໘. ທຸຕິຍເອຊາສຸຕ຺ຕໍ

໙໑. ‘‘ເອຊາ, ຠິກ຺ຂເວ, ໂຣໂຄ, ເອຊາ ຄຓ຺ໂຑ, ເອຊາ ສລ຺ລໍ. ຕສ຺ມາຕິຫ, ຠິກ຺ຂເວ, ຕຖາຄໂຕ ອເນໂຊ ວິຫຣຕິ ວີຕສລ຺ໂລ. ຕສ຺ມາຕິຫ, ຠິກ຺ຂເວ, ຠິກ຺ຂຸ ເຈປິ ອາກງ຺ເຂຍ຺ຍ ‘ອເນໂຊ ວິຫເຣຍ຺ຍໍ ວີຕສລ຺ໂລ’ຕິ, ຈກ຺ຂຸໍ ນ ມຎ຺ເຎຍ຺ຍ, ຈກ຺ຂຸສ຺ມິໍ ນ ມຎ຺ເຎຍ຺ຍ, ຈກ຺ຂຸໂຕ ນ ມຎ຺ເຎຍ຺ຍ, ຈກ຺ຂຸ ເມຕິ ນ ມຎ຺ເຎຍ຺ຍ; ຣູເປ ນ ມຎ຺ເຎຍ຺ຍ… ຈກ຺ຂຸວິຎ຺ຎາຓໍ… ຈກ຺ຂຸສມ຺ຜສ຺ສໍ… ຍມ຺ປິທໍ ຈກ຺ຂຸສມ຺ຜສ຺ສປຈ຺ຈຍາ ອຸປ຺ປຊ຺ຊຕິ ເວທຍິຕໍ ສຸຂໍ ວາ ທຸກ຺ຂໍ ວາ ອທຸກ຺ຂມສຸຂໍ ວາ ຕມ຺ປິ ນ ມຎ຺ເຎຍ຺ຍ, ຕສ຺ມິມ຺ປິ ນ ມຎ຺ເຎຍ຺ຍ, ຕໂຕປິ ນ ມຎ຺ເຎຍ຺ຍ, ຕໍ ເມຕິ ນ ມຎ຺ເຎຍ຺ຍ. ຍຎ຺ຫິ, ຠິກ຺ຂເວ, ມຎ຺ຎຕິ, ຍສ຺ມິໍ ມຎ຺ຎຕິ, ຍໂຕ ມຎ຺ຎຕິ, ຍໍ ເມຕິ ມຎ຺ຎຕິ, ຕໂຕ ຕໍ ໂຫຕິ ອຎ຺ຎຖາ. ອຎ຺ຎຖາຠາວີ ຠວສຕ຺ໂຕ ໂລໂກ ຠວເມວ ອຠິນນ຺ທຕິ…ເປ….

‘‘ຊິວ຺ຫໍ ນ ມຎ຺ເຎຍ຺ຍ, ຊິວ຺ຫາຍ ນ ມຎ຺ເຎຍ຺ຍ, ຊິວ຺ຫາໂຕ ນ ມຎ຺ເຎຍ຺ຍ, ຊິວ຺ຫາ ເມຕິ ນ ມຎ຺ເຎຍ຺ຍ; ຣເສ ນ ມຎ຺ເຎຍ຺ຍ… ຊິວ຺ຫາວິຎ຺ຎາຓໍ… ຊິວ຺ຫາສມ຺ຜສ຺ສໍ… ຍມ຺ປິທໍ ຊິວ຺ຫາສມ຺ຜສ຺ສປຈ຺ຈຍາ ອຸປ຺ປຊ຺ຊຕິ ເວທຍິຕໍ ສຸຂໍ ວາ ທຸກ຺ຂໍ ວາ ອທຸກ຺ຂມສຸຂໍ ວາ ຕມ຺ປິ ນ ມຎ຺ເຎຍ຺ຍ, ຕສ຺ມິມ຺ປິ ນ ມຎ຺ເຎຍ຺ຍ, ຕໂຕປິ ນ ມຎ຺ເຎຍ຺ຍ, ຕໍ ເມຕິ ນ ມຎ຺ເຎຍ຺ຍ. ຍຎ຺ຫິ, ຠິກ຺ຂເວ, ມຎ຺ຎຕິ, ຍສ຺ມິໍ ມຎ຺ຎຕິ, ຍໂຕ ມຎ຺ຎຕິ, ຍໍ ເມຕິ ມຎ຺ຎຕິ, ຕໂຕ ຕໍ ໂຫຕິ ອຎ຺ຎຖາ. ອຎ຺ຎຖາຠາວີ ຠວສຕ຺ໂຕ ໂລໂກ ຠວເມວ ອຠິນນ຺ທຕິ…ເປ….

‘‘ມນໍ ນ ມຎ຺ເຎຍ຺ຍ, ມນສ຺ມິໍ ນ ມຎ຺ເຎຍ຺ຍ, ມນໂຕ ນ ມຎ຺ເຎຍ຺ຍ, ມໂນ ເມຕິ ນ ມຎ຺ເຎຍ຺ຍ… ມໂນວິຎ຺ຎາຓໍ… ມໂນສມ຺ຜສ຺ສໍ… ຍມ຺ປິທໍ ມໂນສມ຺ຜສ຺ສປຈ຺ຈຍາ ອຸປ຺ປຊ຺ຊຕິ ເວທຍິຕໍ ສຸຂໍ ວາ ທຸກ຺ຂໍ ວາ ອທຸກ຺ຂມສຸຂໍ ວາ ຕມ຺ປິ ນ ມຎ຺ເຎຍ຺ຍ, ຕສ຺ມິມ຺ປິ ນ ມຎ຺ເຎຍ຺ຍ, ຕໂຕປິ ນ ມຎ຺ເຎຍ຺ຍ, ຕໍ ເມຕິ ນ ມຎ຺ເຎຍ຺ຍ. ຍຎ຺ຫິ, ຠິກ຺ຂເວ, ມຎ຺ຎຕິ, ຍສ຺ມິໍ ມຎ຺ຎຕິ, ຍໂຕ ມຎ຺ຎຕິ, ຍໍ ເມຕິ ມຎ຺ຎຕິ, ຕໂຕ ຕໍ ໂຫຕິ ອຎ຺ຎຖາ. ອຎ຺ຎຖາຠາວີ ຠວສຕ຺ໂຕ ໂລໂກ ຠວເມວ ອຠິນນ຺ທຕິ.

‘‘ຍາວຕາ, ຠິກ຺ຂເວ, ຂນ຺ຘຘາຕຸອາຍຕນາ ຕມ຺ປິ ນ ມຎ຺ເຎຍ຺ຍ, ຕສ຺ມິມ຺ປິ ນ ມຎ຺ເຎຍ຺ຍ, ຕໂຕປິ ນ ມຎ຺ເຎຍ຺ຍ, ຕໍ ເມຕິ ນ ມຎ຺ເຎຍ຺ຍ. ໂສ ເອວໍ ອມຎ຺ຎມາໂນ ນ ກິຎ຺ຈິ ໂລເກ ອຸປາທິຍຕິ. ອນຸປາທິຍໍ ນ ປຣິຕສ຺ສຕິ. ອປຣິຕສ຺ສໍ ປຈ຺ຈຕ຺ຕຎ຺ເຎວ ປຣິນິພ຺ພາຍຕິ. ‘ຂີຓາ ຊາຕິ, ວຸສິຕໍ ພ຺ຣຫ຺ມຈຣິຍໍ, ກຕໍ ກຣຓີຍໍ, ນາປຣໍ ອິຕ຺ຖຕ຺ຕາຍາ’ຕິ ປຊານາຕີ’’ຕິ. ອຏ຺ຐມໍ.