໓. ມາຕຸຄາມສໍຍຸຕ຺ຕໍ

໑. ປຐມເປຍ຺ຍາລວຄ຺ໂຄ

໑. ມາຕຸຄາມສຸຕ຺ຕໍ

໒໘໐. ‘‘ປຎ຺ຈຫິ, ຠິກ຺ຂເວ, ອງ຺ເຄຫິ ສມນ຺ນາຄໂຕ ມາຕຸຄາໂມ ເອກນ຺ຕອມນາໂປ ໂຫຕິ ປຸຣິສສ຺ສ. ກຕເມຫິ ປຎ຺ຈຫິ? ນ ຈ ຣູປວາ ໂຫຕິ, ນ ຈ ໂຠຄວາ ໂຫຕິ, ນ ຈ ສີລວາ ໂຫຕິ, ອລໂສ ຈ ໂຫຕິ, ປຊຎ຺ຈສ຺ສ ນ ລຠຕິ – ອິເມຫິ ໂຂ, ຠິກ຺ຂເວ, ປຎ຺ຈຫິ ອງ຺ເຄຫິ ສມນ຺ນາຄໂຕ ມາຕຸຄາໂມ ເອກນ຺ຕອມນາໂປ ໂຫຕິ ປຸຣິສສ຺ສ. ປຎ຺ຈຫິ, ຠິກ຺ຂເວ, ອງ຺ເຄຫິ ສມນ຺ນາຄໂຕ ມາຕຸຄາໂມ ເອກນ຺ຕມນາໂປ ໂຫຕິ ປຸຣິສສ຺ສ. ກຕເມຫິ ປຎ຺ຈຫິ? ຣູປວາ ຈ ໂຫຕິ, ໂຠຄວາ ຈ ໂຫຕິ, ສີລວາ ຈ ໂຫຕິ, ທກ຺ໂຂ ຈ ໂຫຕິ ອນລໂສ, ປຊຎ຺ຈສ຺ສ ລຠຕິ – ອິເມຫິ ໂຂ, ຠິກ຺ຂເວ, ປຎ຺ຈຫິ ອງ຺ເຄຫິ ສມນ຺ນາຄໂຕ ມາຕຸຄາໂມ ເອກນ຺ຕມນາໂປ ໂຫຕິ ປຸຣິສສ຺ສາ’’ຕິ. ປຐມໍ.

໒. ປຸຣິສສຸຕ຺ຕໍ

໒໘໑. ‘‘ປຎ຺ຈຫິ, ຠິກ຺ຂເວ, ອງ຺ເຄຫິ ສມນ຺ນາຄໂຕ ປຸຣິໂສ ເອກນ຺ຕອມນາໂປ ໂຫຕິ ມາຕຸຄາມສ຺ສ. ກຕເມຫິ ປຎ຺ຈຫິ? ນ ຈ ຣູປວາ ໂຫຕິ, ນ ຈ ໂຠຄວາ ໂຫຕິ, ນ ຈ ສີລວາ ໂຫຕິ, ອລໂສ ຈ ໂຫຕິ, ປຊຎ຺ຈສ຺ສ ນ ລຠຕິ – ອິເມຫິ ໂຂ, ຠິກ຺ຂເວ, ປຎ຺ຈຫິ ອງ຺ເຄຫິ ສມນ຺ນາຄໂຕ ປຸຣິໂສ ເອກນ຺ຕອມນາໂປ ໂຫຕິ ມາຕຸຄາມສ຺ສ. ປຎ຺ຈຫິ, ຠິກ຺ຂເວ, ອງ຺ເຄຫິ ສມນ຺ນາຄໂຕ ປຸຣິໂສ ເອກນ຺ຕມນາໂປ ໂຫຕິ ມາຕຸຄາມສ຺ສ. ກຕເມຫິ ປຎ຺ຈຫິ? ຣູປວາ ຈ ໂຫຕິ, ໂຠຄວາ ຈ ໂຫຕິ, ສີລວາ ຈ ໂຫຕິ, ທກ຺ໂຂ ຈ ໂຫຕິ ອນລໂສ, ປຊຎ຺ຈສ຺ສ ລຠຕິ – ອິເມຫິ ໂຂ, ຠິກ຺ຂເວ, ປຎ຺ຈຫິ ອງ຺ເຄຫິ ສມນ຺ນາຄໂຕ ປຸຣິໂສ ເອກນ຺ຕມນາໂປ ໂຫຕິ ມາຕຸຄາມສ຺ສາ’’ຕິ. ທຸຕິຍໍ.

໓. ອາເວຓິກທຸກ຺ຂສຸຕ຺ຕໍ

໒໘໒. ‘‘ປຎ຺ຈິມານິ, ຠິກ຺ຂເວ, ມາຕຸຄາມສ຺ສ ອາເວຓິການິ ທຸກ຺ຂານິ, ຍານິ ມາຕຸຄາໂມ ປຈ຺ຈນຸໂຠຕິ, ອຎ຺ຎຕ຺ເຣວ ປຸຣິເສຫິ. ກຕມານິ ປຎ຺ຈ? ອິຘ, ຠິກ຺ຂເວ, ມາຕຸຄາໂມ ທຫໂຣວ ສມາໂນ ປຕິກຸລໍ ຄຈ຺ຉຕິ, ຎາຕເກຫິ ວິນາ ໂຫຕິ. ອິທໍ, ຠິກ຺ຂເວ, ມາຕຸຄາມສ຺ສ ປຐມໍ ອາເວຓິກໍ ທຸກ຺ຂໍ, ຍໍ ມາຕຸຄາໂມ ປຈ຺ຈນຸໂຠຕິ, ອຎ຺ຎຕ຺ເຣວ ປຸຣິເສຫິ. ປຸນ ຈປຣໍ, ຠິກ຺ຂເວ, ມາຕຸຄາໂມ ອຸຕຸນີ ໂຫຕິ. ອິທໍ, ຠິກ຺ຂເວ, ມາຕຸຄາມສ຺ສ ທຸຕິຍໍ ອາເວຓິກໍ ທຸກ຺ຂໍ, ຍໍ ມາຕຸຄາໂມ ປຈ຺ຈນຸໂຠຕິ, ອຎ຺ຎຕ຺ເຣວ ປຸຣິເສຫິ. ປຸນ ຈປຣໍ, ຠິກ຺ຂເວ, ມາຕຸຄາໂມ ຄພ຺ຠິນີ ໂຫຕິ. ອິທໍ, ຠິກ຺ຂເວ, ມາຕຸຄາມສ຺ສ ຕຕິຍໍ ອາເວຓິກໍ ທຸກ຺ຂໍ, ຍໍ ມາຕຸຄາໂມ ປຈ຺ຈນຸໂຠຕິ, ອຎ຺ຎຕ຺ເຣວ ປຸຣິເສຫິ. ປຸນ ຈປຣໍ, ຠິກ຺ຂເວ, ມາຕຸຄາໂມ ວິຊາຍຕິ. ອິທໍ, ຠິກ຺ຂເວ, ມາຕຸຄາມສ຺ສ ຈຕຸຕ຺ຖໍ ອາເວຓິກໍ ທຸກ຺ຂໍ, ຍໍ ມາຕຸຄາໂມ ປຈ຺ຈນຸໂຠຕິ, ອຎ຺ຎຕ຺ເຣວ ປຸຣິເສຫິ. ປຸນ ຈປຣໍ, ຠິກ຺ຂເວ, ມາຕຸຄາໂມ ປຸຣິສສ຺ສ ປາຣິຈຣິຍໍ ອຸເປຕິ. ອິທໍ ໂຂ, ຠິກ຺ຂເວ, ມາຕຸຄາມສ຺ສ ປຎ຺ຈມໍ ອາເວຓິກໍ ທຸກ຺ຂໍ, ຍໍ ມາຕຸຄາໂມ ປຈ຺ຈນຸໂຠຕິ, ອຎ຺ຎຕ຺ເຣວ ປຸຣິເສຫິ. ອິມານິ ໂຂ, ຠິກ຺ຂເວ, ປຎ຺ຈ ມາຕຸຄາມສ຺ສ ອາເວຓິການິ ທຸກ຺ຂານິ, ຍານິ ມາຕຸຄາໂມ ປຈ຺ຈນຸໂຠຕິ, ອຎ຺ຎຕ຺ເຣວ ປຸຣິເສຫີ’’ຕິ. ຕຕິຍໍ.

໔. ຕີຫິຘມ຺ເມຫິສຸຕ຺ຕໍ

໒໘໓. ‘‘ຕີຫິ, ຠິກ຺ຂເວ, ຘມ຺ເມຫິ ສມນ຺ນາຄໂຕ ມາຕຸຄາໂມ ເຍຠຸຍ຺ເຍນ ກາຍສ຺ສ ເຠທາ ປຣໍ ມຣຓາ ອປາຍໍ ທຸຄ຺ຄຕິໍ ວິນິປາຕໍ ນິຣຍໍ ອຸປປຊ຺ຊຕິ. ກຕເມຫິ ຕີຫິ? ອິຘ, ຠິກ຺ຂເວ, ມາຕຸຄາໂມ ປຸພ຺ພຓ຺ຫສມຍໍ ມຈ຺ເຉຣມລປຣິຍຸຏ຺ຐິເຕນ ເຈຕສາ ອຄາຣໍ ອຊ຺ຌາວສຕິ. ມຊ຺ຌນ຺ຫິກສມຍໍ ອິສ຺ສາປຣິຍຸຏ຺ຐິເຕນ ເຈຕສາ ອຄາຣໍ ອຊ຺ຌາວສຕິ. ສາຍນ຺ຫສມຍໍ ກາມຣາຄປຣິຍຸຏ຺ຐິເຕນ ເຈຕສາ ອຄາຣໍ ອຊ຺ຌາວສຕິ. ອິເມຫິ ໂຂ, ຠິກ຺ຂເວ, ຕີຫິ ຘມ຺ເມຫິ ສມນ຺ນາຄໂຕ ມາຕຸຄາໂມ ເຍຠຸຍ຺ເຍນ ກາຍສ຺ສ ເຠທາ ປຣໍ ມຣຓາ ອປາຍໍ ທຸຄ຺ຄຕິໍ ວິນິປາຕໍ ນິຣຍໍ ອຸປປຊ຺ຊຕີ’’ຕິ. ຈຕຸຕ຺ຖໍ.

໕. ໂກຘນສຸຕ຺ຕໍ

໒໘໔. ອຖ ໂຂ ອາຍສ຺ມາ ອນຸຣຸທ຺ໂຘ ເຍນ ຠຄວາ ເຕນຸປສງ຺ກມິ; ອຸປສງ຺ກມິຕ຺ວາ ເອກມນ຺ຕໍ ນິສີທິ. ເອກມນ຺ຕໍ ນິສິນ຺ໂນ ໂຂ ອາຍສ຺ມາ ອນຸຣຸທ຺ໂຘ ຠຄວນ຺ຕໍ ເອຕທໂວຈ – ‘‘ອິຘາຫໍ, ຠນ຺ເຕ, ມາຕຸຄາມໍ ປສ຺ສາມິ ທິພ຺ເພນ ຈກ຺ຂຸນາ ວິສຸທ຺ເຘນ ອຕິກ຺ກນ຺ຕມານຸສເກນ ກາຍສ຺ສ ເຠທາ ປຣໍ ມຣຓາ ອປາຍໍ ທຸຄ຺ຄຕິໍ ວິນິປາຕໍ ນິຣຍໍ ອຸປປຊ຺ຊນ຺ຕໍ. ກຕີຫິ ນຸ ໂຂ, ຠນ຺ເຕ, ຘມ຺ເມຫິ ສມນ຺ນາຄໂຕ ມາຕຸຄາໂມ ກາຍສ຺ສ ເຠທາ ປຣໍ ມຣຓາ ອປາຍໍ ທຸຄ຺ຄຕິໍ ວິນິປາຕໍ ນິຣຍໍ ອຸປປຊ຺ຊຕີ’’ຕິ?

‘‘ປຎ຺ຈຫິ ໂຂ, ອນຸຣຸທ຺ຘ, ຘມ຺ເມຫິ ສມນ຺ນາຄໂຕ ມາຕຸຄາໂມ ກາຍສ຺ສ ເຠທາ ປຣໍ ມຣຓາ ອປາຍໍ ທຸຄ຺ຄຕິໍ ວິນິປາຕໍ ນິຣຍໍ ອຸປປຊ຺ຊຕິ. ກຕເມຫິ ປຎ຺ຈຫິ? ອສ຺ສທ຺ໂຘ ຈ ໂຫຕິ, ອຫິຣິໂກ ຈ ໂຫຕິ, ອໂນຕ຺ຕປ຺ປີ ຈ ໂຫຕິ, ໂກຘໂນ ຈ ໂຫຕິ, ທຸປ຺ປຎ຺ໂຎ ຈ ໂຫຕິ – ອິເມຫິ ໂຂ, ອນຸຣຸທ຺ຘ, ປຎ຺ຈຫິ ຘມ຺ເມຫິ ສມນ຺ນາຄໂຕ ມາຕຸຄາໂມ ກາຍສ຺ສ ເຠທາ ປຣໍ ມຣຓາ ອປາຍໍ ທຸຄ຺ຄຕິໍ ວິນິປາຕໍ ນິຣຍໍ ອຸປປຊ຺ຊຕີ’’ຕິ. ປຎ຺ຈມໍ.

໖. ອຸປນາຫີສຸຕ຺ຕໍ

໒໘໕. ‘‘ປຎ຺ຈຫິ, ອນຸຣຸທ຺ຘ, ຘມ຺ເມຫິ ສມນ຺ນາຄໂຕ ມາຕຸຄາໂມ ກາຍສ຺ສ ເຠທາ ປຣໍ ມຣຓາ ອປາຍໍ ທຸຄ຺ຄຕິໍ ວິນິປາຕໍ ນິຣຍໍ ອຸປປຊ຺ຊຕິ. ກຕເມຫິ ປຎ຺ຈຫິ? ອສ຺ສທ຺ໂຘ ຈ ໂຫຕິ, ອຫິຣິໂກ ຈ ໂຫຕິ, ອໂນຕ຺ຕປ຺ປີ ຈ ໂຫຕິ, ອຸປນາຫີ ຈ ໂຫຕິ, ທຸປ຺ປຎ຺ໂຎ ຈ ໂຫຕິ – ອິເມຫິ ໂຂ, ອນຸຣຸທ຺ຘ, ປຎ຺ຈຫິ ຘມ຺ເມຫິ ສມນ຺ນາຄໂຕ ມາຕຸຄາໂມ ກາຍສ຺ສ ເຠທາ ປຣໍ ມຣຓາ ອປາຍໍ ທຸຄ຺ຄຕິໍ ວິນິປາຕໍ ນິຣຍໍ ອຸປປຊ຺ຊຕີ’’ຕິ. ຉຏ຺ຐໍ.

໗. ອິສ຺ສຸກີສຸຕ຺ຕໍ

໒໘໖. ‘‘ປຎ຺ຈຫິ, ອນຸຣຸທ຺ຘ, ຘມ຺ເມຫິ ສມນ຺ນາຄໂຕ ມາຕຸຄາໂມ ກາຍສ຺ສ ເຠທາ ປຣໍ ມຣຓາ ອປາຍໍ ທຸຄ຺ຄຕິໍ ວິນິປາຕໍ ນິຣຍໍ ອຸປປຊ຺ຊຕິ. ກຕເມຫິ ປຎ຺ຈຫິ? ອສ຺ສທ຺ໂຘ ຈ ໂຫຕິ, ອຫິຣິໂກ ຈ ໂຫຕິ, ອໂນຕ຺ຕປ຺ປີ ຈ ໂຫຕິ, ອິສ຺ສຸກີ ຈ ໂຫຕິ, ທຸປ຺ປຎ຺ໂຎ ຈ ໂຫຕິ – ອິເມຫິ ໂຂ, ອນຸຣຸທ຺ຘ, ປຎ຺ຈຫິ ຘມ຺ເມຫິ ສມນ຺ນາຄໂຕ ມາຕຸຄາໂມ ກາຍສ຺ສ ເຠທາ ປຣໍ ມຣຓາ ອປາຍໍ ທຸຄ຺ຄຕິໍ ວິນິປາຕໍ ນິຣຍໍ ອຸປປຊ຺ຊຕີ’’ຕິ. ສຕ຺ຕມໍ.

໘. ມຈ຺ຉຣີສຸຕ຺ຕໍ

໒໘໗. ‘‘ປຎ຺ຈຫິ, ອນຸຣຸທ຺ຘ, ຘມ຺ເມຫິ ສມນ຺ນາຄໂຕ ມາຕຸຄາໂມ ກາຍສ຺ສ ເຠທາ ປຣໍ ມຣຓາ ອປາຍໍ ທຸຄ຺ຄຕິໍ ວິນິປາຕໍ ນິຣຍໍ ອຸປປຊ຺ຊຕິ. ກຕເມຫິ ປຎ຺ຈຫິ? ອສ຺ສທ຺ໂຘ ຈ ໂຫຕິ, ອຫິຣິໂກ ຈ ໂຫຕິ, ອໂນຕ຺ຕປ຺ປີ ຈ ໂຫຕິ, ມຈ຺ຉຣີ ຈ ໂຫຕິ, ທຸປ຺ປຎ຺ໂຎ ຈ ໂຫຕິ – ອິເມຫິ ໂຂ, ອນຸຣຸທ຺ຘ, ປຎ຺ຈຫິ ຘມ຺ເມຫິ ສມນ຺ນາຄໂຕ ມາຕຸຄາໂມ…ເປ… ອປາຍໍ ທຸຄ຺ຄຕິໍ ວິນິປາຕໍ ນິຣຍໍ ອຸປປຊ຺ຊຕີ’’ຕິ. ອຏ຺ຐມໍ.

໙. ອຕິຈາຣີສຸຕ຺ຕໍ

໒໘໘. ‘‘ປຎ຺ຈຫິ, ອນຸຣຸທ຺ຘ, ຘມ຺ເມຫິ ສມນ຺ນາຄໂຕ ມາຕຸຄາໂມ…ເປ… ອປາຍໍ ທຸຄ຺ຄຕິໍ ວິນິປາຕໍ ນິຣຍໍ ອຸປປຊ຺ຊຕິ. ກຕເມຫິ ປຎ຺ຈຫິ? ອສ຺ສທ຺ໂຘ ຈ ໂຫຕິ, ອຫິຣິໂກ ຈ ໂຫຕິ, ອໂນຕ຺ຕປ຺ປີ ຈ ໂຫຕິ, ອຕິຈາຣີ ຈ ໂຫຕິ, ທຸປ຺ປຎ຺ໂຎ ຈ ໂຫຕິ – ອິເມຫິ ໂຂ, ອນຸຣຸທ຺ຘ, ປຎ຺ຈຫິ ຘມ຺ເມຫິ ສມນ຺ນາຄໂຕ ມາຕຸຄາໂມ…ເປ… ອຸປປຊ຺ຊຕີ’’ຕິ. ນວມໍ.

໑໐. ທຸສ຺ສີລສຸຕ຺ຕໍ

໒໘໙. ‘‘ປຎ຺ຈຫິ, ອນຸຣຸທ຺ຘ, ຘມ຺ເມຫິ ສມນ຺ນາຄໂຕ ມາຕຸຄາໂມ…ເປ… ນິຣຍໍ ອຸປປຊ຺ຊຕິ. ກຕເມຫິ ປຎ຺ຈຫິ? ອສ຺ສທ຺ໂຘ ຈ ໂຫຕິ, ອຫິຣິໂກ ຈ ໂຫຕິ, ອໂນຕ຺ຕປ຺ປີ ຈ ໂຫຕິ, ທຸສ຺ສີໂລ ຈ ໂຫຕິ, ທຸປ຺ປຎ຺ໂຎ ຈ ໂຫຕິ – ອິເມຫິ ໂຂ, ອນຸຣຸທ຺ຘ, ປຎ຺ຈຫິ ຘມ຺ເມຫິ ສມນ຺ນາຄໂຕ ມາຕຸຄາໂມ…ເປ… ນິຣຍໍ ອຸປປຊ຺ຊຕີ’’ຕິ. ທສມໍ.

໑໑. ອປ຺ປສ຺ສຸຕສຸຕ຺ຕໍ

໒໙໐. ‘‘ປຎ຺ຈຫິ, ອນຸຣຸທ຺ຘ, ຘມ຺ເມຫິ ສມນ຺ນາຄໂຕ ມາຕຸຄາໂມ…ເປ… ນິຣຍໍ ອຸປປຊ຺ຊຕິ. ກຕເມຫິ ປຎ຺ຈຫິ? ອສ຺ສທ຺ໂຘ ຈ ໂຫຕິ, ອຫິຣິໂກ ຈ ໂຫຕິ, ອໂນຕ຺ຕປ຺ປີ ຈ ໂຫຕິ, ອປ຺ປສ຺ສຸໂຕ ຈ ໂຫຕິ, ທຸປ຺ປຎ຺ໂຎ ຈ ໂຫຕິ – ອິເມຫິ ໂຂ, ອນຸຣຸທ຺ຘ, ປຎ຺ຈຫິ ຘມ຺ເມຫິ ສມນ຺ນາຄໂຕ ມາຕຸຄາໂມ…ເປ… ນິຣຍໍ ອຸປປຊ຺ຊຕີ’’ຕິ. ເອກາທສມໍ.

໑໒. ກຸສີຕສຸຕ຺ຕໍ

໒໙໑. ‘‘ປຎ຺ຈຫິ, ອນຸຣຸທ຺ຘ, ຘມ຺ເມຫິ ສມນ຺ນາຄໂຕ ມາຕຸຄາໂມ…ເປ… ນິຣຍໍ ອຸປປຊ຺ຊຕິ. ກຕເມຫິ ປຎ຺ຈຫິ? ອສ຺ສທ຺ໂຘ ຈ ໂຫຕິ, ອຫິຣິໂກ ຈ ໂຫຕິ, ອໂນຕ຺ຕປ຺ປີ ຈ ໂຫຕິ, ກຸສີໂຕ ຈ ໂຫຕິ, ທຸປ຺ປຎ຺ໂຎ ຈ ໂຫຕິ – ອິເມຫິ ໂຂ, ອນຸຣຸທ຺ຘ, ປຎ຺ຈຫິ ຘມ຺ເມຫິ ສມນ຺ນາຄໂຕ ມາຕຸຄາໂມ…ເປ… ອປາຍໍ ທຸຄ຺ຄຕິໍ ວິນິປາຕໍ ນິຣຍໍ ອຸປປຊ຺ຊຕີ’’ຕິ. ທ຺ວາທສມໍ.

໑໓. ມຸຏ຺ຐສ຺ສຕິສຸຕ຺ຕໍ

໒໙໒. ‘‘ປຎ຺ຈຫິ, ອນຸຣຸທ຺ຘ, ຘມ຺ເມຫິ ສມນ຺ນາຄໂຕ ມາຕຸຄາໂມ…ເປ… ນິຣຍໍ ອຸປປຊ຺ຊຕິ. ກຕເມຫິ ປຎ຺ຈຫິ? ອສ຺ສທ຺ໂຘ ຈ ໂຫຕິ, ອຫິຣິໂກ ຈ ໂຫຕິ, ອໂນຕ຺ຕປ຺ປີ ຈ ໂຫຕິ, ມຸຏ຺ຐສ຺ສຕິ ຈ ໂຫຕິ, ທຸປ຺ປຎ຺ໂຎ ຈ ໂຫຕິ – ອິເມຫິ ໂຂ, ອນຸຣຸທ຺ຘ, ປຎ຺ຈຫິ ຘມ຺ເມຫິ ສມນ຺ນາຄໂຕ ມາຕຸຄາໂມ…ເປ… ນິຣຍໍ ອຸປປຊ຺ຊຕີ’’ຕິ. ເຕຣສມໍ.

໑໔. ປຎ຺ຈເວຣສຸຕ຺ຕໍ

໒໙໓. ‘‘ປຎ຺ຈຫິ, ອນຸຣຸທ຺ຘ, ຘມ຺ເມຫິ ສມນ຺ນາຄໂຕ ມາຕຸຄາໂມ…ເປ… ນິຣຍໍ ອຸປປຊ຺ຊຕິ. ກຕເມຫິ ປຎ຺ຈຫິ? ປາຓາຕິປາຕີ ຈ ໂຫຕິ, ອທິນ຺ນາທາຍີ ຈ ໂຫຕິ, ກາເມສຸມິຈ຺ຉາຈາຣີ ຈ ໂຫຕິ, ມຸສາວາທີ ຈ ໂຫຕິ, ສຸຣາເມຣຍມຊ຺ຊປ຺ປມາທຏ຺ຐາຍີ ຈ ໂຫຕິ – ອິເມຫິ ໂຂ, ອນຸຣຸທ຺ຘ, ປຎ຺ຈຫິ ຘມ຺ເມຫິ ສມນ຺ນາຄໂຕ ມາຕຸຄາໂມ ກາຍສ຺ສ ເຠທາ ປຣໍ ມຣຓາ ອປາຍໍ ທຸຄ຺ຄຕິໍ ວິນິປາຕໍ ນິຣຍໍ ອຸປປຊ຺ຊຕີ’’ຕິ. ຈຸທ຺ທສມໍ.

ປຐມເປຍ຺ຍາລວຄ຺ໂຄ.

ຕສ຺ສຸທ຺ທານໍ –

ມາຕຸຄາໂມ ປຸຣິໂສ ຈ, ອາເວຓິກາ ຕິຘມ຺ໂມ ຈ [ທ຺ເວ ມນາປາມນາປາຈ, ອາເວຓິກາ ຕີຫິ ອນຸຣຸທ຺ໂຘ (ສພ຺ພຕ຺ຖ)];

ໂກຘໂນ ອຸປນາຫີ ຈ, ອິສ຺ສຸກີ ມຈ຺ຉເຣນ ຈ;

ອຕິຈາຣີ ຈ ທຸສ຺ສີໂລ, ອປ຺ປສ຺ສຸໂຕ ຈ ກຸສີໂຕ;

ມຸຏ຺ຐສ຺ສຕິ ປຎ຺ຈເວຣໍ, ກຓ຺ຫປກ຺ເຂ ປກາສິໂຕ.

໒. ທຸຕິຍເປຍ຺ຍາລວຄ຺ໂຄ

໑. ອກ຺ໂກຘນສຸຕ຺ຕໍ

໒໙໔. ອຖ ໂຂ ອາຍສ຺ມາ ອນຸຣຸທ຺ໂຘ ເຍນ ຠຄວາ ເຕນຸປສງ຺ກມິ; ອຸປສງ຺ກມິຕ຺ວາ…ເປ… ເອກມນ຺ຕໍ ນິສິນ຺ໂນ ໂຂ ອາຍສ຺ມາ ອນຸຣຸທ຺ໂຘ ຠຄວນ຺ຕໍ ເອຕທໂວຈ – ‘‘ອິຘາຫໍ, ຠນ຺ເຕ, ມາຕຸຄາມໍ ປສ຺ສາມິ ທິພ຺ເພນ ຈກ຺ຂຸນາ ວິສຸທ຺ເຘນ ອຕິກ຺ກນ຺ຕມານຸສເກນ ກາຍສ຺ສ ເຠທາ ປຣໍ ມຣຓາ ສຸຄຕິໍ ສຄ຺ຄໍ ໂລກໍ ອຸປປຊ຺ຊນ຺ຕໍ. ກຕີຫິ ນຸ ໂຂ, ຠນ຺ເຕ, ຘມ຺ເມຫິ ສມນ຺ນາຄໂຕ ມາຕຸຄາໂມ ກາຍສ຺ສ ເຠທາ ປຣໍ ມຣຓາ ສຸຄຕິໍ ສຄ຺ຄໍ ໂລກໍ ອຸປປຊ຺ຊຕີ’’ຕິ?

‘‘ປຎ຺ຈຫິ ໂຂ, ອນຸຣຸທ຺ຘ, ຘມ຺ເມຫິ ສມນ຺ນາຄໂຕ ມາຕຸຄາໂມ ກາຍສ຺ສ ເຠທາ ປຣໍ ມຣຓາ ສຸຄຕິໍ ສຄ຺ຄໍ ໂລກໍ ອຸປປຊ຺ຊຕິ. ກຕເມຫິ ປຎ຺ຈຫິ? ສທ຺ໂຘ ຈ ໂຫຕິ, ຫິຣິມາ ຈ ໂຫຕິ, ໂອຕ຺ຕປ຺ປີ ຈ ໂຫຕິ, ອກ຺ໂກຘໂນ ຈ ໂຫຕິ, ປຎ຺ຎວາ ຈ ໂຫຕິ – ອິເມຫິ ໂຂ, ອນຸຣຸທ຺ຘ, ປຎ຺ຈຫິ ຘມ຺ເມຫິ ສມນ຺ນາຄໂຕ ມາຕຸຄາໂມ ກາຍສ຺ສ ເຠທາ ປຣໍ ມຣຓາ ສຸຄຕິໍ ສຄ຺ຄໍ ໂລກໍ ອຸປປຊ຺ຊຕີ’’ຕິ. ປຐມໍ.

໒. ອນຸປນາຫີສຸຕ຺ຕໍ

໒໙໕. ‘‘ປຎ຺ຈຫິ, ອນຸຣຸທ຺ຘ, ຘມ຺ເມຫິ ສມນ຺ນາຄໂຕ ມາຕຸຄາໂມ ກາຍສ຺ສ ເຠທາ ປຣໍ ມຣຓາ ສຸຄຕິໍ ສຄ຺ຄໍ ໂລກໍ ອຸປປຊ຺ຊຕິ. ກຕເມຫິ ປຎ຺ຈຫິ? ສທ຺ໂຘ ຈ ໂຫຕິ, ຫິຣິມາ ຈ ໂຫຕິ, ໂອຕ຺ຕປ຺ປີ ຈ ໂຫຕິ, ອນຸປນາຫີ ຈ ໂຫຕິ, ປຎ຺ຎວາ ຈ ໂຫຕິ – ອິເມຫິ ໂຂ, ອນຸຣຸທ຺ຘ, ປຎ຺ຈຫິ ຘມ຺ເມຫິ ສມນ຺ນາຄໂຕ ມາຕຸຄາໂມ ກາຍສ຺ສ ເຠທາ ປຣໍ ມຣຓາ ສຸຄຕິໍ ສຄ຺ຄໍ ໂລກໍ ອຸປປຊ຺ຊຕີ’’ຕິ. ທຸຕິຍໍ.

໓. ອນິສ຺ສຸກີສຸຕ຺ຕໍ

໒໙໖. ‘‘ປຎ຺ຈຫິ, ອນຸຣຸທ຺ຘ, ຘມ຺ເມຫິ ສມນ຺ນາຄໂຕ ມາຕຸຄາໂມ ກາຍສ຺ສ ເຠທາ ປຣໍ ມຣຓາ ສຸຄຕິໍ ສຄ຺ຄໍ ໂລກໍ ອຸປປຊ຺ຊຕິ. ກຕເມຫິ ປຎ຺ຈຫິ? ສທ຺ໂຘ ຈ ໂຫຕິ, ຫິຣິມາ ຈ ໂຫຕິ, ໂອຕ຺ຕປ຺ປີ ຈ ໂຫຕິ, ອນິສ຺ສຸກີ ຈ ໂຫຕິ, ປຎ຺ຎວາ ຈ ໂຫຕິ – ອິເມຫິ ໂຂ, ອນຸຣຸທ຺ຘ, ປຎ຺ຈຫິ ຘມ຺ເມຫິ ສມນ຺ນາຄໂຕ ມາຕຸຄາໂມ ກາຍສ຺ສ ເຠທາ ປຣໍ ມຣຓາ ສຸຄຕິໍ ສຄ຺ຄໍ ໂລກໍ ອຸປປຊ຺ຊຕີ’’ຕິ. ຕຕິຍໍ.

໔. ອມຈ຺ຉຣີສຸຕ຺ຕໍ

໒໙໗. ອມຈ຺ຉຣີ ຈ ໂຫຕິ, ປຎ຺ຎວາ ຈ ໂຫຕິ…ເປ…. ຈຕຸຕ຺ຖໍ.

໕. ອນຕິຈາຣີສຸຕ຺ຕໍ

໒໙໘. ອນຕິຈາຣີ ຈ ໂຫຕິ, ປຎ຺ຎວາ ຈ ໂຫຕິ…ເປ…. ປຎ຺ຈມໍ.

໖. ສຸສີລສຸຕ຺ຕໍ

໒໙໙. ສີລວາ ຈ ໂຫຕິ, ປຎ຺ຎວາ ຈ ໂຫຕິ…ເປ…. ຉຏ຺ຐໍ.

໗. ພຫຸສ຺ສຸຕສຸຕ຺ຕໍ

໓໐໐. ພຫຸສ຺ສຸໂຕ ຈ ໂຫຕິ, ປຎ຺ຎວາ ຈ ໂຫຕິ…ເປ…. ສຕ຺ຕມໍ.

໘. ອາຣທ຺ຘວີຣິຍສຸຕ຺ຕໍ

໓໐໑. ອາຣທ຺ຘວີຣິໂຍ ຈ ໂຫຕິ, ປຎ຺ຎວາ ຈ ໂຫຕິ…ເປ…. ອຏ຺ຐມໍ.

໙. ອຸປຏ຺ຐິຕສ຺ສຕິສຸຕ຺ຕໍ

໓໐໒. ‘‘ອຸປຏ຺ຐິຕສ຺ສຕິ ຈ ໂຫຕິ, ປຎ຺ຎວາ ຈ ໂຫຕິ – ອິເມຫິ ໂຂ, ອນຸຣຸທ຺ຘ, ປຎ຺ຈຫິ ຘມ຺ເມຫິ ສມນ຺ນາຄໂຕ ມາຕຸຄາໂມ ກາຍສ຺ສ ເຠທາ ປຣໍ ມຣຓາ ສຸຄຕິໍ ສຄ຺ຄໍ ໂລກໍ ອຸປປຊ຺ຊຕີ’’ຕິ. ນວມໍ.

ອິເມ ອຏ຺ຐ ສຸຕ຺ຕນ຺ຕສງ຺ເຂປາ.

໑໐. ປຎ຺ຈສີລສຸຕ຺ຕໍ

໓໐໓. ‘‘ປຎ຺ຈຫິ, ອນຸຣຸທ຺ຘ, ຘມ຺ເມຫິ ສມນ຺ນາຄໂຕ ມາຕຸຄາໂມ ກາຍສ຺ສ ເຠທາ ປຣໍ ມຣຓາ ສຸຄຕິໍ ສຄ຺ຄໍ ໂລກໍ ອຸປປຊ຺ຊຕິ. ກຕເມຫິ ປຎ຺ຈຫິ? ປາຓາຕິປາຕາ ປຏິວິຣໂຕ ຈ ໂຫຕິ, ອທິນ຺ນາທານາ ປຏິວິຣໂຕ ຈ ໂຫຕິ, ກາເມສຸມິຈ຺ຉາຈາຣາ ປຏິວິຣໂຕ ຈ ໂຫຕິ, ມຸສາວາທາ ປຏິວິຣໂຕ ຈ ໂຫຕິ, ສຸຣາເມຣຍມຊ຺ຊປ຺ປມາທຏ຺ຐານາ ປຏິວິຣໂຕ ຈ ໂຫຕິ – ອິເມຫິ ໂຂ, ອນຸຣຸທ຺ຘ, ປຎ຺ຈຫິ ຘມ຺ເມຫິ ສມນ຺ນາຄໂຕ ມາຕຸຄາໂມ ກາຍສ຺ສ ເຠທາ ປຣໍ ມຣຓາ ສຸຄຕິໍ ສຄ຺ຄໍ ໂລກໍ ອຸປປຊ຺ຊຕີ’’ຕິ. ທສມໍ.

ທຸຕິຍເປຍ຺ຍາລວຄ຺ໂຄ.

ຕສ຺ສຸທ຺ທານໍ –

ທຸຕິເຍ ຈ [ອນຸຣຸທ຺ໂຘ (ສພ຺ພຕ຺ຖ)] ອກ຺ໂກຘໂນ, ອນຸປນາຫີ ອນິສ຺ສຸກີ;

ອມຈ຺ຉຣີ ອນຕິຈາຣີ, ສີລວາ ຈ ພຫຸສ຺ສຸໂຕ;

ວີຣິຍໍ ສຕິ ສີລຎ຺ຈ, ສຸກ຺ກປກ຺ເຂ ປກາສິໂຕ.

໓. ພລວຄ຺ໂຄ

໑. ວິສາຣທສຸຕ຺ຕໍ

໓໐໔. ‘‘ປຎ຺ຈິມານິ, ຠິກ຺ຂເວ, ມາຕຸຄາມສ຺ສ ພລານິ. ກຕມານິ ປຎ຺ຈ? ຣູປພລໍ, ໂຠຄພລໍ, ຎາຕິພລໍ, ປຸຕ຺ຕພລໍ, ສີລພລໍ – ອິມານິ ໂຂ, ຠິກ຺ຂເວ, ປຎ຺ຈ ມາຕຸຄາມສ຺ສ ພລານິ. ອິເມຫິ ໂຂ, ຠິກ຺ຂເວ, ປຎ຺ຈຫິ ພເລຫິ ສມນ຺ນາຄໂຕ ມາຕຸຄາໂມ ວິສາຣໂທ ອຄາຣໍ ອຊ຺ຌາວສຕີ’’ຕິ. ປຐມໍ.

໒. ປສຍ຺ຫສຸຕ຺ຕໍ

໓໐໕. ‘‘ປຎ຺ຈິມານິ, ຠິກ຺ຂເວ, ມາຕຸຄາມສ຺ສ ພລານິ. ກຕມານິ ປຎ຺ຈ? ຣູປພລໍ, ໂຠຄພລໍ, ຎາຕິພລໍ, ປຸຕ຺ຕພລໍ, ສີລພລໍ – ອິມານິ ໂຂ, ຠິກ຺ຂເວ, ປຎ຺ຈ ມາຕຸຄາມສ຺ສ ພລານິ. ອິເມຫິ ໂຂ, ຠິກ຺ຂເວ, ປຎ຺ຈຫິ ພເລຫິ ສມນ຺ນາຄໂຕ ມາຕຸຄາໂມ ສາມິກໍ ປສຍ຺ຫ ອຄາຣໍ ອຊ຺ຌາວສຕີ’’ຕິ. ທຸຕິຍໍ.

໓. ອຠິຠຸຍ຺ຍສຸຕ຺ຕໍ

໓໐໖. ‘‘ປຎ຺ຈິມານິ, ຠິກ຺ຂເວ, ມາຕຸຄາມສ຺ສ ພລານິ. ກຕມານິ ປຎ຺ຈ? ຣູປພລໍ, ໂຠຄພລໍ, ຎາຕິພລໍ, ປຸຕ຺ຕພລໍ, ສີລພລໍ – ອິມານິ ໂຂ, ຠິກ຺ຂເວ, ປຎ຺ຈ ມາຕຸຄາມສ຺ສ ພລານິ. ອິເມຫິ ໂຂ, ຠິກ຺ຂເວ, ປຎ຺ຈຫິ ພເລຫິ ສມນ຺ນາຄໂຕ ມາຕຸຄາໂມ ສາມິກໍ ອຠິຠຸຍ຺ຍ ວຕ຺ຕຕີ’’ຕິ. ຕຕິຍໍ.

໔. ເອກສຸຕ຺ຕໍ

໓໐໗. ‘‘ເອເກນ ຈ ໂຂ, ຠິກ຺ຂເວ, ພເລນ ສມນ຺ນາຄໂຕ ປຸຣິໂສ ມາຕຸຄາມໍ ອຠິຠຸຍ຺ຍ ວຕ຺ຕຕິ. ກຕເມນ ເອເກນ ພເລນ? ອິສ຺ສຣິຍພເລນ ອຠິຠູຕໍ ມາຕຸຄາມໍ ເນວ ຣູປພລໍ ຕາຍຕິ, ນ ໂຠຄພລໍ ຕາຍຕິ, ນ ຎາຕິພລໍ ຕາຍຕິ, ນ ປຸຕ຺ຕພລໍ ຕາຍຕິ, ນ ສີລພລໍ ຕາຍຕີ’’ຕິ. ຈຕຸຕ຺ຖໍ.

໕. ອງ຺ຄສຸຕ຺ຕໍ

໓໐໘. ‘‘ປຎ຺ຈິມານິ, ຠິກ຺ຂເວ, ມາຕຸຄາມສ຺ສ ພລານິ. ກຕມານິ ປຎ຺ຈ? ຣູປພລໍ, ໂຠຄພລໍ, ຎາຕິພລໍ, ປຸຕ຺ຕພລໍ, ສີລພລໍ. ຣູປພເລນ ຈ, ຠິກ຺ຂເວ, ມາຕຸຄາໂມ ສມນ຺ນາຄໂຕ ໂຫຕິ, ນ ຈ ໂຠຄພເລນ – ເອວໍ ໂສ ເຕນງ຺ເຄນ ອປຣິປູໂຣ ໂຫຕິ. ຍໂຕ ຈ ໂຂ, ຠິກ຺ຂເວ, ມາຕຸຄາໂມ ຣູປພເລນ ຈ ສມນ຺ນາຄໂຕ ໂຫຕິ, ໂຠຄພເລນ ຈ – ເອວໍ ໂສ ເຕນງ຺ເຄນ ປຣິປູໂຣ ໂຫຕິ. ຣູປພເລນ ຈ, ຠິກ຺ຂເວ, ມາຕຸຄາໂມ ສມນ຺ນາຄໂຕ ໂຫຕິ, ໂຠຄພເລນ ຈ, ນ ຈ ຎາຕິພເລນ – ເອວໍ ໂສ ເຕນງ຺ເຄນ ອປຣິປູໂຣ ໂຫຕິ. ຍໂຕ ຈ ໂຂ, ຠິກ຺ຂເວ, ມາຕຸຄາໂມ ຣູປພເລນ ຈ ສມນ຺ນາຄໂຕ ໂຫຕິ, ໂຠຄພເລນ ຈ, ຎາຕິພເລນ ຈ – ເອວໍ ໂສ ເຕນງ຺ເຄນ ປຣິປູໂຣ ໂຫຕິ. ຣູປພເລນ ຈ, ຠິກ຺ຂເວ, ມາຕຸຄາໂມ ສມນ຺ນາຄໂຕ ໂຫຕິ, ໂຠຄພເລນ ຈ, ຎາຕິພເລນ ຈ, ນ ຈ ປຸຕ຺ຕພເລນ – ເອວໍ ໂສ ເຕນງ຺ເຄນ ອປຣິປູໂຣ ໂຫຕິ. ຍໂຕ ຈ ໂຂ, ຠິກ຺ຂເວ, ມາຕຸຄາໂມ ຣູປພເລນ ຈ ສມນ຺ນາຄໂຕ ໂຫຕິ, ໂຠຄພເລນ ຈ, ຎາຕິພເລນ ຈ, ປຸຕ຺ຕພເລນ ຈ – ເອວໍ ໂສ ເຕນງ຺ເຄນ ປຣິປູໂຣ ໂຫຕິ. ຣູປພເລນ ຈ, ຠິກ຺ຂເວ, ມາຕຸຄາໂມ ສມນ຺ນາຄໂຕ ໂຫຕິ, ໂຠຄພເລນ ຈ, ຎາຕິພເລນ ຈ, ປຸຕ຺ຕພເລນ ຈ, ນ ຈ ສີລພເລນ – ເອວໍ ໂສ ເຕນງ຺ເຄນ ອປຣິປູໂຣ ໂຫຕິ. ຍໂຕ ຈ ໂຂ, ຠິກ຺ຂເວ, ມາຕຸຄາໂມ ຣູປພເລນ ຈ ສມນ຺ນາຄໂຕ ໂຫຕິ, ໂຠຄພເລນ ຈ, ຎາຕິພເລນ ຈ, ປຸຕ຺ຕພເລນ ຈ, ສີລພເລນ ຈ – ເອວໍ ໂສ ເຕນງ຺ເຄນ ປຣິປູໂຣ ໂຫຕິ. ອິມານິ ໂຂ, ຠິກ຺ຂເວ, ປຎ຺ຈ ມາຕຸຄາມສ຺ສ ພລານີ’’ຕິ. ປຎ຺ຈມໍ.

໖. ນາເສນ຺ຕິສຸຕ຺ຕໍ

໓໐໙. ‘‘ປຎ຺ຈິມານິ, ຠິກ຺ຂເວ, ມາຕຸຄາມສ຺ສ ພລານິ. ກຕມານິ ປຎ຺ຈ? ຣູປພລໍ, ໂຠຄພລໍ, ຎາຕິພລໍ, ປຸຕ຺ຕພລໍ, ສີລພລໍ. ຣູປພເລນ ຈ, ຠິກ຺ຂເວ, ມາຕຸຄາໂມ ສມນ຺ນາຄໂຕ ໂຫຕິ, ນ ຈ ສີລພເລນ, ນາເສນ຺ເຕວ ນໍ, ກຸເລ ນ ວາເສນ຺ຕິ. ຣູປພເລນ ຈ, ຠິກ຺ຂເວ, ມາຕຸຄາໂມ ສມນ຺ນາຄໂຕ ໂຫຕິ, ໂຠຄພເລນ ຈ, ນ ຈ ສີລພເລນ, ນາເສນ຺ເຕວ ນໍ, ກຸເລ ນ ວາເສນ຺ຕິ. ຣູປພເລນ ຈ, ຠິກ຺ຂເວ, ມາຕຸຄາໂມ ສມນ຺ນາຄໂຕ ໂຫຕິ, ໂຠຄພເລນ ຈ, ຎາຕິພເລນ ຈ, ນ ຈ ສີລພເລນ, ນາເສນ຺ເຕວ ນໍ, ກຸເລ ນ ວາເສນ຺ຕິ. ຣູປພເລນ ຈ, ຠິກ຺ຂເວ, ມາຕຸຄາໂມ ສມນ຺ນາຄໂຕ ໂຫຕິ, ໂຠຄພເລນ ຈ, ຎາຕິພເລນ ຈ, ປຸຕ຺ຕພເລນ ຈ, ນ ຈ ສີລພເລນ, ນາເສນ຺ເຕວ ນໍ, ກຸເລ ນ ວາເສນ຺ຕິ. ສີລພເລນ ຈ, ຠິກ຺ຂເວ, ມາຕຸຄາໂມ ສມນ຺ນາຄໂຕ ໂຫຕິ, ນ ຈ ຣູປພເລນ, ວາເສນ຺ເຕວ ນໍ, ກຸເລ ນ ນາເສນ຺ຕິ. ສີລພເລນ ຈ, ຠິກ຺ຂເວ, ມາຕຸຄາໂມ ສມນ຺ນາຄໂຕ ໂຫຕິ, ນ ຈ ໂຠຄພເລນ, ວາເສນ຺ເຕວ ນໍ, ກຸເລ ນ ນາເສນ຺ຕິ. ສີລພເລນ ຈ, ຠິກ຺ຂເວ, ມາຕຸຄາໂມ ສມນ຺ນາຄໂຕ ໂຫຕິ, ນ ຈ ຎາຕິພເລນ, ວາເສນ຺ເຕວ ນໍ, ກຸເລ ນ ນາເສນ຺ຕິ. ສີລພເລນ ຈ, ຠິກ຺ຂເວ, ມາຕຸຄາໂມ ສມນ຺ນາຄໂຕ ໂຫຕິ, ນ ຈ ປຸຕ຺ຕພເລນ, ວາເສນ຺ເຕວ ນໍ, ກຸເລ ນ ນາເສນ຺ຕິ. ອິມານິ ໂຂ, ຠິກ຺ຂເວ, ປຎ຺ຈ ມາຕຸຄາມສ຺ສ ພລານີ’’ຕິ. ຉຏ຺ຐໍ.

໗. ເຫຕຸສຸຕ຺ຕໍ

໓໑໐. ‘‘ປຎ຺ຈິມານິ, ຠິກ຺ຂເວ, ມາຕຸຄາມສ຺ສ ພລານິ. ກຕມານິ ປຎ຺ຈ? ຣູປພລໍ, ໂຠຄພລໍ, ຎາຕິພລໍ, ປຸຕ຺ຕພລໍ, ສີລພລໍ. ນ, ຠິກ຺ຂເວ, ມາຕຸຄາໂມ ຣູປພລເຫຕຸ ວາ ໂຠຄພລເຫຕຸ ວາ ຎາຕິພລເຫຕຸ ວາ ປຸຕ຺ຕພລເຫຕຸ ວາ ກາຍສ຺ສ ເຠທາ ປຣໍ ມຣຓາ ສຸຄຕິໍ ສຄ຺ຄໍ ໂລກໍ ອຸປປຊ຺ຊຕິ. ສີລພລເຫຕຸ ໂຂ, ຠິກ຺ຂເວ, ມາຕຸຄາໂມ ກາຍສ຺ສ ເຠທາ ປຣໍ ມຣຓາ ສຸຄຕິໍ ສຄ຺ຄໍ ໂລກໍ ອຸປປຊ຺ຊຕິ. ອິມານິ ໂຂ, ຠິກ຺ຂເວ, ປຎ຺ຈ ມາຕຸຄາມສ຺ສ ພລານີ’’ຕິ. ສຕ຺ຕມໍ.

໘. ຐານສຸຕ຺ຕໍ

໓໑໑. ‘‘ປຎ຺ຈິມານິ, ຠິກ຺ຂເວ, ຐານານິ ທຸລ຺ລຠານິ ອກຕປຸຎ຺ເຎນ ມາຕຸຄາເມນ. ກຕມານິ ປຎ຺ຈ? ປຕິຣູເປ ກຸເລ ຊາເຍຍ຺ຍນ຺ຕິ – ອິທໍ, ຠິກ຺ຂເວ, ປຐມໍ ຐານໍ ທຸລ຺ລຠໍ ອກຕປຸຎ຺ເຎນ ມາຕຸຄາເມນ. ປຕິຣູເປ ກຸເລ ຊາຍິຕ຺ວາ ປຕິຣູປໍ ກຸລໍ ຄຈ຺ເຉຍ຺ຍນ຺ຕິ – ອິທໍ, ຠິກ຺ຂເວ, ທຸຕິຍໍ ຐານໍ ທຸລ຺ລຠໍ ອກຕປຸຎ຺ເຎນ ມາຕຸຄາເມນ. ປຕິຣູເປ ກຸເລ ຊາຍິຕ຺ວາ, ປຕິຣູປໍ ກຸລໍ ຄນ຺ຕ຺ວາ, ອສປຕ຺ຕິ ອຄາຣໍ ອຊ຺ຌາວເສຍ຺ຍນ຺ຕິ – ອິທໍ, ຠິກ຺ຂເວ, ຕຕິຍໍ ຐານໍ ທຸລ຺ລຠໍ ອກຕປຸຎ຺ເຎນ ມາຕຸຄາເມນ. ປຕິຣູເປ ກຸເລ ຊາຍິຕ຺ວາ, ປຕິຣູປໍ ກຸລໍ ຄນ຺ຕ຺ວາ, ອສປຕ຺ຕິ ອຄາຣໍ ອຊ຺ຌາວສນ຺ຕີ ປຸຕ຺ຕວຕີ ອສ຺ສນ຺ຕິ – ອິທໍ, ຠິກ຺ຂເວ, ຈຕຸຕ຺ຖໍ ຐານໍ ທຸລ຺ລຠໍ ອກຕປຸຎ຺ເຎນ ມາຕຸຄາເມນ. ປຕິຣູເປ ກຸເລ ຊາຍິຕ຺ວາ, ປຕິຣູປໍ ກຸລໍ ຄນ຺ຕ຺ວາ, ອສປຕ຺ຕິ ອຄາຣໍ ອຊ຺ຌາວສນ຺ຕີ ປຸຕ຺ຕວຕີ ສມານາ ສາມິກໍ ອຠິຠຸຍ຺ຍ ວຕ຺ເຕຍ຺ຍນ຺ຕິ – ອິທໍ, ຠິກ຺ຂເວ, ປຎ຺ຈມໍ ຐານໍ ທຸລ຺ລຠໍ ອກຕປຸຎ຺ເຎນ ມາຕຸຄາເມນ. ອິມານິ ໂຂ, ຠິກ຺ຂເວ, ປຎ຺ຈ ຐານານິ ທຸລ຺ລຠານິ ອກຕປຸຎ຺ເຎນ ມາຕຸຄາເມນາຕິ.

‘‘ປຎ຺ຈິມານິ, ຠິກ຺ຂເວ, ຐານານິ ສຸລຠານິ ກຕປຸຎ຺ເຎນ ມາຕຸຄາເມນ. ກຕມານິ ປຎ຺ຈ? ປຕິຣູເປ ກຸເລ ຊາເຍຍ຺ຍນ຺ຕິ – ອິທໍ, ຠິກ຺ຂເວ, ປຐມໍ ຐານໍ ສຸລຠໍ ກຕປຸຎ຺ເຎນ ມາຕຸຄາເມນ. ປຕິຣູເປ ກຸເລ ຊາຍິຕ຺ວາ ປຕິຣູປໍ ກຸລໍ ຄຈ຺ເຉຍ຺ຍນ຺ຕິ – ອິທໍ, ຠິກ຺ຂເວ, ທຸຕິຍໍ ຐານໍ ສຸລຠໍ ກຕປຸຎ຺ເຎນ ມາຕຸຄາເມນ. ປຕິຣູເປ ກຸເລ ຊາຍິຕ຺ວາ ປຕິຣູປໍ ກຸລໍ ຄນ຺ຕ຺ວາ ອສປຕ຺ຕິ ອຄາຣໍ ອຊ຺ຌາວເສຍ຺ຍນ຺ຕິ – ອິທໍ, ຠິກ຺ຂເວ, ຕຕິຍໍ ຐານໍ ສຸລຠໍ ກຕປຸຎ຺ເຎນ ມາຕຸຄາເມນ. ປຕິຣູເປ ກຸເລ ຊາຍິຕ຺ວາ ປຕິຣູປໍ ກຸລໍ ຄນ຺ຕ຺ວາ ອສປຕ຺ຕິ ອຄາຣໍ ອຊ຺ຌາວສນ຺ຕີ ປຸຕ຺ຕວຕີ ອສ຺ສນ຺ຕິ – ອິທໍ, ຠິກ຺ຂເວ, ຈຕຸຕ຺ຖໍ ຐານໍ ສຸລຠໍ ກຕປຸຎ຺ເຎນ ມາຕຸຄາເມນ. ປຕິຣູເປ ກຸເລ ຊາຍິຕ຺ວາ ປຕິຣູປໍ ກຸລໍ ຄນ຺ຕ຺ວາ ອສປຕ຺ຕິ ອຄາຣໍ ອຊ຺ຌາວສນ຺ຕີ ປຸຕ຺ຕວຕີ ສມານາ ສາມິກໍ ອຠິຠຸຍ຺ຍ ວຕ຺ເຕຍ຺ຍນ຺ຕິ – ອິທໍ, ຠິກ຺ຂເວ, ປຎ຺ຈມໍ ຐານໍ ສຸລຠໍ ກຕປຸຎ຺ເຎນ ມາຕຸຄາເມນ. ອິມານິ ໂຂ, ຠິກ຺ຂເວ, ປຎ຺ຈ ຐານານິ ສຸລຠານິ ກຕປຸຎ຺ເຎນ ມາຕຸຄາເມນາ’’ຕິ. ອຏ຺ຐມໍ.

໙. ປຎ຺ຈສີລວິສາຣທສຸຕ຺ຕໍ

໓໑໒. ‘‘ປຎ຺ຈຫິ, ຠິກ຺ຂເວ, ຘມ຺ເມຫິ ສມນ຺ນາຄໂຕ ມາຕຸຄາໂມ ວິສາຣໂທ ອຄາຣໍ ອຊ຺ຌາວສຕິ. ກຕເມຫິ ປຎ຺ຈຫິ? ປາຓາຕິປາຕາ ປຏິວິຣໂຕ ຈ ໂຫຕິ, ອທິນ຺ນາທານາ ປຏິວິຣໂຕ ຈ ໂຫຕິ, ກາເມສຸມິຈ຺ຉາຈາຣາ ປຏິວິຣໂຕ ຈ ໂຫຕິ, ມຸສາວາທາ ປຏິວິຣໂຕ ຈ ໂຫຕິ, ສຸຣາເມຣຍມຊ຺ຊປ຺ປມາທຏ຺ຐານາ ປຏິວິຣໂຕ ຈ ໂຫຕິ – ອິເມຫິ ໂຂ, ຠິກ຺ຂເວ, ປຎ຺ຈຫິ ຘມ຺ເມຫິ ສມນ຺ນາຄໂຕ ມາຕຸຄາໂມ ວິສາຣໂທ ອຄາຣໍ ອຊ຺ຌາວສຕີ’’ຕິ. ນວມໍ.

໑໐. ວຑ຺ຒີສຸຕ຺ຕໍ

໓໑໓. ‘‘ປຎ຺ຈຫິ, ຠິກ຺ຂເວ, ວຑ຺ຒີຫິ ວຑ຺ຒມານາ ອຣິຍສາວິກາ ອຣິຍາຍ ວຑ຺ຒິຍາ ວຑ຺ຒຕິ ສາຣາທາຍິນີ ຈ ໂຫຕິ ວຣາທາຍິນີ ຈ ກາຍສ຺ສ. ກຕເມຫິ ປຎ຺ຈຫິ? ສທ຺ຘາຍ ວຑ຺ຒຕິ, ສີເລນ ວຑ຺ຒຕິ, ສຸເຕນ ວຑ຺ຒຕິ, ຈາເຄນ ວຑ຺ຒຕິ, ປຎ຺ຎາຍ ວຑ຺ຒຕິ – ອິເມຫິ ໂຂ, ຠິກ຺ຂເວ, ປຎ຺ຈຫິ ວຑ຺ຒີຫິ ວຑ຺ຒມານາ ອຣິຍສາວິກາ ອຣິຍາຍ ວຑ຺ຒິຍາ ວຑ຺ຒຕິ, ສາຣາທາຍິນີ ຈ ໂຫຕິ, ວຣາທາຍິນີ ຈ ກາຍສ຺ສາ’’ຕິ.

‘‘ສທ຺ຘາຍ ສີເລນ ຈ ຍາຘ ວຑ຺ຒຕິ,

ປຎ຺ຎາຍ ຈາເຄນ ສຸເຕນ ຈູຠຍໍ;

ສາ ຕາທິສີ ສີລວຕີ ອຸປາສິກາ,

ອາທີຍຕິ ສາຣມິເຘວ ອຕ຺ຕໂນ’’ຕິ. ທສມໍ;

ພລວຄ຺ໂຄ ຕຕິໂຍ.

ຕສ຺ສຸທ຺ທານໍ –

ວິສາຣທາ ປສຍ຺ຫ ອຠິຠຸຍ຺ຍ, ເອກໍ ອງ຺ເຄນ ປຎ຺ຈມໍ;

ນາເສນ຺ຕິ ເຫຕຸ ຐານຎ຺ຈ, ວິສາຣໂທ ວຑ຺ຒິນາ ທສາຕິ.

ມາຕຸຄາມສໍຍຸຕ຺ຕໍ ສມຕ຺ຕໍ.