ທ຺ວາຣສງ຺ຄຫວຓ຺ຓນາ

໓໕. ທ຺ວາຣານໍ, ທ຺ວາຣປ຺ປວຕ຺ຕຈິຕ຺ຕານຎ຺ຈ ປຣິຈ຺ເຉທວເສນ ສງ຺ຄໂຫ ທ຺ວາຣສງ຺ຄໂຫ. ອາວຊ຺ຊນາທີນໍ ອຣູປຘມ຺ມານໍ ປວຕ຺ຕິມຸຂຠາວໂຕ ທ຺ວາຣານິ ວິຍາຕິ ທ຺ວາຣານິ.

໓໖. ຈກ຺ຂຸເມວາຕິ ປສາທຈກ຺ຂຸເມວ.

໓໗. ອາວຊ຺ຊນາທີນໍ ມນານໍ, ມໂນເຍວ ວາ ທ຺ວາຣນ຺ຕິ ມໂນທ຺ວາຣໍ. ຠວງ຺ຄນ຺ຕິ ອາວຊ຺ຊນານນ຺ຕຣໍ ຠວງ຺ຄໍ. ເຕນາຫຸ ໂປຣາຓາ –

‘‘ສາວຊ຺ຊນໍ ຠວງ຺ຄນ຺ຕຸ, ມໂນທ຺ວາຣນ຺ຕິ ວຸຈ຺ຈຕີ’’ຕິ;

໓໙. ຕຕ຺ຖາຕິ ເຕສຸ ຈກ຺ຂາທິທ຺ວາເຣສຸ ຈກ຺ຂຸທ຺ວາເຣ ຉຈຕ຺ຕາລີສ ຈິຕ຺ຕານິ ຍຖາຣຫມຸປ຺ປຊ຺ຊນ຺ຕີຕິ ສມ຺ພນ຺ໂຘ. ປຎ຺ຈທ຺ວາຣາວຊ຺ຊນເມກໍ, ຈກ຺ຂຸວິຎ຺ຎາຓາທີນິ ອຸຠຍວິປາກວເສນ ສຕ຺ຕ, ໂວຏ຺ຐພ຺ພນເມກໍ, ກາມາວຈຣຊວນານິ ຈ ກຸສລາກຸສລນິຣາວຊ຺ຊນກິຣິຍວເສນ ເອກູນຕິໍສ, ຕທາຣມ຺ມຓານິ ຈ ອຄ຺ຄຫິຕຄ຺ຄຫເຓນ ອຏ຺ເຐວາຕິ ຉຈຕ຺ຕາລີສ. ຍຖາຣຫນ຺ຕິ ອິຏ຺ຐາທິອາຣມ຺ມເຓ ໂຍນິໂສອໂຍນິໂສມນສິກາຣນິຣນຸສຍສນ຺ຕານາທີນໍ ອນຸຣູປວເສນ. ສພ຺ພຖາປີຕິ ອາວຊ຺ຊນາທິຕທາຣມ຺ມຓປຣິໂຍສາເນນ ສພ຺ເພນປິ ປກາເຣນ ກາມາວຈຣາເນວາຕິ ໂຍຊນາ. ສພ຺ພຖາປິ ຈຕຸປຎ຺ຎາສ ຈິຕ຺ຕານີຕິ ວາ ສມ຺ພນ຺ໂຘ. ສພ຺ພຖາປິ ຕໍຕໍທ຺ວາຣິກວເສນ ຐິຕານິ ອຄ຺ຄຫິຕຄ຺ຄຫເຓນ ຈກ຺ຂຸທ຺ວາຣິເກສຸ ຉຈຕ຺ຕາລີສຈິຕ຺ເຕສຸ ໂສຕວິຎ຺ຎາຓາທີນໍ ຈຕຸນ຺ນໍ ຍຸຄຬານໍ ປກ຺ເຂເປນ ຈຕຸປຎ຺ຎາສປີຕ຺ຍຕ຺ໂຖ.

໔໑. ຈກ຺ຂາທິທ຺ວາເຣສຸ ອປ຺ປວຕ຺ຕນໂຕ, ມໂນທ຺ວາຣສງ຺ຂາຕຠວງ຺ຄໂຕ ອາຣມ຺ມຓນ຺ຕຣຄ຺ຄຫຓວເສນ ອປ຺ປວຕ຺ຕິໂຕ ຈ ປຏິສນ຺ຘາທິວເສນ ປວຕ຺ຕານິ ເອກູນວີສຕິ ທ຺ວາຣວິມຸຕ຺ຕານິ.

໔໒. ທ຺ວິປຎ຺ຈວິຎ຺ຎາຓານິ ສກສກທ຺ວາເຣ, ຉພ຺ພີສຕິ ມຫຄ຺ຄຕໂລກຸຕ຺ຕຣຊວນານິ ມໂນທ຺ວາເຣເຍວ ອຸປ຺ປຊ຺ຊນໂຕ ຉຕ຺ຕິໍສ ຈິຕ຺ຕານິ ຍຖາຣຫໍ ສກສກທ຺ວາຣານຸຣູປໍ ເອກທ຺ວາຣິກຈິຕ຺ຕານິ.

໔໕. ປຎ຺ຈທ຺ວາເຣສຸ ສນ຺ຕີຣຓຕທາຣມ຺ມຓວເສນ, ມໂນທ຺ວາເຣ ຈ ຕທາຣມ຺ມຓວເສນ ປວຕ຺ຕນໂຕ ຉທ຺ວາຣິການິ ເຈວ ປຏິສນ຺ຘາທິວສປ຺ປວຕ຺ຕິຍາ ທ຺ວາຣວິມຸຕ຺ຕານິ ຈ.

໔໗. ປຎ຺ຈທ຺ວາຣິການິ ຈ ຉທ຺ວາຣິການິ ຈ ປຎ຺ຈຉທ຺ວາຣິການິ. ຉທ຺ວາຣິການິ ຈ ຕານິ ກທາຈິ ທ຺ວາຣວິມຸຕ຺ຕານິ ຈາຕິ ຉທ຺ວາຣິກວິມຸຕ຺ຕານິ. ອຖ ວາ ຉທ຺ວາຣິການິ ຈ ຉທ຺ວາຣິກວິມຸຕ຺ຕານິ ຈາຕິ ຉທ຺ວາຣິກວິມຸຕ຺ຕານີຕິ ເອກເທສສຣູເປກເສໂສ ທຏ຺ຐພ຺ໂພ.

ທ຺ວາຣສງ຺ຄຫວຓ຺ຓນາ ນິຏ຺ຐິຕາ.