໑໑. ເອກາທສໂມ ປຣິຈ຺ເຉໂທ

ນິພ຺ພານນິທ຺ເທສວຓ຺ຓນາ

໗໖໙. ຠວາຠວໍ ວິນນໂຕຕິ ຂຸທ຺ທກໍ, ມຫນ຺ຕໍ ຠວໍ ສິພ຺ພນໂຕ. ສພ຺ພູປຘິປຏິນິສ຺ສຄ຺ໂຄຕິ ສພ຺ເພຫິ ສງ຺ຂາຣູປຘິກິເລສູປຘິຂນ຺ຘູປຘີຫິ ປຏິນິສ຺ສຊ຺ຊນໍ. ອຈ຺ຈຸຕິຣສໍ ອຈຸຕິສມ຺ປຕ຺ຕິກໍ. ນິພ຺ພານໍ ປຸຏ຺ເຐນາຕິ ສຸຄເຕນ ນິພ຺ພານໍ ປຸຏ຺ເຐນ ສາຣິປຸຕ຺ຕຕ຺ເຖເຣນ. ອຸຠິນ຺ນໍ ສຸຕ຺ຕານນ຺ຕິ ຘມ຺ມເສນາປຕິວຸຕ຺ຕານໍ ທ຺ວິນ຺ນໍ ສຸຕ຺ຕານນ຺ຕິ ອຕ຺ໂຖ. ຂຍສ຺ສ ອຸປນິສ຺ສຍຕ຺ຕາຕິ ຂຍສ຺ສ ພລວກາຣຓຕ຺ຕາ. ປຸຖູນໍ ຘມ຺ມານໍ ອປ຺ປມຕ຺ຕກ຺ຂເຓ ຣາຄາທິກ຺ຂຍມຕ຺ຕໍ ນິພ຺ພານໍ ຠເວຍ຺ຍ. ສພ຺ເພ ພາລປຸຖຸຊ຺ຊນາ ສມຘິຄຕນິພ຺ພານາ ສຈ຺ຉິກຕນິໂຣຘາ ຠເວຍ຺ຍຸໍ. ກິຎ຺ຈ ຠິຍ຺ໂຍ ກິໍ ອຸຕ຺ຕຣິ ກາຣຓຎ຺ຈ ອຕ຺ຖີຕິ ອຕ຺ໂຖ. ຣາຄາທີນໍ ສງ຺ຂຕຕ຺ຕາ ເຕສໍ ສງ຺ຂຕານໍ ນິພ຺ພານໍ ສງ຺ຂຕລກ຺ຂຓໍ ຠເວຍ຺ຍ. ກິໍ ປເນຕ຺ຖາຕິ ເອເຕສຸ ຂເຓສຸ ກິໍ ປນ ຂເຓ ຕ຺ວໍ ວເທສິ. ຂີເຓສ຺ເວວາຕິ ຠວາທີສຸ ຂີເຓສຸ ເອວ. ນິຣຸຕ຺ຕໂຣຕິ ນິປ຺ຜນ຺ນຫາໂຣ.

໗໗໑. ອສ຺ສທ຺ໂຘຕິ ພາຫິຣສທ຺ຘາຍ ວິຣຫິໂຕ. ວນ຺ຕາໂສຕິ ວນ຺ຕາ ວມິຕາ ອາສາ ຕຓ຺ຫາ ເຍນາຕິ ວນ຺ຕາໂສ.

ນິສ຺ສຣຓິຍາຕິ ນິສ຺ສຣເຓ ນິຍຸຕ຺ຕາ. ຍທິທໍ ເນກ຺ຂມ຺ມໍ ຍໍ ອິທໍ ກາມານໍ ເອຕໍ ນິສ຺ສຣຓໍ ນິໂຣໂຘ, ຕສ຺ສ ກິຎ຺ຈິຠູຕສ຺ສ ສງ຺ຂຕສ຺ສ ປຏິຈ຺ຈສມຸປ຺ປນ຺ນຘມ຺ມຊາຕສ຺ສ ນິໂຣໂຘ ນິສ຺ສຣຓນ຺ຕິ, ເອວໍ ອິມິນາ ປກາເຣນ ວຸຕ຺ຕສ຺ສ ຕສ຺ສ ນິສ຺ສຣຓນາມກສ຺ສ ອຠາວປ຺ປຕ຺ຕິໂທສໂຕ ນິສ຺ສຣຓນາມການໍ ປຐມຊ຺ຌານອາກາສານຎ຺ຈາຍຕນານມ຺ປິ ອຠາໂວ ຠເວຍ຺ຍ. ອຕ຺ຖິ ນິສ຺ສຣຓນ຺ຕິ ອຕ຺ຖິ ນິພ຺ພານໍ. ອຸປ຺ປາທາທີນນ຺ຕິ ອຸປ຺ປາທຏ຺ຐິຕິຠງ຺ຄານໍ. ປປຎ຺ຈາຠາວໂຕຕິ ຕຓ຺ຫາມານທິຏ຺ຐີນໍ ອຠາວໂຕ.

໗໗໒. ອປໂລກິຕນ຺ຕິ ອທສ຺ສນຘມ຺ມໍ.

໗໗໔. ອພ຺ຍາປຊ຺ຌນ຺ຕິ ນິທຸກ຺ຂໍ. ອກ຺ຂຣນ຺ຕິ ອຂຣໍ.

໗໗໗. ສທ຺ຘາພຸທ຺ຘິກຣໍ ຕຖາຄຕມເຕ ຊິນວຈເນ ສມ຺ໂມຫວິທ຺ຘໍສນໍ ປຎ຺ຎາສມ຺ຠວໍ ປຎ຺ຎາກາຣຓໍ ສມ຺ປສາທນກຣໍ. ອຕ຺ຖພ຺ຍຎ຺ຊນສາລິນນ຺ຕິ ອຕ຺ຖພ຺ຍຎ຺ຊນສາຣວນ຺ຕໍ ສຸມຘຸຣໍ ສາຣຎ຺ຎຸ ຊິນສາສນສາຣຎ຺ຎູ ວິມ຺ຫາປນໍ ອຈ຺ເຉຣກຣໍ ອິມໍ ເອວໍ ວຸຕ຺ຕປ຺ປກາຣໍ ອຠິຘມ຺ມາວຕາຣໍ ໂຍ ຊານາຕິ, ໂສ ຊໂນ ຄມ຺ຠີເຣ ນິປຸເຓ ນິປຸຓຎາຓໂຄຈເຣ ອຠິຘມ຺ມປິຏເກ ປທໍ ນິຏ຺ຐໍ ອຸຕ຺ຕມສນ຺ນິຏ຺ຐານໍ ຍາຕິ ປາປຸຓາຕິ.

ອິຕິ ອຠິຘມ຺ມາວຕາຣຏີກາຍ

ນິພ຺ພານນິທ຺ເທສວຓ຺ຓນາ ນິຏ຺ຐິຕາ.

ເອກາທສໂມ ປຣິຈ຺ເຉໂທ.