈວາ’’ຕິອາທິ ວຸຕ຺ຕໍ. ‘‘ຈຕສ຺ໂສປາຍຠູມິໂຍ’’ຕິ ວຕ຺ວາ ອສຸຣຄຕິຍາ ເປຕຄຕິຍໍເຍວ ສງ຺ຄຫິຕຕ຺ຕາ ‘‘ຄຕິໂຍ ປຎ຺ຈາ’’ຕິ ວຸຕ຺ຕນ຺ຕິ ວທນ຺ຕິ. ມຍໍ ປນ ‘‘ຕິສ຺ໂສວາປາຍຠູມິໂຍ’’ຕິ ປາເຐນ ຠວິຕພ຺ພນ຺ຕິ ມຎ຺ຎາມ. ນ ຫິ ເອສ ອນາກຸລວຈໂນ ອາຈຣິໂຍ ອີທິສໍ ປຸພ຺ພາປຣວິຣຸທ຺ຘໍ ວິຍ ສມ຺ໂມຫຊນກໍ ວຈນໍ ຠາສຕິ. ປາຬິຍມ຺ປິ ຫິ –
‘‘ປຎ຺ຈ ໂຂ ອິມາ, ສາຣິປຸຕ຺ຕ, ຄຕິໂຍ. ກຕມາ ປຎ຺ຈ? ນິຣໂຍ ຕິຣຈ຺ຉານໂຍນິ ເປຕ຺ຕິວິສໂຍ ມນຸສ຺ສາ ເທວາ’’ຕິ (ອ. ນິ. ໙.໖໘) –
ເອວໍ ຕິຓ຺ຓເມວ ອປາຍານໍ ວເສນ ວຸຕ຺ຕໍ. ກາມຣູປາຣູປວເສນ ຕໂຍ ຠວາ. ຕຕ຺ຖາຕິ ເຕສຸ ຕີສຸ ຠເວສຸ. ຕິໍເສວາຕິ ຈຕສ຺ໂສ ອປາຍຠູມິໂຍ, ສຕ຺ຕວິຘາ ກາມສຸຄຕິຠູມິ, ໂສຬສ ຣູປີພ຺ຣຫ຺ມໂລກາ, ຈຕສ຺ໂສ ອຣູປຠູມິໂຍຕິ ເອກຕິໍສຠູມີນມນ຺ຕເຣ ຈິຕ຺ຕປ຺ປວຕ຺ຕິອຘິກາຣຕ຺ຕາ ອສຎ຺ຎຠູມິໍ ອປເນຕ຺ວາ ອວເສສາ ຕິໍເສວ ຠູມິໂຍຕິ ອຕ຺ໂຖ. ຕາສຸ ຕິໍເສວ ປຸຄ຺ຄລາຕິ ຕາສຸ ຠູມີສຸ ອຸປ຺ປນ຺ນາ ປຸຄ຺ຄລາ ຠູມິຄຓນວເສນ ຕິໍເສວ ໂຫນ຺ຕິ. ຠູມິວເສນ ຕິໍສວິຘາປິ ປນ ປຏິສນ຺ຘິຈິຕ຺ຕຄຓນາຍ ເອກູນວີສຕິ ໂຫນ຺ຕີຕິ ທສ຺ເສນ຺ໂຕ ອາຫ ‘‘ຠູມີສ຺ເວຕາສູ’’ຕິອາທິ.
ປຏິສນ຺ຘິກຈິຕ຺ຕານນ຺ຕິ ທສ ກາມາວຈຣປຏິສນ຺ຘິຈິຕ຺ຕານິ, ປຎ຺ຈ ຣູປາວຈຣປຏິສນ຺ຘິຈິຕ຺ຕານິ, ຈຕ຺ຕາຣິ ອຣູປາວຈຣປຏິສນ຺ຘິຈິຕ຺ຕານີຕິ ອິເມສໍ ເອກູນວີສຕິປຏິສນ຺ຘິຈິຕ຺ຕານໍ ວເສນ. ອສຎ຺ຎີນມຈິຕ຺ຕກາຕິ ອສຎ຺ຎສຕ຺ຕານໍ ອຈິຕ຺ຕກາ ປຏິສນ຺ຘິ. ວຸຕ຺ຕຎ຺ເຫຕໍ –
‘‘ອສຎ຺ຎສຕ຺ຕາ ເທວາ ອເຫຕຸກາ ອນາຫາຣກາ ອຜສ຺ສກາ ອເວທນກາ ອສຎ຺ຎກາ ອເຈຕນກາ ອຈິຕ຺ຕກາ ປາຕຸຠວນ຺ຕີ’’ຕິ.
ຍທິ ປຏິສນ຺ຘິວເສນ ວີສຕິ ປຸຄ຺ຄລາ, ກຖໍ ຠູມິວເສນ ຕິໍສາຕິ ວຸຕ຺ຕາ. ເອກຕິໍສາຕິ ຫິ ວຕ຺ຕພ຺ພນ຺ຕິ ອາຫ ‘‘ອິຘາ’’ຕິອາທິ.
ນ ວິຊ຺ຊຕິ ເຫຕຸ ອິເມສນ຺ຕິ ອເຫຕູ, ທຸເວ, ຕີຓິ ຈ ເຫຕູ ອິເມສນ຺ຕິ ທ຺ວິຕິເຫຕູ, ປຏິສນ຺ຘິວເສນ ອເຫຕຸກາ, ທຸເຫຕຸກາ, ຕິເຫຕຸກາ ຈາຕິ ອຕ຺ໂຖ. ຕຕ຺ຖ ອເຫຕຸກາ ອາປາຍິກາ ຈ, ເອກຈ຺ເຈ ຠູມເທວາ, ມນຸສ຺ເສສຸ ຊຈ຺ຈນ຺ຘຊຈ຺ຈພຘິຣຊຈ຺ຈຸມ຺ມຕ຺ຕກນປຸໍສກອຸຠໂຕພ຺ຍຎ຺ຊນກາທໂຍ ຈ. ວຸຕ຺ຕາວເສສາ ກາມສຸຄຕິວາສິໂນວ ທຸເຫຕຸກາ. ຕິເຫຕຸກາ ປນ ກາມສຸຄຕິວາສິໂນວ. ອຣິຍາ ປນ ອຏ຺ຐາຕິ ຈຕຸນ຺ນໍ ອຣິຍມຄ຺ຄສມງ຺ຄີນໍ, ຈຕຸນ຺ນຎ຺ຈ ອຣິຍຜລສມງ຺ຄີນໍ ວເສນ ອຏ຺ຐ ອຣິຍປຸຄ຺ຄລາ. ນນຸ ຈ ອຣິຍາປິ ຕິເຫຕຸກາເຍວາຕິ? ສຈ຺ຈໍ, ຈິຕ຺ຕຸປ຺ປາທໍ ປນ ປຕ຺ວາ ເຕສໍ ວິເສສສພ຺ຠາວໂຕ ວິສຸໍເຍວ ອຸທ຺ຘຏາຕິ ທຏ຺ຐພ຺ພໍ.
໑໘໙-໙໒. ‘‘ຠູມີສຸປ຺ປຕ຺ຕິໍ ຠຓໂຕ ເມ ນິໂພຘຖາ’’ຕິ ສຸຕ຺ວາ ໂຈທໂກ ‘‘ຕິໍສຠູມີສູ’’ຕິອາທິນາ ສພ຺ເພສໍ ຠູມີນໍ ສາຘາຣຓຈິຕ຺ຕານິ ປຸຈ຺ຉຕິ, ອິຕໂຣ ‘‘ຈຸທ຺ທເສວາ’’ຕິ ວິສ຺ສຊ຺ເຊຕິ. ຕຕ຺ຖ ອຏ຺ຐ ປຣິຕ຺ຕກຸສລານິ, ຈຕ຺ຕາຣິ ທິຏ຺ຐິວິປ຺ປຍຸຕ຺ຕານິ, ອຸທ຺ຘຈ຺ຈສຫຄຕໍ, ມໂນທ຺ວາຣາວຊ຺ຊນຎ຺ຈາຕິ ຈຸທ຺ທເສວ, ນ ອູນານິ ນາຘິການິ, ສພ຺ພາສຸ ຕິໍສຠູມີສຸ ໂຫນ຺ຕິ, ສພ຺ພຠູມີນໍ ສາຘາຣຓານີຕິ ອຕ຺ໂຖ.
ສທາ…ເປ… ສິຍຸນ຺ຕິ ທ຺ເວ ໂທສມູລານິ, ກຸສລວິປາກຈກ຺ຂຸໂສຕວິຎ຺ຎາຓສມ຺ປຏິຈ຺ຉນສນ຺ຕີຣຓທ຺ວຍວຊ຺ຊິຕານິ ອຏ຺ຐາຣສ ກາມາວຈຣວິປາກຈິຕ຺ຕານີຕິ ວີສຕິ ຈິຕ຺ຕານິ ສທາ ກາເມເຍວ ຠເວ ສິຍຸໍ, ນ ກທາຈິ ອຎ຺ຎຕ຺ຖ ອຸປ຺ປຊ຺ຊນ຺ຕີຕິ ອຕ຺ໂຖ. ນນຸ ຈ ພ຺ຣຫ຺ມູນມ຺ປິ ອກຸສລວິປາການິ ອຸປ຺ປຊ຺ຊນ຺ຕີຕິ? ສຈ຺ຈໍ ອຸປ຺ປຊ຺ຊນ຺ຕິ, ຕານິ ກາມຠເວ ອນິຏ຺ຐຣູປາທໂຍ ອາຣພ຺ຠ ອຸປ຺ປຊ຺ຊນ຺ຕິ ພ຺ຣຫ຺ມໂລເກ ເຕສໍ ອຠາວໂຕຕິ ກາມຠເວເຍວ ນິຍມິຕານິ. ຣູປາວຈຣວິປາກຈິຕ຺ຕານິ ປຎ຺ຈ ຣູປາວຈຣຠເວເຍວ ສິຍຸໍ, ຈຕ຺ຕາໂຣ ຈ ອຣູປາວຈຣວິປາກາ ອຣູປີສູຕິ ອາຫ ‘‘ປຎ຺ຈ ຣູປຠເວ’’ຕິອາທິ.
ກາມ …ເປ… ຠວນ຺ຕີຕິ ຣູປາວຈຣກຸສລກິຣິຍຈິຕ຺ຕານິ ເຈວ ກຸສລວິປາການິ ຈ ຈກ຺ຂຸໂສຕວິຎ຺ຎາຓສມ຺ປຏິຈ຺ຉນສນ຺ຕີຣຓານິ ໂວຏ຺ຐພ຺ພນວຊ຺ຊານິ ຈ ທ຺ເວ ອເຫຕຸກກິຣິຍຈິຕ຺ຕານິ ປຐມມຄ຺ຄວິຎ຺ຎາຓນ຺ຕິ ອຏ຺ຐາຣສ ຈິຕ຺ຕານິ ກາມຣູປຠເວເຍວ ຠວນ຺ຕິ, ນ ອຣູປຠເວ. ຕຕ຺ຖ ຫິ ສພ຺ພໂສ ຣູປສຎ຺ຎານໍ ສມຕິກ຺ກນ຺ຕຕ຺ຕາ ຣູປາວຈຣກຸສລກິຣິຍາ ນຸປ຺ປຊ຺ຊນ຺ຕິ. ຈກ຺ຂຸວິຎ຺ຎາຓາທີນິ ວຕ຺ຖຸທ຺ວາຣວິຣຫໂຕ, ຫສິຕຸປ຺ປາໂທ ເອກນ຺ຕວຕ຺ຖຸນິສ຺ສຍຕ຺ຕາ, ໂສຕາປຕ຺ຕິມຄ຺ໂຄ ປຣໂຕໂຆສປຈ຺ຈຍາເຍວ ນິພ຺ພຕ຺ຕນໂຕ ນ ອຸປ຺ປຊ຺ຊຕິ. ທ຺ເວຈຕ຺ຕາລີສາຕິ ອຏ຺ຐ ປຣິຕ຺ຕກຸສລານິ, ຈຕ຺ຕາຣິ ອຣູປກຸສລານິ, ປຐມມຄ຺ຄວຊ຺ຊານິ ສຕ຺ຕ ໂລກຸຕ຺ຕຣຈິຕ຺ຕານິ, ປຏິຆທ຺ວຍວຊ຺ຊິຕານິ ຈ ທສ ອກຸສລຈິຕ຺ຕານິ, ປຸພ຺ເພ ວຸຕ຺ຕອເຫຕຸກກິຣິຍາທ຺ວຍວຊ຺ຊິຕານິ ນວ ກາມາວຈຣກິຣິຍຈິຕ຺ຕານິ, ຈຕ຺ຕາຣິ ອຣູປາວຈຣກິຣິຍຈິຕ຺ຕານີຕິ ເອວໍ ທ຺ເວຈຕ຺ຕາລີສ ຈິຕ຺ຕານິ ຕີສຸ ຠເວສຸ ໂຫນ຺ຕິ.
໑໙໓-໒໐໔. ເອວໍ ຠວວເສນ ຈິຕ຺ຕຸປ຺ປຕ຺ຕິໍ ທສ຺ເສຕ຺ວາ ອິທານິ ກາລວເສນ ທສ຺ເສນ຺ໂຕ ອາຫ ‘‘ຐເປຕ຺ວາ ປນາ’’ຕິອາທິ. ສພ຺ພາສນ຺ຕິ ນິທ຺ຘາຣຓຕ຺ເຖ ສາມິວຈນໍ. ອຏ຺ຐ ມຫາກິຣິຍາ, ອຣຫຕ຺ຕມຄ຺ຄຜລຈິຕ຺ຕານິ, ອນາຄາມິຜລໍ, ເນວສຎ຺ຎານາສຎ຺ຎາຍຕນກຸສລກິຣິຍາຕິ ເຕຣເສວ ຈິຕ຺ຕານິ ອປາຍຣຫິຕາສຸ ຉພ຺ພີສຠູມີສຸ ໂຫນ຺ຕິ ອປາເຍສຸ ວິປາກາວຣຓສພ຺ຠາເວ ເອເຕສໍ ອນຸປ຺ປຊ຺ຊນໂຕ. ອປຣານິ ຉ ຈິຕ຺ຕານີຕິ ສມ຺ພນ຺ໂຘ. ຕານິ ປນ ຣູປຠວສາຘາຣຓານໍ ປຎ຺ຈປຣິຕ຺ຕວິປາການໍ, ກິຣິຍມໂນຘາຕຸຍາ ຈ ວເສນ ເວທິຕພ຺ພານິ.
ປຎ຺ຈ ຈິຕ຺ຕານີຕິ ທິຏ຺ຐິສມ຺ປຍຸຕ຺ຕວິຈິກິຈ຺ຉາວເສນ ປຎ຺ຈ ຈິຕ຺ຕານິ. ຕານິ ຫິ ປຎ຺ຈສຸ ສຸທ຺ຘາວາສຠູມີສຸ ນ ລພ຺ຠນ຺ຕິ. ຕຕ຺ຖ ອນາຄາມິຂີຓາສວານເມວ ອຘິວຸຕ຺ຖຕ຺ຕາ, ເຕສຎ຺ຈ ປຐມມຄ຺ເຄເນວ ອິເມສໍ ປຎ຺ຈນ຺ນໍ ວິຎ຺ຎາຓານໍ ອນຸປ຺ປາທຘມ຺ມຕໍ ອາປາທິຕຕ຺ຕາ.
ອປຣານິ ທຸເວຕິ ຕຕິຍາຣຸປ຺ປກຸສລກິຣິຍຈິຕ຺ຕານິ. ຕານິ ຫິ ເນວສຎ຺ຎານາສຎ຺ຎາຍຕເນສຸ ອຕິກ຺ກນ຺ຕາຣມ຺ມຓຕ຺ຕາ, ອປາເຍສຸ ຈ ອເຫຕຸກປຏິສນ຺ຘິກຕ຺ຕາ ນຸປ຺ປຊ຺ຊນ຺ຕິ. ຈຕຸວີສຕີຠູມິສຸ ທ຺ເວ ຈາຕິ ວິຎ຺ຎາຓຎ຺ຈາຍຕນກຸສລກິຣິຍາວເສນ ທ຺ເວ ຈິຕ຺ຕານິ. ເຕວີສຠູມິສຸ ທ຺ເວເຍວາຕິ ອາກາສານຎ຺ຈາຍຕນກຸສລກິຣິຍຈິຕ຺ຕານິ.
ເອກາທສວິຘນ຺ຕິ ຣູປາວຈຣກຸສລກິຣິຍາ ຫສິຕຸປ຺ປາໂທຕິ ເອກາທສ. ໂສຕາປຕ຺ຕິຜລໍ ຍາວ ອນາຄາມິມຄ຺ໂຄ ຈຕ຺ຕາຣິ ຈ ຈິຕ຺ຕານິ ສຸທ຺ຘາວາສອປາຍວຊ຺ຊາສຸ ເອກວີສຕິຠູມີສຸ ຠວນ຺ຕິ. ເອກໍ ໂສຕາປຕ຺ຕິມຄ຺ຄຈິຕ຺ຕໍ ສຸທ຺ຘາວາສອປາຍອຣູປຠູມິວຊ຺ເຊສຸ ສຕ຺ຕຣສສຸ ຠູມີສຸ ຊາຍຕິ. ທ຺ເວ ໂທສມູລານິ, ກຸສລວິປາກຆານຊິວ຺ຫາກາຍວິຎ຺ຎາຓານິ, ສຕ຺ຕ ອກຸສລວິປາກາຕິ ທ຺ວາທສ ຈິຕ຺ຕານິ ມຫຄ຺ຄຕຠູມິວຊ຺ຊາສຸ ເອກາທສສຸ ກາມຠູມີສຸ ຊາຍນ຺ຕິ. ອຏ຺ຐ ມຫາວິປາກຈິຕ຺ຕານິ ກາມາວຈຣເທວມນຸສ຺ສວເສນ ສຕ຺ຕຠູມີສຸ ຊາຍນ຺ຕິ. ຉສຸ ຠູມິສູຕິ ເວຫປ຺ຜລສຸທ຺ຘາວາສສງ຺ຂາຕາສຸ ຉສຸ ປຎ຺ຈມຊ຺ຌານຠູມີສຸ.
ຈຕ຺ຕາຣິ…ເປ… ຠູມິສູຕິ ຈຕຸຕ຺ຖຊ຺ຌານວິປາໂກ ປຣິຕ຺ຕສຸຠອປ຺ປມາຓສຸຠສຸຠກິຓ຺ຫວເສນ ຕີສຸ ຠູມີສຸ ຊາຍຕິ, ທຸຕິຍຊ຺ຌານວິປາໂກ, ຕຕິຍຊ຺ຌານວິປາໂກ ຈ ປຣິຕ຺ຕາຠາອປ຺ປມາຓາຠາອາຠສ຺ສຣວເສນ ຕີສຸ ຠູມີສຸ, ປຐມຊ຺ຌານວິປາໂກ ພ຺ຣຫ຺ມປາຣິສຊ຺ຊພ຺ຣຫ຺ມປຸໂຣຫິຕມຫາພ຺ຣຫ຺ມາວເສນ ຕີສຸ ຠູມີສຸ ໂຫຕີຕິ ເອວໍ ຈຕ຺ຕາຣິ ຈິຕ຺ຕານິ ເອເກກວເສນ ຕີສຸ ຕີສຸ ຠູມີສຸ ຊາຍນ຺ຕິ.
໒໐໖-໙. ເອວໍ ເອຕ຺ຕກາເນວ ຈິຕ຺ຕານິ ເອຕ຺ຕກາສຸ ຠູມີສຸ ອຸປ຺ປຊ຺ຊນ຺ຕີຕິ ຈິຕ຺ຕນິຍມວເສນ ອຸປ຺ປຕ຺ຕິໍ ທສ຺ເສຕ຺ວາ ອິທານິ ເອຕ຺ຕກາສຸ ເອວ ຠູມີສຸ ເອຕ຺ຕກາເນວ ຈິຕ຺ຕານິ ອຸປ຺ປຊ຺ຊນ຺ຕີຕິ ຠູມິນິຍມວເສນ ທສ຺ເສຕຸໍ ‘‘ກຸສລາກຸສລາ ກາເມ’’ຕິອາທິ ອາຣທ຺ຘໍ. ຕຕ຺ຖ ກາເມ ກຸສລາກຸສລາ ວີສຕິ, ເຕສໍ ປນ຺ນຣສ ອເຫຕຸກາ ປາກາ, ອາວຊ຺ຊນທ຺ວຍຎ຺ຈາຕິ ສຕ຺ຕຕິໍເສວ ມານສາ ນຣກາທີສຸ ຈຕູສຸປິ ອປາເຍສຸ ຊາຍເຣ. ອວເສສານິ ປນ ສຕ຺ຕຣສ ກາມາວຈຣວິປາກກິຣິຍຈິຕ຺ຕານິ, ປຎ຺ຈຕິໍສ ມຫຄ຺ຄຕໂລກຸຕ຺ຕຣານີຕິ ທ຺ເວປຎ຺ຎາສ ມານສາ ກທາຈິປິ ເຕສຸ ນຸປ຺ປຊ຺ຊນ຺ຕິ ອຠູມິຠາວໂຕຕິ ອຕ຺ໂຖ.
ອສີຕິ ຫທຍາຕິ ວຸຕ຺ຕາວເສສານິ ອສີຕິ ຈິຕ຺ຕານິ. ຆານາທິວິຎ຺ຎາຓຕ຺ຕຍນ຺ຕິ ກຸສລວິປາກຆານາທິວິຎ຺ຎາຓຕ຺ຕຍໍ. ‘‘ອປຸຎ຺ຎຊາ ປາກາ’’ຕິ ອກຸສລວິປາການໍ ສພ຺ເພສເມວ ຄຫິຕຕ຺ຕາ ຆານາທິວິຎ຺ຎາຓຕ຺ຕຍໍ ອຄ຺ຄຫິຕວິເສສມ຺ປິ ປາຣິເສສຎາເຍນ ກຸສລວິປາກເມວ ວິຎ຺ຎາຍຕິ.
໒໑໓. ໂທມນສ຺ສນ຺ຕິ ໂທມນສ຺ສສຫຄຕໍ. ກ຺ຣິຍາ ຈ ທ຺ເວຕິ ໂວຏ຺ຐພ຺ພນວຊ຺ຊິຕາ ທ຺ເວ ອເຫຕຸກກິຣິຍາ.
໒໑໔. ຠູມິວເສເນວາຕິ ປຸຄ຺ຄເລ ອນາມສິຕ຺ວາ ເກວລໍ ຠູມິວເສນ. ປຸຄ຺ຄລານໍ ວເສນ ຈ ຠູມິວເສນ ຈ ຈິຕ຺ຕຸປ຺ປຕ຺ຕິໍ ວິຠາວເຍຕິ ສມ຺ພນ຺ໂຘ.
໒໑໖-໘. ປຎ຺ຈຠູມິສູຕິ ຈຕຸຣາປາຍມນຸສ຺ສວເສນ ປຎ຺ຈຠູມີສຸ. ອເຫຕຸການໍ ປຏິສນ຺ຘິສທິສຕທາຣມ຺ມຓວເສນ ‘‘ສຕ຺ຕຕິໍເສວາ’’ຕິ ວຸຕ຺ຕໍ, ອຎ຺ຎກມ຺ເມນ ປນ ທ຺ວິເຫຕຸກຕທາຣມ຺ມຓສ຺ສາປິ ສມ຺ຠວໂຕ ເອກຈຕ຺ຕາລີສ ໂຫນ຺ຕິ. ອາຈຣິຍໂຊຕິປາລຕ຺ເຖຣສ຺ສ ອຘິປ຺ປາເຍນ ຕິເຫຕຸກວິປາເກຫິປິ ສທ຺ຘິໍ ປຎ຺ຈຈຕ຺ຕາລີເສວາຕິ ທຏ຺ຐພ຺ພໍ. ອເຫຕຸກສ຺ສ ວຸຕ຺ເຕຫີຕິ ອເຫຕຸກສຕ຺ຕສ຺ສ ວຸຕ຺ເຕຫິ ສຕ຺ຕຕິໍສມານເສຫິ ສຫ. ນວ ກ຺ຣິຍາຕິ ອຏ຺ຐ ມຫາກິຣິຍາ, ຫສິຕຸປ຺ປາໂທ ຈາຕິ ອິມານິ ອສາຘາຣຓກິຣິຍຈິຕ຺ຕານິ ນວ.
໒໒໐-໑. ‘‘ຈຕຸປຎ຺ຎາສ ມານສາ’’ຕິ ວຕ຺ວາ ເຕສໍ ສຣູປໂຕ ທສ຺ສນຕ຺ຖໍ ອາຫ ‘‘ທ຺ວິເຫຕຸກສ຺ສາ’’ຕິອາທິ. ປຸນ ‘‘ຈຕຸປຎ຺ຎາສາ’’ຕິອາທິ ປນ ນິຄມນໍ.
໒໒໓-໔. ປຎ຺ຎາເສວສ຺ສ ຈິຕ຺ຕານີຕິ ຕິເຫຕຸກສ຺ສ ປຸຖຸຊ຺ຊນສ຺ສ ວຸຕ຺ຕຈຕຸປຎ຺ຎາສຈິຕ຺ເຕສຸ ທິຏ຺ຐິວິຈິກິຈ຺ຉາສຫຄຕວຊ຺ຊານິ ເອກູນປຎ຺ຎາສ, ໂສຕາປຕ຺ຕິຜລນ຺ຕິ ອິມານິ ປຎ຺ຎາເສວ ຈິຕ຺ຕານິ ອສ຺ສ ກາມາວຈຣສ຺ສ ໂສຕາປນ຺ນເທຫິໂນ ຊາຍນ຺ເຕ. ນວຕິໍເສວາຕິ ເອກູນຈຕ຺ຕາລີສຈິຕ຺ຕານິ. ປຐມໍ ຜລນ຺ຕິ ໂສຕາປຕ຺ຕິຜລໍ.
໒໒໕-໘. ທຸຕິຍຎ຺ຈ ຜລໍ ຫິຕ຺ວາຕິ ສກທາຄາມິຜລໍ ຫິຕ຺ວາ. ຈ-ສທ຺ເທນ ໂສຕາປຕ຺ຕິຜລຎ຺ຈ ຫິຕ຺ວາຕິ ອຕ຺ໂຖ. ອຕ຺ຕໂນ ຜເລນ ສຫ ຍານິ ອຏ຺ຐຈຕ຺ຕາລີສ ຈິຕ຺ຕານິ, ຕານິ ອນາຄາມິສ຺ສ ສຕ຺ຕສ຺ສ ຊາຍນ຺ຕິ. ຈຕ຺ຕາລີສຎ຺ຈ ຈຕ຺ຕາຣີຕິ ເຕວີສຕິ ກາມາວຈຣວິປາກຈິຕ຺ຕານິ, ວີສຕິ ກິຣິຍຈິຕ຺ຕານິ, ອຣຫຕ຺ຕຜລຎ຺ຈາຕິ ຈຕຸຈຕ຺ຕາລີສ ຈິຕ຺ຕານິ. ສກໍ ສກນ຺ຕິ ‘‘ໂສຕາປນ຺ນສ຺ສ ໂສຕາປຕ຺ຕິມຄ຺ຄຈິຕ຺ຕໍ, ສກທາຄາມິໂນ ສກທາຄາມິມຄ຺ຄຈິຕ຺ຕ’’ນ຺ຕິອາທິນາ ອຕ຺ຕໂນ ອຕ຺ຕໂນ ມຄ຺ຄຈິຕ຺ຕໍ. ກສ຺ມາ ປນ ເຕສໍ ເອເກກເມວ ຈິຕ຺ຕໍ ໂຫຕີຕິ ອາຫ ‘‘ເອກຈິຕ຺ຕກ຺ຂຓາຫິ ເຕ’’ຕິ. ປຎ຺ຈຕິໍເສວາຕິ ສຕ຺ຕຣສ ກາມຣູປາຣູປກຸສລຈິຕ຺ຕານິ, ປຏິຆທ຺ວຍວຊ຺ຊານິ ທສ ອກຸສລານິ, ຣູປຠເວ ລພ຺ຠມານການິ ປຎ຺ຈ ອເຫຕຸກວິປາການິ, ອາວຊ຺ຊນທ຺ວຍໍ, ປຐມຊ຺ຌານວິປາໂກ ຈາຕິ ປຎ຺ຈຕິໍສ ຈິຕ຺ຕານິ ຕີສຸ ປຐມຊ຺ຌານຠູມີສຸ ປຸຖຸຊ຺ຊນສ຺ສ ຊາຍນ຺ຕິ.
໒໓໒-໕. ຫິຕ຺ວາ ຈາຕິ ເອຕ຺ຖ ຈ-ສທ຺ເທນ ປຐມຜລສ຺ສ ຄຫຓໍ ທສ຺ເສຕິ. ເຕນ ອປຸຎ຺ຎປຎ຺ຈກໍ ຫິຕ຺ວາ ປຐມໍ ຜລໍ ຄເຫຕ຺ວາ ຈາຕິ ອຕ຺ໂຖ. ອປຸຎ຺ຎປຎ຺ຈກນ຺ຕິ ທິຏ຺ຐິສມ຺ປຍຸຕ຺ຕວິຈິກິຈ຺ຉາສຫຄຕວເສນ ປຎ຺ຈ ອກຸສລຈິຕ຺ຕານິ. ຕຕ຺ຖາຕິ ເຕສຸ ໂສຕາປນ຺ນສ຺ສ ວຸຕ຺ເຕສຸ. ຕຕ຺ເຖວາຕິ ສກທາຄາມິສ຺ສ ວຸຕ຺ເຕສຸ. ປຸຎ຺ຎຊໍ ສມ຺ປຏິຈ຺ຉນໍ ສນ຺ຕີຣຓທ຺ວຍຎ຺ເຈວາຕິ ສມ຺ພນ຺ໂຘ.
໒໓໗. ເອວໍ ປຐມຊ຺ຌານຠູມິຍໍ ປຸຖຸຊ຺ຊນໂສຕາປນ຺ນາທິວເສນ ຈິຕ຺ຕສມ຺ຠວໍ ທສ຺ເສຕ຺ວາ ອິທານິ ເຕສເມວ ວເສນ ທຸຕິຍຊ຺ຌານຠູມິຍໍ ທສ຺ເສຕຸໍ ‘‘ປຸຖຸຊ຺ຊນສ຺ສາ’’ຕິອາທິ ອາຣທ຺ຘໍ. ທຸຕິຍຊ຺ຌານຕຕິຍຊ຺ຌານວິປາການໍ ເອກສຕ຺ຕສ຺ເສວ ອສມ຺ຠເວປິ ທຸຕິຍຊ຺ຌານຕເລ ນິພ຺ພຕ຺ເຕ ປຸຖຸຊ຺ຊນາທໂຍ ປຸຖຸຊ຺ຊນາທິຠາວສາມຎ຺ເຎນ ເອກໂຕ ຄເຫຕ຺ວາ ‘‘ທຸຕິຍຊ຺ຌານຕຕິຍຊ຺ຌານປາກໂຕ’’ຕິ ວຸຕ຺ຕໍ.
໒໔໒. ປຣິຕ຺ຕສຸຠາທິໂຕ ປຏ຺ຐາຍ ຍາວ ອກນິຏ຺ຐາ ຕຕິຍຈຕຸຕ຺ຖຊ຺ຌານຠູມີສຸ ປຐມຊ຺ຌານຠູມິຍໍ ວຸຕ຺ຕຄຓນາຍ ຈິຕ຺ຕປ຺ປວຕ຺ຕິ ເວທິຕພ຺ພາ. ເຕນາຫ ‘‘ປຣິຕ຺ຕກສຸຠາທີນ’’ນ຺ຕິອາທິ.
໒໔໗. ຈຕຸວີສຕິ ຈິຕ຺ຕານີຕິ ອຏ຺ຐປຣິຕ຺ຕກຸສລານິ, ຈຕ຺ຕາຣິ ອຣູປກຸສລານິ, ປຏິຆທ຺ວຍວຊ຺ຊິຕານິ ທສ ອກຸສລຈິຕ຺ຕານິ, ປຐມາຣຸປ຺ປວິປາໂກ, ມໂນທ຺ວາຣາວຊ຺ຊນຎ຺ຈາຕິ ຈຕຸວີສຕິ ຈິຕ຺ຕານິ ປຐມາຣຸປ຺ປຠູມິຍໍ ປຸຖຸຊ຺ຊນສ຺ສ ຊາຍນ຺ຕິ.
໒໕໐-໓. ທສ ປຎ຺ຈາຕິ ອຏ຺ຐ ມຫາກິຣິຍາ, ຈຕສ຺ໂສ ອຣູປກິຣິຍາ, ມໂນທ຺ວາຣາວຊ຺ຊນໍ, ປຐມາຣຸປ຺ປວິປາໂກ, ອຣຫຕ຺ຕຜລຎ຺ຈາຕິ ປນ຺ນຣສ ຈິຕ຺ຕານິ ປຐມາຣຸປ຺ປຠູມິຍໍ ອຣຫໂຕ ໂຫນ຺ຕິ.
ເຕວີສາຕິ ປຐມາຣຸປ຺ປຠູມິຍໍ ປຸຖຸຊ຺ຊນສ຺ສ ວຸຕ຺ເຕສຸ ຈຕຸວີສຕິຈິຕ຺ເຕສຸ ອາກາສານຎ຺ຈາຍຕນກຸສລວິປາກວຊ຺ຊາ ພາວີສຕິ ຈ ທຸຕິຍາຣຸປ຺ປວິປາໂກ ຈາຕິ ເຕວີສຕິ ທຸຕິຍາຣຸປ຺ປຠູມິຍໍ ປຸຖຸຊ຺ຊນສ຺ສ ໂຫນ຺ຕິ. ຕຕ຺ເຖວ ຕິຓ຺ຓໍ ຜລຏ຺ຐເສຂານໍ ປຸຖຸຊ຺ຊນສ຺ສ ວຸຕ຺ເຕສຸ ອກຸສລປຎ຺ຈກວຊ຺ຊານິ ອຏ຺ຐາຣສ, ຕໍຕໍຜລຎ຺ຈາຕິ ເອກູນວີສຕິ ຈິຕ຺ຕານິ ໂຫນ຺ຕິ.
ກ຺ຣິຍາ ທ຺ວາທສາຕິ ອຏ຺ຐ ມຫາກິຣິຍາ, ອາກາສານຎ຺ຈາຍຕນວຊ຺ຊິຕາ ຕິສ຺ໂສ ອຣູປກິຣິຍາ, ມໂນທ຺ວາຣາວຊ຺ຊນນ຺ຕິ ທ຺ວາທສ ກິຣິຍຈິຕ຺ຕານິ. ປາເກໂກຕິ ເອໂກ ອຣູປວິປາໂກ.
ທຸຕິຍາຣຸປ຺ປຠູມິຍໍ ປຸຖຸຊ຺ຊນສ຺ສ ວຸຕ຺ເຕສຸ ວິຎ຺ຎາຓຎ຺ຈາຍຕນກຸສລວິປາກວຊ຺ຊານິ ເອກວີສຕິ, ອາກິຎ຺ຈຎ຺ຎາຍຕນວິປາໂກ ຈາຕິ ພາວີສຕິ ຈິຕ຺ຕານິ ຕຕິຍາຣຸປ຺ປຠູມິຍໍ ປຸຖຸຊ຺ຊນສ຺ສ ອຸປ຺ປຊ຺ຊນ຺ຕິ.
໒໕໔-໖໐. ປຸຖຸຊ຺ຊນສ຺ສ ວຸຕ຺ເຕສຸ ອປຸຎ຺ຎປຎ຺ຈກວຊ຺ຊານິ ສຕ຺ຕຣສ, ປຐມຜລຎ຺ຈາຕິ ອຏ຺ຐາຣສ ຕຕິຍາຣຸປ຺ປຠູມິຍໍ ໂສຕາປນ຺ນສ຺ສ ອຸປ຺ປຊ຺ຊນ຺ຕິ. ຕານີຕິ ຕາເນວ ອຏ຺ຐາຣສ ຈິຕ຺ຕານິ. ‘‘ຐເປຕ຺ວາ ປຐມໍ ຜລ’’ນ຺ຕິ ຫິ ວຈນໂຕ ທຸຕິຍຜລໍ ປກ຺ຂິປິຕ຺ວາຕິ ອຍມຕ຺ໂຖ ອວຸຕ຺ຕສິທ຺ໂຘ. ນ ຫິ ສກທາຄາມິໂນ ສກທາຄາມິຜລຎ຺ຈ ນຸປ຺ປຊ຺ຊຕິ. ເອວຎ຺ຈ ກຕ຺ວາ ວຸຕ຺ຕໍ ‘‘ຐເປຕ຺ວາ ທຸຕິຍໍ ຜລ’’ນ຺ຕິ. ເອຕ຺ຖາປິ ອນາຄາມິຜລໍ ປກຣຓສິທ຺ຘເມວາຕິ ທຏ຺ຐພ຺ພໍ. ອຏ຺ຐ ມຫາກິຣິຍາ, ທ຺ເວ ຕຕິຍຈຕຸຕ຺ຖາຣຸປ຺ປກິຣິຍາ, ມໂນທ຺ວາຣາວຊ຺ຊນໍ, ອາກິຎ຺ຈຎ຺ຎາຍຕນວິປາໂກ, ອຣຫຕ຺ຕຜລນ຺ຕິ ເຕຣສ ຈິຕ຺ຕານິ ຕຕິຍາຣຸປ຺ປຠູມິຍໍ ຂີຓາສວສ຺ສ ຊາຍນ຺ຕິ. ຕຕິຍາຣຸປ຺ປຠູມິຍໍ ປຸຖຸຊ຺ຊນສ຺ສ ວຸຕ຺ເຕສຸ ທ຺ວາວີສຕິຈິຕ຺ເຕສຸ ອາກິຎ຺ຈຎ຺ຎາຍຕນກຸສລວິປາກວຊ຺ຊາຕິ ວີສຕິ, ເນວສຎ຺ຎານາສຎ຺ຎາຍຕນວິປາໂກຕິ ເອກວີສຕິ ຈິຕ຺ຕານິ ຈຕຸຕ຺ຖາຣຸປ຺ປຠູມິຍໍ ປຸຖຸຊ຺ຊນສ຺ສ ຊາຍນ຺ຕິ. ປຸຖຸຊ຺ຊນສ຺ສ ວຸຕ຺ເຕສຸ ອປຸຎ຺ຎປຎ຺ຈກວຊ຺ຊານິ ໂສຬສ, ໂສຕາປຕ຺ຕິຜລຎ຺ຈາຕິ ສຕ຺ຕຣສ ຕຕ຺ເຖວ ໂສຕາປນ຺ນສ຺ສ ໂຫນ຺ຕິ. ອຏ຺ຐ ມຫາກິຣິຍາ, ທ຺ເວ ຈ ເນວສຎ຺ຎານາສຎ຺ຎາຍຕນວິປາກກິຣິຍາ, ມໂນທ຺ວາຣາວຊ຺ຊນໍ, ອຣຫຕ຺ຕຜລຎ຺ຈາຕິ ທ຺ວາທສ ຈິຕ຺ຕານິ ຕຕ຺ເຖວ ອຣຫໂຕ ອຸປ຺ປຊ຺ຊນ຺ຕິ.
໒໖໑-໓. ອຣູປກຸສລາ ເຈວ ກິຣິຍາປິ ຈ ອຸປ຺ປຊ຺ຊນ຺ຕິ, ນ ປນ ວິປາກາຕິ ອຘິປ຺ປາໂຍ. ອຸທ຺ຘມຸທ຺ຘມຣູປີນນ຺ຕິ ວິຎ຺ຎາຓຎ຺ຈາຍຕນາທີສຸ ອຣູປີນໍ. ເຫຏ຺ຐິມາຕິ ວິຎ຺ຎາຓຎ຺ຈາຍຕນິການໍ ອາກາສານຎ຺ຈາຍຕນກຸສລວິປາກາ ນຸປ຺ປຊ຺ຊນ຺ຕິ, ອາກິຎ຺ຈຎ຺ຎາຍຕນິການໍ ອາກາສານຎ຺ຈາຍຕນວິຎ຺ຎາຓຎ຺ຈາຍຕນກຸສລວິປາກາຕິ ເອວມາທິນາ ເຫຏ຺ຐິມາ ເຫຏ຺ຐິມາ ອຣູປາ ນຸປ຺ປຊ຺ຊນ຺ຕິ. ກສ຺ມາຕິ ອາຫ ‘‘ທິຏ຺ຐາທີນວໂຕ ກິຣາ’’ຕິ. ກິຣາຕິ ອນຸສ຺ສຸຕິຍໍ. ທິຏ຺ຐາທີນວໂຕຕິ ອາຣມ຺ມເຓ, ຌາເນ ຈ ທິຏ຺ຐໂທສຕ຺ຕາ. ກຸສລານຸຕ຺ຕຣາຕິ ໂລກຸຕ຺ຕຣກຸສລາ.
໒໖໖. ສພ຺ໂພ ຣູໂປ ມຫຄ຺ຄໂຕຕິ ສພ຺ໂພ ຣູປາວຈຣມຫຄ຺ຄຕຈິຕ຺ຕຸປ຺ປາໂທ. ມໂນຘາຕູຕິ ກິຣິຍາມໂນຘາຕຸວິປາກມໂນຘາຕູນໍ ກາມວິປາກ-ຄ຺ຄຫເຓນ ຄຫິຕຕ຺ຕາ.
໒໖໙-໗໓. ເອວໍ…ເປ… ເຫຏ຺ຐິມນ຺ຕິ ທຸຕິຍາຣຸປ຺ປຠູມິຍໍ ວຸຕ຺ເຕສຸ ທຸຕິຍາຣຸປ຺ປຕ຺ຕຍໍ ຐເປຕ຺ວາ ອຕ຺ຕໂນ ປາເກນ ສຫ ຕຕິຍາຣຸປ຺ປຠູມິຍໍ ເອກູນຈຕ຺ຕາລີສ ຈິຕ຺ຕານິ ຕຕ຺ຖວຸຕ຺ເຕສຸ ຕຕິຍາຣຸປ຺ປຕ຺ຕຍໍ ຐເປຕ຺ວາ ອຕ຺ຕໂນ ປາເກນ ສຫ ສຕ຺ຕຕິໍສາຕິ ເອວໍ ເສສທ຺ວເຍປິ ເຫຏ຺ຐິມເຫຏ຺ຐິມໍ ຫິຕ຺ວາ ຈິຕ຺ຕຄຓນາ ເຎຍ຺ຍາ. ອຕ຺ຕໂນ ອຕ຺ຕໂນຕິ ປຐມາຣຸປ຺ປຠູມິຍໍ ປຐມາຣຸປ຺ປວິປາໂກ, ທຸຕິຍາຣຸປ຺ປຠູມິຍໍ ທຸຕິຍາຣຸປ຺ປວິປາໂກຕິ ເອວໍ ອຕ຺ຕໂນ ອຕ຺ຕໂນ ວິປາກາ ຈຕ຺ຕາໂຣ ຈ ອນາສວາ ໂລກຸຕ຺ຕຣວິປາກາຕິ ເອວໍ ຈຕູສຸ ອຣູປຠູມີສຸ ເອເກກາຍ ຠູມິຍາ ປຎ຺ຈ ປຎ຺ຈ ວິປາກາ ຊາຍນ຺ຕິ. ຍາ ກິຣິຍາ ເຕຣເສວ ສິຍຸໍ, ຕາ ສພ຺ພປຐມາຣຸປ຺ປຠູມິຍໍ ຂີຓາສວສ຺ສ ຊາຍນ຺ເຕຕິ ສມ຺ພນ຺ໂຘ. ທຸຕິຍາຣຸປ຺ປຠູມິຍໍ ຂີຓາສວສ຺ສ ປຐມາຣຸປ຺ປກິຣິຍຈິຕ຺ຕໍ ວຊ຺ເຊຕ຺ວາ ທ຺ວາທເສວ ກ຺ຣິຍາ ໂຫນ຺ຕິ. ຕຕິຍາຣຸປ຺ປຠູມິຍໍ ທຸຕິຍາຣຸປ຺ປກິຣິຍຈິຕ຺ຕໍ ວຊ຺ເຊຕ຺ວາ ເອກາທສ. ຈຕຸຕ຺ຖາຣຸປ຺ປຠູມິຍໍ ຕຕິຍາຣຸປ຺ປກິຣິຍຈິຕ຺ຕໍ ວຊ຺ເຊຕ຺ວາ ທເສວ ວິຎ຺ເຎຍ຺ຍາ.
໒໗໔-໕. ອິທານິ ເກວລໍ ປຸຄ຺ຄລວເສນ ເຕສເມວ ປຸຄ຺ຄລານໍ ອາເວຓິກຈິຕ຺ຕໍ ທສ຺ເສຕຸໍ ‘‘ອຣຫໂຕ ປນາ’’ຕິອາທິນາ ອຣຫໂຕເຍວ ອຸປ຺ປຊ຺ຊນກຈິຕ຺ຕໍ ທສ຺ເສຕ຺ວາ ອນາຄາມິອາທີນໍ ປາຏິປຸຄ຺ຄລິກໍ ສກສກຜລຈິຕ຺ຕໍ ປາກຏເມວາຕິ ສໍຂິຕ຺ຕໍ. ອຣຫໂຕຕິ ຂີຓາສວສ຺ສ. ອຣຫໂຕ ຠາໂວ ອຣຫຕ຺ຕໍ, ອຣຫຕ຺ຕຜລນ຺ຕິ ອຕ຺ໂຖ. ຕຎ຺ຫິ ‘‘ອຣີນໍ ຫຕຕ຺ຕາ ອຣຫາ’’ຕິອາທິນາ ອຣຫນ຺ຕ-ສທ຺ທສ຺ສ ປວຕ຺ຕິນິມິຕ຺ຕຠາເວນ ‘‘ອຣຫຕ຺ຕ’’ນ຺ຕິ ວຸຈ຺ຈຕິ. ອິທານິ ເຕສໍ ເຕສໍ ປຸຄ຺ຄລານໍ ສາຘາຣຓຈິຕ຺ຕານິ ທສ຺ເສຕຸໍ ‘‘ຈຕຸນ຺ນຎ຺ຈ ຜລຏ຺ຐານ’’ນ຺ຕິອາທິ ວຸຕ຺ຕໍ.
໒໙໐. ສຸສາຣນ຺ຕິ ອຕ຺ຖພ຺ຍຎ຺ຊນວເສນ ປຣິຈ຺ຈຊິຕພ຺ພສ຺ສ ເຜຄ຺ຄຸສ຺ສ ອຠາວໂຕ ສຸຏ຺ຐຸ ສາຣໍ, ສພ຺ພໂສ ສາຣນ຺ຕິ ອຕ຺ໂຖ. ປຣນ຺ຕິ ສຸສາຣຕ຺ຕາ ເອວ ປຣໍ. ສຕ຺ຕານໍ ອິຘໂລກປຣໂລກຫິຕປຏິຈ຺ຉາທກສ຺ສ ອວິຊ຺ຊນ຺ຘກາຣສ຺ສ ວິຘມນໂຕ ໂມຫນ຺ຘກາຣປ຺ປທີປໍ. ຈິນ຺ເຕຕີຕິ ອຕ຺ຖວເສນ ຈິນ຺ເຕຕິ. ວາເຈຕີຕິ ພ຺ຍຎ຺ຊນວເສນ ສຊ຺ຌາຍຕິ. ຣາຄໂທສານໍ ໂມເຫນ ສຫ ອວິນາຠາວໂຕ ຕສ຺ສ ອນຸປຄມນໍ ອຕ຺ຖສິທ຺ຘເມວາຕິ ‘‘ໂມຫນ຺ຘກາຣປ຺ປທີປ’’ນ຺ຕິ ວຕ຺ວາປິ ‘‘ນຣໍ…ເປ… ໂນປຍນ຺ຕີ’’ຕິ ຣາຄໂທສານຸປຄມນເມວ ວຸຕ຺ຕໍ. ‘‘ໂມຫນ຺ຘກາຣປ຺ປທີປ’’ນ຺ຕິ ວາ ວຈເນເນວ ໂມຫສ຺ສ ອນຸປຄໂມ ວຸຕ຺ໂຕ ໂຫຕີຕິ ຣາຄໂທສານເມວ ອນຸປຄມນໍ ວຸຕ຺ຕໍ. ມູລຠູຕານໍ ປນ ຕິຓ຺ຓໍ ອນຸປຄມນວຈເນນ ເສສກິເລສານມ຺ປິ ອນຸປຄມນໍ ວຸຕ຺ຕເມວາຕິ ທຏ຺ຐພ຺ພໍ.
ອິຕິ ອຠິຘມ຺ມຕ຺ຖວິກາສິນິຍາ ນາມ
ອຠິຘມ຺ມາວຕາຣສໍວຓ຺ຓນາຍ
ຠູມິປຸຄ຺ຄລຈິຕ຺ຕຸປ຺ປຕ຺ຕິນິທ຺ເທສວຓ຺ຓນາ ນິຏ຺ຐິຕາ.
ປຐໂມ ຠາໂຄ ນິຏ຺ຐິໂຕ.
ນໂມ ຕສ຺ສ ຠຄວໂຕ ອຣຫໂຕ ສມ຺ມາສມ຺ພຸທ຺ຘສ຺ສ