໑໓. ເຕຣສໂມ ປຣິຈ຺ເຉໂທ

ກາຣກປຏິເວຘວຓ຺ຓນາ

ເວທກສ຺ສາຕິ ສຸຂທຸກ຺ຂເວທກສ຺ສ. ຕທາຍຕ຺ຕວຸຕ຺ຕີນນ຺ຕິ ເຕສໍ ອາຍຕ຺ຕາ ປຏິພທ຺ຘາ ເຍສໍ ວິປາການໍ ເຕ ຕທາຍຕ຺ຕວຸຕ຺ຕິໂນ, ເຕສໍ. ອຕ຺ຣ ອິມສ຺ມິໍ ຐາເນ ອາຈຣິເຍນ ປຣິຫາໂຣ ວຸຈ຺ຈເຕ. ກຸໂຕຍໍ ຕວ ຕຕ຺ຖານຸໂຣໂຘຕິ ຕຕ຺ຖ ຕສ຺ມິໍ ອຎ຺ຎສ຺ສ ອຕ຺ຕກາຣກສ຺ສ ອຠາເວປິ ສຕ຺ຕຸສງ຺ຂາຕສ຺ສ ອຕ຺ຕໂນ ຠາເວປິ ອຍໍ ຕວ ອນຸໂຣໂຘ ອນຸນໂຍ ກຸໂຕ ເກນ ກາຣເຓນ ອິຘ ອິມສ຺ມິໍ ອສຕິ ກຕ຺ຕຣິ ກຸສລາທີນໍ ອຕ຺ຖິຠາເວ ກມ຺ມວິໂຣໂຘ ກຸໂຕ ເກນ ກາຣເຓນ. ອຖາປີຕິ ອປໂຣ ນໂຍປິ. ກິຎ຺ເຈຕ຺ຖາຕິ ເອຕ຺ຖ ເອຕິສ຺ສໍ ໂຈທນາຍໍ ກິຎ຺ຈິ ວຕ຺ຕພ຺ພໍ ອຕ຺ຖິ, ອວສິຏ຺ຐໍ ຕາວ ພ຺ຣູຫິ, ອປຣິສມຕ຺ຕາ ເຕ ໂຈທນາ. ຕສ຺ສາຕິ ອຕ຺ຕໂນ. ກາຣກເວທກຕ຺ຕາຠາໂວຕິ ກາຣກເວທກຕ຺ຕສ຺ສ ອຠາໂວ ສິຍາ.

ອຖ ນ ຠວຕີຕິ ອຕ຺ຕໂນ ອນາເສ ເຈຕນາປິ ອນາໂສ ຍທິ ນ ຠວຕິ. ປຏິຎ຺ຎາ ຫີນາຕິ ‘‘ເຈຕນາຍ ອນຎ຺ໂຎ ອຕ຺ຕາ’’ຕິ ປຏິຎ຺ຎາ ຫີນາ. ວຸຕ຺ຕປ຺ປກາຣໂຕຕິ ‘‘ອຕ຺ຕໂນ ອນາເສ ເຈຕນາຍ ນາໂສ ນ ຠວຕິ’’ອິຕິ ວຸຕ຺ຕປ຺ປກາຣໂຕ. ວິປຣີຕນ຺ຕິ ‘‘ອຕ຺ຕໂນ ອນາເສ ເຈຕນາຍ ອນາໂສ’’ອິຕິ ວິປຣີຕຄ຺ຄຫຓໍ ສິຍາ. ອຕ຺ຕາ ນສ຺ສຕຸ, ເຈຕນາ ຕິຏ຺ຐຕຸ, ອຖ ປນ ເອວໍ ນ ຠວຕີຕິ ອຕ຺ຕາ ນສ຺ສຕຸ, ເຈຕນາ ຕິຏ຺ຐຕຸ, ເອວໍ ຄຫຓໍ ປນ ນ ຠວຕິ. ອນຎ຺ຎຕ຺ຕປກ຺ຂໍ ປຣິຈ຺ຈຊ ປຣິຈ຺ຈຊາຫິ ‘‘ເຈຕນາຍ ອນຎ຺ໂຎ ອຕ຺ຕາ’’ຕິ. ປຏິຎ຺ຎາ ຫີນາ ຍສ຺ສ ໂສ ປຏິຎ຺ຎາຫີໂນ.

ອຸຠິນ຺ນໍ ເຈຕນຕ຺ຕານໍ ເອກເທສຕາ ເອກເທສຠາໂວ ນຕ຺ຖິ. ເອວຎ຺ຈ ສຕີຕິ ເອວໍ ອຸຠິນ຺ນໍ ເອກເທສສ຺ສ ອຠາເວ ສຕິ ໂກ ໂທໂສ ອິຕິ ຕ຺ວໍ ເຈ ວເທຍ຺ຍາສິ. ຍໍ ປນ ຕຍາ ວຸຕ຺ຕໍ ຍຖາ ຣູປຣສຄນ຺ຘາທີນໍ ເອກເທເສ ວຕ຺ຕມານານມ຺ປິ ລກ຺ຂຓໂຕ ອຎ຺ຎຕ຺ຕນ຺ຕິ ຍໍ ວຈນໍ ປນ ຕຍາ ວຸຕ຺ຕໍ, ຕໍ ວຈນໍ ອຍຸຕ຺ຕໍ, ນານຸຣູປນ຺ຕິ ອຕ຺ໂຖ. ຕວ ປຏິຎ຺ຎາ ຫີນາຕິ ‘‘ເອກເທເສ ວຕ຺ຕມານານໍ ເຈຕນຕ຺ຕານໍ ລກ຺ຂຓໂຕ ອຎ຺ຎຕ຺ຕ’’ນ຺ຕິ ປຏິຎ຺ຎາ ຫີນາ.

ເອວຎ຺ຈ ສຕີຕິ ເອຕໍ ເຈຕນາຍ ອຎ຺ຎຠາເວ ສຕິ ໂກ ໂທໂສ ອິຕິ ເຈ ຠວໍ ວເທຍ຺ຍ. ‘‘ອເຈຕໂນ ອຕ຺ຕາ’’ຕິ ວຈນໍ, ປຸພ຺ເພ ວຸຕ຺ຕໂທສໂຕຕິ ‘‘ປາກາຣຕຣຸປາສາຓຕິຓສທິໂສ ສິຍາ’’ຕິ ປຸພ຺ເພ ວຸຕ຺ຕໂທສໂຕ.

໗໘໐. ອຕ຺ຖິ ສຕ຺ໂຕປປາຕິໂກຕິ ໂອປປາຕິກາ ສຕ຺ຕາ ອຕ຺ຖິ.

໗໘໑. ຠາຣາທານນ຺ຕິ ຠາຣຄ຺ຄຫຓໍ. ຠາຣນິກ຺ເຂປນນ຺ຕິ ຠາໂຣໂຣປນໍ.

໗໘໓. ເອກສ຺ສ ປຸຄ຺ຄລສ຺ສ ອຏ຺ຐິສຎ຺ຈໂຍ ອຏ຺ຐິສມູໂຫ ເອເກນ ກປ຺ເປນ ປພ຺ພຕສໂມ ຣາສິ ສິຍາ.

໗໘໕. ໂຠ ມາຣ, ຕ຺ວໍ ສຕ຺ໂຕ ອິຕິ ປຈ຺ເຈສິ, ກໍ ສທ຺ທຫສິ, ‘‘ສຕ຺ໂຕ’’ຕິ ຄຫຓໍ ເຕ ຕວ ທິຏ຺ຐິຄຕໍ, ສຸທ຺ຘສງ຺ຂາຣປຸຎ຺ໂຊ ອຍໍ, ອິຘ ໂລເກ ສຕ຺ໂຕ ນ ອຸປລພ຺ຠຕິ.

໗໘໗. ໂຍ ຠິກ຺ຂຸ ອິມໍ ຄນ຺ຖໍ ອຈ຺ຈນ຺ຕໍ ສຕຕມ຺ປິ ຈິນ຺ເຕຕິ, ຕສ຺ສ ຠິກ຺ຂຸໂນ ປຣມາ ປຎ຺ຎາ ເວປຸລໍ ວິປຸລຠາວໍ ຄຈ຺ຉຕິ.

໗໘໘. ໂຍ ຠິກ຺ຂຸ ອິມໍ ອຠິຘມ຺ມາວຕາຣໍ ອຕິມຕິກຣໍ ອຸຕ຺ຕມໍ ອຠິຎ຺ຎາຓກຣໍ ວິມຕິວິນາສກຣໍ ກງ຺ຂຈ຺ເຉທກຣໍ ປິຍກ຺ກຣໍ ເປມກຣໍ ສທາ ປຐຕິ, ສຸຓາຕິ, ຕສ຺ສ ຠິກ຺ຂຸໂນ ມຕິ ອິຘ ສາສເນ ຐິເຕ ວິກສຕິ ປຏິຜຸລ຺ລຕິ.

ອິຕິ ອຠິຘມ຺ມາວຕາຣຏີກາຍ

ກາຣກປຏິເວຘວຓ຺ຓນາ ນິຏ຺ຐິຕາ.

ເຕຣສໂມ ປຣິຈ຺ເຉໂທ.