໑໐. ທສໂມ ປຣິຈ຺ເຉໂທ

ຣູປວິຠາຄວຓ຺ຓນາ

໖໒໒. ວຸຕ຺ຕມາທິມ຺ຫິ ຍໍ ຣູປໍ, ຈິຕ຺ຕຊານມນນ຺ຕຣໍ ຍໍ ຣູປໍ ຈິຕ຺ຕເຈຕສິການໍ ອນນ຺ຕຣໍ ອາທິມ຺ຫິ ປກຣຓາທິມ຺ຫິ ‘‘ຈິຕ຺ຕໍ ເຈຕສິກໍ ຣູປ’’ນ຺ຕິອາທິນາ ວຈເນນ ອາຈຣິເຍນ ວຸຕ຺ຕໍ, ອິໂຕ ປຣໍ ອິທານິ ຕສ຺ສ ຣູປສ຺ສ ວິຠາວນໍ ສມາເສນ ສງ຺ເຂເປນ ກຣິສ຺ສໍ.

໖໒໓. ຍໍ ຣຸປ຺ປຕີຕິ ຣູປນ຺ຕິ ຍໍ ຘມ຺ມຊາຕໍ ຣຸປ຺ປຕິ ສີຕາທິນາ ວິຣຸທ຺ຘປຈ຺ຈເຍນ ວິກາຣມາປຊ຺ຊຕິ. ຕຖາ ຣູປຍຕີຕິ ຣູປໍ ຍໍ ຘມ຺ມຊາຕໍ ວຓ຺ຓວິກາຣມາປຊ຺ຊມານໍ ຫທຍງ຺ຄຕຠາວໍ ອຊ຺ຌາສຍໍ ປກາເສຕິ, ອິຕິ ຕສ຺ມາ ຣູປໍ, ກິໍ ຕໍ? ວຓ຺ຓາຍຕນໍ. ຣູປາຣູປຠວາຕີໂຕ, ສຸຣູໂປ ຣູປມພ຺ຣ຺ວິ ຠຄວາ ຣູປາຣູປຠວອຕີໂຕ ສຸຣູໂປ ຣູປໍ ອພ຺ຣ຺ວິ ກເຖສິ.

໖໒໕-໖. ມຫາຠູເຕນາຕິ ມຫນ຺ໂຕ ຠູໂຕ ອຸປ຺ປຕ຺ຕິ ເອຕສ຺ສາຕິ ມຫາຠູໂຕ, ເຕນ. ວຎ຺ຈກຕ຺ຕາ ມຫາຠູຕສມາຕິ ວາ.

໖໓໐. ນິຣຸປາທານມານໂສຕິ ອຸປາທານວິຣຫິຕຈິຕ຺ໂຕ.

໖໓໓. ຕສ຺ສ ສມ຺ປຕ຺ຕີຕິ ຕສ຺ສ ກິຈ຺ຈສ຺ສ ສມ຺ປຕ຺ຕິ.

໖໓໔. ອຸປພ຺ຣູຫນຣສາຕິ ວຑ຺ຒນກິຈ຺ຈາ.

໖໓໗. ອາສຍານຸສເຍ ຎາຓນ຺ຕິ ເອຕ຺ຖ ອາສໂຍ ນາມ

ສສ຺ສຕຸຈ຺ເຉທທິຏ຺ຐີ ຈ, ຂນ຺ຕີ ສຈ຺ຈານຸໂລມິກໍ;

ຍຖາຠູຕຎ຺ຈ ຍໍ ຎາຓໍ, ເອຕໍ ອາສຍສທ຺ທິຕໍ.

ອຕ຺ຖີຕິ ໂຂ, ກຈ຺ຈານ, ອຍເມໂກ ອນ຺ໂຕ, ອນ຺ໂຕ ໂຂ, ກຈ຺ຈານ, ອຕ຺ຖິ ອິຕິ ອຍໍ ເອໂກ ອນ຺ໂຕ ໂກຏ຺ຐາໂສ, ອຍໍ ສສ຺ສຕທິຏ຺ຐິ. ນຕ຺ຖີຕິ ໂຂ, ກຈ຺ຈານ, ອຍໍ ທຸຕິໂຍ ອນ຺ໂຕ, ອຍໍ ອຸຈ຺ເຉທທິຏ຺ຐິ. ຂນ຺ຕີ ສຈ຺ຈານຸໂລມິກນ຺ຕິ ຈຕຸນ຺ນໍ ສຈ຺ຈານໍ ອນຸໂລມິກຎາຓໍ, ສງ຺ຂາຣຸເປກ຺ຂາຎາຓນ຺ຕິ ອຕ຺ໂຖ. ຍຖາຠູຕຎ຺ຈ ຍໍ ຎາຓນ຺ຕິ ສປ຺ປຈ຺ຈຍນາມຣູປທສ຺ສນໍ ຎາຓໍ. ເອຕໍອາສຍສທ຺ທິຕນ຺ຕິ ເອຕໍ ອາສຍໍ ອິຕິ ກຖິຕໍ. ເອວໍ ວຸຕ຺ຕປ຺ປກາເຣນ ອາສເຍ ຎາຓໍ ນາມ. ອນຸສໂຍ ນາມ ທິຏ຺ຐານຸສຍາທໂຍ ອນຸສຍາ ສຕ຺ຕ. ອິນ຺ທ຺ຣິຍານໍ ປໂຣປເຣຕິ ປເຣ ອຘິກຠາເວນ ໂອປເຣ ຈ ຕິກ຺ຂານຸຠາເວນ ອຍໍ ສຕ຺ໂຕ ຕິກ຺ຂສທ຺ຘິນ຺ທ຺ຣິໂຍ ມຸທຸສທ຺ຘິນ຺ທ຺ຣິໂຍ ຫີນສທ຺ຘິນ຺ທ຺ຣິໂຍຕິ ອຕ຺ໂຖ. ສມາຘິນ຺ທ຺ຣິຍາທີສຸປິ ເອເສວ ນໂຍ. ອິຕິ ສຕ຺ຕານໍ ອິນ຺ທ຺ຣິຍານໍ ປຣໂອປເຣ ຎາຓໍ.

໖໓໘. ສພ຺ພຎ຺ຎຸຕາ ຎາຓນ຺ຕິ ຕິເຫຕຸກກາມາວຈຣກ຺ຣິຍາຈຕຸກ຺ກໍ ຄເຫຕພ຺ພໍ.

໖໔໑. ອກ຺ຂິກູເຏຫິ ມຕ຺ຖລຸງ຺ເຄນ ປຣິຈ຺ຉິນ຺ໂນ ອນ຺ຕໂຕ.

໖໔໕. ຠາວສມ຺ຠວສຓ຺ຐານາຕິ ອິຕ຺ຖິປຸມສມ຺ຠວຠູຕວຓ຺ຓາຍຕນໍ.

໖໔໗. ເອເຕ ທສ ຈຕຸສມຸຏ຺ຐານາ ສມ຺ຠາຣາ ຈຕູຫິ ປຈ຺ຈເຍຫິ ຈຕ຺ຕາລີສ ຠວນ຺ຕິ.

໖໕໒. ນິວິຏ຺ເຐຕິ ປຕິຏ຺ຐິເຕ.

໖໕໘. ອຸພ຺ພິອຘິການໍ ປຖວີອຘິການໍ.

໖໖໐-໒. ວິເສເສ ສຕີຕິ ນິສ຺ສຍຠູຕານໍ ຈຕຸນ຺ນໍ ວິເສເສ ສຕິ, ສພ຺ພໂສ ສພ຺ເພສໍ ວິເສສປຣິກປ຺ປນໍ ປຫາຍ ເອວ ກມ຺ມວິເສເສນ ປສາທານໍ ວິເສສຕາ ເຎຍ຺ຍາ.

໖໖໓. ສທ຺ທີຍຕີຕິ ອຸຈ຺ຈາຣີຍເຕ. ຣສນ຺ຕີຕິ ອສ຺ສາເທນ຺ຕິ.

໖໖໘. ປຣໂຕຕິ ປຐມກປ຺ປໂຕ ອປຣຠາເຄ ປຏິສນ຺ຘິຍໍ ຠາວທ຺ວຍໍ ສມຸຏ຺ຐາຕີຕິ ວິຎ຺ເຎຍ຺ຍໍ. ‘‘ປວຕ຺ເຕປິ ສມຸຏ຺ຐາຍາ’’ຕິອາທິກໍ ໂສຓກຸມາຣາທໂຍ ສນ຺ຘາຍ ວຸຕ຺ຕໍ.

໖໗໒. ນ ຕໍ ພ຺ຍຎ຺ຊນກາຣຓນ຺ຕິ ຕໍ ອິນ຺ທ຺ຣິຍທ຺ວຍໍ ພ຺ຍຎ຺ຊນສ຺ສ ກາຣຓໍ ນ ສິຍາ. ຕສ຺ສາຕິ ພ຺ຍຎ຺ຊນສ຺ສ.

໖໗໔. ອຸພ຺ພາຫນນ຺ຕິ ນີຫຣຓໍ.

໖໗໖-໗. ອນ຺ນປານາທິກໍ ວຕ຺ຖຸ ຍໍ ກມ຺ມຊໍ ອຄ຺ຄິໍ ຫຣຕິ, ເກວລໍ ເອກໍ ຫຸຕ຺ວາ ຕໍ ອນ຺ນປານາທິກໍ ວຕ຺ຖຸ ຊີວິຕໍ ປນ ປາເລຕຸໍ ນ ຈ ສກ຺ໂກຕິ. ເອກໂຕ ຊີວິຕໍ ປາເລຕຸຎ຺ຈ ສກ຺ໂກນ຺ຕິ.

ກາເຍນ ຣູປກາເຍນ ອຕ຺ຕໂນ ຠາວໍ ວິຎ຺ຎາເປນ຺ຕານໍ ຠາໂວ ກາຍຄ຺ຄຫຓານຸສາເຣນ ກາຍຄ຺ຄຫຓສ຺ສ ອນຸຈິນ຺ຕເນນ ຄຫິຕາຍ ວາໂຍຘາຕຸວິກາຣສງ຺ຂາຕາຍ ເອຕາຍ ຘມ຺ມຊາຕິຍາ ປຓ຺ຑິເຕຫິ ວິຎ຺ຎາຍເຕ. ອິຕິປິ ຕສ຺ມາ ກາຍວິຎ຺ຎຕ຺ຕິ.

໖໘໑. ເອກາວຊ຺ຊນວີຖິຍໍ ເຫຏ຺ຐາ ຉຫິ ຈິຕ຺ເຕຫິ ວາໂຍຘາຕຸສມຸຏ຺ຐິຕໍ ອຸປຕ຺ຖມ຺ຠໍ ລຠິຕ຺ວາ.

໖໘໔. ສຫ ສທ຺ເທນ ວາຕິ ສທ຺ເທນ ສເຫວ.

໖໙໐-໑. ເອຕາສໍ ປນ ລຫຸຕາທີນໍ ຕິສ຺ສນ຺ນໍ ປວຕ຺ຕິຍໍ ນິທສ຺ສນໍ ກມໂຕ ອາໂຣຄ຺ຍໍ ລຫຸຕາ, ມທ຺ທິຕໍ ຘມ຺ມໍ ມຸທຸຕາ, ຘນ຺ຕເຫມໍ ກມ຺ມຎ຺ຎຕາ ໂຫຕິ. ລຫຸຕາທິຕ຺ຕຍໍ ປນ ກມ຺ມໍ ກາຕຸໍ ນ ສກ຺ໂກຕິ, ອາຫາຣາທິຕ຺ຕຍໍເຍວ ລຫຸຕາທິຕ຺ຕຍໍ ກໂຣຕິ ຍສ຺ມາ, ຕໂຕ ຕໍ ຕິຊໍ ນາມ.

໖໙໓. ວຸຕ຺ຕມາກາຣນານຕ຺ຕາຕິ ເອຕ຺ຖ ອາກາຣນານຕ຺ຕາ ນາມ ອາຈຍາກາຣອນຸພນ຺ຘຕາກາຣວເສນ ວຸຕ຺ຕໍ. ເວເນຍ຺ຍານໍ ວເສນ ວາຕິ ເອເກ ເວເນຍ຺ຍາ ອາຈຍວເສນ ຊາຕິຣູປໍ ຊານນ຺ຕິ, ເອເກ ອນຸພນ຺ຘຕາວເສນ ຊານນ຺ຕິ. ອິຕິ ເວເນຍ຺ຍານໍ ຊານນວເສນ ຊາຕິຣູປໍ ທ຺ວິຘາ ວຸຕ຺ຕໍ.

໖໙໔. ສຠາວານປຄເມ ອຕ຺ຕໂນ ສຠາວສ຺ສ ອນປຄເມ ສຕິ.

ເຕ ມິທ຺ຘຣູປວາທາຈຣິຍາ ປຏິກ຺ຂິປິຕພ຺ພາ. ກຖໍ? ອທ຺ຘາ ມຸນິສິ ສມ຺ພຸທ຺ໂຘ, ນຕ຺ຖິ ນີວຣຓາ ຕວາຕິ ໂຍ ຕ຺ວໍ ອທ຺ຘາ ເອກນ຺ເຕນ ມຸນິ ອສິ ສມ຺ພຸທ຺ໂຘ ອສິ ນີວຣຓາ ຘມ຺ມາ ຕວ ຕຸຍ຺ຫໍ ນຕ຺ຖິ, ອິຕິ ວຈເນ ສເຈ ມິທ຺ຘໍ ນີວຣຓໍ ຣູເປ ປວິຏ຺ຐໍ ສິຍາ. ຠຄວຕາ ຣູປກາຍສ຺ສ ວິຊ຺ຊມານຕ຺ຕາ ‘‘ນຕ຺ຖິ ນີວຣຓາ ຕວາ’’ຕິ ວຈນໍ ວຕ຺ຕພ຺ພໍ ສິຍາ. ຖິນມິທ຺ຘນີວຣຓໍ ອວິຊ຺ຊານີວຣເຓນ ສຫ ນີວຣຓຎ຺ເຈວ ໂຫຕິ, ນີວຣຓສມ຺ປຍຸຕ຺ຕຎ຺ຈ ໂຫຕິ. ອິຕິ ສມ຺ປຍຸຕ຺ຕວຈນໂຕ ສມ຺ປຍຸຕ຺ຕສ຺ສ ຣູປສ຺ສ ອຠາວໂຕ ຕມ຺ປິ ນ ວຕ຺ຕພ຺ພໍ ສິຍາ. ນ ປຸເຣຊາຕປຈ຺ຈຍາຕິ ອຎ຺ຎມຎ຺ຎປຈ຺ຈຍາຕິ ອຕ຺ໂຖ. ສເຈ ຖິນມິທ຺ຘໍ ຣູປໍ ສິຍາ, ກຖໍ ອຣູເປປິ ອຎ຺ຎມຎ຺ຎໍ ສິຍາ, ນ ສິຍາຕິ ອຕ຺ໂຖ. ອຣູເປປິ ກາມຈ຺ຉນ຺ທນີວຣຓໍ ປຏິຈ຺ຈ ຖິນມິທ຺ຘນີວຣຓໍ ອຸປ຺ປຊ຺ຊຕິ. ອິຕິ ວຈເນນ ຈ ນ ມິທ຺ຘຣູປໍ ສິຍາ, ອຣູເປ ກຖໍ ສິຍາຕິ ອຕ຺ໂຖ. ອຣູປເມວ ມິທ຺ຘໍ ອິຕິ ປຏິກ຺ຂິປິຕພ຺ພາ. ອຣູເປປິ ເອຕສ຺ສ ມິທ຺ຘສ຺ສ ອຸປ຺ປຕ຺ຕິຍາ ສາຘກວຈນໂຕ ນິຏ຺ຐໍ ເອຕ຺ຖ ຈ ອວຄນ຺ຕພ຺ພໍ ‘‘ອຣູປ’’ນ຺ຕິ ວິຎ຺ຎຸນາ.

໗໐໕-໖. ກມ຺ເມນ ວີສຕິ ຣູປາຕິ ອຏ຺ຐິນ຺ທ຺ຣິຍວຕ຺ຖຸອຏ຺ຐາວິນິພ຺ໂຠຄສນ຺ຕຕູປຈຍາກາສາ ກມ຺ມຊາ. ເຈຕສາ ວິຎ຺ຎຕ຺ຕິທ຺ວຍສທ຺ທລຫຸຕາທິຕ຺ຕຍອວິນິພ຺ໂຠຄສນ຺ຕຕູປຈຍາກາສາ ຈິຕ຺ຕຊາ. ອຸຕຸນາ ສທ຺ທລຫຸຕາທິຕ຺ຕຍອວິນິພ຺ໂຠຄສນ຺ຕຕູປຈຍາກາສາ ອຸຕຸຊາ. ອາຫາຣໂຕ ລຫຸຕາທິຕ຺ຕຍອວິນິພ຺ໂຠຄສນ຺ຕຕູປຈຍາກາສາ ອາຫາຣຊາ.

໗໐໗-໑໗. ຊາເຍຍ຺ຍຸໍ ຍທິ ຕານິປີຕິ ຕານິ ຊຣຕາອນິຈ຺ຈຕາຣູປາ ຍທິ ຊາເຍຍ຺ຍຸໍ, ເອວໍ ສນ຺ເຕ ຕຸ ເຕສໍ ຊຣຕາອນິຈ຺ຈຕາ ເຠທາ ສິຍຸໍ. ຫິ ສຈ຺ຈໍ ວຈນໍ ປາໂກ ນ ປຈ຺ຈຕິ, ເຠໂທ ວາ ນ ຈ ຠິຊ຺ຊຕິ ຍສ຺ມາ, ຕສ຺ມາ ເຕສໍ ປາກເຠທາ ສິຍຸນ຺ຕິ, ຕໍ ວຈນໍ ນຕ຺ຖິ. ເອຕໍ ຊຣຕາອນິຈ຺ຈຕາທ຺ວຍໍ ຊາຕສ຺ສ ນິປ຺ຜນ຺ນຣູປສ຺ສ ປາກເຠທຕ຺ຕາ ນ ຊາຍຕິ. ສິຍາ ກສ຺ສຈິ ພຸທ຺ເຘຕ຺ຖາຕິ ເອຕ຺ຖ ຊຣຕາອນິຈ຺ຈຕາວິນິຈ຺ຉຍາຘິກາເຣ ກສ຺ສຈິ ຊນສ຺ສ ພຸທ຺ຘິ ຎາຓໍ ຍທິ ສິຍາ, ‘‘ຣູປສ຺ສູປຈໂຍ’’ຕິ ວຈເນນ ‘‘ຊາຕິ ຊາຍຕີ’’ຕິ ວຈນໍ ທີປິຕໍ ຍຖາ, ເອວໍ ຕຖາ ປາໂກປິ ປຈ຺ຈຕຸ, ເຠໂທປິ ປຣິຠິຊ຺ຊຕຸ, ເອວໍ ພຸທ຺ຘິ ສິຍາ. ຊາຕິ ນ ເຈວ ຊາຍເຕ. ອິຕິ ອິມິນາ ປກາເຣນ ວິຠາວິນາ ເຎຍ຺ຍາ. ຊາຕິ ຊາຍມານສ຺ສ ນິປ຺ຜນ຺ນຣູປສ຺ສ ນິພ຺ພຕ຺ຕິ ນາມ ປກາສິຕາ. ຕຕ຺ຖ ຍສ຺ສ ສິຍາ ຕຕ຺ຖ ວຈເນ ຍສ຺ສ ຊນສ຺ສ ພຸທ຺ຘິ ສິຍາ. ເຍສໍ ນິປ຺ຜນ຺ນຣູປຘມ຺ມານໍ ຊາຕິ ອຕ຺ຖິ, ສາ ຊາຕິ ອຠິນິພ຺ພຕ຺ຕິສມ຺ມຸຕິໍ ຕປ຺ປຈ຺ຈຍຕ຺ຕໂວຫາຣໍ ເຕສໍ ນິປ຺ຜນ຺ນຣູປຘມ຺ມານໍ ປຈ຺ຈຍຏ຺ເຐນ ລທ຺ຘໂວຫາຣໍ ກມ຺ມຊາທິກໍ ໂວຫາຣໍ ລຠເຕວ ຍຖາ, ຕຖາ ເຕສໍ ນິປ຺ຜນ຺ນຣູປຘມ຺ມານໍ ເຕ ປາກເຠທາ ອຠິນິພ຺ພຕ຺ຕິສມ຺ມຸຕິໍ ນາມ ຕປ຺ປຈ຺ຈຍຕ຺ຕໂວຫາຣໍ ລຠນ຺ຕິ, ອິຕິ ພຸທ຺ຘິ ສິຍາ. ຕສ຺ສ ຊນສ຺ສ ເອວໍ ວຕ຺ຕພ຺ພໍ – ອິທໍ ສນ຺ຕຕູປຈຍທ຺ວຍໍ ກມ຺ມາທິສມ຺ຠວໍ ໂຫຕິ ຍຖາ, ເອວໍ ປາກເຠທາ ຕໍ ກມ຺ມາທິສມ຺ຠວໂວຫາຣໍ ກທາຈິປິ ນ ລຠນ຺ຕິ. ຫິ ສຈ຺ຈໍ ວຈນໍ ກສ຺ມາ ກາຣຓາ ຊນການໍ ກມ຺ມາທິປຈ຺ຈຍານໍ ອານຸຠາວສງ຺ຂາເຕ ຂຓຸປ຺ປາເທ ເຕສໍ ປາກເຠທານໍ ອຠາວໂຕ ນ ລຠນ຺ຕິ. ວຸຕ຺ຕປ຺ປກາເຣນ ຂຓຸປ຺ປາເທ ຊາຕິປຣມ຺ປຣາຠາວໂຕ ສາ ຊາຕິ ລພ຺ຠເຕ, ຕສ຺ມາ ກາຣຓາ ຊາຕິ ເອວ ອຠິນິພ຺ພຕ຺ຕິສມ຺ມຸຕິໍ ປຈ຺ຈຍຕ຺ຕໂວຫາຣໍ ລຠຕິ, ອິຕຣໍ ຊຣຕາອນິຈ຺ຈຕາທ຺ວຍໍ ປນ ນ ລຠຕິ. ຕໍ ຊຣຕາອນິຈ຺ຈຕາທ຺ວຍໍ ຊິຍ຺ຍຕິ ອິຕິ ຠິຊ຺ຊຕິ ອິຕິ ວາ ນ ວຕ຺ຕພ຺ພໍ ໂຫຕິ. ກສ຺ມາ? ກມ຺ມາທິປຈ຺ຈຍານໍ ອານຸຠາວກ຺ຂເຓ ຕສ຺ສ ຊຣຕາອນິຈ຺ຈຕາທ຺ວຍສ຺ສ ປຈ຺ຈຍານໍ ອຠາວໂຕ.

໗໑໘-໒໓. ອນິຈ຺ຈໍ ສງ຺ຂຕຎ຺ເຈຕໍ ຊຣາມຣຓໍ ອນິຈ຺ຈສງ຺ຂາຕໍ ອິຕິປິ ວຈນສ຺ສ ຠຄວຕາ ວຸຕ຺ຕຕ຺ຕາ ຊຣຕາອນິຈ຺ຈຕາທ຺ວຍໍ ຊາຍຕິ, ເອວໍ ອິຕິ ຕ຺ວໍ ເຈ ມຎ຺ຎສິ, ເອວໍ ‘‘ຊາຍຕິ ເອວາ’’ຕິ ວຈນໍ ຠຄວຕາ ນ ວຕ຺ຕພ຺ພໍ. ຫິ ກສ຺ມາ ກາຣຓາ? ‘‘ອນິຈ຺ຈໍ ສງ຺ຂຕຎ຺ເຈຕໍ, ຊຣາມຣຓມິຈ຺ຈປີ’’ຕິວຸຕ຺ຕຠາວາທິນາ ອາກາຣເທສນາປຣິຍາເຍນ ເລເສນ ຠຄວຕາ ອນິຈ຺ຈານໍ ນິປ຺ຜນ຺ນຣູປຘມ຺ມານໍ ຊຣາມຣຓສງ຺ຂາຕໍ ສຠາວໂຕ ຊຣາມຣຓໍ ອນິຈ຺ຈໍ ສງ຺ຂຕຎ຺ຈາປິ ຈິຕ຺ຕຊານໍ ວິກາຣຕ຺ຕາ ວິຎ຺ຎຕ຺ຕິໂຍ ‘‘ຈິຕ຺ຕຊາ’’ຕິ ວຸຕ຺ຕາ ວິຍ, ຕຖາ ເອວໍ ຠຄວຕາ ວຸຕ຺ຕໍ. ຍທິ ເອວໍ ອຕ຺ເຖ ສຕິ ເອຕໍ ຣຸປ຺ປນລກ຺ຂຓຕ຺ຕຍໍ ອຊາຕຕ຺ຕາ ຈ ສພ຺ພຖາ ສພ຺ພາກາເຣນ ຂໍປຸປ຺ຜໍວ ນຕ຺ຖິ, ອສງ຺ຂຕໍ ນິພ຺ພານໍ ວິຍ ນິຈ຺ຈໍວາຕິ ຈ ໂຈທໂກ ວເທຍ຺ຍ, ນຕ຺ຖິ ນິຈ຺ຈນ຺ຕິ ອິທໍ ອຸຠຍວຈນໍ ໂນ ຠຄວຕາ ວຕ຺ຕພ຺ພໍ. ກສ຺ມາ? ນິສ຺ສຍຘມ຺ມານໍ ອາຍຕ຺ຕຠາເວນ ປວຕ຺ຕິໂຕ ປຖວິຍາທີນໍ ນິສ຺ສຍານໍ ຠາເວ ສຕິ ຕສ຺ສ ລກ຺ຂຓຕ຺ຕຍສ຺ສ ຠາວໂຕ, ຕສ຺ມາ ຂໍປຸປ຺ຜໍວ ຕໍ ລກ຺ຂຓຕ຺ຕຍໍ ນ ນຕ຺ຖິ, ອຕ຺ຖີຕິ ອຕ຺ໂຖ. ປຖວີອາທີນໍ ອຠາເວ ຕໍ ລກ຺ຂຓຕ຺ຕຍໍ ນ ຈ ລພ຺ຠຕິ ຍສ຺ມາ, ຕສ຺ມາ ນິພ຺ພານໍ ວິຍ, ຕຖາ ນິຈ຺ຈໍ ນ.

໗໒໔-໕. ປຣິຈ຺ເຉທາທໂຍ ອນິປ຺ຜນ຺ນາ. ເຕສເມວ ຈ ຣູປານໍ ເຕສເມວ ນິປ຺ຜນ຺ນຣູປຘມ຺ມານໍ ວິກາຣຕ຺ຕາ ນິປ຺ຜນ຺ນາ ເຈວ ສງ຺ຂຕາ ເສສວເສນ ວຸຕ຺ຕານໍ ປເຠທກໂຕຕິ ທສ຺ສນໂຕ. ເສສໍ ອຸຕ຺ຕານຕ຺ຖເມວ.

໗໖໗. ຄນ຺ຕຸໍ ປນິຈ຺ເຉ ປິຏເກຠິຘມ຺ເມ,

ໂຍ ຘມ຺ມເສນາປຕິນາ ສມຕ຺ຕໍ;

ຫິຕຕ຺ຖິນາ ເຕນ ຈ ຠິກ຺ຂຸນາຍໍ,

ສກ຺ກຈ຺ຈ ສມ຺ມາ ປນ ສິກ຺ຂິຕພ຺ໂພ.

ໂຍ ຠິກ຺ຂຸ ອຠິຘມ຺ເມ ປິຏເກ ຘມ຺ມເສນາປຕິນາ ສມຕ຺ຕໍ ສຠາວໍ ຄນ຺ຕຸໍ ປາປຸຓິຕຸໍ ອິຈ຺ເຉຍ຺ຍ, ເຕນ ຈ ຠິກ຺ຂຸນາ ຫິຕຕ຺ຖິນາ ສກ຺ກຈ຺ຈໍ ອາທເຣນ ສມ຺ມາ ຕີຣຓຈິນ຺ຕນສຊ຺ຌາຍເນຫິ ອຍໍ ອຠິຘມ຺ມາວຕາໂຣ ສິກ຺ຂິຕພ຺ໂພ.

ອິຕິ ອຠິຘມ຺ມາວຕາຣຏີກາຍ

ຣູປວິຠາຄວຓ຺ຓນາ ນິຏ຺ຐິຕາ.

ທສໂມ ປຣິຈ຺ເຉໂທ.