໑. ນິພ຺ພານປຎ຺ຫາສຸຕ຺ຕໍ

໓໑໔. ເອກໍ ສມຍໍ ອາຍສ຺ມາ ສາຣິປຸຕ຺ໂຕ ມຄເຘສຸ ວິຫຣຕິ ນາລກຄາມເກ. ອຖ ໂຂ ຊມ຺ພຸຂາທໂກ ປຣິພ຺ພາຊໂກ ເຍນາຍສ຺ມາ ສາຣິປຸຕ຺ໂຕ ເຕນຸປສງ຺ກມິ; ອຸປສງ຺ກມິຕ຺ວາ ອາຍສ຺ມຕາ ສາຣິປຸຕ຺ເຕນ ສທ຺ຘິໍ ສມ຺ໂມທິ. ສມ຺ໂມທນີຍໍ ກຖໍ ສາຣຓີຍໍ ວີຕິສາເຣຕ຺ວາ ເອກມນ຺ຕໍ ນິສີທິ. ເອກມນ຺ຕໍ ນິສິນ຺ໂນ ໂຂ ຊມ຺ພຸຂາທໂກ ປຣິພ຺ພາຊໂກ ອາຍສ຺ມນ຺ຕໍ ສາຣິປຸຕ຺ຕໍ ເອຕທໂວຈ –

‘‘‘ນິພ຺ພານໍ, ນິພ຺ພານ’ນ຺ຕິ, ອາວຸໂສ ສາຣິປຸຕ຺ຕ, ວຸຈ຺ຈຕິ. ກຕມໍ ນຸ ໂຂ, ອາວຸໂສ, ນິພ຺ພານ’’ນ຺ຕິ? ‘‘ໂຍ ໂຂ, ອາວຸໂສ, ຣາຄກ຺ຂໂຍ ໂທສກ຺ຂໂຍ ໂມຫກ຺ຂໂຍ – ອິທໍ ວຸຈ຺ຈຕິ ນິພ຺ພານ’’ນ຺ຕິ. ‘‘ອຕ຺ຖິ ປນາວຸໂສ, ມຄ຺ໂຄ ອຕ຺ຖິ ປຏິປທາ ເອຕສ຺ສ ນິພ຺ພານສ຺ສ ສຈ຺ຉິກິຣິຍາຍາ’’ຕິ? ‘‘ອຕ຺ຖິ ໂຂ, ອາວຸໂສ, ມຄ຺ໂຄ ອຕ຺ຖິ ປຏິປທາ ເອຕສ຺ສ ນິພ຺ພານສ຺ສ ສຈ຺ຉິກິຣິຍາຍາ’’ຕິ. ‘‘ກຕໂມ ປນາວຸໂສ, ມຄ຺ໂຄ ກຕມາ ປຏິປທາ ເອຕສ຺ສ ນິພ຺ພານສ຺ສ ສຈ຺ຉິກິຣິຍາຍາ’’ຕິ? ‘‘ອຍເມວ ໂຂ, ອາວຸໂສ, ອຣິໂຍ ອຏ຺ຐງ຺ຄິໂກ ມຄ຺ໂຄ ເອຕສ຺ສ ນິພ຺ພານສ຺ສ ສຈ຺ຉິກິຣິຍາຍ, ເສຍ຺ຍຖິທໍ – ສມ຺ມາທິຏ຺ຐິ ສມ຺ມາສງ຺ກປ຺ໂປ ສມ຺ມາວາຈາ ສມ຺ມາກມ຺ມນ຺ໂຕ ສມ຺ມາອາຊີໂວ ສມ຺ມາວາຍາໂມ ສມ຺ມາສຕິ ສມ຺ມາສມາຘິ. ອຍໍ ໂຂ, ອາວຸໂສ, ມຄ຺ໂຄ ອຍໍ ປຏິປທາ ເອຕສ຺ສ ນິພ຺ພານສ຺ສ ສຈ຺ຉິກິຣິຍາຍາ’’ຕິ. ‘‘ຠທ຺ທໂກ, ອາວຸໂສ, ມຄ຺ໂຄ ຠທ຺ທິກາ ປຏິປທາ ເອຕສ຺ສ ນິພ຺ພານສ຺ສ ສຈ຺ຉິກິຣິຍາຍ. ອລຎ຺ຈ ປນາວຸໂສ ສາຣິປຸຕ຺ຕ, ອປ຺ປມາທາຍາ’’ຕິ. ປຐມໍ.