໓. ໂຍຘາຊີວສຸຕ຺ຕໍ

໓໕໕. ອຖ ໂຂ ໂຍຘາຊີໂວ ຄາມຓິ ເຍນ ຠຄວາ ເຕນຸປສງ຺ກມິ; ອຸປສງ຺ກມິຕ຺ວາ…ເປ… ເອກມນ຺ຕໍ ນິສິນ຺ໂນ ໂຂ ໂຍຘາຊີໂວ ຄາມຓິ ຠຄວນ຺ຕໍ ເອຕທໂວຈ – ‘‘ສຸຕໍ ເມຕໍ, ຠນ຺ເຕ, ປຸພ຺ພການໍ ອາຈຣິຍປາຈຣິຍານໍ ໂຍຘາຊີວານໍ ຠາສມານານໍ – ‘ໂຍ ໂສ ໂຍຘາຊີໂວ ສງ຺ຄາເມ ອຸສ຺ສຫຕິ ວາຍມຕິ, ຕເມນໍ ອຸສ຺ສຫນ຺ຕໍ ວາຍມນ຺ຕໍ ປເຣ ຫນນ຺ຕິ ປຣິຍາປາເທນ຺ຕິ, ໂສ ກາຍສ຺ສ ເຠທາ ປຣໍ ມຣຓາ ປຣຊິຕານໍ ເທວານໍ ສຫພ຺ຍຕໍ ອຸປປຊ຺ຊຕີ’ຕິ. ອິຘ ຠຄວາ ກິມາຫາ’’ຕິ? ‘‘ອລໍ, ຄາມຓິ, ຕິຏ຺ຐເຕຕໍ; ມາ ມໍ ເອຕໍ ປຸຈ຺ຉີ’’ຕິ. ທຸຕິຍມ຺ປິ ໂຂ…ເປ… ຕຕິຍມ຺ປິ ໂຂ ໂຍຘາຊີໂວ ຄາມຓິ ຠຄວນ຺ຕໍ ເອຕທໂວຈ – ‘‘ສຸຕໍ ເມຕໍ, ຠນ຺ເຕ, ປຸພ຺ພການໍ ອາຈຣິຍປາຈຣິຍານໍ ໂຍຘາຊີວານໍ ຠາສມານານໍ – ‘ໂຍ ໂສ ໂຍຘາຊີໂວ ສງ຺ຄາເມ ອຸສ຺ສຫຕິ ວາຍມຕິ, ຕເມນໍ ອຸສ຺ສຫນ຺ຕໍ ວາຍມນ຺ຕໍ ປເຣ ຫນນ຺ຕິ ປຣິຍາປາເທນ຺ຕິ, ໂສ ກາຍສ຺ສ ເຠທາ ປຣໍ ມຣຓາ ປຣຊິຕານໍ ເທວານໍ ສຫພ຺ຍຕໍ ອຸປປຊ຺ຊຕີ’ຕິ. ອິຘ ຠຄວາ ກິມາຫາ’’ຕິ?

‘‘ອທ຺ຘາ ໂຂ ຕ຺ຍາຫໍ, ຄາມຓິ, ນ ລຠາມິ – ‘ອລໍ, ຄາມຓິ, ຕິຏ຺ຐເຕຕໍ; ມາ ມໍ ເອຕໍ ປຸຈ຺ຉີ’ຕິ. ອປິ ຈ ຕ຺ຍາຫໍ ພ຺ຍາກຣິສ຺ສາມິ. ໂຍ ໂສ, ຄາມຓິ, ໂຍຘາຊີໂວ ສງ຺ຄາເມ ອຸສ຺ສຫຕິ ວາຍມຕິ, ຕສ຺ສ ຕໍ ຈິຕ຺ຕໍ ປຸພ຺ເພ ຄຫິຕໍ [ຫີນໍ (ສີ. ປີ.)] ທຸກ຺ກຏໍ ທຸປ຺ປຓິຫິຕໍ – ‘ອິເມ ສຕ຺ຕາ ຫຎ຺ຎນ຺ຕຸ ວາ ພຊ຺ຌນ຺ຕຸ ວາ ອຸຈ຺ຉິຊ຺ຊນ຺ຕຸ ວາ ວິນສ຺ສນ຺ຕຸ ວາ ມາ ວາ ອເຫສຸໍ ອິຕິ ວາ’ຕິ. ຕເມນໍ ອຸສ຺ສຫນ຺ຕໍ ວາຍມນ຺ຕໍ ປເຣ ຫນນ຺ຕິ ປຣິຍາປາເທນ຺ຕິ; ໂສ ກາຍສ຺ສ ເຠທາ ປຣໍ ມຣຓາ ປຣຊິໂຕ ນາມ ນິຣໂຍ ຕຕ຺ຖ ອຸປປຊ຺ຊຕີຕິ. ສເຈ ໂຂ ປນສ຺ສ ເອວໍ ທິຏ຺ຐິ ໂຫຕິ – ‘ໂຍ ໂສ ໂຍຘາຊີໂວ ສງ຺ຄາເມ ອຸສ຺ສຫຕິ ວາຍມຕິ ຕເມນໍ ອຸສ຺ສຫນ຺ຕໍ ວາຍມນ຺ຕໍ ປເຣ ຫນນ຺ຕິ ປຣິຍາປາເທນ຺ຕິ, ໂສ ກາຍສ຺ສ ເຠທາ ປຣໍ ມຣຓາ ປຣຊິຕານໍ ເທວານໍ ສຫພ຺ຍຕໍ ອຸປປຊ຺ຊຕີ’ຕິ, ສາສ຺ສ ໂຫຕິ ມິຈ຺ຉາທິຏ຺ຐິ. ມິຈ຺ຉາທິຏ຺ຐິກສ຺ສ ໂຂ ປນາຫໍ, ຄາມຓິ, ປຸຣິສປຸຄ຺ຄລສ຺ສ ທ຺ວິນ຺ນໍ ຄຕີນໍ ອຎ຺ຎຕຣໍ ຄຕິໍ ວທາມິ – ນິຣຍໍ ວາ ຕິຣຈ຺ຉານໂຍນິໍ ວາ’’ຕິ.

ເອວໍ ວຸຕ຺ເຕ, ໂຍຘາຊີໂວ ຄາມຓິ ປໂຣທິ, ອສ຺ສູນິ ປວຕ຺ເຕສິ. ‘‘ເອຕໍ ໂຂ ຕ຺ຍາຫໍ, ຄາມຓິ, ນາລຕ຺ຖໍ – ‘ອລໍ, ຄາມຓິ, ຕິຏ຺ຐເຕຕໍ; ມາ ມໍ ເອຕໍ ປຸຈ຺ຉີ’’’ຕິ. ‘‘ນາຫໍ, ຠນ຺ເຕ, ເອຕໍ ໂຣທາມິ ຍໍ ມໍ ຠຄວາ ເອວມາຫ; ອປິຈາຫໍ, ຠນ຺ເຕ, ປຸພ຺ພເກຫິ ອາຈຣິຍປາຈຣິເຍຫິ ໂຍຘາຊີເວຫິ ທີຆຣຕ຺ຕໍ ນິກໂຕ ວຎ຺ຈິໂຕ ປລຸທ຺ໂຘ – ‘ໂຍ ໂສ ໂຍຘາຊີໂວ ສງ຺ຄາເມ ອຸສ຺ສຫຕິ ວາຍມຕິ, ຕເມນໍ ອຸສ຺ສຫນ຺ຕໍ ວາຍມນ຺ຕໍ ປເຣ ຫນນ຺ຕິ ປຣິຍາປາເທນ຺ຕິ, ໂສ ກາຍສ຺ສ ເຠທາ ປຣໍ ມຣຓາ ປຣຊິຕານໍ ເທວານໍ ສຫພ຺ຍຕໍ ອຸປປຊ຺ຊຕີ’’’ຕິ. ‘‘ອຠິກ຺ກນ຺ຕໍ, ຠນ຺ເຕ…ເປ… ອຊ຺ຊຕຄ຺ເຄ ປາຓຸເປຕໍ ສຣຓໍ ຄຕ’’ນ຺ຕິ. ຕຕິຍໍ.