໒. ທຸຕິຍວິຫາຣສຸຕ຺ຕໍ

໑໒. ສາວຕ຺ຖິນິທານໍ. ‘‘ອິຈ຺ຉາມຫໍ, ຠິກ຺ຂເວ, ເຕມາສໍ ປຏິສລ຺ລິຍິຕຸໍ. ນມ຺ຫິ ເກນຈິ ອຸປສງ຺ກມິຕພ຺ໂພ, ອຎ຺ຎຕ຺ຣ ເອເກນ ປິຓ຺ຑປາຕນີຫາຣເກນາ’’ຕິ. ‘‘ເອວໍ, ຠນ຺ເຕ’’ຕິ ໂຂ ເຕ ຠິກ຺ຂູ ຠຄວໂຕ ປຏິສ຺ສຸຕ຺ວາ ນາສ຺ສຸຘ ໂກຈິ ຠຄວນ຺ຕໍ ອຸປສງ຺ກມຕິ, ອຎ຺ຎຕ຺ຣ ເອເກນ ປິຓ຺ຑປາຕນີຫາຣເກນ.

ອຖ ໂຂ ຠຄວາ ຕສ຺ສ ເຕມາສສ຺ສ ອຈ຺ຈເຍນ ປຏິສລ຺ລານາ ວຸຏ຺ຐິໂຕ ຠິກ຺ຂູ ອາມນ຺ເຕສິ – ‘‘ເຍນ ສ຺ວາຫໍ, ຠິກ຺ຂເວ, ວິຫາເຣນ ປຐມາຠິສມ຺ພຸທ຺ໂຘ ວິຫຣາມິ, ຕສ຺ສ ປເທເສນ ວິຫາສິໍ. ໂສ ເອວໍ ປຊານາມິ – ‘ມິຈ຺ຉາທິຏ຺ຐິປຈ຺ຈຍາປິ ເວທຍິຕໍ; ມິຈ຺ຉາທິຏ຺ຐິວູປສມປຈ຺ຈຍາປິ ເວທຍິຕໍ; ສມ຺ມາທິຏ຺ຐິປຈ຺ຈຍາປິ ເວທຍິຕໍ; ສມ຺ມາທິຏ຺ຐິວູປສມປຈ຺ຈຍາປິ ເວທຍິຕໍ…ເປ… ມິຈ຺ຉາສມາຘິປຈ຺ຈຍາປິ ເວທຍິຕໍ; ມິຈ຺ຉາສມາຘິວູປສມປຈ຺ຈຍາປິ ເວທຍິຕໍ, ສມ຺ມາສມາຘິປຈ຺ຈຍາປິ ເວທຍິຕໍ; ສມ຺ມາສມາຘິວູປສມປຈ຺ຈຍາປິ ເວທຍິຕໍ; ຉນ຺ທປຈ຺ຈຍາປິ ເວທຍິຕໍ; ຉນ຺ທວູປສມປຈ຺ຈຍາປິ ເວທຍິຕໍ; ວິຕກ຺ກປຈ຺ຈຍາປິ ເວທຍິຕໍ; ວິຕກ຺ກວູປສມປຈ຺ຈຍາປິ ເວທຍິຕໍ; ສຎ຺ຎາປຈ຺ຈຍາປິ ເວທຍິຕໍ; ສຎ຺ຎາວູປສມປຈ຺ຈຍາປິ ເວທຍິຕໍ; ຉນ຺ໂທ ຈ ອວູປສນ຺ໂຕ ໂຫຕິ, ວິຕກ຺ໂກ ຈ ອວູປສນ຺ໂຕ ໂຫຕິ, ສຎ຺ຎາ ຈ ອວູປສນ຺ຕາ ໂຫຕິ, ຕປ຺ປຈ຺ຈຍາປິ ເວທຍິຕໍ; ຉນ຺ໂທ ຈ ວູປສນ຺ໂຕ ໂຫຕິ, ວິຕກ຺ໂກ ຈ ວູປສນ຺ໂຕ ໂຫຕິ, ສຎ຺ຎາ ຈ ວູປສນ຺ຕາ ໂຫຕິ, ຕປ຺ປຈ຺ຈຍາປິ ເວທຍິຕໍ; ອປ຺ປຕ຺ຕສ຺ສ ປຕ຺ຕິຍາ ອຕ຺ຖິ ອາຍາມໍ [ວາຍາມໍ (ສີ. ສ຺ຍາ.)], ຕສ຺ມິມ຺ປິ ຐາເນ ອນຸປ຺ປຕ຺ເຕ ຕປ຺ປຈ຺ຈຍາປິ ເວທຍິຕ’’’ນ຺ຕິ. ທຸຕິຍໍ.