໑໓. ຠວປຎ຺ຫາສຸຕ຺ຕໍ

໓໒໖. ‘‘‘ຠໂວ, ຠໂວ’ຕິ, ອາວຸໂສ ສາຣິປຸຕ຺ຕ, ວຸຈ຺ຈຕິ. ກຕໂມ ນຸ ໂຂ, ອາວຸໂສ, ຠໂວ’’ຕິ? ‘‘ຕໂຍ ເມ, ອາວຸໂສ, ຠວາ. ກາມຠໂວ, ຣູປຠໂວ, ອຣູປຠໂວ – ອິເມ ໂຂ, ອາວຸໂສ, ຕໂຍ ຠວາ’’ຕິ. ‘‘ອຕ຺ຖິ ປນາວຸໂສ, ມຄ຺ໂຄ ອຕ຺ຖິ ປຏິປທາ, ເອເຕສໍ ຠວານໍ ປຣິຎ຺ຎາຍາ’’ຕິ? ‘‘ອຕ຺ຖິ ໂຂ, ອາວຸໂສ, ມຄ຺ໂຄ ອຕ຺ຖິ ປຏິປທາ, ເອເຕສໍ ຠວານໍ ປຣິຎ຺ຎາຍາ’’ຕິ. ‘‘ກຕໂມ, ປນາວຸໂສ, ມຄ຺ໂຄ ກຕມາ ປຏິປທາ, ເອເຕສໍ ຠວານໍ ປຣິຎ຺ຎາຍາ’’ຕິ? ‘‘ອຍເມວ ໂຂ, ອາວຸໂສ, ອຣິໂຍ ອຏ຺ຐງ຺ຄິໂກ ມຄ຺ໂຄ, ເອເຕສໍ ຠວານໍ ປຣິຎ຺ຎາຍ, ເສຍ຺ຍຖິທໍ – ສມ຺ມາທິຏ຺ຐິ ສມ຺ມາສງ຺ກປ຺ໂປ ສມ຺ມາວາຈາ ສມ຺ມາກມ຺ມນ຺ໂຕ ສມ຺ມາອາຊີໂວ ສມ຺ມາວາຍາໂມ ສມ຺ມາສຕິ ສມ຺ມາສມາຘິ. ອຍໍ ໂຂ, ອາວຸໂສ, ມຄ຺ໂຄ ອຍໍ ປຏິປທາ, ເອເຕສໍ ຠວານໍ ປຣິຎ຺ຎາຍາ’’ຕິ. ‘‘ຠທ຺ທໂກ, ອາວຸໂສ, ມຄ຺ໂຄ ຠທ຺ທິກາ ປຏິປທາ, ເອເຕສໍ ຠວານໍ ປຣິຎ຺ຎາຍ. ອລຎ຺ຈ ປນາວຸໂສ ສາຣິປຸຕ຺ຕ, ອປ຺ປມາທາຍາ’’ຕິ. ເຕຣສມໍ.