໓. ປຐມສມິທ຺ຘິມາຣປຎ຺ຫາສຸຕ຺ຕໍ

໖໕. ເອກໍ ສມຍໍ ຠຄວາ ຣາຊຄເຫ ວິຫຣຕິ ເວຬຸວເນ ກລນ຺ທກນິວາເປ. ອຖ ໂຂ ອາຍສ຺ມາ ສມິທ຺ຘິ ເຍນ ຠຄວາ…ເປ… ຠຄວນ຺ຕໍ ເອຕທໂວຈ – ‘‘‘ມາໂຣ, ມາໂຣ’ຕິ, ຠນ຺ເຕ, ວຸຈ຺ຈຕິ. ກິຕ຺ຕາວຕາ ນຸ ໂຂ, ຠນ຺ເຕ, ມາໂຣ ວາ ອສ຺ສ ມາຣປຎ຺ຎຕ຺ຕິ ວາ’’ຕິ?

‘‘ຍຕ຺ຖ ໂຂ, ສມິທ຺ຘິ, ອຕ຺ຖິ ຈກ຺ຂຸ, ອຕ຺ຖິ ຣູປາ, ອຕ຺ຖິ ຈກ຺ຂຸວິຎ຺ຎາຓໍ, ອຕ຺ຖິ ຈກ຺ຂຸວິຎ຺ຎາຓວິຎ຺ຎາຕພ຺ພາ ຘມ຺ມາ, ອຕ຺ຖິ ຕຕ຺ຖ ມາໂຣ ວາ ມາຣປຎ຺ຎຕ຺ຕິ ວາ. ອຕ຺ຖິ ໂສຕໍ, ອຕ຺ຖິ ສທ຺ທາ, ອຕ຺ຖິ ໂສຕວິຎ຺ຎາຓໍ, ອຕ຺ຖິ ໂສຕວິຎ຺ຎາຓວິຎ຺ຎາຕພ຺ພາ ຘມ຺ມາ, ອຕ຺ຖິ ຕຕ຺ຖ ມາໂຣ ວາ ມາຣປຎ຺ຎຕ຺ຕິ ວາ. ອຕ຺ຖິ ຆານໍ, ອຕ຺ຖິ ຄນ຺ຘາ, ອຕ຺ຖິ ຆານວິຎ຺ຎາຓໍ, ອຕ຺ຖິ ຆານວິຎ຺ຎາຓວິຎ຺ຎາຕພ຺ພາ ຘມ຺ມາ, ອຕ຺ຖິ ຕຕ຺ຖ ມາໂຣ ວາ ມາຣປຎ຺ຎຕ຺ຕິ ວາ. ອຕ຺ຖິ ຊິວ຺ຫາ, ອຕ຺ຖິ ຣສາ, ອຕ຺ຖິ ຊິວ຺ຫາວິຎ຺ຎາຓໍ, ອຕ຺ຖິ ຊິວ຺ຫາວິຎ຺ຎາຓວິຎ຺ຎາຕພ຺ພາ ຘມ຺ມາ, ອຕ຺ຖິ ຕຕ຺ຖ ມາໂຣ ວາ ມາຣປຎ຺ຎຕ຺ຕິ ວາ. ອຕ຺ຖິ ກາໂຍ, ອຕ຺ຖິ ໂຜຏ຺ຐພ຺ພາ, ອຕ຺ຖິ ກາຍວິຎ຺ຎາຓໍ, ອຕ຺ຖິ ກາຍວິຎ຺ຎາຓວິຎ຺ຎາຕພ຺ພາ ຘມ຺ມາ, ອຕ຺ຖິ ຕຕ຺ຖ ມາໂຣ ວາ ມາຣປຎ຺ຎຕ຺ຕິ ວາ. ອຕ຺ຖິ ມໂນ, ອຕ຺ຖິ ຘມ຺ມາ, ອຕ຺ຖິ ມໂນວິຎ຺ຎາຓໍ, ອຕ຺ຖິ ມໂນວິຎ຺ຎາຓວິຎ຺ຎາຕພ຺ພາ ຘມ຺ມາ, ອຕ຺ຖິ ຕຕ຺ຖ ມາໂຣ ວາ ມາຣປຎ຺ຎຕ຺ຕິ ວາ.

‘‘ຍຕ຺ຖ ຈ ໂຂ, ສມິທ຺ຘິ, ນຕ຺ຖິ ຈກ຺ຂຸ, ນຕ຺ຖິ ຣູປາ, ນຕ຺ຖິ ຈກ຺ຂຸວິຎ຺ຎາຓໍ, ນຕ຺ຖິ ຈກ຺ຂຸວິຎ຺ຎາຓວິຎ຺ຎາຕພ຺ພາ ຘມ຺ມາ, ນຕ຺ຖິ ຕຕ຺ຖ ມາໂຣ ວາ ມາຣປຎ຺ຎຕ຺ຕິ ວາ. ນຕ຺ຖິ ໂສຕໍ…ເປ… ນຕ຺ຖິ ຆານໍ…ເປ… ນຕ຺ຖິ ຊິວ຺ຫາ, ນຕ຺ຖິ ຣສາ, ນຕ຺ຖິ ຊິວ຺ຫາວິຎ຺ຎາຓໍ, ນຕ຺ຖິ ຊິວ຺ຫາວິຎ຺ຎາຓວິຎ຺ຎາຕພ຺ພາ ຘມ຺ມາ, ນຕ຺ຖິ ຕຕ຺ຖ ມາໂຣ ວາ ມາຣປຎ຺ຎຕ຺ຕິ ວາ. ນຕ຺ຖິ ກາໂຍ…ເປ…. ນຕ຺ຖິ ມໂນ, ນຕ຺ຖິ ຘມ຺ມາ, ນຕ຺ຖິ ມໂນວິຎ຺ຎາຓໍ, ນຕ຺ຖິ ມໂນວິຎ຺ຎາຓວິຎ຺ຎາຕພ຺ພາ ຘມ຺ມາ, ນຕ຺ຖິ ຕຕ຺ຖ ມາໂຣ ວາ ມາຣປຎ຺ຎຕ຺ຕິ ວາ’’ຕິ. ຕຕິຍໍ.