໑໘. ອຏ຺ຐາຣສໂມ ປຣິຈ຺ເຉໂທ

ທິຏ຺ຐິວິສຸທ຺ຘິນິທ຺ເທສວຓ຺ຓນາ

໑໑໗໕. ຍາ ສຎ຺ຊານນມຕ຺ຕໍວ, ສຎ຺ຎາ ນີລາທິໂຕ ປນາຕິ ສາ ສຎ຺ຎາ ນີລາທິວເສນ ສຎ຺ຊານນມຕ຺ຕໍວ ກໂຣຕິ. ລກ຺ຂຓປ຺ປຏິເວຘນ຺ຕິ ອນິຈ຺ຈາທິລກ຺ຂຓປຏິພຸຊ຺ຌນໍ.

໑໑໗໗. ຕໍ ວິຎ຺ຎາຓໍ ອຸສ຺ສກ຺ກິຕ຺ວາ ອຸທ຺ຘໍ ສກ຺ກໍ ກຕ຺ວາ ສຕ຺ເຕ ມຄ຺ຄໍ ປາເປຕຸໍ ນ ສກ຺ໂກຕິ.

໑໑໗໘-໙. ສພ຺ເພສໍ ປນ ຘມ຺ມານໍ ສຠາວປຏິເວຘນໍ ອວິປຣີຕວເສນ ປຏິພຸຊ຺ຌນໍ ປຎ຺ຎາຍ ລກ຺ຂຓໍ.

໑໑໘໐. ສມາຘິ ອາສນ຺ນກາຣຓໍ ເອຕາຍາຕິ ສມາຘາສນ຺ນກາຣຓາ.

໑໑໘໑. ລກ຺ຂເຓເນກຘາຕິ ສພ຺ພຘມ຺ມໍ ປຏິພຸຊ຺ຌນລກ຺ຂເຓນ ປຎ຺ຎາວ ເອກຘາ ວຸຕ຺ຕາ.

໑໑໘໓. ຠູຣິປຎ຺ເຎນາຕິ ຠູເຕ ອຕ຺ເຖ ອວິປຣີເຕ ອຕ຺ເຖ ຣມຕີຕິ ຠູຣິ, ຠູຣິ ປຎ຺ຎາ ເອຕສ຺ສາຕິ ຠູຣິປຎ຺ໂຎ, ເຕນ.

໑໑໘໖-໙໑. ຕີສຸ ອຕ຺ຖຘມ຺ມນິຣຸຕ຺ຕີສຸ ຈ ຎາເຓສຸ ອຕ຺ຖຘມ຺ມນິຣຸຕ຺ຕີສຸ ຊາເຕສຸ ຎາເຓສຸ ຈ ຎາຓໍ. ຍໍ ກິຎ຺ຈິ ປຈ຺ຈຍຸປ຺ປນ຺ນໍ ຜລໍ ຘມ຺ມຊາຕໍ. ຠາສິຕຕ຺ໂຖຕິ ປາຬິຍາ ອຕ຺ໂຖ. ເອເຕ ປຎ຺ຈ ຘມ຺ມາ ອຕ຺ຖສຎ຺ຎິຕາ ອຕ຺ຖນາມກາ. ຜລນິພ຺ພຕ຺ຕໂກ ເຫຕູຕິ ຊນນໂກ ປຈ຺ຈໂຍ. ຠາສິຕນ຺ຕິ ປາຬິ. ຘມ຺ມສຎ຺ຎິຕາຕິ ຘມ຺ມນາມກາ. ສຠາວນິຣຸຕ຺ຕີຕິ ອວິປຣີຕໂວຫາໂຣ. ປຣິຍຕ຺ຕີຕິ ສິກ຺ຂນໍ. ສວນາຘິຄເມຫິ ປຸພ຺ພໂຍເຄນ ປຸພ຺ເພ ປວຕ຺ຕນາຍ.

໑໑໙໒. ຠູມິຠູເຕສູຕິ ວິປສ຺ສນາຍ ຠູມິຠູເຕສຸ.

໑໑໙໔. ຊນນາທິໂຕຕິ ຊາຕິອາທິໂຕ ຠີເຕນ ປຎ຺ຎາ ຠາເວຕພ຺ພາ.

໑໒໐໓. ເອກາສີຕິຍາ ຈິຕ຺ເຕນາຕິ ໂລກຸຕ຺ຕຣຈິຕ຺ຕວຊ຺ຊິເຕນ ວິປສ຺ສນາຠູມິຠູເຕນ ເອກາສີຕິຍາ ຈິຕ຺ເຕນ.

໑໒໐໘. ສຕ຺ຕສມ຺ໂມຫຆາຕຕ຺ຖນ຺ຕິ ສຕ຺ໂຕຕິ ສມ຺ໂມຫສ຺ສ ວິນາສິຕຕ຺ຖໍ.

໑໒໑໑. ນິຣີຫກນ຺ຕິ ອີຫວິຣຫິຕໍ ພ຺ຍາປາຣວິຣຫິຕໍ, ທາຣຸຣຊ຺ຊຸສມາໂຍເຄ.

໑໒໑໕. ອຸໂຠ ຠິຊ຺ຊນ຺ຕິ ປຈ຺ຈຍາຕິ ອຎ຺ຎມຎ຺ຎປຈ຺ຈຍກາຣຓາ.

໑໒໒໕. ອນ຺ຕທ຺ວຍນ຺ຕິ ກາມສຸຂລ຺ລິການຸໂຍຄອຕ຺ຕກິລມຖານຸໂຍຄທ຺ວຍໍ. ຠາວເຍຕິ ທິຏ຺ຐິວິສຸທ຺ຘິໍ ວຑ຺ເຒຍ຺ຍ.

ອິຕິ ອຠິຘມ຺ມາວຕາຣຏີກາຍ

ທິຏ຺ຐິວິສຸທ຺ຘິນິທ຺ເທສວຓ຺ຓນາ ນິຏ຺ຐິຕາ.

ອຏ຺ຐາຣສໂມ ປຣິຈ຺ເຉໂທ.