໑໔. ຈຸທ຺ທສໂມ ປຣິຈ຺ເຉໂທ

ຣູປາວຈຣສມາຘິຠາວນານິທ຺ເທສວຓ຺ຓນາ

໗໘໙-໙໓. ຫິຕານຍນ຺ຕິ ຫິຕາວຫໍ. ມານສຎ຺ຈ ສຸຄຕນ຺ຕິ ສຸຏ຺ຐຸ ປວຕ຺ຕມານສຎ຺ຈ. ມຘຸຣາ ອຕ຺ຖວຓ຺ຓນາ ເອຕສ຺ສາຕິ ມຘຸຣຕ຺ຖວຓ຺ຓນໍ. ອຸຕ຺ຕຣໍ ຕຸ ມນຸສ຺ສານໍ, ຘມ຺ມໂຕ ຎາຓທສ຺ສນນ຺ຕິ ມນຸສ຺ສານໍ ໂລກິຍຘມ຺ມໂຕ ອຸຕ຺ຕຣິຠູຕຎາຓທສ຺ສນໂລກຸຕ຺ຕຣໍ. ສງ຺ກສ຺ສຣສມາຈາເຣຕິ ສງ຺ກາຍ ກງ຺ຂາຍ ສຣິຕພ຺ພສມາຈາເຣ. ອຈ຺ຉິທ຺ທໍ ອກ຺ຂຓ຺ຑໍ ອກມ຺ມາສໍ. ອຕ຺ຖກາເມນາຕິ ອຕ຺ຕໂນ ຫິຕກາເມນ.

໗໙໗. ທຸວິຘລກ຺ຂຓໍ ຈາຣິຕ຺ຕວາຣິຕ຺ຕລກ຺ຂຓໍ.

໘໐໕. ເຕສໍ ຈຣິຕານໍ ໂວມິສ຺ສກນຍາ.

໘໐໗. ສວຓ຺ຓກສິຓາຕິ ນີລປີຕໂອທາຕໂລຫິຕວຓ຺ຓກສິຓາ.

໘໐໘. ຕໍ ເອກກໍ ອານາປານໍ ອສ຺ສາສປສ຺ສາໂສ.

໘໐໙-໑໐. ມຣຓູປສມາຍຸຕ຺ຕາ ສຕີຕິ ມຣຓານຸສ຺ສຕິ ອຸປສມານຸສ຺ສຕິ. ອາຫາຣນິສ຺ສິຕສຎ຺ຎາຕິ ອາຫາເຣ ປຏິກູລສຎ຺ຎາ. ຘາຕຸວວຕ຺ຖານນ຺ຕິ ຈຕຸຘາຕຸວວຕ຺ຖານໍ.

໘໑໑-໒. ອນຸກູລາ ອິເມ ສພ຺ພ-ຈຣິຕານນ຺ຕິ ວຓ຺ຓິຕາຕິ ຍໍ ກມ຺ມຏ຺ຐານໍ ສທ຺ຘາຈຣິຕສ຺ສ ອນຸກູລໍ, ຕເມວ ປຎ຺ຎາຈຣິຕສ຺ສ ອນຸກູລນ຺ຕິ ອຘິປ຺ປາໂຍ. ອິທໍ ສພ຺ພໍ ປນ ວຈນໍ ເອກນ຺ຕວິປຈ຺ຈນີກຠາວໂຕ ເອກນ຺ຕປຏິປກ຺ຂຠາວໂຕ ອຕິສປ຺ປາຍໂຕ ວຸຕ຺ຕໍ, ອິຕິ ວິຠາວິນາ ເຎຍ຺ຍໍ.

໘໓໕. ວິປສ຺ສນາຠວສມ຺ປຕ຺ຕິ-ສຸຂານໍ ປຈ຺ຈຍາ ສິຍຸໍ ວິປສ຺ສນາສມ຺ປຕ຺ຕິສຸຂານໍ ຠວສມ຺ປຕ຺ຕິສຸຂານໍ ປຈ຺ຈຍາ ສິຍຸໍ.

໘໓໘. ສມ຺ມຏ຺ຐານໍ ມໂນຠຸໂນຕິ ມໂນຠຸຫທໂຍ ຕສ຺ສ ຫທຍສ຺ສ ສມ຺ມຏ຺ຐານໍ.

໘໔໔. ປຕ຺ຕຸກາເມນ ຘີມຕາ ກສິຓໍ ກຕ຺ຕພ຺ພໍ.

໘໔໕. ສໍຫາຣິມນ຺ຕິ ອິໂຕ ຈິໂຕ ຈ ຫຣິຕພ຺ພກສິຓໍ. ຕຕ຺ຣຏ຺ຐກນ຺ຕິ ຕສ຺ມິໍ ຐາເນ ຐິຕໍ ອິໂຕ ຈິໂຕ ຈ ອນາຫຣິຕພ຺ພໍ ກສິຓໍ.

໘໔໙. ວິວຏ຺ຏໍ ປນ ມິຈ຺ຉຕາຕິ ນິພ຺ພານໍ ອິຈ຺ຉນ຺ເຕນ ວິທຕ຺ຖິຈຕຸຣງ຺ຄຸລໍ ວຏ຺ຏໍ ກາຕຸໍ ຕໍ ກສິຓໍ ວຏ຺ຏຕິ.

໘໕໑-໒. ຫຕ຺ຖປາສປ຺ປມາຓສ຺ມິໍ, ຕມ຺ຫາ ກສິຓມຓ຺ຑລາຕິ ຕໂຕ ກສິຓມຓ຺ຑລໂຕ ຫຕ຺ຖປາສປ຺ປມາຓສ຺ມິໍ ປເທເສ ວິທຕ຺ຖິຈຕຸຣງ຺ຄຸເລ ອຸຈ຺ເຈ. ປຣິມຸຂໍ ສຕິນ຺ຕິ ກມ຺ມຏ຺ຐານາຠິມຸຂໍ ສຕິໍ.

໘໕໓-໔. ເນກ຺ຂມ຺ມນ຺ຕິ ຌານໍ. ເຂມໂຕ ທຏ຺ຐຸໍ ທິສ຺ວາ ອຫໍ ອິມາຍ ປຏິປຕ຺ຕິຍາ ອທ຺ຘາ ເອກນ຺ເຕນ ປວິເວກສຸຂສ຺ສ ນິພ຺ພານສຸຂສ຺ສ ຠາຄີ ອສ຺ສໍ ຠເວຍ຺ຍໍ.

໘໕໖. ໂສ ກສິຓສ຺ສ ວຓ຺ໂຓ ເຕນ ໂຍຄິນາ ນ ເປກ຺ຂິຕພ຺ໂພ, ກສິຓສ຺ສ ລກ຺ຂຓໍ ນ ເປກ຺ຂິຕພ຺ພໍ ອຸສ຺ສທສ຺ສ ວເສນ ວຓ຺ຓໍ ອມຸຎ຺ຈິຕ຺ວາ.

໘໖໐. ເອວໍ ອິມິນາ ວຸຕ຺ຕປ຺ປກາເຣນ ເອກຄ຺ຄເຈຕໂສ ເອກຄ຺ຄຈິຕ຺ຕສ຺ສ ໂຍຄິໂນ ນິມີເລຕ຺ວາ ອາວຊ຺ຊນ຺ຕສ຺ສ ຍຖາ ເຍນ ປກາເຣນ ກມ຺ມຏ຺ຐານໍ ໂຫຕິ ອຸມ຺ມີລິເຕ ກາເລປິ, ຕຖາ ເຕນ ປກາເຣນ ຕໍ ກມ຺ມຏ຺ຐານໍ ອາປາຖໍ ຍາຕິ ເຈ ຍທິ ອາຄຈ຺ຉຕິ, ອຸຄ຺ຄຫເມວ ອຸຄ຺ຄຫນິມິຕ຺ຕໍ.

໘໖໔. ປາທານໍ ໂຘວເນ ປປຎ຺ຈປຣິຫາຣຕ຺ຖໍ. ເອກຕລິກາຕິ ເອກຕລມຕ຺ຕາ.

໘໖໕. ຕໍ ສໍຫາຣິມໍ ກສິຓມາທາຍ.

໘໖໖. ສມນ຺ນາຫຣິຕພ຺ພນ຺ຕິ ກມ຺ມຏ຺ຐານໍ ສຸມເນນ ອາຫຣິຕພ຺ພໍ, ມນສິກາຕພ຺ພນ຺ຕິ ອຕ຺ໂຖ. ຕກ຺ກາຫຏນ຺ຕິ ວິຕກ຺ເກນ ອາຫຏໍ ຜຸສິຕໍ ກເຣ ກເຣຍ຺ຍ.

໘໖໘. ຕນ຺ຕິ ຕໍ ນິມິຕ຺ຕໍ.

໘໗໑-໔. ອິມສ຺ສາຕິ ປຏິຠາຄນິມິຕ຺ຕສ຺ສ. ປຸຣິມສ຺ສາຕິ ອຸຄ຺ຄຫນິມິຕ຺ຕສ຺ສ. ໂກ ປນ ອຍໍ ວິເສໂສ? ຖວິກາ ນີຫຣິຕໍ ອາທາສມຓ຺ຑລໍ ມຊ຺ຊິຕໍ ວິຍ. ໂຕຍເທ ກາຬເມເຆ ເສຕພລາກາ ວິຍ. ຕທາ ຕໍ ອຸຄ຺ຄຫນິມິຕ຺ຕໍ ປທາເລຕ຺ວາວ ນິຄ຺ຄຕໍ ປຏິຠາຄນິມິຕ຺ຕໍ. ຕໂຕ ອຸຄ຺ຄຫນິມິຕ຺ຕໂຕ. ຕນ຺ຕິ ຕໍ ປຏິຠາຄນິມິຕ຺ຕໍ. ສຓ຺ຐານວນ຺ຕຎ຺ຈ ວຓ຺ຓວນ຺ຕຎ຺ຈ ນ ຈ ອຸປຏ຺ຐາກາຣມຕ຺ຕໍ. ປຎ຺ຎຊນ຺ຕິ ປຎ຺ຎາຍ ຊາຕໍ.

໘໗໗-໘. ອຸປຈາຣກ຺ຂເຓ ຕສ຺ສາຕິ ຕສ຺ສ ສມາຘິໂນ ອຸປຈາຣກ຺ຂເຓ. ນີວຣຓປ຺ປຫາເນນ ສມາຘິໂນ ປຏິລາຠກ຺ຂເຓ ປນ ອງ຺ຄານໍ ວິຕກ຺ກາທີນໍ ປາຕຸຠາເວນ ອິຕິ ທ຺ວີຫິ ອາກາເຣຫິ.

໘໗໙. ທ຺ວິນ຺ນໍ ສມາຘີນນ຺ຕິ ອຸປຈາຣປ຺ປນາສມາຘີນໍ.

໘໘໒. ຈກ຺ກວຕ຺ຕິຍຄພ຺ໂຠວ ຣຕນໍ ວິຍ ອສ຺ສ ອເນນ ສຸທຸລ຺ລຠໍ.

໘໘໔. ອຍນ຺ຕິ ປຏິສນ຺ຘິສນ຺ຖາໂຣ.

໘໙໑-໒. ສມຕໍ ວີຣິຍສ຺ເສວາຕິ ວີຣິຍສມຠາວໍ. ລຍໍ ລີນຠາວໍ ອີສກມ຺ປິ ຍນ຺ຕໍ ຄຈ຺ຉນ຺ຕໍ ມານສໍ ອາວຊ຺ຊນຈິຕ຺ຕໍ.

໘໙໕-໙. ຠວງ຺ຄໍ ປນ ປຈ຺ຉິຊ຺ຊ ອຸຈ຺ຉິນ຺ທິຕ຺ວາ ຕເທວ ປຖວີກສິຓໍ ອາຣມ຺ມຓໍ ກຕ຺ວາ ໂຍຄິໂນ ມໂນທ຺ວາຣມ຺ຫິ ຊາຍຕິ. ຕໂຕຕິ ອາວຊ຺ຊນໂຕ ຕຕ຺ເຣວາຣມ຺ມເຓ ຕສ຺ມິໍ ປຖວີກສິຓສງ຺ຂາເຕ ອາຣມ຺ມເຓ ຕສ຺ສ ໂຍຄິໂນ ຊວນານິ ຈຕ຺ຕາຣິ ວາ ປຎ຺ຈ ວາ ຊາຍນ຺ເຕ. ອວສາເນ ເອກໍ ຊວນມານສໍ ຣູປາວຈຣິກໍ ໂຫຕິ, ຕສ຺ມິໍ ຣູປາວຈຣິເກ ວິຕກ຺ກາທໂຍ ອງ຺ຄາ. ອຎ຺ເຎຫິ ອຎ຺ເຎສໍ ຈິຕ຺ຕານໍ ອຎ຺ເຎຫິ ວິຕກ຺ກາທີຫິ ພລວຕຣາ ໂຫນ຺ຕິ. ຕານິ ອປ຺ປນາຠາວໍ ອປ຺ປຕ຺ຕານິ ອປ຺ປນາເຈຕໂສ ປຣິກມ຺ໂມປຈາຣໂຕ ປຣິກມ຺ມຠາວໂຕ ປຣິກມ຺ມານີຕິ ວຸຈ຺ຈນ຺ເຕ, ອຸປຈາຣຠາວໂຕ ອຸປຈາຣານີຕິ ຈ ວຸຈ຺ຈນ຺ເຕ. ຕານິ ຊວນານິ ອປ຺ປນາຍານຸໂລມຕ຺ຕາ ອນຸໂລມານິ ເອວ ຈ ວຸຈ຺ຈນ຺ຕິ. ເອຕ຺ຖ ອນຸໂລມເກສຸ ຍໍ ສພ຺ພນ຺ຕິມໍ ຊວນໍ, ຕໍ ໂຄຕ຺ຣຠູຕິ ປວຸຈ຺ຈຕິ.

໙໐໑. ໂຄຕ຺ຣຠຸ ທິຏ຺ຐນ຺ຕິ ໂຄຕ຺ຣຠຸ ນາມ ອຸທ຺ທິຏ຺ຐໍ.

໙໐໔-໕. ປຸຣິເມຫິ ຊວເນຫິ ຍໍ ອາເສວນໍ, ຕໍ ພລວປຈ຺ຈຍໍ ລທ຺ຘາ ລຠິຕ຺ວາ ຉຏ຺ຐໍ ຊວນໍ, ສຕ຺ຕມໍ ວາ ຊວນໍ ອປ຺ເປຕິ. ອິຕິ ວຈນໍ ປວຸຈ຺ຈຕິ, ເອຕ຺ຖ ວາເທ ໂຄທຕ຺ໂຕ ນາມ ອາຠິຘມ຺ມິໂກ ອາຈຣິໂຍ ອາຫ. ຉິນ຺ນຕເຏ ມຸຂໍ ຍສ຺ສ ຉິນ຺ນຕຏມຸໂຂ.

໙໐໘. ປຈ຺ຈເວກ຺ຂຓາ ເຫຕຸ ຍສ຺ສ ອາວຊ຺ຊນສ຺ສາຕິ ປຈ຺ຈເວກ຺ຂຓເຫຕຸກໍ.

໙໑໑-໒. ກາມຈ຺ຉນ຺ທສ຺ສ ນານາວິສເຍ ປລຸທ຺ຘສ຺ສ. ເຈຕໂສ ເອກສ຺ມິໍ ວິສເຍ ສມາຘາເນນ ສມາຘິ.

໙໑໕. ສຍຎ຺ຈ ອຕິສນ຺ຕໂຕ ສຸຂໍ ອວູປສນ຺ຕສຠາວສ຺ສ ອຸທ຺ຘຈ຺ຈກຸກ຺ກຸຈ຺ຈທ຺ວຍສ຺ສ ປຏິປກ຺ຂໂຕ ວຸຕ຺ຕໍ.

໙໑໗. ປຎ຺ຈງ຺ຄວິປ຺ປຍຸຕ຺ຕນ຺ຕິ ປຎ຺ຈນີວຣຓວິປ຺ປຍຸຕ຺ຕໍ. ປຎ຺ຈງ຺ຄສໍຍຸຕນ຺ຕິ ວິຕກ຺ກາທີຫິ ຍຸຕ຺ຕໍ.

໙໒໐-໑. ເວປຸລ຺ລນ຺ຕິ ກມ຺ມຏ຺ຐານສ຺ສ ວິປຸລຠາວໍ. ຕຎ຺ຈ ປຏິຠາຄນິມິຕ຺ຕໍ ອຸປຈາຣໍ ວິຈາເຣຕ຺ວາ ວຑ຺ເຒຕຸໍ ວຏ຺ຏຕິ.

໙໒໘-໓໑. ປມາທໂຍຄິໂນຕິ ປມາທວເສນ ໂຍຄິສມ຺ປນ຺ນສ຺ສ ກາມສຫຄຕາ ສຎ຺ຎາມນກ຺ກາຣາ ມນສິກາຣາ ເຈ ຈຣນ຺ຕິ, ຕສ຺ສ ໂຍຄິໂນ ຕໍ ຌານໍ ຫານຠາຄິຍໍ ໂຫຕິ. ສຕິ ສນ຺ຕິຏ຺ຐເຕ ຕສ຺ມິໍ, ສນ຺ຕາ ຕທນຸຘມ຺ມຕາ ຕສ຺ມິໍ ປຐມຊ຺ຌາເນ ຕທນຸຘມ຺ມຕາ ຕສ຺ສ ປຐມຊ຺ຌານສ຺ສ ອນຸຣູປາ ສຕິ ນິກນ຺ຕິ ສນ຺ຕາ ສໍວິຊ຺ຊມານາ ສນ຺ຕິຏ຺ຐເຕ ສນ຺ຕິຏ຺ຐຕິ, ຕໍ ຌານໍ ມນ຺ທສ຺ສ ໂຍຄິໂນ ຐິຕິຠາຄິຍໍ ໂຫຕິ, ຐິຕິໍ ຠຊຕິ. ວິເສສຠາຄິຍໍ ໂຫຕິ, ວິເສສໍ ທຸຕິຍາທິຠາວນໍ ປາປຸຓາຕີຕິ ອຕ຺ໂຖ. ນິພ຺ພິທາສໍຍຸຕາ ສຎ຺ຎາ, ມນກ຺ກາຣາຕິ ນິພ຺ພິທາວິປສ຺ສນາສໍຍຸຕ຺ຕາ ສຎ຺ຎາມນກ຺ກາຣາ. ນິພ຺ເພຘຠາຄິຍນ຺ຕິ ໂລກຸຕ຺ຕຣຠາຄິຍໍ, ໂລກຸຕ຺ຕຣມຄ຺ຄຠາຄິຍນ຺ຕິ ອຕ຺ໂຖ.

໙໓໓. ອຍໍ ສມາປຕ຺ຕິ ອາສນ຺ນາກຸສລາຣໂຍ ອາສນ຺ນາກຸສລາຣິກາ ຍສ຺ມາ ຕກ຺ກຈາຣານໍ ຖູລຕ຺ຕາ ຈ, ຕສ຺ມາ ກາຣຓາ ອຍໍ ສມາປຕ຺ຕິ ອງ຺ຄທຸພ຺ພລາ.

໙໓໕. ນິກນ຺ຕິນ຺ຕິ ຕຓ຺ຫໍ. ປຣິຍາທາຍາຕິ ໂສສາເປຕ຺ວາ.

໙໓໖. ວິຘິນາຕິ ປຸພ຺ເພ ວຸຕ຺ຕວິຘິນາ. ສຕສ຺ສາຕິ ສຕິສມ຺ປນ຺ນສ຺ສ.

໙໓໘. ນິມິຕ຺ຕໍ ຕຸ ຕເທວ ຈາຕິ ຕເມວ ປຐມນິມິຕ຺ຕໍ ‘‘ປຖວີ ປຖວີ’’ອິຕິ ເອວໍ ມນສາ ກໂຣນ຺ຕສ຺ສ.

໙໔໓. ສມ຺ປສາທນນ຺ຕິ ສທ຺ຘາ. ມຊ຺ຌຕ຺ຕນ຺ຕິ ຕຕ຺ຣມຊ຺ຌຕ຺ຕຕາ.

໙໔໔. ທຸວງ຺ຄຫີນນ຺ຕິ ວິຕກ຺ກວິຈາຣຫີນໍ.

໙໔໘. ປີຕິ ນາມ ເຈຕໂສ ຈິຕ຺ຕສ຺ສ ອຸປ຺ປິລາປນໍ ອຸປ຺ປິລາປິຕຕ຺ຕໍ ຍໂຕ ຍສ຺ມາ ກາຣຓາ.

໙໖໑-໒. ອາສນ຺ນປີຕິໂທສາຕິ ປີຕິເຍວ ໂທສາ. ເອຕ຺ຖ ເອຕສ຺ມິໍ ຕຕິຍຊ຺ຌາເນ ຍເທວ ຍໍ ເອວ ສຸຂໍ ອິຕິ ເອວໍ ສຸຂໍ ເຈຕໂສ ອາໂຠໂຄ ມນສິກາໂຣ. ເອວໍ ອິມິນາ ປກາເຣນ ສຸຂສ຺ສ ຖູລຕ຺ຕາ ອຍໍ ສມາປຕ຺ຕິ ອງ຺ຄທຸພ຺ພລາ ໂຫຕິ.

໙໗໔-໕. ສຸຂໍ ອຸເປກ຺ຂາຍ ອາເສວນໍ ປນ ນ ໂຫຕິ ຍສ຺ມາ ອຸເປກ຺ຂາຍ ອາເສວນໍ ປນ ນ ໂຫຕິ, ຍສ຺ມາ ອຸເປກ຺ຂາສຫຄຕານິ ຊວນານິ ຊວນ຺ຕິ, ຕສ຺ມາ ຈຕຸຕ຺ຖຊ຺ຌານໍ ອຸເປກ຺ຂາສຫຄຕໍ ສມຸທີຣິຕໍ.

໙໗໖. ທຸຕິຍຊ຺ຌານໍ ທ຺ວິຘາ ທ຺ວີຫິ ໂກຏ຺ຐາເສຫິ ຐິຕໍ.

໙໗໙. ອຍໍ ອຠິຘມ຺ມາວຕາໂຣ ສຸມຘຸຣວຣຕຣວຈໂນ ກໍ ນຸ ຊນໍ ເນວ ຣຎ຺ຊຍຕິ, ອຕິນິສິຕວິສໂທ ພຸທ຺ຘິປ຺ປຈາໂຣ ຍສ຺ສ ໂສ ອຕິນິສິຕວິສທພຸທ຺ຘິປ຺ປຈາໂຣ, ໂສ ເຕນ ຊເນນ ເວທນີໂຍ ຊານິຕພ຺ໂພ.

ອິຕິ ອຠິຘມ຺ມາວຕາຣຏີກາຍ

ຣູປາວຈຣສມາຘິຠາວນານິທ຺ເທສວຓ຺ຓນາ ນິຏ຺ຐິຕາ.

ຈຸທ຺ທສໂມ ປຣິຈ຺ເຉໂທ.