໔. ຊມ຺ພຸຂາທກສໍຍຸຕ຺ຕໍ

໑. ນິພ຺ພານປຎ຺ຫາສຸຕ຺ຕໍ

໓໑໔. ເອກໍ ສມຍໍ ອາຍສ຺ມາ ສາຣິປຸຕ຺ໂຕ ມຄເຘສຸ ວິຫຣຕິ ນາລກຄາມເກ. ອຖ ໂຂ ຊມ຺ພຸຂາທໂກ ປຣິພ຺ພາຊໂກ ເຍນາຍສ຺ມາ ສາຣິປຸຕ຺ໂຕ ເຕນຸປສງ຺ກມິ; ອຸປສງ຺ກມິຕ຺ວາ ອາຍສ຺ມຕາ ສາຣິປຸຕ຺ເຕນ ສທ຺ຘິໍ ສມ຺ໂມທິ. ສມ຺ໂມທນີຍໍ ກຖໍ ສາຣຓີຍໍ ວີຕິສາເຣຕ຺ວາ ເອກມນ຺ຕໍ ນິສີທິ. ເອກມນ຺ຕໍ ນິສິນ຺ໂນ ໂຂ ຊມ຺ພຸຂາທໂກ ປຣິພ຺ພາຊໂກ ອາຍສ຺ມນ຺ຕໍ ສາຣິປຸຕ຺ຕໍ ເອຕທໂວຈ –

‘‘‘ນິພ຺ພານໍ, ນິພ຺ພານ’ນ຺ຕິ, ອາວຸໂສ ສາຣິປຸຕ຺ຕ, ວຸຈ຺ຈຕິ. ກຕມໍ ນຸ ໂຂ, ອາວຸໂສ, ນິພ຺ພານ’’ນ຺ຕິ? ‘‘ໂຍ ໂຂ, ອາວຸໂສ, ຣາຄກ຺ຂໂຍ ໂທສກ຺ຂໂຍ ໂມຫກ຺ຂໂຍ – ອິທໍ ວຸຈ຺ຈຕິ ນິພ຺ພານ’’ນ຺ຕິ. ‘‘ອຕ຺ຖິ ປນາວຸໂສ, ມຄ຺ໂຄ ອຕ຺ຖິ ປຏິປທາ ເອຕສ຺ສ ນິພ຺ພານສ຺ສ ສຈ຺ຉິກິຣິຍາຍາ’’ຕິ? ‘‘ອຕ຺ຖິ ໂຂ, ອາວຸໂສ, ມຄ຺ໂຄ ອຕ຺ຖິ ປຏິປທາ ເອຕສ຺ສ ນິພ຺ພານສ຺ສ ສຈ຺ຉິກິຣິຍາຍາ’’ຕິ. ‘‘ກຕໂມ ປນາວຸໂສ, ມຄ຺ໂຄ ກຕມາ ປຏິປທາ ເອຕສ຺ສ ນິພ຺ພານສ຺ສ ສຈ຺ຉິກິຣິຍາຍາ’’ຕິ? ‘‘ອຍເມວ ໂຂ, ອາວຸໂສ, ອຣິໂຍ ອຏ຺ຐງ຺ຄິໂກ ມຄ຺ໂຄ ເອຕສ຺ສ ນິພ຺ພານສ຺ສ ສຈ຺ຉິກິຣິຍາຍ, ເສຍ຺ຍຖິທໍ – ສມ຺ມາທິຏ຺ຐິ ສມ຺ມາສງ຺ກປ຺ໂປ ສມ຺ມາວາຈາ ສມ຺ມາກມ຺ມນ຺ໂຕ ສມ຺ມາອາຊີໂວ ສມ຺ມາວາຍາໂມ ສມ຺ມາສຕິ ສມ຺ມາສມາຘິ. ອຍໍ ໂຂ, ອາວຸໂສ, ມຄ຺ໂຄ ອຍໍ ປຏິປທາ ເອຕສ຺ສ ນິພ຺ພານສ຺ສ ສຈ຺ຉິກິຣິຍາຍາ’’ຕິ. ‘‘ຠທ຺ທໂກ, ອາວຸໂສ, ມຄ຺ໂຄ ຠທ຺ທິກາ ປຏິປທາ ເອຕສ຺ສ ນິພ຺ພານສ຺ສ ສຈ຺ຉິກິຣິຍາຍ. ອລຎ຺ຈ ປນາວຸໂສ ສາຣິປຸຕ຺ຕ, ອປ຺ປມາທາຍາ’’ຕິ. ປຐມໍ.

໒. ອຣຫຕ຺ຕປຎ຺ຫາສຸຕ຺ຕໍ

໓໑໕. ‘‘‘ອຣຫຕ຺ຕໍ, ອຣຫຕ຺ຕ’ນ຺ຕິ, ອາວຸໂສ ສາຣິປຸຕ຺ຕ, ວຸຈ຺ຈຕິ. ກຕມໍ ນຸ ໂຂ, ອາວຸໂສ, ອຣຫຕ຺ຕ’’ນ຺ຕິ? ‘‘ໂຍ ໂຂ, ອາວຸໂສ, ຣາຄກ຺ຂໂຍ ໂທສກ຺ຂໂຍ ໂມຫກ຺ຂໂຍ – ອິທໍ ວຸຈ຺ຈຕິ ອຣຫຕ຺ຕ’’ນ຺ຕິ. ‘‘ອຕ຺ຖິ ປນາວຸໂສ, ມຄ຺ໂຄ ອຕ຺ຖິ ປຏິປທາ ເອຕສ຺ສ ອຣຫຕ຺ຕສ຺ສ ສຈ຺ຉິກິຣິຍາຍາ’’ຕິ? ‘‘ອຕ຺ຖິ ໂຂ, ອາວຸໂສ, ມຄ຺ໂຄ ອຕ຺ຖິ ປຏິປທາ ເອຕສ຺ສ ອຣຫຕ຺ຕສ຺ສ ສຈ຺ຉິກິຣິຍາຍາ’’ຕິ. ‘‘ກຕໂມ ປນາວຸໂສ, ມຄ຺ໂຄ ກຕມາ ປຏິປທາ ເອຕສ຺ສ ອຣຫຕ຺ຕສ຺ສ ສຈ຺ຉິກິຣິຍາຍາ’’ຕິ? ‘‘ອຍເມວ ໂຂ, ອາວຸໂສ, ອຣິໂຍ ອຏ຺ຐງ຺ຄິໂກ ມຄ຺ໂຄ ເອຕສ຺ສ ອຣຫຕ຺ຕສ຺ສ ສຈ຺ຉິກິຣິຍາຍ, ເສຍ຺ຍຖິທໍ – ສມ຺ມາທິຏ຺ຐິ ສມ຺ມາສງ຺ກປ຺ໂປ ສມ຺ມາວາຈາ ສມ຺ມາກມ຺ມນ຺ໂຕ ສມ຺ມາອາຊີໂວ ສມ຺ມາວາຍາໂມ ສມ຺ມາສຕິ ສມ຺ມາສມາຘິ. ອຍໍ ໂຂ ອາວຸໂສ, ມຄ຺ໂຄ, ອຍໍ ປຏິປທາ ເອຕສ຺ສ ອຣຫຕ຺ຕສ຺ສ ສຈ຺ຉິກິຣິຍາຍາ’’ຕິ. ‘‘ຠທ຺ທໂກ, ອາວຸໂສ, ມຄ຺ໂຄ ຠທ຺ທິກາ ປຏິປທາ ເອຕສ຺ສ ອຣຫຕ຺ຕສ຺ສ ສຈ຺ຉິກິຣິຍາຍ. ອລຎ຺ຈ ປນາວຸໂສ ສາຣິປຸຕ຺ຕ, ອປ຺ປມາທາຍາ’’ຕິ. ທຸຕິຍໍ.

໓. ຘມ຺ມວາທີປຎ຺ຫາສຸຕ຺ຕໍ

໓໑໖. ‘‘ເກ ນຸ ໂຂ, ອາວຸໂສ ສາຣິປຸຕ຺ຕ, ໂລເກ ຘມ຺ມວາທິໂນ, ເກ ໂລເກ ສຸປ຺ປຏິປນ຺ນາ, ເກ ໂລເກ ສຸຄຕາ’’ຕິ? ‘‘ເຍ ໂຂ, ອາວຸໂສ, ຣາຄປ຺ປຫານາຍ ຘມ຺ມໍ ເທເສນ຺ຕິ, ໂທສປ຺ປຫານາຍ ຘມ຺ມໍ ເທເສນ຺ຕິ, ໂມຫປ຺ປຫານາຍ ຘມ຺ມໍ ເທເສນ຺ຕິ, ເຕ ໂລເກ ຘມ຺ມວາທິໂນ. ເຍ ໂຂ, ອາວຸໂສ, ຣາຄສ຺ສ ປຫານາຍ ປຏິປນ຺ນາ, ໂທສສ຺ສ ປຫານາຍ ປຏິປນ຺ນາ, ໂມຫສ຺ສ ປຫານາຍ ປຏິປນ຺ນາ, ເຕ ໂລເກ ສຸປ຺ປຏິປນ຺ນາ. ເຍສໍ ໂຂ, ອາວຸໂສ, ຣາໂຄ ປຫີໂນ ອຸຈ຺ຉິນ຺ນມູໂລ ຕາລາວຕ຺ຖຸກໂຕ ອນຠາວງ຺ກໂຕ ອາຍຕິໍ ອນຸປ຺ປາທຘມ຺ໂມ, ໂທໂສ ປຫີໂນ ອຸຈ຺ຉິນ຺ນມູໂລ ຕາລາວຕ຺ຖຸກໂຕ ອນຠາວງ຺ກໂຕ ອາຍຕິໍ ອນຸປ຺ປາທຘມ຺ໂມ, ໂມໂຫ ປຫີໂນ ອຸຈ຺ຉິນ຺ນມູໂລ ຕາລາວຕ຺ຖຸກໂຕ ອນຠາວງ຺ກໂຕ ອາຍຕິໍ ອນຸປ຺ປາທຘມ຺ໂມ, ເຕ ໂລເກ ສຸຄຕາ’’ຕິ.

‘‘ອຕ຺ຖິ ປນາວຸໂສ, ມຄ຺ໂຄ ອຕ຺ຖິ ປຏິປທາ ເອຕສ຺ສ ຣາຄສ຺ສ ໂທສສ຺ສ ໂມຫສ຺ສ ປຫານາຍາ’’ຕິ? ‘‘ອຕ຺ຖິ ໂຂ, ອາວຸໂສ, ມຄ຺ໂຄ ອຕ຺ຖິ ປຏິປທາ ເອຕສ຺ສ ຣາຄສ຺ສ ໂທສສ຺ສ ໂມຫສ຺ສ ປຫານາຍາ’’ຕິ. ‘‘ກຕໂມ, ປນາວຸໂສ, ມຄ຺ໂຄ ກຕມາ ປຏິປທາ ເອຕສ຺ສ ຣາຄສ຺ສ ໂທສສ຺ສ ໂມຫສ຺ສ ປຫານາຍາ’’ຕິ? ‘‘ອຍເມວ ໂຂ, ອາວຸໂສ, ອຣິໂຍ ອຏ຺ຐງ຺ຄິໂກ ມຄ຺ໂຄ ເອຕສ຺ສ ຣາຄສ຺ສ ໂທສສ຺ສ ໂມຫສ຺ສ ປຫານາຍ, ເສຍ຺ຍຖິທໍ – ສມ຺ມາທິຏ຺ຐິ ສມ຺ມາສງ຺ກປ຺ໂປ ສມ຺ມາວາຈາ ສມ຺ມາກມ຺ມນ຺ໂຕ ສມ຺ມາອາຊີໂວ ສມ຺ມາວາຍາໂມ ສມ຺ມາສຕິ ສມ຺ມາສມາຘິ. ອຍໍ ໂຂ, ອາວຸໂສ, ມຄ຺ໂຄ ອຍໍ ປຏິປທາ ເອຕສ຺ສ ຣາຄສ຺ສ ໂທສສ຺ສ ໂມຫສ຺ສ ປຫານາຍາ’’ຕິ. ‘‘ຠທ຺ທໂກ, ອາວຸໂສ, ມຄ຺ໂຄ ຠທ຺ທິກາ ປຏິປທາ, ເອຕສ຺ສ ຣາຄສ຺ສ ໂທສສ຺ສ ໂມຫສ຺ສ ປຫານາຍ. ອລຎ຺ຈ ປນາວຸໂສ ສາຣິປຸຕ຺ຕ, ອປ຺ປມາທາຍາ’’ຕິ. ຕຕິຍໍ.

໔. ກິມຕ຺ຖິຍສຸຕ຺ຕໍ

໓໑໗. ‘‘ກິມຕ຺ຖິຍໍ, ອາວຸໂສ ສາຣິປຸຕ຺ຕ, ສມເຓ ໂຄຕເມ ພ຺ຣຫ຺ມຈຣິຍໍ ວຸສ຺ສຕີ’’ຕິ? ‘‘ທຸກ຺ຂສ຺ສ ໂຂ, ອາວຸໂສ, ປຣິຎ຺ຎຕ຺ຖໍ ຠຄວຕິ ພ຺ຣຫ຺ມຈຣິຍໍ ວຸສ຺ສຕີ’’ຕິ. ‘‘ອຕ຺ຖິ ປນາວຸໂສ, ມຄ຺ໂຄ ອຕ຺ຖິ ປຏິປທາ ເອຕສ຺ສ ທຸກ຺ຂສ຺ສ ປຣິຎ຺ຎາຍາ’’ຕິ? ‘‘ອຕ຺ຖິ ໂຂ, ອາວຸໂສ, ມຄ຺ໂຄ ອຕ຺ຖິ ປຏິປທາ, ເອຕສ຺ສ ທຸກ຺ຂສ຺ສ ປຣິຎ຺ຎາຍາ’’ຕິ? ‘‘ກຕໂມ ປນາວຸໂສ, ມຄ຺ໂຄ ກຕມາ ປຏິປທາ, ເອຕສ຺ສ ທຸກ຺ຂສ຺ສ ປຣິຎ຺ຎາຍາ’’ຕິ?

‘‘ອຍເມວ ໂຂ, ອາວຸໂສ, ອຣິໂຍ ອຏ຺ຐງ຺ຄິໂກ ມຄ຺ໂຄ, ເອຕສ຺ສ ທຸກ຺ຂສ຺ສ ປຣິຎ຺ຎາຍ, ເສຍ຺ຍຖິທໍ – ສມ຺ມາທິຏ຺ຐິ ສມ຺ມາສງ຺ກປ຺ໂປ ສມ຺ມາວາຈາ ສມ຺ມາກມ຺ມນ຺ໂຕ ສມ຺ມາອາຊີໂວ ສມ຺ມາວາຍາໂມ ສມ຺ມາສຕິ ສມ຺ມາສມາຘິ. ອຍໍ ໂຂ, ອາວຸໂສ, ມຄ຺ໂຄ ອຍໍ ປຏິປທາ ເອຕສ຺ສ ທຸກ຺ຂສ຺ສ ປຣິຎ຺ຎາຍາ’’ຕິ. ‘‘ຠທ຺ທໂກ, ອາວຸໂສ, ມຄ຺ໂຄ ຠທ຺ທິກາ ປຏິປທາ, ເອຕສ຺ສ ທຸກ຺ຂສ຺ສ ປຣິຎ຺ຎາຍ. ອລຎ຺ຈ ປນາວຸໂສ ສາຣິປຸຕ຺ຕ, ອປ຺ປມາທາຍາ’’ຕິ. ຈຕຸຕ຺ຖໍ.

໕. ອສ຺ສາສປ຺ປຕ຺ຕສຸຕ຺ຕໍ

໓໑໘. ‘‘‘ອສ຺ສາສປ຺ປຕ຺ໂຕ, ອສ຺ສາສປ຺ປຕ຺ໂຕ’ຕິ, ອາວຸໂສ ສາຣິປຸຕ຺ຕ, ວຸຈ຺ຈຕິ. ກິຕ຺ຕາວຕາ ນຸ ໂຂ, ອາວຸໂສ, ອສ຺ສາສປ຺ປຕ຺ໂຕ ໂຫຕີ’’ຕິ? ‘‘ຍໂຕ ໂຂ, ອາວຸໂສ, ຠິກ຺ຂຸ ຉນ຺ນໍ ຜສ຺ສາຍຕນານໍ ສມຸທຍຎ຺ຈ ອຕ຺ຖງ຺ຄມຎ຺ຈ ອສ຺ສາທຎ຺ຈ ອາທີນວຎ຺ຈ ນິສ຺ສຣຓຎ຺ຈ ຍຖາຠູຕໍ ປຊານາຕິ, ເອຕ຺ຕາວຕາ ໂຂ, ອາວຸໂສ, ອສ຺ສາສປ຺ປຕ຺ໂຕ ໂຫຕີ’’ຕິ. ‘‘ອຕ຺ຖິ ປນາວຸໂສ, ມຄ຺ໂຄ ອຕ຺ຖິ ປຏິປທາ, ເອຕສ຺ສ ອສ຺ສາສສ຺ສ ສຈ຺ຉິກິຣິຍາຍາ’’ຕິ? ‘‘ອຕ຺ຖິ ໂຂ, ອາວຸໂສ, ມຄ຺ໂຄ ອຕ຺ຖິ ປຏິປທາ, ເອຕສ຺ສ ອສ຺ສາສສ຺ສ ສຈ຺ຉິກິຣິຍາຍາ’’ຕິ. ‘‘ກຕໂມ ປນາວຸໂສ, ມຄ຺ໂຄ ກຕມາ ປຏິປທາ, ເອຕສ຺ສ ອສ຺ສາສສ຺ສ ສຈ຺ຉິກິຣິຍາຍາ’’ຕິ? ‘‘ອຍເມວ ໂຂ, ອາວຸໂສ, ອຣິໂຍ ອຏ຺ຐງ຺ຄິໂກ ມຄ຺ໂຄ ເອຕສ຺ສ ອສ຺ສາສສ຺ສ ສຈ຺ຉິກິຣິຍາຍ, ເສຍ຺ຍຖິທໍ – ສມ຺ມາທິຏ຺ຐິ ສມ຺ມາສງ຺ກປ຺ໂປ ສມ຺ມາວາຈາ ສມ຺ມາກມ຺ມນ຺ໂຕ ສມ຺ມາອາຊີໂວ ສມ຺ມາວາຍາໂມ ສມ຺ມາສຕິ ສມ຺ມາສມາຘິ. ອຍໍ ໂຂ, ອາວຸໂສ, ມຄ຺ໂຄ ອຍໍ ປຏິປທາ, ເອຕສ຺ສ ອສ຺ສາສສ຺ສ ສຈ຺ຉິກິຣິຍາຍາ’’ຕິ. ‘‘ຠທ຺ທໂກ, ອາວຸໂສ, ມຄ຺ໂຄ ຠທ຺ທິກາ ປຏິປທາ, ເອຕສ຺ສ ອສ຺ສາສສ຺ສ ສຈ຺ຉິກິຣິຍາຍ. ອລຎ຺ຈ ປນາວຸໂສ ສາຣິປຸຕ຺ຕ, ອປ຺ປມາທາຍາ’’ຕິ. ປຎ຺ຈມໍ.

໖. ປຣມສ຺ສາສປ຺ປຕ຺ຕສຸຕ຺ຕໍ

໓໑໙. ‘‘‘ປຣມສ຺ສາສປ຺ປຕ຺ໂຕ, ປຣມສ຺ສາສປ຺ປຕ຺ໂຕ’ຕິ, ອາວຸໂສ ສາຣິປຸຕ຺ຕ, ວຸຈ຺ຈຕິ. ກິຕ຺ຕາວຕາ ນຸ ໂຂ, ອາວຸໂສ, ປຣມສ຺ສາສປ຺ປຕ຺ໂຕ ໂຫຕີ’’ຕິ? ‘‘ຍໂຕ ໂຂ, ອາວຸໂສ, ຠິກ຺ຂຸ ຉນ຺ນໍ ຜສ຺ສາຍຕນານໍ ສມຸທຍຎ຺ຈ ອຕ຺ຖງ຺ຄມຎ຺ຈ ອສ຺ສາທຎ຺ຈ ອາທີນວຎ຺ຈ ນິສ຺ສຣຓຎ຺ຈ ຍຖາຠູຕໍ ວິທິຕ຺ວາ ອນຸປາທາວິມຸຕ຺ໂຕ ໂຫຕິ, ເອຕ຺ຕາວຕາ ໂຂ, ອາວຸໂສ, ປຣມສ຺ສາສປ຺ປຕ຺ໂຕ ໂຫຕີ’’ຕິ. ‘‘ອຕ຺ຖິ ປນາວຸໂສ, ມຄ຺ໂຄ ອຕ຺ຖິ ປຏິປທາ, ເອຕສ຺ສ ປຣມສ຺ສາສສ຺ສ ສຈ຺ຉິກິຣິຍາຍາ’’ຕິ? ‘‘ອຕ຺ຖິ ໂຂ, ອາວຸໂສ, ມຄ຺ໂຄ ອຕ຺ຖິ ປຏິປທາ, ເອຕສ຺ສ ປຣມສ຺ສາສສ຺ສ ສຈ຺ຉິກິຣິຍາຍາ’’ຕິ. ‘‘ກຕໂມ ປນ, ອາວຸໂສ, ມຄ຺ໂຄ ກຕມາ ປຏິປທາ, ເອຕສ຺ສ ປຣມສ຺ສາສສ຺ສ ສຈ຺ຉິກິຣິຍາຍາ’’ຕິ? ‘‘ອຍເມວ ໂຂ, ອາວຸໂສ, ອຣິໂຍ ອຏ຺ຐງ຺ຄິໂກ ມຄ຺ໂຄ ເອຕສ຺ສ ປຣມສ຺ສາສສ຺ສ ສຈ຺ຉິກິຣິຍາຍ, ເສຍ຺ຍຖິທໍ – ສມ຺ມາທິຏ຺ຐິ ສມ຺ມາສງ຺ກປ຺ໂປ ສມ຺ມາວາຈາ ສມ຺ມາກມ຺ມນ຺ໂຕ ສມ຺ມາອາຊີໂວ ສມ຺ມາວາຍາໂມ ສມ຺ມາສຕິ ສມ຺ມາສມາຘິ. ອຍໍ ໂຂ, ອາວຸໂສ, ມຄ຺ໂຄ ອຍໍ ປຏິປທາ, ເອຕສ຺ສ ປຣມສ຺ສາສສ຺ສ ສຈ຺ຉິກິຣິຍາຍາ’’ຕິ. ‘‘ຠທ຺ທໂກ, ອາວຸໂສ, ມຄ຺ໂຄ ຠທ຺ທິກາ ປຏິປທາ, ເອຕສ຺ສ ປຣມສ຺ສາສສ຺ສ ສຈ຺ຉິກິຣິຍາຍ. ອລຎ຺ຈ ປນາວຸໂສ ສາຣິປຸຕ຺ຕ, ອປ຺ປມາທາຍາ’’ຕິ. ຉຏ຺ຐໍ.

໗. ເວທນາປຎ຺ຫາສຸຕ຺ຕໍ

໓໒໐. ‘‘‘ເວທນາ, ເວທນາ’ຕິ, ອາວຸໂສ ສາຣິປຸຕ຺ຕ, ວຸຈ຺ຈຕິ. ກຕມາ ນຸ ໂຂ, ອາວຸໂສ, ເວທນາ’’ຕິ? ‘‘ຕິສ຺ໂສ ອິມາວຸໂສ, ເວທນາ. ກຕມາ ຕິສ຺ໂສ? ສຸຂາ ເວທນາ, ທຸກ຺ຂາ ເວທນາ, ອທຸກ຺ຂມສຸຂາ ເວທນາ – ອິມາ ໂຂ, ອາວຸໂສ, ຕິສ຺ໂສ ເວທນາ’’ຕິ. ‘‘ອຕ຺ຖິ ປນາວຸໂສ, ມຄ຺ໂຄ ອຕ຺ຖິ ປຏິປທາ, ເອຕາສໍ ຕິສ຺ສນ຺ນໍ ເວທນານໍ ປຣິຎ຺ຎາຍາ’’ຕິ? ‘‘ອຕ຺ຖິ ໂຂ, ອາວຸໂສ, ມຄ຺ໂຄ ອຕ຺ຖິ ປຏິປທາ, ເອຕາສໍ ຕິສ຺ສນ຺ນໍ ເວທນານໍ ປຣິຎ຺ຎາຍາ’’ຕິ. ‘‘ກຕໂມ ປນາວຸໂສ, ມຄ຺ໂຄ ກຕມາ ປຏິປທາ, ເອຕາສໍ ຕິສ຺ສນ຺ນໍ ເວທນານໍ ປຣິຎ຺ຎາຍາ’’ຕິ? ‘‘ອຍເມວ ໂຂ, ອາວຸໂສ, ອຣິໂຍ ອຏ຺ຐງ຺ຄິໂກ ມຄ຺ໂຄ, ເອຕາສໍ ຕິສ຺ສນ຺ນໍ ເວທນານໍ ປຣິຎ຺ຎາຍ, ເສຍ຺ຍຖິທໍ – ສມ຺ມາທິຏ຺ຐິ ສມ຺ມາສງ຺ກປ຺ໂປ ສມ຺ມາວາຈາ ສມ຺ມາກມ຺ມນ຺ໂຕ ສມ຺ມາອາຊີໂວ ສມ຺ມາວາຍາໂມ ສມ຺ມາສຕິ ສມ຺ມາສມາຘິ. ອຍໍ ໂຂ, ອາວຸໂສ, ມຄ຺ໂຄ ອຍໍ ປຏິປທາ, ເອຕາສໍ ຕິສ຺ສນ຺ນໍ ເວທນານໍ ປຣິຎ຺ຎາຍາ’’ຕິ. ‘‘ຠທ຺ທໂກ, ອາວຸໂສ, ມຄ຺ໂຄ ຠທ຺ທິກາ ປຏິປທາ, ເອຕາສໍ ຕິສ຺ສນ຺ນໍ ເວທນານໍ ປຣິຎ຺ຎາຍ. ອລຎ຺ຈ ປນາວຸໂສ ສາຣິປຸຕ຺ຕ, ອປ຺ປມາທາຍາ’’ຕິ. ສຕ຺ຕມໍ.

໘. ອາສວປຎ຺ຫາສຸຕ຺ຕໍ

໓໒໑. ‘‘‘ອາສໂວ, ອາສໂວ’ຕິ, ອາວຸໂສ ສາຣິປຸຕ຺ຕ, ວຸຈ຺ຈຕິ. ກຕໂມ ນຸ ໂຂ, ອາວຸໂສ, ອາສໂວ’’ຕິ? ‘‘ຕໂຍ ເມ, ອາວຸໂສ, ອາສວາ. ກາມາສໂວ, ຠວາສໂວ, ອວິຊ຺ຊາສໂວ – ອິເມ ໂຂ, ອາວຸໂສ, ຕໂຍ ອາສວາ’’ຕິ. ‘‘ອຕ຺ຖິ ປນາວຸໂສ, ມຄ຺ໂຄ ອຕ຺ຖິ ປຏິປທາ ເອເຕສໍ ອາສວານໍ ປຫານາຍາ’’ຕິ? ‘‘ອຕ຺ຖິ ໂຂ, ອາວຸໂສ, ມຄ຺ໂຄ ອຕ຺ຖິ ປຏິປທາ ເອເຕສໍ ອາສວານໍ ປຫານາຍາ’’ຕິ. ‘‘ກຕໂມ ປນາວຸໂສ, ມຄ຺ໂຄ ກຕມາ ປຏິປທາ ເອເຕສໍ ອາສວານໍ ປຫານາຍາ’’ຕິ? ‘‘ອຍເມວ ໂຂ, ອາວຸໂສ, ອຣິໂຍ ອຏ຺ຐງ຺ຄິໂກ ມຄ຺ໂຄ ເອເຕສໍ ອາສວານໍ ປຫານາຍ, ເສຍ຺ຍຖິທໍ – ສມ຺ມາທິຏ຺ຐິ ສມ຺ມາສງ຺ກປ຺ໂປ ສມ຺ມາວາຈາ ສມ຺ມາກມ຺ມນ຺ໂຕ ສມ຺ມາອາຊີໂວ ສມ຺ມາວາຍາໂມ ສມ຺ມາສຕິ ສມ຺ມາສມາຘິ. ອຍໍ ໂຂ, ອາວຸໂສ, ມຄ຺ໂຄ ອຍໍ ປຏິປທາ, ເອເຕສໍ ອາສວານໍ ປຫານາຍາ’’ຕິ. ‘‘ຠທ຺ທໂກ, ອາວຸໂສ, ມຄ຺ໂຄ ຠທ຺ທິກາ ປຏິປທາ, ເອເຕສໍ ອາສວານໍ ປຫານາຍ. ອລຎ຺ຈ ປນາວຸໂສ ສາຣິປຸຕ຺ຕ, ອປ຺ປມາທາຍາ’’ຕິ. ອຏ຺ຐມໍ.

໙. ອວິຊ຺ຊາປຎ຺ຫາສຸຕ຺ຕໍ

໓໒໒. ‘‘‘ອວິຊ຺ຊາ, ອວິຊ຺ຊາ’ຕິ, ອາວຸໂສ ສາຣິປຸຕ຺ຕ, ວຸຈ຺ຈຕິ. ກຕມາ ນຸ ໂຂ, ອາວຸໂສ, ອວິຊ຺ຊາ’’ຕິ? ‘‘ຍໍ ໂຂ, ອາວຸໂສ, ທຸກ຺ເຂ ອຎ຺ຎາຓໍ, ທຸກ຺ຂສມຸທເຍ ອຎ຺ຎາຓໍ, ທຸກ຺ຂນິໂຣເຘ ອຎ຺ຎາຓໍ, ທຸກ຺ຂນິໂຣຘຄາມິນິຍາ ປຏິປທາຍ ອຎ຺ຎາຓໍ – ອຍໍ ວຸຈ຺ຈຕາວຸໂສ, ອວິຊ຺ຊາ’’ຕິ. ‘‘ອຕ຺ຖິ ປນາວຸໂສ, ມຄ຺ໂຄ ອຕ຺ຖິ ປຏິປທາ, ເອຕິສ຺ສາ ອວິຊ຺ຊາຍ ປຫານາຍາ’’ຕິ? ‘‘ອຕ຺ຖິ ໂຂ, ອາວຸໂສ, ມຄ຺ໂຄ ອຕ຺ຖິ ປຏິປທາ, ເອຕິສ຺ສາ ອວິຊ຺ຊາຍ ປຫານາຍາ’’ຕິ. ‘‘ກຕໂມ ປນາວຸໂສ, ມຄ຺ໂຄ ກຕມາ ປຏິປທາ, ເອຕິສ຺ສາ ອວິຊ຺ຊາຍ ປຫານາຍາ’’ຕິ? ‘‘ອຍເມວ ໂຂ, ອາວຸໂສ, ອຣິໂຍ ອຏ຺ຐງ຺ຄິໂກ ມຄ຺ໂຄ, ເອຕິສ຺ສາ ອວິຊ຺ຊາຍ ປຫານາຍ, ເສຍ຺ຍຖິທໍ – ສມ຺ມາທິຏ຺ຐິ ສມ຺ມາສງ຺ກປ຺ໂປ ສມ຺ມາວາຈາ ສມ຺ມາກມ຺ມນ຺ໂຕ ສມ຺ມາອາຊີໂວ ສມ຺ມາວາຍາໂມ ສມ຺ມາສຕິ ສມ຺ມາສມາຘິ. ອຍໍ ໂຂ, ອາວຸໂສ, ມຄ຺ໂຄ ອຍໍ ປຏິປທາ, ເອຕິສ຺ສາ ອວິຊ຺ຊາຍ ປຫານາຍາ’’ຕິ. ‘‘ຠທ຺ທໂກ, ອາວຸໂສ, ມຄ຺ໂຄ ຠທ຺ທິກາ ປຏິປທາ, ເອຕິສ຺ສາ ອວິຊ຺ຊາຍ ປຫານາຍ. ອລຎ຺ຈ ປນາວຸໂສ ສາຣິປຸຕ຺ຕ, ອປ຺ປມາທາຍາ’’ຕິ. ນວມໍ.

໑໐. ຕຓ຺ຫາປຎ຺ຫາສຸຕ຺ຕໍ

໓໒໓. ‘‘‘ຕຓ຺ຫາ, ຕຓ຺ຫາ’ຕິ, ອາວຸໂສ ສາຣິປຸຕ຺ຕ, ວຸຈ຺ຈຕິ. ກຕມາ ນຸ ໂຂ, ອາວຸໂສ, ຕຓ຺ຫາ’’ຕິ? ‘‘ຕິສ຺ໂສ ອິມາ, ອາວຸໂສ, ຕຓ຺ຫາ. ກາມຕຓ຺ຫາ, ຠວຕຓ຺ຫາ, ວິຠວຕຓ຺ຫາ – ອິມາ ໂຂ, ອາວຸໂສ, ຕິສ຺ໂສ ຕຓ຺ຫາ’’ຕິ. ‘‘ອຕ຺ຖິ ປນາວຸໂສ, ມຄ຺ໂຄ ອຕ຺ຖິ ປຏິປທາ, ເອຕາສໍ ຕຓ຺ຫານໍ ປຫານາຍາ’’ຕິ? ‘‘ອຕ຺ຖິ ໂຂ, ອາວຸໂສ, ມຄ຺ໂຄ ອຕ຺ຖິ ປຏິປທາ, ເອຕາສໍ ຕຓ຺ຫານໍ ປຫານາຍາ’’ຕິ. ‘‘ກຕໂມ ປນາວຸໂສ, ມຄ຺ໂຄ ກຕມາ ປຏິປທາ, ເອຕາສໍ ຕຓ຺ຫານໍ ປຫານາຍາ’’ຕິ? ‘‘ອຍເມວ ໂຂ, ອາວຸໂສ, ອຣິໂຍ ອຏ຺ຐງ຺ຄິໂກ ມຄ຺ໂຄ, ເອຕາສໍ ຕຓ຺ຫານໍ ປຫານາຍ, ເສຍ຺ຍຖິທໍ – ສມ຺ມາທິຏ຺ຐິ ສມ຺ມາສງ຺ກປ຺ໂປ ສມ຺ມາວາຈາ ສມ຺ມາກມ຺ມນ຺ໂຕ ສມ຺ມາອາຊີໂວ ສມ຺ມາວາຍາໂມ ສມ຺ມາສຕິ ສມ຺ມາສມາຘິ. ອຍໍ ໂຂ, ອາວຸໂສ, ມຄ຺ໂຄ ອຍໍ ປຏິປທາ, ເອຕາສໍ ຕຓ຺ຫານໍ ປຫານາຍາ’’ຕິ. ‘‘ຠທ຺ທໂກ, ອາວຸໂສ, ມຄ຺ໂຄ ຠທ຺ທິກາ ປຏິປທາ, ເອຕາສໍ ຕຓ຺ຫານໍ ປຫານາຍ. ອລຎ຺ຈ ປນາວຸໂສ ສາຣິປຸຕ຺ຕ, ອປ຺ປມາທາຍາ’’ຕິ. ທສມໍ.

໑໑. ໂອຆປຎ຺ຫາສຸຕ຺ຕໍ

໓໒໔. ‘‘‘ໂອໂຆ, ໂອໂຆ’ຕິ, ອາວຸໂສ ສາຣິປຸຕ຺ຕ, ວຸຈ຺ຈຕິ. ກຕໂມ ນຸ ໂຂ, ອາວຸໂສ, ໂອໂຆ’’ຕິ? ‘‘ຈຕ຺ຕາໂຣເມ, ອາວຸໂສ, ໂອຆາ. ກາໂມໂຆ, ຠໂວໂຆ, ທິຏ຺ໂຐໂຆ, ອວິຊ຺ໂຊໂຆ – ອິເມ ໂຂ, ອາວຸໂສ, ຈຕ຺ຕາໂຣ ໂອຆາ’’ຕິ. ‘‘ອຕ຺ຖິ ປນາວຸໂສ, ມຄ຺ໂຄ ອຕ຺ຖິ ປຏິປທາ, ເອເຕສໍ ໂອຆານໍ ປຫານາຍາ’’ຕິ? ‘‘ອຕ຺ຖິ ໂຂ, ອາວຸໂສ, ມຄ຺ໂຄ ອຕ຺ຖິ ປຏິປທາ, ເອເຕສໍ ໂອຆານໍ ປຫານາຍາ’’ຕິ. ‘‘ກຕໂມ ປນາວຸໂສ, ມຄ຺ໂຄ ກຕມາ ປຏິປທາ, ເອເຕສໍ ໂອຆານໍ ປຫານາຍາ’’ຕິ? ‘‘ອຍເມວ ໂຂ, ອາວຸໂສ, ອຣິໂຍ ອຏ຺ຐງ຺ຄິໂກ ມຄ຺ໂຄ, ເອເຕສໍ ໂອຆານໍ ປຫານາຍ, ເສຍ຺ຍຖິທໍ – ສມ຺ມາທິຏ຺ຐິ ສມ຺ມາສງ຺ກປ຺ໂປ ສມ຺ມາວາຈາ ສມ຺ມາກມ຺ມນ຺ໂຕ ສມ຺ມາອາຊີໂວ ສມ຺ມາວາຍາໂມ ສມ຺ມາສຕິ ສມ຺ມາສມາຘິ. ອຍໍ ໂຂ, ອາວຸໂສ, ມຄ຺ໂຄ ອຍໍ ປຏິປທາ, ເອເຕສໍ ໂອຆານໍ ປຫານາຍາ’’ຕິ. ‘‘ຠທ຺ທໂກ, ອາວຸໂສ, ມຄ຺ໂຄ ຠທ຺ທິກາ ປຏິປທາ, ເອເຕສໍ ໂອຆານໍ ປຫານາຍ. ອລຎ຺ຈ ປນາວຸໂສ ສາຣິປຸຕ຺ຕ, ອປ຺ປມາທາຍາ’’ຕິ. ເອກາທສມໍ.

໑໒. ອຸປາທານປຎ຺ຫາສຸຕ຺ຕໍ

໓໒໕. ‘‘‘ອຸປາທານໍ, ອຸປາທານ’ນ຺ຕິ, ອາວຸໂສ ສາຣິປຸຕ຺ຕ, ວຸຈ຺ຈຕິ. ກຕມໍ ນຸ ໂຂ, ອາວຸໂສ, ອຸປາທານ’’ນ຺ຕິ? ‘‘ຈຕ຺ຕາຣິມານິ, ອາວຸໂສ, ອຸປາທານານິ. ກາມຸປາທານໍ, ທິຏ຺ຐຸປາທານໍ ສີລພ຺ພຕຸປາທານໍ, ອຕ຺ຕວາທຸປາທານໍ – ອິມານິ ໂຂ, ອາວຸໂສ, ຈຕ຺ຕາຣິ ອຸປາທານານີ’’ຕິ. ‘‘ອຕ຺ຖິ ປນາວຸໂສ, ມຄ຺ໂຄ ອຕ຺ຖິ ປຏິປທາ, ເອເຕສໍ ອຸປາທານານໍ ປຫານາຍາ’’ຕິ? ‘‘ອຕ຺ຖິ ໂຂ, ອາວຸໂສ, ມຄ຺ໂຄ ອຕ຺ຖິ ປຏິປທາ, ເອເຕສໍ ອຸປາທານານໍ ປຫານາຍາ’’ຕິ. ‘‘ກຕໂມ ປນາວຸໂສ, ມຄ຺ໂຄ ກຕມາ ປຏິປທາ, ເອເຕສໍ ອຸປາທານານໍ ປຫານາຍາ’’ຕິ? ‘‘ອຍເມວ ໂຂ, ອາວຸໂສ, ອຣິໂຍ ອຏ຺ຐງ຺ຄິໂກ ມຄ຺ໂຄ, ເອເຕສໍ ອຸປາທານານໍ ປຫານາຍ, ເສຍ຺ຍຖິທໍ – ສມ຺ມາທິຏ຺ຐິ ສມ຺ມາສງ຺ກປ຺ໂປ ສມ຺ມາວາຈາ ສມ຺ມາກມ຺ມນ຺ໂຕ ສມ຺ມາອາຊີໂວ ສມ຺ມາວາຍາໂມ ສມ຺ມາສຕິ ສມ຺ມາສມາຘິ. ອຍໍ ໂຂ, ອາວຸໂສ, ມຄ຺ໂຄ ອຍໍ ປຏິປທາ, ເອເຕສໍ ອຸປາທານານໍ ປຫານາຍາ’’ຕິ. ‘‘ຠທ຺ທໂກ, ອາວຸໂສ, ມຄ຺ໂຄ ຠທ຺ທິກາ ປຏິປທາ, ເອເຕສໍ ອຸປາທານານໍ ປຫານາຍ. ອລຎ຺ຈ ປນາວຸໂສ ສາຣິປຸຕ຺ຕ, ອປ຺ປມາທາຍາ’’ຕິ. ທ຺ວາທສມໍ.

໑໓. ຠວປຎ຺ຫາສຸຕ຺ຕໍ

໓໒໖. ‘‘‘ຠໂວ, ຠໂວ’ຕິ, ອາວຸໂສ ສາຣິປຸຕ຺ຕ, ວຸຈ຺ຈຕິ. ກຕໂມ ນຸ ໂຂ, ອາວຸໂສ, ຠໂວ’’ຕິ? ‘‘ຕໂຍ ເມ, ອາວຸໂສ, ຠວາ. ກາມຠໂວ, ຣູປຠໂວ, ອຣູປຠໂວ – ອິເມ ໂຂ, ອາວຸໂສ, ຕໂຍ ຠວາ’’ຕິ. ‘‘ອຕ຺ຖິ ປນາວຸໂສ, ມຄ຺ໂຄ ອຕ຺ຖິ ປຏິປທາ, ເອເຕສໍ ຠວານໍ ປຣິຎ຺ຎາຍາ’’ຕິ? ‘‘ອຕ຺ຖິ ໂຂ, ອາວຸໂສ, ມຄ຺ໂຄ ອຕ຺ຖິ ປຏິປທາ, ເອເຕສໍ ຠວານໍ ປຣິຎ຺ຎາຍາ’’ຕິ. ‘‘ກຕໂມ, ປນາວຸໂສ, ມຄ຺ໂຄ ກຕມາ ປຏິປທາ, ເອເຕສໍ ຠວານໍ ປຣິຎ຺ຎາຍາ’’ຕິ? ‘‘ອຍເມວ ໂຂ, ອາວຸໂສ, ອຣິໂຍ ອຏ຺ຐງ຺ຄິໂກ ມຄ຺ໂຄ, ເອເຕສໍ ຠວານໍ ປຣິຎ຺ຎາຍ, ເສຍ຺ຍຖິທໍ – ສມ຺ມາທິຏ຺ຐິ ສມ຺ມາສງ຺ກປ຺ໂປ ສມ຺ມາວາຈາ ສມ຺ມາກມ຺ມນ຺ໂຕ ສມ຺ມາອາຊີໂວ ສມ຺ມາວາຍາໂມ ສມ຺ມາສຕິ ສມ຺ມາສມາຘິ. ອຍໍ ໂຂ, ອາວຸໂສ, ມຄ຺ໂຄ ອຍໍ ປຏິປທາ, ເອເຕສໍ ຠວານໍ ປຣິຎ຺ຎາຍາ’’ຕິ. ‘‘ຠທ຺ທໂກ, ອາວຸໂສ, ມຄ຺ໂຄ ຠທ຺ທິກາ ປຏິປທາ, ເອເຕສໍ ຠວານໍ ປຣິຎ຺ຎາຍ. ອລຎ຺ຈ ປນາວຸໂສ ສາຣິປຸຕ຺ຕ, ອປ຺ປມາທາຍາ’’ຕິ. ເຕຣສມໍ.

໑໔. ທຸກ຺ຂປຎ຺ຫາສຸຕ຺ຕໍ

໓໒໗. ‘‘‘ທຸກ຺ຂໍ, ທຸກ຺ຂ’ນ຺ຕິ, ອາວຸໂສ ສາຣິປຸຕ຺ຕ, ວຸຈ຺ຈຕິ. ກຕມໍ ນຸ ໂຂ, ອາວຸໂສ, ທຸກ຺ຂ’’ນ຺ຕິ? ‘‘ຕິສ຺ໂສ ອິມາ, ອາວຸໂສ, ທຸກ຺ຂຕາ. ທຸກ຺ຂທຸກ຺ຂຕາ, ສງ຺ຂາຣທຸກ຺ຂຕາ, ວິປຣິຓາມທຸກ຺ຂຕາ – ອິມາ ໂຂ, ອາວຸໂສ, ຕິສ຺ໂສ ທຸກ຺ຂຕາ’’ຕິ. ‘‘ອຕ຺ຖິ ປນາວຸໂສ ມຄ຺ໂຄ ອຕ຺ຖິ ປຏິປທາ, ເອຕາສໍ ທຸກ຺ຂຕານໍ ປຣິຎ຺ຎາຍາ’’ຕິ? ‘‘ອຕ຺ຖິ ໂຂ, ອາວຸໂສ, ມຄ຺ໂຄ ອຕ຺ຖິ ປຏິປທາ, ເອຕາສໍ ທຸກ຺ຂຕານໍ ປຣິຎ຺ຎາຍາ’’ຕິ. ‘‘ກຕໂມ ປນາວຸໂສ, ມຄ຺ໂຄ ກຕມາ ປຏິປທາ, ເອຕາສໍ ທຸກ຺ຂຕານໍ ປຣິຎ຺ຎາຍາ’’ຕິ? ‘‘ອຍເມວ ໂຂ, ອາວຸໂສ, ອຣິໂຍ ອຏ຺ຐງ຺ຄິໂກ ມຄ຺ໂຄ, ເອຕາສໍ ທຸກ຺ຂຕານໍ ປຣິຎ຺ຎາຍ, ເສຍ຺ຍຖິທໍ – ສມ຺ມາທິຏ຺ຐິ ສມ຺ມາສງ຺ກປ຺ໂປ ສມ຺ມາວາຈາ ສມ຺ມາກມ຺ມນ຺ໂຕ ສມ຺ມາອາຊີໂວ ສມ຺ມາວາຍາໂມ ສມ຺ມາສຕິ ສມ຺ມາສມາຘິ. ອຍໍ ໂຂ, ອາວຸໂສ, ມຄ຺ໂຄ ອຍໍ ປຏິປທາ, ເອຕາສໍ ທຸກ຺ຂຕານໍ ປຣິຎ຺ຎາຍາ’’ຕິ. ‘‘ຠທ຺ທໂກ, ອາວຸໂສ, ມຄ຺ໂຄ ຠທ຺ທິກາ ປຏິປທາ, ເອຕາສໍ ທຸກ຺ຂຕານໍ ປຣິຎ຺ຎາຍ. ອລຎ຺ຈ ປນາວຸໂສ ສາຣິປຸຕ຺ຕ, ອປ຺ປມາທາຍາ’’ຕິ. ຈຸທ຺ທສມໍ.

໑໕. ສກ຺ກາຍປຎ຺ຫາສຸຕ຺ຕໍ

໓໒໘. ‘‘‘ສກ຺ກາໂຍ, ສກ຺ກາໂຍ’ຕິ, ອາວຸໂສ ສາຣິປຸຕ຺ຕ, ວຸຈ຺ຈຕິ. ກຕໂມ ນຸ ໂຂ, ອາວຸໂສ, ສກ຺ກາໂຍ’’ຕິ? ‘‘ປຎ຺ຈິເມ, ອາວຸໂສ, ອຸປາທານກ຺ຂນ຺ຘາ ສກ຺ກາໂຍ ວຸຕ຺ໂຕ ຠຄວຕາ, ເສຍ຺ຍຖິທໍ – ຣູປຸປາທານກ຺ຂນ຺ໂຘ, ເວທນຸປາທານກ຺ຂນ຺ໂຘ, ສຎ຺ຎຸປາທານກ຺ຂນ຺ໂຘ, ສງ຺ຂາຣຸປາທານກ຺ຂນ຺ໂຘ, ວິຎ຺ຎາຓຸປາທານກ຺ຂນ຺ໂຘ. ອິເມ ໂຂ, ອາວຸໂສ, ປຎ຺ຈຸປາທານກ຺ຂນ຺ຘາ ສກ຺ກາໂຍ ວຸຕ຺ໂຕ ຠຄວຕາ’’ຕິ. ‘‘ອຕ຺ຖິ ປນາວຸໂສ, ມຄ຺ໂຄ ອຕ຺ຖິ ປຏິປທາ, ເອຕສ຺ສ ສກ຺ກາຍສ຺ສ ປຣິຎ຺ຎາຍາ’’ຕິ? ‘‘ອຕ຺ຖິ ໂຂ, ອາວຸໂສ, ມຄ຺ໂຄ ອຕ຺ຖິ ປຏິປທາ, ເອຕສ຺ສ ສກ຺ກາຍສ຺ສ ປຣິຎ຺ຎາຍາ’’ຕິ. ‘‘ກຕໂມ ປນາວຸໂສ, ມຄ຺ໂຄ ກຕມາ ປຏິປທາ, ເອຕສ຺ສ ສກ຺ກາຍສ຺ສ ປຣິຎ຺ຎາຍາ’’ຕິ? ‘‘ອຍເມວ ໂຂ, ອາວຸໂສ, ອຣິໂຍ ອຏ຺ຐງ຺ຄິໂກ ມຄ຺ໂຄ, ເອຕສ຺ສ ສກ຺ກາຍສ຺ສ ປຣິຎ຺ຎາຍ, ເສຍ຺ຍຖິທໍ – ສມ຺ມາທິຏ຺ຐິ ສມ຺ມາສງ຺ກປ຺ໂປ ສມ຺ມາວາຈາ ສມ຺ມາກມ຺ມນ຺ໂຕ ສມ຺ມາອາຊີໂວ ສມ຺ມາວາຍາໂມ ສມ຺ມາສຕິ ສມ຺ມາສມາຘິ. ອຍໍ ໂຂ, ອາວຸໂສ, ມຄ຺ໂຄ ອຍໍ ປຏິປທາ, ເອຕສ຺ສ ສກ຺ກາຍສ຺ສ ປຣິຎ຺ຎາຍາ’’ຕິ. ‘‘ຠທ຺ທໂກ, ອາວຸໂສ, ມຄ຺ໂຄ ຠທ຺ທິກາ ປຏິປທາ, ເອຕສ຺ສ ສກ຺ກາຍສ຺ສ ປຣິຎ຺ຎາຍ. ອລຎ຺ຈ ປນາວຸໂສ ສາຣິປຸຕ຺ຕ, ອປ຺ປມາທາຍາ’’ຕິ. ປນ຺ນຣສມໍ.

໑໖. ທຸກ຺ກຣປຎ຺ຫາສຸຕ຺ຕໍ

໓໒໙. ‘‘ກິໍ ນຸ ໂຂ, ອາວຸໂສ ສາຣິປຸຕ຺ຕ, ອິມສ຺ມິໍ ຘມ຺ມວິນເຍ ທຸກ຺ກຣ’’ນ຺ຕິ? ‘‘ປພ຺ພຊ຺ຊາ ໂຂ, ອາວຸໂສ, ອິມສ຺ມິໍ ຘມ຺ມວິນເຍ ທຸກ຺ກຣາ’’ຕິ. ‘‘ປພ຺ພຊິເຕນ ປນາວຸໂສ, ກິໍ ທຸກ຺ກຣ’’ນ຺ຕິ? ‘‘ປພ຺ພຊິເຕນ ໂຂ, ອາວຸໂສ, ອຠິຣຕິ ທຸກ຺ກຣາ’’ຕິ. ‘‘ອຠິຣເຕນ ປນາວຸໂສ, ກິໍ ທຸກ຺ກຣ’’ນ຺ຕິ? ‘‘ອຠິຣເຕນ ໂຂ, ອາວຸໂສ, ຘມ຺ມານຸຘມ຺ມປ຺ປຏິປຕ຺ຕິ ທຸກ຺ກຣາ’’ຕິ. ‘‘ກີວຈິຣໍ ປນາວຸໂສ, ຘມ຺ມານຸຘມ຺ມປ຺ປຏິປນ຺ໂນ ຠິກ຺ຂຸ ອຣຫໍ ອສ຺ສາ’’ຕິ? ‘‘ນຈິຣໍ, ອາວຸໂສ’’ຕິ. ໂສຬສມໍ.

ຊມ຺ພຸຂາທກສໍຍຸຕ຺ຕໍ ສມຕ຺ຕໍ.